Tio̍h chiàu-kò͘ sin-thé
Ga̍k-chèng Chú-chhun beh lo̍h in tiâⁿ-nı̍h ê gı̂m-kı̂ⁿ-á, ta̍h m̄ tú hó, sit-gō͘ siong-tio̍h ka-kı̄ ê kha-kut. Kàu í-keng i-hó kúi-nā jı̍t lah, iáu bô chhut-khı̀ kiâⁿ; bı̄n-nı̍h ū chin m̄ hoaⁿ-hí ê khoán. I ê ha̍k-seng chiū mn̄g i kóng, Sian-siⁿ in-ūi sit-gō͘ siong-tio̍h kha, taⁿ í-keng hó chiah kú lah, iáu m̄-bat chhut mn̂g, koh chin hoân-ló ê khoán, m̄ chai sı̄ sím-mı̍h iân-kò͘? Ga̍k-chèng Chú-chhun ı̀n i kóng, Lín án-ni mn̄g kài hó; nā m̄-bat tio̍h kā in kóng. In-ūi goá bat thiaⁿ-kı̀ⁿ Cheng-chú teh kóng, kóng i siū Khóng-chú ê kà-sı̄, seh-tio̍h pē-bú hō͘ lán oân-choân ê sin-thé, lán iā tio̍h oân-choân lâi hêng i, m̄-thang siong-hāi-tio̍h seng-khu, iā m̄-thang sún-sit hêng-hâi, chiah thang kiò choè sı̄ hàu-chú. Kun-chú ê lâng m̄ káⁿ chı̍t ba̍k-nih kú pàng boē kı̀-tit chit kù ê kà-sı̄; só͘-í goá chiah chin hoân-ló. Án-ni khó-kiàn sin-thé m̄ sı̄ lán sai-khia ê, sǹg sı̄ pē-bú ê.
Taⁿ siⁿ lán ê sin-thé kap iúⁿ chhı̄ lán ê, sǹg sı̄ pē-bú; siúⁿ-sù lán ê lêng-hûn ê, chiū-sı̄ thiⁿ Pē. Sin-thé pí-phēng lêng-hûn, chū-jiân sı̄ lêng-hûn khah tùi-tiōng; pē-bú pí-phēng thiⁿ Pē, chū jiân sı̄ thiⁿ Pē khah chun-kùi. Sèng-keng ū kóng, Lâng ê sin-thé sı̄ Siōng-tè ê tiān, Lâng nā sún-hāi sin thé, chiū-sı̄ sún-hāi Siōng-tè ê tiān, hit ê choē chū-jiân koh khah tāng. M̄-kú sè-kan lâng ū ê ài khai, ài hoā, chia̍h a phiàn, hèng poa̍h kiáu, lâi sńg-hāi in ê sin-thé kap cheng-sı̂n, sı̄m-chı̀ choè chhut pháiⁿ tāi, lâi hoān-tio̍h kok hoat, chiong sin thé khı̀ siū hêng-hoa̍t. M̄-nā lêng jio̍k tio̍h pē-bú hō͘ lán ê sin-thé, boē chheng-choè ū-hàu tit, iā sún-hāi-tio̍h Siōng-tè ê tiān, hit hō choē koh khah chhim, koh khah tāng. Chiàu án-ni khoàⁿ, lán sè-kan lâng thái thang khoàⁿ-khin lán ê seng-khu leh?
Kè-sit tio̍h kín koé
Bēng-chú ê chheh kóng, Bat ū chı̍t ê lâng, in chhù-piⁿ ê koe nā lâi in tau, i chiū kā i lia̍h-khí-lâi thâi. Nā ta̍k jı̍t khoàⁿ-kı̀ⁿ, i iā ta̍k jı̍t kā i lia̍h-khí-lâi. bô koh pàng hō͘ i chhut-khı̀. Āu-lâi ū lâng kā i kóng, Pêng-iú ah, lí ta̍k jı̍t lia̍h lín chhù-piⁿ ê koe, sı̍t-chāi sı̄ boē ēng tit, chhiáⁿ lí tio̍h kín-kín kái-kò. Hit ê lâng ı̀n kóng, Lia̍h lâng ê koe, goá kú-kú chiū chai sı̄ boē án-ni choè tit. Taⁿ í-keng siū lí ê hó kà-sı̄, kam-goān tùi taⁿ kái-kò, āu kè chı̍t ge̍h-jı̍t chiah lia̍h chı̍t chiah chiū hó; tán-hāu mê-nı̂ khí, chiah lóng bo̍h-tit lia̍h.
Hiān-sı̂ iā ū chin choē lâng, í-keng chai chia̍h a-phiàn ài lim-chiú, í-kı̍p phiâu tó͘ hit hō tāi-chı̀, lóng sı̄ bô chiàu tō-lí. Nā tú-tio̍h ū lâng khó͘-khǹg in, in chiū ı̀n kóng, Goá khoaⁿ-á-sı̄ to beh koé. Iā ū kóng, Goá āu-ge̍h chiū beh koé, ū ê kóng, mê nı̂ goá chiū beh kā i tû-khı̀. Che chin-chiàⁿ sı̄ ka-kı̄ phiàn ka-kı̄; kı̀-jiân chai sı̄ bô chiàu tō-lí, chiū tio̍h liâm-piⁿ koé-pı̀ⁿ; beh thài tio̍h thèng-hāu mê-nı̂ á sı̄ tı̄-sı̄ leh? Khóng-chú kóng, Ū kè-sit chiū m̄-thang pı̂n-toāⁿ koé, chiū-sı̄ teh kóng chit khoán ê lâng.
Hô͘-hūn bóng kè
Chê soan-ông ài thiaⁿ û ê ga̍k-khı̀, (chhin-chhiūⁿ tōng-siau), ta̍k-pái teh pûn ê sı̂-chūn, tio̍h saⁿ pah lâng choè chı̍t-ē lâi pûn. Tong-sı̂ ū chı̍t ê Lâm-kok ê sian-siⁿ lâi kı̀ⁿ Soan-ông, chhéng beh jı̍p chit ê pûn û ê chit-hūn. soan-ông put-chí hoaⁿ-hí, ta̍k ge̍h-jı̍t iā sù chin choē ê hōng-lo̍k, kàu-gia̍h thang iúⁿ-chhı̄ kúi-nā pah lâng. Āu-lâi soan-ông sí-khı̀, Bín-ông chiap-khí-lâi chē ūi; iā iû-goân chin ài thiaⁿ û ê ga̍k-khı̀. Chóng-sı̄ Bín-ông m̄-ài hiah choē lâng saⁿ-kap pûn, i ài sûi lâng chı̍t-ê chı̍t-ê pûn hō͘ i thiaⁿ. Hit ê Lâm-kok sian-siⁿ thiaⁿ-kı̀ⁿ chit hō siau-sit, chiū thàn chá choè i tô-cháu khı̀ liáu.
