Tē-kiû

Kiàn-ha̍k Kó͘-chá lâng teh siūⁿ lán chit ê sè-kài ū kúi nā khoán, taⁿ kı̀ chı̍t nn̄g hāng chiū hó. Ū-ê kóng, lán só͘ khiā-khí ê tē, chhin-chhiūⁿ hái-sū phû tı̄ chúi-bı̄n, sı̀-ûi lóng sı̄ chúi, tē-hêng khui-khiok. Só͘ pâi-lia̍t chiah ê hái-sū chō-chò hok-khı̀ ê hái-sū. Tiàm hia khiā-khí ê lâng, ū ke̍k toā-hàn ê lâng, iā ū ke̍k-sè-hàn ê lâng. Ū lú-jı̂n kok, toā-hı̄ kok, chhng heng-khám ê kok, koh ū kúi-koài tı̄ hia. Che sı̄ Se-iûⁿ ê su-sióng; Tang-iûⁿ iû-goân ū kap che tāi-tông siáu-ı̄ⁿ. Ìn-tō͘ lâng kóng, tē ū 12 ki thiāu thuh-teh, chiah bē lap-lo̍h--khı̀. Hu̍t- kàu ê lâng, chiū ēng án-ni lâi khǹg lâng tio̍h chò hó. Lâng nā chò hó, bô ià-siān, thiāu chiū le̍k-koè kú-kú, bē hiú-noā. Lâng nā chò m̄-hó, tē ê thiāu teh-beh tó, tùi chı̍t-lâng hō͘ chèng-lâng siū chai-hō, án-ni kiám thang? Chú-āu 700 goā nı̂, ū chı̍t ê chhut-miâ ê tha̍k-chheh lâng, miâ Phí-tek, kóng, lán só͘ khiā-khí ê tē, hêng chhin- chhiūⁿ ke-nn̄g; tiàm tı̄ thiⁿ tē ê tiong- kan, chhin-chhiūⁿ ke-nn̄g jı̂n. Chiu-ûi lóng-sı̄ chúi, chhin-chhiūⁿ ke-nn̄g chheng. Khàm khong-khı̀, chhin-chhiūⁿ nn̄g-phoê. Í-goā ná chún hoé pau-teh, chhin- chhiūⁿ nn̄g-khak. Tē tiàm tiong-ng, sı̀-hng ê ap-la̍t lóng kui tı̄ tē. Chit lâng só͘ phah-sǹg, kap lán khah sio-oá. Tē-kiû sı̍t-chāi sı̄ ı̂ⁿ; ū chèng-kù: 1.Hiān-sı̂ lâng teh se̍h tē-kiû, put-lūn tùi tó-ūi khí-sin, nā tı̍t-tı̍t ǹg tang lâi chı̀n, á-sı̄ tiāⁿ-tiāⁿ ǹg sai teh khı̀, kàu boé ē tò-tńg lâi goân-ūi. 2.Lâng tı̄ hái-kı̂ⁿ khoàⁿ chûn teh lâi, tāi-seng khoàⁿ tio̍h chûn-boé, chiām- chiām khoàⁿ tio̍h chûn sin. Che, thang chai tē-bı̄n, sı̄ khiau-ku ê hêng. 3.Lâng chē chûn, tiàm hái-tiong, chí-ū khoàⁿ-tio̍h chúi kap thiⁿ sı̄ chı̍t-sek. Hut-jiân khoàⁿ-kı̀ⁿ chhiⁿ-sek ê soaⁿ-chiam tı̄ chèng-bı̄n, chai lı̄-khui lio̍k-tē bô loā-hn̄g. Āu-lâi chiām kı̄n, lio̍k-tē tı̍t-tı̍t hiān. Che sı̄ in-ūi tē-hêng sı̄ ı̂ⁿ. 4.Lâng khoàⁿ sit-goe̍h, goe̍h-lāi ê o͘-iáⁿ, sı̄ ı̂ⁿ-hêng. Chiū-sı̄ tē-kiû hō͘ jı̍t- thâu chiò, i ê iáⁿ keng-koè goe̍h-bı̄n. Iáⁿ nā ı̂ⁿ, hêng iā sı̄ ı̂ⁿ. 5.Chhâ-mn̄g lâng khui ūn-hô, á-sı̄ chhòng hoé-chhia lō͘, nā ū chı̍t Eng-lí ê tn̂g, koân kē ū cheng-chha 8 chhùn, che sı̄ ha̍p tı̄ tē-thé ê hêng. Án-ni, chı̍t lâng nā 6 Eng-chhioh koân, kiâⁿ kàu 9 Eng-lí; chiū bô khoàⁿ-kı̀ⁿ. (Tâi-oân Kàu-hoē Kong-pò tē 706 hō, 1947 nı̂ 10 ge̍h)