Tı̄m-kiuⁿ-bah

Choè-kı̄n tú-á thiⁿ-khı̀ chin bô ún-tēng, liam-mi-á joa̍h, liam-mi-á koâⁿ, chá-àm khı̀-un piàn-hoà chin toā, ū bē chió lâng tō án-ne khı̀ kám--tio̍h koâⁿ--tio̍h-a, che kám--tio̍h siōng kiaⁿ siáⁿ? Bô m̄ tio̍h, sı̄「sàu」! Sàu tō m̄-thang thoa, poàⁿ-mı̂ ná khùn ná sàu, ka-tı̄ kan-khó͘, chhù--nih ê lâng thiaⁿ--tio̍h mā sim-sng. Kā lí siāu-kài 1-bı̄ “tı̄m-kiuⁿ-bah”, pó-chèng chia̍h liáu chí-sàu kò͘-hı̀-kńg, koh ē-tàng pó͘-chhiong thé-la̍t. Tāi-seng, khı̀ chhı̄-á bé koá sam-chân kap kiuⁿ-bó, 2-hāng lóng kā chhiat-phı̀ⁿ, khǹg tı̄ oáⁿ-kong lāi, khǹg ê sı̂-chūn ài 1-chân bah thia̍p 1-chân kiuⁿ, án-ne bah-chiap chiah ē ū kiuⁿ ê hiam-bı̄, chhòng hó liáu-āu kā hē lo̍h tiān-oe, oáⁿ-kong téng koh khàm 1-tè poâⁿ-á, goā-oe khǹg chha-put-to 1-kóng chúi, oáⁿ--nih kap lāi-oe lóng bián, tán tiān-oe phiak--khí-lâi, chin-chiàⁿ sı̄ phang-kòng-kòng koh kòng-kòng-phang, kan-taⁿ he kiuⁿ-bó ê bı̄, tō hō͘ lí that phı̄ⁿ-khang--a, koāⁿ sûi tō chhèng--chhut-lâi, m̄-thang kò͘ chia̍h bah, siōng tiōng-iàu sı̄ kiuⁿ-bó kap bah piak--chhut-lâi ê bah-chiap, tō sı̄ leh kò͘ hı̀-kńg--ê-lah! Chia̍h chit-bı̄ tı̄m-kiuⁿ-bah, bı̂n-á-chài ê khùi-la̍t, kin-á-jı̍t tō kā lí chhoân-piān-piān! (TGB Thong-sı̀n tē 31 kı̂, 2002 nı̂ 4 goe̍h)