Chiàu án-ni khoàⁿ, chit ê Lâm-kok sian-siⁿ, goân-pún sı̄ chı̍t-tiám-á pûn û ê pún-sū to bô. In-ūi khoàⁿ-kı̀ⁿ Soan-ông hoaⁿ-hí thiaⁿ saⁿ pah lâng choè chı̍t choê pûn, lia̍h choè che sı̄ chin hó ê ki-hoē, oē-thang ká-mō͘ kap in hô͘-hūn chāi-lāi; ka-kı̄ pûn liáu hó thiaⁿ á sı̄ m̄ hó thiaⁿ, phah-sǹg Soan-ông iā thiaⁿ boē chhut. Āu-lâi Bín-ông iū ài beh sûi lâng chı̍t-ê chı̍t-ê lâi pûn, án-ni chiū chı̍t-tiám-á kiàn-siàu to boē khàm-tit, boē bián-tit tio̍h tng-bı̄n làu-khùi; só͘-í put-tek-put tio̍h tāi-seng tó-cháu. Khó-sioh sè-kan chhin-chhiūⁿ chit ê Lâm-kok sian-siⁿ ê lâng sı̄ chin choē; bô lūn sı̄ choè koaⁿ, á-sı̄ kà o̍h, í-kı̍p choè thoân-tō ê, éng-éng ū chit téng hō ê lâng; chí-ū chai hô͘-hūn lâi that-gia̍h, choè tāi-chı̀ ló-ló chhó-chhó chiū kā i kè khı̀, siūⁿ thang tô͘-bô͘ hit sı̂ ê hōng-lo̍k, tek-khak bô siūⁿ ka-kı̄ ê pún-sū cháiⁿ-iūⁿ, iā bô siūⁿ-kàu tāi chı̀ ê sèng-pāi sı̄ chái-iūⁿ; lâi tı̀-kàu siong thian hāi lí, gō͘ lâng ê toā sū. Lóng bô siūⁿ kàu āu-lâi tek-khak ū chı̍t ê jı̍t-kı̂, chiong ta̍k lâng só͘ choè ê kang, iā beh chı̍t-ê chı̍t-ê tng bı̄n kā i chhı̀, lâi tiāⁿ-tio̍h in ê siúⁿ-hoa̍t. Kàu hit sı̂ khiok bô só͘-chāi thang khı̀ tô-siám, m̄-sı̄ chhin-chhiūⁿ hit ê Lâm-kok sian-siⁿ, cháu-lı̄ chiū oē soah tit.
M̄-thang lōng hiám
Chong-chú ū kóng, Ū chı̍t ê sòng-hiong lâng, kan-ta khò chit chhio̍h-á teh tō͘ oa̍h. Ū chı̍t jı̍t i ê kiáⁿ chhàng chúi bı̄ jı̍p hái toé chin chhim, tit-tio̍h chı̍t lia̍p chin-chu, ta̍t ū káng chheng gûn ê kè-chı̂ⁿ. In lāu-pē chı̍t-ē khoàⁿ-kı̀ⁿ, kiaⁿ-liáu i ê kiáⁿ tham-sim koh khı̀ chhē, chiū the̍h chio̍h-thâu kā i tok hō͘ phoà; chiah kóng, Che ta̍t káng chheng gûn ê chu, ún-tàng sı̄ chin chhim ê hái-toé, lê-lêng ām-kún-ē ê; lí tit-tio̍h chit ê chu, liōng-pit sı̄ in-ūi lê-lêng teh khùn; nā-sı̄ cheng-sı̂n ê sı̂, tek-khak sı̄ bô sı̀ⁿ-miā.
Lūn kàu sè-kan chiú sek châi khı̀, bô kóng chı̍t pái chiū oē hāi Lâng. Sio̍k-gú kóng, Chiú put chùi jı̂n, jı̂n chū chùi; sek put bê jı̂n, jı̂n chū bê. Chhin-chhiūⁿ chia̍h a-phiàn, bô kóng chı̍t poàⁿ pái chiū oē tiâu; tāi-seng chia̍h-liáu chhù-bı̄ chhù-bı̄, ū chia̍h iā án-ni, bô chia̍h iā án-ni. Ná chia̍h ná kú, ó hò! bô chia̍h boē-ēng-tit lah. Iā nā án-ni chai thang kiu-kha, koáⁿ-kín lâi koé iā hó; m̄-kú lóng sı̄ jú chia̍h jú toā, ná kú giàn ná tāng, chió-chió oē chhin-chhiūⁿ hit ê lāu lâng ê koat-sim.
Iā koh chhin-chhiūⁿ poa̍h-kiáu lâng, iā sı̄ án-ni. Ū sı̂ tiâu-kò͘-ı̀ tàu lâng lâi choè kiáu-bê, tāi-seng poa̍h sió khoá ê sı̂, tiâu-tı̂ pàng hō͘ i iâⁿ; i chiū lia̍h choè ka-kı̄ chin gâu poa̍h, sim-koaⁿ ná toā, siūⁿ beh iâⁿ khah choē. Hit sı̂ in chiū ēng hoat-tō͘ lâi kā i; ia̍h chı̍t-ē su, tı̍t-tı̍t siūⁿ beh phı̂ⁿ, ná phı̂ⁿ ná giâ ı̂ⁿ. Sim kông sò jia̍t, chèng-keng sū pàng-sak liáu-liáu; mı̂-jı̍t chı̀m-chù teh poa̍h; bú-lōng kàu kheng-ka tōng sán, liân sı̀ⁿ-miā ū sı̂ soà bô-khı̀. Taⁿ chit ê lāu lâng ê só͘ choè, sı̄ kiaⁿ i ê hāu-siⁿ, chı̍t pái ū choán-chia̍h; āu kè koh khı̀ choè, tio̍h pı̀ⁿ kàu bô pan-gı̂ chiah soah bé. Só͘-í chiong hit lia̍p chu tok hō͘ phoà, hō͘ i ê kiáⁿ oē sí sim, boē koh khı̀ choè.
Sı̂n iā ū kok.
Chê kok ēng peng kong-phah Ló͘ kok, ài beh tit-tio̍h Ló͘ kok ê gı̂m-tiáⁿ. Ló͘ kok ê peng tòng boē tiâu, chiū kah lâng chù chı̍t ê ké ê tiáⁿ, sàng khı̀ Chê kok. Chê hô͘ khoàⁿ-liáu giâu-gı̂, kiaⁿ-liáu m̄ sı̄ chin ê gı̂m-tiáⁿ, chiū chhe lâng sàng tò-tńg khı̀ Ló͘ kok, iā kā Ló͘ hô͘ kóng, Nā sı̄ Liú-hā Hūi kóng che sı̄ chin ê gı̂m-tiáⁿ, goán Chê kok ê jı̂n-kun chiū beh sêng-siū i. Ló͘ hô͘ chiū khı̀ tiàu Liú-hā Hūi beh lâi kan-chèng chit ê tiáⁿ. Liú-hā Hūi kóng, Kun ēng gı̂m-tiáⁿ hiàn hō͘ Chê kok, sı̄ ūi-tio̍h beh pó-choân kun ê kok,Chóng-sı̄ sı̂n iā ū kok, chiū-sı̄ sı̂n ê sı̀n-sı̍t. Hiān-chāi kun beh phò-hoāi sı̂n ê kok, lâi pó-choân kun ê kok, chit hō tāi-chı̀ beh thài oē ēng tit? Ló͘ hô͘ bô hoat-tō͘, chiū ēng chin ê gı̂m-tiáⁿ sàng khı̀ hō͘ Chê kok.
Lūn kàu lâng oa̍h tı̄ sè-kan, bô lūn sı̄ choè koaⁿ choè sài, á sı̄ khui hâng chē tiàm, boé-boē thàn chia̍h, bô lūn sı̄ tùi goā-kok, á sı̄ pún-toē só͘-chāi ê lâng, lâi-óng kau-chiap, lóng tio̍h ēng sı̀n-sı̍t choè kau-chè ê só-sı̂. Nā sı̄ bô sı̀n-sı̍t, sı̄ chhin-chhiūⁿ toā tiuⁿ chhia bô chhia-taⁿ, soè tiuⁿ chhia bô chhia pı̂ⁿ; khoàⁿ beh thài oē kiâⁿ oē tín-tāng leh? Hiān-sı̂ ū chı̍t khoán ê lâng, chí-ū oē hiáu-tit kóng pe̍h-chha̍t, bô iáⁿ bô chiah, siⁿ kàu ū ki ū hio̍h, kóng kàu kui-nn̂g thò, lâi moâ-phiàn lâng; bô siūⁿ kàu phah pháiⁿ miâ-siaⁿ, pí hit ê sit kok koh khah iàu-kín. Sı̄m-chı̀ ū ê bêng chai sı̄ hoān-tio̍h chà-khi, oē lia̍h khı̀ pān choē, in iā sı̄ tiâu-kò͘-ı̀ beh choè; chin-chiàⁿ sı̄ thang siong-sim ê sū. Siōng-tè chap tiâu kài ū kóng, M̄-thang lām-sám choè kan-chèng. Khóng-chú iā ū kóng, Beh liāu-lí kok, tio̍h kiong-kèng in ê tāi-chı̀, koh tio̍h sı̀n-sı̍t. Iā kóng, Choè gín-ná iàu-kín tio̍h soè jı̄, koh sı̀n-sı̍t. Chhin-chhiūⁿ chit hō oē, ū choē-choē khoán ê kà-sı̄;khó-kiàn sı̀n-sı̍t sı̄ tē-it pó-poè, tē-it tio̍h tùi-tiōng lah.
U̍t pāng siong chhı̂
Chiàn kok ê sı̂, So͘ Chı̂n tùi Ian ông kóng, Ū chı̍t jı̍t hô-nı̍h chı̍t lia̍p pāng (hún-giô ê khoán)chhut-lâi tı̄ hoāⁿ-téng, chiong khak thí-khui teh hō͘ pha̍k jı̍t. Hut-jiân ū chı̍t chiah u̍t (chiáu-á ê miâ, siông-siông tı̄ chúi-nı̍h thó chia̍h)khoàⁿ-kı̀ⁿ, chiū tùi hit ê pāng ê bah kā i tok teh; hit lia̍p pāng iā chiong khak ha̍p oá lâi, tùi u̍t ê chhùi kā ngoe̍h-teh. U̍t chiū kóng, Kin-á-jı̍t bô lo̍h hō͘, bı̂n-á-chài bô lo̍h hō͘, chiū ū pāng bah thang chia̍h. Pāng iā kóng, Kin-á-jı̍t bô chhut jı̍t, bı̂n-á-chài koh bô chhut jı̍t, tek-khak ū sí u̍t. Án-ni lióng pêng khiú-teh m̄ pàng. Chin tú hó, ū chı̍t ê thó-hı̂ lâng tùi hia kè, khoàⁿ-kı̀ⁿ chit chiah u̍t kap chı̍t lia̍p pāng, tı̂ⁿ-tı̂ⁿ ká-ká choè chı̍t tui, m̄ khéng saⁿ-niū; i chiū choè chı̍t-ē kā i lia̍h-khı̀. Sio̍k-gú kóng, U̍t pāng siong chhı̂, gû-jı̂n tek lı̄, chiū-sı̄ chit ê kó͘-tián.
Koh iáu chı̍t hāng, tı̄ oá saⁿ-cha̍p8 nı̂ chêng, La̍k-ku-lí hit sı̀ ê lâng, iáu-bē siū bûn-bêng ê kàu-hoà, tı̀-sek bē khui, boé-boē ê sū lóng bô kap lâng kè-kàu. Bat ū chı̍t pái, nn̄g ê hit só͘-chāi ê lâng khı̀ phah-la̍h; kàu jı̍t beh àm ê sı̂, nn̄g ê lâng ū phah saⁿ chiah lo̍k, chiū giâ chhut lâi tı̄ lō͘-piⁿ teh pun. Chı̍t lâng pun chı̍t chiah, m̄-kú iáu ū chı̍t chiah. Nā chit ê thoa-kè-lâi, hit-ê chiū kóng, Án-ni lí khah ke. Ia̍h hit-ê thoa-kè-khı̀, chit-ê iū kóng, Án-ni lí khah choē. Boē hiáu-tit phoà pêng lâi pun, kan-ta kui chiah thoa-lâi thoa-khı̀. Teh pun boē pı̂ⁿ,iā chhàu-khiáu tú-tio̍h chı̍t ê boē cha̍p-hè ê tùi hia kè, khoàⁿ-kı̀ⁿ in án-ni teh pun, pun lóng boē pı̂ⁿ, i chiū oá khı̀, chı̍t lâng pun chı̍t chiah hō͘ in, iā ka-kı̄ thoa chı̍t chiah lâi bı̄n-thâu-chêng, mn̄g in kóng, Chı̍t lâng chı̍t chiah án-ni ū pı̂ⁿ bô? Hit nn̄g ê lâng khoàⁿ-liáu toā hoaⁿ-hí kóng, Lí chin kong-tō, chin gâu pun; thài m̄ khah chá lâi teh, hō͘ goán chin kú teh pun boē pı̂ⁿ?
Lūn kàu sè-kan lâng, choē-choē sı̄ in-ūi chı̍t ê sió-khoá ê tāi-chı̀, m̄ khéng saⁿ niū. Lí kāng goá chı̍t ē, goá iā beh kāng lí chı̍t ē , lâi thó phı̂ⁿ. Lí mē goá chı̍t siaⁿ, goá chiū mē lí kúi-nā siaⁿ, thang khah-iâⁿ i, lóng sı̄ beh chiàm pān-gı̂. Ū sı̂ in-ūi chı̍t ê sió-sió khoá-khoá ê tāi-chı̀, iā lōng kàu saⁿ kò kúi-nā nı̂. Lâng nā khó͘-khǹg in, in kóng sı̄ cheng khı̀ put cheng châi; chit pêng m̄ khéng jı̄n su, hit pêng m̄ khéng jı̄n chhò, chiong chı̂ⁿ thoa teh iā, chèng-keng tāi-chı̀ pàng-sak liáu liáu. Kàu chai thang hoán-hoé ê sı̂,lióng pêng to lóng kheng-ka tōng-sán; chí-ū ūi-tio̍h beh tháu chı̍t tiám khùi, hoán-tńg chia̍h chı̍t ê toā khek-khui. Só͘-í lâng oē jím-nāi, oē hô-sūn, sı̄ tē it iàu kín. Chiū-sı̄ hit ê La̍k-ku-lí lâng, in-ūi khah tiâu-tı̍t, só͘-í liáu sió-khoá; nā beh ēng kiông-ê lâi saⁿ chiⁿ, kiaⁿ-liáu soà bô thang pun poàⁿ chiah.
Tio̍h chiàu kong-tō
Lia̍t-kok ê sı̂, Chı̀n Tō-kong mn̄g Kı̂ Hông-iông kóng, Hiān-sı̂ Lâm-iông iáu-bē ū koāiⁿ-koaⁿ, m̄ chai sím-mı̍h lâng oē kham-tit tng chit ê chit-jı̄m. Kı̂ Hông-iông kóng, Kái Hô͘ oē ēng tit. Chı̀n Tō-kong kóng, Kái Hô͘ kiám m̄ sı̄ kap lí ū oan-siû ê lâng mah? Kı̂ Hông-iông ı̀n kóng, Kun sı̄ mn̄g goá khoàⁿ sím-mı̍h lâng oē kham-tit tng chit ê chit-jı̄m, to m̄ sı̄ mn̄g goá ê siû-jı̂n. Chı̀n Tō-kong kóng, Hó; chiū ēng i. Kok-lāi ê lâng kó-jiân lóng o-ló i hó. Kè bô joā kú, Chı̀n Tō-kong koh mn̄g Kı̂ Hông-iông kóng, Kok-nı̍h bô ū niá peng ê koaⁿ, m̄ chai sím-mı̍h lâng oē kham-tit tng chit ê chit-jı̄m. Kı̂ Hông-iông kóng, Ngó͘-á oē ēng tit. Chı̀n Tō-kong kóng, Ngó͘-á kiám m̄ sı̄ lí ê hāu-siⁿ mah? Kı̂ Hông-iông kóng, Kun sı̄ mn̄g goá khoàⁿ sím-mı̍h lâng oē kham-tit tng chit ê chit-jı̄m, to m̄ sı̄ mn̄g goá ê hāu-siⁿ ah. Tō-kong kóng, Hó; chiū chhái ēng i. Kok-lāi ê lâng iā sı̄ o-ló ēng chit ê lâng chin tio̍h chin hó. Khóng-chú thiaⁿ-kı̀ⁿ án-ni chiū kóng, Kı̂ Hông-iông só͘ kóng ê oē, chin-chiàⁿ sı̄ bô chhò. I tùi tı̄ goā-bı̄n ê teh kú-chiàn, bô khioh oàn-hūn, kóng che sı̄ lán ê oan-siû. Tùi tı̄ lāi-bı̄n ê teh kú-chiàn, bô pı̄ hiâm-gı̂, kóng che sı̄ lán ê hāu-siⁿ. Che chin-chiàⁿ sı̄ kong-tō ê lâng ah.
Lūn-kàu hiān-kim ê lâng, toā-poàⁿ sı̄ lia̍h jı̂n-chêng khoàⁿ khah tùi-tiōng, bô lūn hit ê lâng ê pún-sū sı̄ cháiⁿ-iūⁿ. Siat-sú goá ê siû-jı̂n, tek-khak sı̄ kóng in m̄ hó; iā nā sı̄ goá ê chhin-chhek, chiū ēng hiah-ê hó oē lâi o-ló in; lóng m̄ khéng kóng kong-tō ê oē. Bú Sàm-su bat kóng, Kap goá hó ê, chiū-sı̄ hó lâng; kap goá pháiⁿ ê, chiū-sı̄ pháiⁿ lâng; sı̍t-chāi chin-chiàⁿ sı̄ ū iáⁿ. Chóng-sı̄ lán kàu-hoē lāi ê lâng iàu-kín m̄-thang chhin-chhiūⁿ án-ni; tio̍h o̍h Kı̂ Hông-iông chiàu kong-tō chiah hó. Ū sı̂ ín-chı̀n lâng lâi jı̍p sèng-kàu, á sı̄ kú-chiàn lâng lâi tha̍k Toā-o̍h, lóng tio̍h chiàu hit ê lâng ê phín-hēng chim-chiok lâi kóng; m̄-thang ū chı̍t-tiám-á phian-thán ê sim. In-ūi lán só͘ ín-chı̀n kú-chiàn ê lâng, nā choè-liáu ū hó bô͘-iūⁿ, chiū lán iā ū êng-kng. Siat-sú só͘ chiàn ê lâng, in ê só͘ choè lóng bô chiàu lán kú-chiàn hit sı̂ ê oē, á-sı̄ kàu poàⁿ-tiong-tn̂g chiah táⁿ-chhà, chiū lán kú-chiàn ê lâng iā chin pháiⁿ sè-bı̄n; boē bián-tit hō͘ lâng kóng lán sı̄ bô chiàu kong-tō, á-sı̄ kóng lán boē bat lâng. Só͘-í kó͘-chá ê hoat-tō͘, nā kú-chiàn-tio̍h gâu lâng, kó-jiân ū lı̄-ek tı̄ kok-ka, chiū pó-kú ê lâng iā tit-tio̍h siúⁿ-sù; ia̍h nā chiàn m̄ tio̍h lâng, choè-liáu m̄ hó ū hoān-choē, hit ê pó-kú ê lâng iā tio̍h liân-chō. Chhin-chhiūⁿ chit-tia̍p ê pó-chèng-jı̂n tio̍h liân-tài in ê chek-sêng hit khoán. Khó-kiàn teh chiàn lâng ê koan-hē sı̄ chin toā, m̄-thang sûi-piān hut-lio̍k i .
Chhâ koe ū oân-choân ê tek-hēng
Kí Séng-chú teh kā Chiu Soan-ông chhı̄ hit hō sio-phah koe; í-keng kà kè cha̍p jı̍t kú, Soan-ông mn̄g kóng, Chit chiah koe oē ēng tit hō͘ i sio phah á boē? Kí Séng-chú kóng, Chit chiah koe iáu-koh sı̄ chin kiau-ngō͘, gâu sái sèng-tē, boē oē ēng tit hō͘ i kap pa̍t chiah sio-phah tit. Āu-lâi koh kè cha̍p-jı̍t, Soan-ông koh mn̄g i kóng, Chit chiah koe oē hō͘ i sio phah tit á boē? Kí Séng-chú kóng, Chit chiah koe iáu-koh sı̄ nā thiaⁿ-kı̀ⁿ sím-mı̍h hiáng, i chiū thı̂, á-sı̄ khoàⁿ-tio̍h sím-mı̍h iáⁿ, i chiū jip; iáu-bē thang kap pa̍t chiah sio-phah tit. Iū-koh kè cha̍p jı̍t, Soan-ông iû-goân teh mn̄g, Kí Séng-chú kóng, Iáu sı̄ boē ēng tit, in-ūi nā teh khoàⁿ sím-mı̍h, iû-goân chin chhiⁿ-kông, iā gâu siū-khı̀; só͘-í boē ēng tit. Ba̍k-chı̍t-nih iū kè cha̍p jı̍t, Soan-ông iū koh chiàu chêng án-ni mn̄g, Kí Séng-chú chiah kóng, Chha-put-to oē ēng-tit hō͘ i khı̀ sio-phah tit lah. Sui-jiân ū pa̍t chiah koe teh thı̂, i khiok ná-chún bô thiaⁿ-kı̀ⁿ, chū-chū chāi-chāi, put-tōng seng-sek, khoàⁿ-liáu chhin-chhiūⁿ chhâ ê koe; só͘-í tek-hēng sǹg sı̄ chiâu-pı̄, pa̍t chiah-ê koe khoàⁿ-tio̍h i, boē bián-tit ka-kı̄ tò-thè tùi āu-bı̄n khı̀ liáu.
Chi-ná Tiông-kang hit sı̀, nā kóng lâng ê pún-sū bô cheng-kong, ū chı̍t kù sio̍k-gú kóng, Poàⁿ pân chhò͘. Tāi-khài sı̄ kóng, Chhò͘ toé poàⁿ-pân nā-tiāⁿ, sió-khoá chı̍t-ē iô chiū ū siaⁿ; nā toé kàu tı̄ⁿ lâi kā i iô, chiū bô thiaⁿ-kı̀ⁿ. Chhin-chhiūⁿ hit hō bat chı̍t-hāng poàⁿ-hāng, sió-khoá ū tō-ha̍k ê lâng, i chiū chin kiau-ngō͘ chū-ko, nā kap lâng choè tui, chiū phín i ê pún-sū. Siat-sú sı̄ chin-chiàⁿ tō-ha̍k khah koâiⁿ, tek-hēng chin hó, ha̍k-būn iā chhim hit khoán ê lâng, in chiū hoán-tńg chin khiam-pi. Lēng-goā ū chı̍t khoán, bêng-bêng sı̄ ū, khoàⁿ-liáu ná chhin-chhiūⁿ bô, bêng-bêng sı̄ cha̍t-cha̍t, khoàⁿ-liáu ná-chún khang-khang ê hêng-chōng. Sio̍k-gú ū kóng, Chin chiong-kun put-chāi tı̄ jiông chong. Iā kóng, Ū--ê m̄ kóng, bô--ê teh phín-phóng, chiū-sı̄ chit ê ı̀-sù.
M̄ chai ka-kı̄ ū pı̄ⁿ
Pián Chhiok sı̄ Tiong-kok kó͘-chá ê sı̂, choè ū miâ-siaⁿ ê i-seng. Ū chı̍t jı̍t tùi Chê-kok keng-kè, jı̍p-khı̀ kı̀ⁿ Chê Hoân-kong, Pián Chhiok chiū kā Hoân-kong kóng, Kun-hô͘ ê phê-hu hiān-sı̂ ū pı̄ⁿ teh; nā bô i-tı̄, chiū oē jú chhim. Hoân-kong kóng, Goá to bô pı̄ⁿ. Kè gō͘ jı̍t āu, Pián Chhiok koh kı̀ⁿ-tio̍h Hoân-kong, iū kā i kóng, Kun-hô͘ ê pı̄ⁿ í-keng kàu tı̄ tn̂g ūi ê só͘-chāi; nā m̄ i-tı̄, oē tı̀ khah chhim. Hoân-kong iā bô ı̀n i. Kàu Pián Chhiok chhut khı̀, Hoân-kong put-chí m̄ hoaⁿ-hí, tùi kun-sûi i ê lâng kóng, Hé, choè i-seng ê lâng, ài thàn lâng ê chı̂ⁿ, beh tián in ê pún-sū; goá bêng-bêng to bô sím-mı̍h m̄ hó, i iā kóng goá ū pı̄ⁿ. Koh kè gō͘ jı̍t, Pián Chhiok iū lâi kı̀ⁿ Hoân-kong, chı̍t-ē khoàⁿ-tio̍h, chiū oa̍t-tńg-sin choè i chhut-khı̀. Hoân-kong chiū kiò lâng khı̀ mn̄g i, khoàⁿ sı̄ cháiⁿ-iūⁿ. Pián Chhiok chiū kóng, Pı̄ⁿ tı̄ phê-hu, ēng io̍h lâi soé, á sı̄ ēng hé lâi kù, chiū oē i tit. Pı̄ⁿ tı̄ huih-me̍h, ēng chù-siā iā oē i tit. Nā pı̄ⁿ tı̄ tn̂g-ūi ê só͘-chāi, ēng ka, ēng chiú ê io̍h-lūi iā koán oē tio̍h. Pı̄ⁿ kàu tı̄ kut-chhé, sui-jiân sı̄ chip-chiáng siⁿ-sí ê koân-pèng, iā bô hoat-tō͘ liáu. Hiān-sı̂ kun ê pı̄ⁿ í-keng jı̍p tı̄ kut-chhé; goá só͘-í m̄ káⁿ koh kóng sím-mı̍h. Āu-lâi koh kè gō͘ jı̍t, Chê Hoân-kong hut-jiân khí pı̄ⁿ, kiò lâng khı̀ tiàu Pián Chhiok; Pián Chhiok í-keng choè i tô-siám. Kè bô joā kú, Hoân-kong chiū pı̄ⁿ sí.
Hiān-sı̂ choē-choē hit khoán ûi-hui chok-tái ê lâng, pêng-sò͘ iā ū hit hō hó ê chhin-chiâⁿ pêng-iú khó͘-khǹg in, in khiok lóng m̄ thiaⁿ; kàu āu-lâi hō͘ koaⁿ-hú lia̍h khı̀ hêng-hoa̍t tēng choē, chiah chai thang siūⁿ-tio̍h bó͘ lâng só͘ kóng ê oē sı̄ tio̍h, chóng-sı̄ í-keng bô lō͘-ēng liáu. Koh chhin-chhiūⁿ chit-tia̍p ê Thoân-tō͘ sian-siⁿ teh kóng tō-lí, kin-á-jı̍t kiò lâng hoán-hoé koé-pı̀ⁿ, bı̂n-á-chài iā sı̄ kiò lâng hoán-hoé koé-pı̀ⁿ, m̄-kú sè-sio̍k lâng lóng m̄ khéng hoán-hoé koé-pı̀ⁿ, koh m̄ sı̀n ka-kı̄ ū choē. Kàu āu-lâi ū chı̍t jı̍t khiā tı̄ sím-phoàⁿ tâi chêng, Siōng-tè mn̄g choē ê sı̂-chūn, hit-tia̍p beh hoán-hoé, khiok sı̄ siuⁿ bān lah.
Kiáⁿ kan-chèng pē choè chha̍t
Chhó͘ kok ū chı̍t ê tiâu-tı̍t ê lâng, in lāu-pē thau-khan lâng ê iûⁿ, i cháu-khı̀ kong-tn̂g chhut siú. Koaⁿ-hú lia̍h in lāu-pē lâi, in-ūi i ê kiáⁿ choè kan-chèng, bô oē thang chı̀ⁿ, chiū tēng-choē beh thâi i. Chit ê tiâu-tı̍t ê lâng iū chhiáⁿ koaⁿ-hú pàng i ê lāu-pē, i kam-goān thoè i ê lāu-pē sí. Āu-lâi kàu teh-beh thâi ê sı̂-chūn, chit ê lâng tùi hiah-ê gê-ia̍h kóng, Goán lāu-pē thau-khan lâng ê iûⁿ, goá khı̀ tng koaⁿ chhut siù, án-ni goá kiám m̄ sı̄ chı̍t ê tiâu-tı̍t koh sı̀n-sı̍t ê lâng mah? Goán lāu-pē hoān-choē tio̍h thâi, goá kam-goān thoè i sí, án-ni goá kiám m̄ sı̄ chı̍t ê hàu-chú mah? Chhin-chhiūⁿ goá chit khoán ê sı̀n-sı̍t koh ū hàu ê lâng, kèng-jiân tio̍h hō͘ lâng thâi, chit kok lāi iáu ū sím-mı̍h lâng m̄ tio̍h thâi leh? Chhó͘ ông thiaⁿ-kı̀ⁿ chiah-ê oē, chiū sià-bián hit ê lâng bô thâi. Khóng-chú thiaⁿ-kı̀ⁿ chiah kóng, Chin kı̂-koài ah, ū chit khoán ê tiâu-tı̍t lâng, sǹg choè sı̄ ū sı̀n-sı̍t, kèng-jiân ēng in lāu-pē lâi boé hó miâ-siaⁿ hō͘ lâng o-ló, chin-chiàⁿ sı̄ kı̂-koài.
Nā lūn sè-kan, éng-éng ū chı̍t khoán ê lâng, pêng-siông-sı̂ mı̍h-iūⁿ kan-khiáu to ū, ēng pah poaⁿ khúi-khiat ê kè-bô͘; nā khoàⁿ-kı̀ⁿ bó͘-mı̍h lâng khah gû-chhún, chiū beh khı̀ khi-hū i, khoàⁿ-kı̀ⁿ sím-mı̍h lâng khah loán-jio̍k, chiū beh khı̀ hāi i, lóng bô chı̍t tiám-á jı̂n-ài ê sim-chiâⁿ, iā bô chı̍t tiám-á lı̂n-bín ê chêng-ı̀. Kı̍p-chı̀ kàu āu-lâi, khi-hū lâng iā khi-hū kàu chiok lah, hāi lâng iā hāi kàu chı̄n liáu, put-gı̄ ê chı̂ⁿ-châi iā ēng lóng boē liáu. Hit-sı̂ khiok siūⁿ beh chhē chı̍t ê hó lâng ê miâ lâi choè; chiū khı̀ siu-lí chı̍t tiâu kiô, á sı̄ khı̀ chéng-lí chı̍t keng biō, sàng lâng kúi niá mı̂-hiû, á-sı̄ hoat tām-po̍h bí hō͘ sòng-hiong lâng, chiū giám-jiân ka-kı̄ lia̍h choè hó lâng teh choè hó sū. Chiàu án-ni khoàⁿ, in nā beh chhin-chhiūⁿ chit khoán ê teh kiû hó lâng ê miâ-siaⁿ, put-jû chá-jı̍t bo̍h-tit choè hit hō hāi lâng ê tāi-chı̀ kiám m̄ sı̄ koh khah hó mah?
Hoán-hoé jı̄n choē
Chhit kok ê sı̂, Lı̄n Siong-jû sǹg sı̄ hó kháu-châi, koh ū tám-le̍k ê lâng, i ū oân-choân hit tè pó-ge̍k tò-lâi Tiō-kok, iā tı̄ Bín-tı̂ ê só͘-chāi, bô lêng-jio̍k-tio̍h i ê kun-ông. Só͘-í Tiō-ông hong i choè siōng-kheng. Chit-ūi tian-tò pí Liâm Phó khah koâiⁿ. Liâm Phó chı̍t-ē siūⁿ, Goá tùi siàu-liân kàu taⁿ, keng-kè káng pah pái ê cheng-chiàn, chiah choè chiong-kun ê chit; Lı̄n Siong-jû put-kò khò i ê kháu-châi, hoán-tńg pí goá koaⁿ choè khah koâiⁿ. Chiū tùi lâng kóng, Goá nā tú-tio̍h Siong-jû ê sı̂, tek-khak beh lêng-jio̍k i. Siong-jû thiaⁿ-kı̀ⁿ chit hō oē, múi pái chhut-lâi ê sı̂-chūn, nā khoàⁿ-kı̀ⁿ Liâm Phó, chiū koáⁿ-kín siám tùi piⁿ-á khı̀. I só͘ ēng ê lâng khoàⁿ-kı̀ⁿ in chú-lâng chit hō khoán, chiū lia̍h-choè toā-toā ê kiàn-siàu; tāi-ke lâi tùi Siong-jû saⁿ-sı̂, beh khı̀ pa̍t ūi. Siong-jû chiah kā in kóng, Hiān-sı̂ tē-it kiông tē-it toā ê chiū sı̄ Chı̂n-kok. Chóng-sı̄ goá tı̄ i tiān-téng, siōng-chhiáⁿ káⁿ toā siaⁿ hoah lâi chek-pı̄ i Chı̂n ông, hô-hòng Liâm Chiong-kun, goá kiám chin-chiàⁿ sı̄ teh kiaⁿ mah? Put-kò chit-tia̍p Chı̂n-kok m̄ káⁿ lâi phah Tiō-kok, chiū-sı̄ in-ūi ū goán nn̄g lâng, nā kau-chiap óng-lâi ê sū, goá oē siat-hoat, m̄-kú cheng-chiàn ê tāi-chı̀, iû-goân tio̍h khò Liâm Chiong-kun. Siat-sú goán nn̄g ê put-hô, sı̄ chhin-chhiūⁿ nn̄g chiah hó͘ teh saⁿ-chiⁿ, hit ê sè-bı̄n oh-tit lóng oa̍h; só͘-í goá nā kı̀ⁿ-tio̍h i, chiū tāi-seng siám-pı̄. In-ūi goá sı̄ lia̍h kok-ka ê tāi-chı̀ choè khah iàu-kín, i tùi goá sǹg sı̄ kò-jı̂n ê hia̍p-hiâm nā-tiāⁿ, só͘-í bô beh kap i kè-kàu lah. I só͘ ēng ê lâng, thiaⁿ-liáu put-chí ū chêng-lí, iā chiū o̍h in chú-lâng ê khoán, tú-tio̍h Liâm Phó ê kun-lâng, iā lóng khah niū i. Liâm Phó hit pêng ê lâng, chiū ná kiau-ngō͘ khí lâi, lia̍h choè Siong-jû chin-chiàⁿ kiaⁿ i. Āu-lâi ū chı̍t lâng miâ kiò Gû Kheng, lâi chhē Liâm Phó, chiong Lı̄n Siong-jû ê ı̀-sù thiah bêng hō͘ i thiaⁿ. Liâm Phó chiah chhíⁿ-gō͘ hoán-hoé, chiū thǹg-pak-theh pē chı̍t ki tek-poe, lâi Siong-jû in tau jı̄n choē, chhiáⁿ Siong-jû ēng tek-poe chek-hoa̍t i. Siong-jû chin hoaⁿ-hí khan i ê chhiú, chhiáⁿ i jı̍p-khı̀ lāi-bı̄n, hó lé khoán-thāi i; nn̄g lâng soà kiat choè siⁿ-sí ê kau-poê.
Lūn-kàu put-hô ê tāi-chı̀, m̄-nā kok-nı̍h ū án-ni, ke-lāi iā sı̄ ū án-ni. Chiū-sı̄ Iâ-so͘ ê kàu-hoē, iā boē kóng tit chiū bô án-ni. Bat khoàⁿ-kı̀ⁿ ū sı̂ chit pêng ê kàu-hoē khoàⁿ-khin hit pêng ê kàu-hoē, á sı̄ hit pêng ê hoē-iú khoàⁿ-khin chit pêng ê hoē-iú. Ū sı̂ kóng bó͘ lâng sı̄ kiû piáⁿ tit-tio̍h piáⁿ, á sı̄ kóng bó͘ lâng sı̄ oá-khò sè-le̍k, iā bat kóng bó͘-mı̍h lâng to bô ha̍k-būn, hoán-tńg teh choè chip-sū, á sı̄ kóng bó͘ mı̍h lâng to bô jia̍t-sim, cháiⁿ-iūⁿ teh choè thoân-tō. Án-ni tāi-ke phoe-phêng; kóng-liáu to lóng ū in ê lí-khı̀. Sū-put-ti Mô͘-kúi í-keng thàn chit ê ki-hoē, hō͘ lí lı̄-khui chèng-keng ê lō͘, lâi jı̍p tı̄ i ê khoan-thò lah. Iā chiū-sı̄ sè-sio̍k lâng, in-ūi khoàⁿ-kı̀ⁿ lán ê hoē-iú ka-kı̄ put-bo̍k, bô saⁿ-thiàⁿ ê sim, oē soà kiaⁿ kàu m̄ káⁿ lâi; án-ni kàu-hoē thài oē heng-ōng nih? Só͘-í chhim-chhim ǹg-bāng kàu-hoē lāi ê pêng-iú, nā ū chit hō, chiū koáⁿ-kín koé; nā bô, iā tio̍h kín-sı̄n m̄-thang hoān-tio̍h, bo̍h-tit ū phāng thang hō͘ Mô͘-kúi jı̍p-khı̀.
Ia̍h koh chı̍t hāng, Siong-jû kap Liâm Phó sǹg-sı̄ siāng chı̍t tiān ê jı̂n-sı̂n, Liâm Phó ê sim ū hō͘ hit ê kong-bêng miâ-siaⁿ bê-khı̀, chiū kap Siong-jû m̄-hó. Siong-jû iā khoan-iông i, kàu i chai thang hoán-hoé jı̄n-choē, chiū hoaⁿ-hí koh chiap-la̍p i, kap i kau-poê; che sǹg-sı̄ chı̍t lâng tùi chı̍t lâng, pêng-iú óng-lâi ê sū nā-tiāⁿ. Iáu ū chı̍t hāng khah toā iàu-kín, chiū-sı̄ sè-kan lâng kiâⁿ m̄ tio̍h lō͘, poē-biū tō-lí, Siōng-tè iā chhut-chāi in khı̀ choè, kàu i chai thang hoán-hoé jı̄n-choē, chiū beh koh chiap-la̍p i choè kiáⁿ; chit hō sǹg-sı̄ siⁿ lán ê lêng-hûn, pē-kiáⁿ ê chı̀-chhin, chū-jiân koh khah iàu-kín. I ū chhe-khián Kiù-chú Iâ-so͘ lo̍h-lâi sè-kan, hō͘ lâng sı̀n lâi tit-tio̍h koh kap Siōng-tè chhin-kūn. Iâ-so͘ lâi sè-kan thoân Siōng-tè kok ê hok-im, hō͘ lâng chhíⁿ-gō͘ chai choē, sı̄ chhin-chhiūⁿ Gû Kheng thiah-bêng Siong-jû ê ı̀-sù. Taⁿ lán lóng tio̍h o̍h Liâm Phó, chai thang chhíⁿ-gō͘ jı̄n-choē, bián-tit āu-lâi beh hoán-hoé ê sı̂, chiah chai í-keng tı̂ lah.
Gâu tı̄-lí peh-sı̀ⁿ
Kù Pek-gio̍k choè Oē-kok ê cháiⁿ-siòng, hit sı̂ kok-lāi toā pêng-tiāⁿ. Chú-kòng khı̀ mn̄g i kóng, M̄ chai lín kok-lāi ēng sím-mı̍h hoat-tō͘ teh tı̄-lí. Kù Pek-gio̍k kóng, Goá sı̄ ēng m̄ bián tı̄-lí ê hoat-tō͘ lâi teh tı̄ kok. Tng hit-sı̂ Chı̀n-kok Tiō Kán-chú siūⁿ beh khı̀ kong-phah Oē-kok, tāi-seng chhe Sú Ám khı̀ Oē-kok thàm-thiaⁿ chêng-hêng. Sú Ám tò-lâi hoê-ho̍k kóng, Kù Pek-gio̍k teh choè cháiⁿ-siòng, m̄-thang khı̀ kong phah i.
Bēng-chú ū kóng, Teh siú kok, m̄ sı̄ khò soaⁿ-khiⁿ ê gûi-hiám choè kian-kò͘ lah. Koán peh-sı̀ⁿ boē oē lia̍h siū hong ê toē-hng choè chè-hān tit. Só͘-í Ko Iâu sui-jiân sı̄ toā-chı̍h koh têng-kù, i tı̄ Sùn-tè hit sı̂ teh choè koán hoat-lu̍t ê koaⁿ, liāu-lí peh-sı̀ⁿ hêng-hoa̍t ê sū, lóng bô chı̍t tiám-á oan-óng; khiok pí hit hō ū kháu-châi gâu kóng oē ê khah hó. Su Khòng sui-jiân sı̄ chhiⁿ-mı̂ ê lâng, i choè Chı̀n-kok Thài-cháiⁿ ê sı̂-chūn, kok-lāi ê chèng-sū lóng bô chı̍t-tiám-á hūn-cha̍p; khiok pí hit hō ū ba̍k-chiu thang khoàⁿ khah hó. Án-ni khó-kiàn bô lūn sím-mı̍h tāi-chı̀, lóng tio̍h kiû hit ê sı̍t-chāi, m̄-thang chng-thāⁿ hit ê goā-phê, sı̄ khah iàu-kín.
Koh che iā kap Lô-má jı̂n-su tē 6, tē 7 chiuⁿ só͘ kı̀-chài chiâⁿ-sèng ê tō-lí chha-put-to saⁿ-tâng. In-ūi Kiù-chú kiò I ê peh-sı̀ⁿ lâi kiâⁿ hó, m̄ sı̄ ēng lu̍t-hoat giâm-giâm iok-sok in, chiū-sı̄ ēng I ê Sèng-sı̂n kám-hoà in ê sim, hō͘ in chū-jiân kiâⁿ hó sū.
Sū hông kah sı̂
Ló͘-kok ū chı̍t ê sı̀ⁿ Si ê lâng, siⁿ nn̄g ê kiáⁿ, chı̍t-ê ài o̍h bûn ê, chı̍t-ê ài o̍h bú ê. Hit ê ài o̍h bûn ê khı̀ Chê kok, beh bā khoàⁿ ū koaⁿ thang choè bô. Chê hô͘ khoàⁿ i ê ha̍k-būn chin hó, chiū chhiáⁿ i choè in hiah-ê kong-chú ê sian-siⁿ. Hit ê ài o̍h bú ê khı̀ Chhó͘ kok kı̀ⁿ Chhó͘ ông. Chhó͘ ông iā chin hoaⁿ-hí, kú-khí i choè kun-chèng-si. Án-ni nn̄g ê hiaⁿ-tı̄-á, chı̍t bûn chı̍t bú, lóng teh choè toā koaⁿ, sǹg sı̄ hián-chó͘ êng-chong, ka-têng chin ū kong-chhái ê sū. Lâng-lâng put-chí him-soān in. Iā chin chhàu-khiáu, in hit chhù-piⁿ ū chı̍t ê sı̀ⁿ Bēng ê, iû-goân nn̄g ê kiáⁿ, só͘ ha̍k-sı̍p ê iā siāng chı̍t iūⁿ. Chóng-sı̄ lóng iáu teh lo̍k-phek, kan-khó͘ kàu boē kham tit. In-ūi án-ni, chiū lâi mn̄g-khí, khoàⁿ in àn-cháiⁿ-iūⁿ oē kàu chiah hián-ta̍t; sı̀ⁿ Si ê ēng sı̍t-chāi kā in kóng, Hit ê sı̀ⁿ Bēng ê chiū kah hit ê o̍h bûn ê toā kiáⁿ khı̀ Chı̂n kok, beh bā khoàⁿ ū koaⁿ thang choè bô. Chı̂n ông thiaⁿ i hiah-ê tō-tek ê oē chiū kóng, Hiān-chāi sı̄ thiⁿ-kha-ē toā jiáu-loān ê sı̂, lóng tio̍h oá-khò peng ê khùi-la̍t choè iàu-kín; nā ēng jı̂n-gı̄ lâi liāu-lí kok, sı̄ beh hāi goá ê kok hō͘ bia̍t bô. Chiū chiong in hit ê toā kiáⁿ ēng ke̍k kan-khó͘ ê hêng-hoa̍t, hō͘ i pı̀ⁿ-chiâⁿ hoè-jı̂n, chiah pàng i khı̀. Iā hit ê soè-hàn ê khı̀ Oē kok, tùi Oē hô͘ kóng-khí tio̍h cháiⁿ-iūⁿ lâi káng-sı̍p bú ê sū. Oē hô͘ kóng, Hiān-sı̂ goá ê kok sǹg sı̄ put-chí loán-jio̍k, koh kap chiah-ê toā kok sio keh-kài. Só͘-í nā tùi toā kok, eng-kai tio̍h sió-sim kín-sı̄n lâi ho̍k-sāi i; nā tùi sió kok, iā chí-hó sı̄ ēng an-hú ê hoat-tō͘; án-ni chiah sǹg sı̄ kiû kok-lāi pêng-an ê hong-hoat. Siat-sú ēng peng-koân, chiū-sı̄ teh chhē bia̍t-bô ê lō͘. Nā pàng chit ê lâng oân-choân tò-khı̀, chiong-lâi tek-khak oē hāi goá ê kok. Chiū chiong kha kā i chām-khí-lâi, chiah pàng i tò-khı̀ Ló͘ kok. Hit ê sı̀ⁿ Bēng ê khoàⁿ-kı̀ⁿ nn̄g ê kiáⁿ m̄-nā bô koaⁿ thang choè, hoán-tńg lóng pı̀ⁿ hoè-jı̂n, chiū khı̀ kàu beh sí, soà khı̀ sı̀ⁿ Si ê in lāi-bı̄n kā i chháu-nāu. Hit ê sı̀ⁿ Si ê chiū kóng, Hoān-sū nā tú-tio̍h sı̂-ki chiū heng-ōng, sit-lo̍h sı̂-ki chiū choè pāi-hoāi. Lín ê ha̍k-būn kap goán siāng chı̍t iūⁿ, m̄-kú hit ê sı̂-ki sı̄ bô saⁿ-tâng.
Chiàu án-ni khoàⁿ, thiⁿ-kha-ē ê lí-khı̀, boē oē kóng-tit siông-siông sı̄ tio̍h, tāi-chı̀ iā boē oē kóng tit chhiâng-chāi m̄-tio̍h tit. Ū ê chı̍t khoán ê tāi-chı̀, chāi-chá sǹg choè ū lí-khı̀, choè-liáu sı̄ tio̍h; kàu hiān-chāi khiok boē oē sǹg-tit ū lí-khı̀. Ū ê chit hāng mı̍h hiān-chāi sı̄ bô lō͘-ēng, kàu āu-lâi m̄-kú pı̀ⁿ choè chin ū lō͘-ēng. Só͘-í ū lí-khı̀, á sı̄ bô lí-khı̀, ū lō͘-ēng á sı̄ bô lō͘-ēng, khiok boē oē it-tēng lâi siú tit,lóng tio̍h khoàⁿ sı̄ sím-mı̍h sı̂-chūn. Tāi-pı̍t, Só͘-lô-bûn, Giâu, Sùn, in ê chun-kùi choè jı̂n-kun, iā boē kóng tit in ū siuⁿ kè-thâu. Lia̍p-sat-lō͘, Gân Hoê, in sòng-hiong kàu choè khit-chia̍h, khiā-khí hit phian-phiah oe̍h-toe̍h ê hāng-á-lāi, iā sı̄ boē ēng tit kóng in sı̄ thài pi-chiān. In-ūi kok lâng ê só͘ choè, Siōng-tè lóng ū tiāⁿ-tio̍h ê sı̂ hō͘ in, m̄ sı̄ lâng só͘ oē bián-kióng tit. Bēng-chú ū kóng, Sú seng iú bēng, hù-kùi chāi thian. Só͘-í lâng lóng tio̍h siú pún-hūn, jı̄n miā, thèng-hāu sı̂, chhut-chāi thiⁿ chú-ı̀, m̄-thang kiông-kiông choè. Sio̍k-gú ū kóng, Sū hông kah sı̂; siat-sú tāi-chı̀ bô tú-tio̍h ha̍h hit ê sı̂, sui-jiân khah gâu kè-bô͘, choè kàu chin chiu-chı̀, iā bô tek-khak oē tit thang sêng-kong.
To gı̂ oē hāi sū
Hoâi-lâm chú ê chheh kóng, Ū chı̍t ê cha-bó͘ gín-ná beh chhut kè ê sı̂, in chhù-piⁿ ê lâng kā i ê pē-bú kóng, Lín cha-bó͘-kiáⁿ kè-khı̀ lâng tau, āu-lâi oē siⁿ kiáⁿ á boē, sı̄ boē liāu tit; nā boē siⁿ, kiám m̄ sı̄ hoān-tio̍h chhit-chhut ê tiâu-lē mah? Lêng-khó͘ tio̍h chiàu-kò͘ lí ê cha-bó͘-kiáⁿ, kah i nā ū lı̄-piān ê sı̂, tio̍h chiong in ang hit thâu ê saⁿ-á-khò͘ kap cha̍p-chhùi ê mı̍h, thau-the̍h koá tò-lâi lín chhù; bān-it āu-lâi bô kā lâng siⁿ kiáⁿ, hō͘ lâng lı̂ tò-lâi, iā chiah ū thang tō͘ oa̍h. In ê pē-bú lia̍h choè án-ni sı̄ chin tio̍h, chiū kap in cha-bó͘-kiáⁿ tàu, chiong in ang hit pêng ê mı̍h-kiāⁿ, thau-the̍h tò-lâi in tau. Kè ū hiah kú, in ê ta-ke-koaⁿ chai kiò i ê sim-pū tiāⁿ-tiāⁿ thau-the̍h mı̍h khı̀ in goā-ke chhù, chiū kóng, Goán chit ê sim-pū, sim-koaⁿ í-keng ǹg tı̄ goā-bı̄n, sı̄ boē ēng-tit koh lâu i toà teh, put-jû liōng-chá hō͘ i khı̀; chiū kā i lı̂ tò-khı̀ in goā-ke hia. In ê pē-bú m̄ chai hit ê hō͘ lâng lı̂ ê iân-kò͘, hoán-tńg chin kám-kek chhù-piⁿ hit ê lâng, kóng i kà-sı̄ in, hō͘ in chai thang thàn chá pı̄-pān.
Nā lūn pún-tó kap Tiong-kok ê lâng, iā choē-choē ū chit hō mâu-pēng, múi siông choè chı̍t hāng tāi-chı̀, chiū giâu-gı̂ kiaⁿ-liáu boē chiâⁿ; chiū-sı̄ í-keng choè chiâⁿ, iā giâu-gı̂ kiaⁿ-liáu tù bô kú. Tı̀-kàu ū hit hō eng-kai tio̍h chı̄n-la̍t ê, m̄ khéng khı̀ chı̄n la̍t, eng-kai tio̍h pān ê sū, iā m̄ khéng khı̀ pān; kan-ta kiaⁿ oē pe̍h liáu kang, á sı̄ oē liáu pún, án-ni lóng m̄ khéng khı̀ choè. Koh ū chı̍t khoán, hit hō tāi-chı̀ taⁿ-chiah chhòng lı̍p, iā m̄ khéng hē pún chhut-la̍t lo̍h khı̀ choè, hoán-tńg sı̀-koè khau-khek; nā ū thang thàn tām-po̍h jı̍p chhiú, ka-kı̄ chiū lia̍h choè kàu-gia̍h; ia̍h hit hō tāi-chı̀ ê sêng-kong á sı̄ pāi-hoāi, lóng bô beh khı̀ koán. Put-lūn chhòng sím-mı̍h tāi-chı̀, tāi-khài sı̄ ū thâu bô bé, poàn tô͘ jı̂ hoè ê khah choē; bô ū hit hō kian-kò͘ koat-toàn ê sim; só͘-í choè lóng boē oē sêng-kong.
Hit khoán ê lâng, m̄-nā choè tāi-chı̀ sı̄ án-ni, chiū-sı̄ thàn tō-lí ho̍k-sāi Siōng-tè, iā bô m̄ sı̄ án-ni. Phı̀-lūn chhin-chhiūⁿ chit ê lâng, pêng-sò͘ chin ài kóng pe̍h-chha̍t lâi phiàn lâng, āu-lâi in-ūi chai choè tāi-chı̀ nā ū ha̍h tı̄ Siōng-tè ê chí-ı̀, Siōng-tè chū-jiân siúⁿ-sù hok-khı̀ hō͘ i, iū koh lām-sám kóng pe̍h-chha̍t, sı̄ hoān-tio̍h Siōng-tè kap lâng lóng siū-khı̀ ê choē. Án-ni chiū lâi chun-thàn Siōng-tè ê chí-ı̀, ǹg-bāng Siōng-tè siúⁿ-sù hok-khı̀ hō͘ in. M̄-kú kè bē joā kú, hut-jiân iū giâu-gı̂ Siōng-tè siúⁿ-sù ê hok-khı̀, sı̄ bông-bông biáu-biáu, boē pı̂n-chún tit, m̄-thang choan-choan oá-khò chit hāng; put-jû it-biān ēng tām-po̍h pe̍h-chha̍t oē lâi phiàn lâng, iā it-biān lâi chun-thàn tō-lí, kiám m̄ sı̄ nn̄g thâu lóng ū thang oá-khò mah? Khó-sioh chhin-chhiūⁿ chit khoán ê lâng, it-seng lóng boē oē tit-tio̍h hok-khı̀ ê pò-siúⁿ, hoán-tńg kóng chin Sı̂n bô ū lêng-siàⁿ. Kiám chin-chiàⁿ chin Sı̂n bô ū lêng-siàⁿ mah? Sio̍k-gú kóng, Gı̂ sū bû kong; nā sı̄ giâu-gı̂ ê tāi-chı̀, choè liáu boē sêng-kong, chiū-sı̄ chit ê ı̀-sù.
Kín phang bô hó se
Bēng-chú ū kóng, Sòng kok ū chı̍t ê lâng, hoân-ló i chhân-nih ê tiū-á lóng bô sím-mı̍h toā, i chiū chı̍t bô͘ chı̍t bô͘, ēng chhiú kā i pu̍ih, hō͘ phû khah koâiⁿ-khí-lâi; tı̍t-tı̍t cháu tò-lâi in tau kā lâng kóng, Kin-á-jı̍t goá khoàⁿ-kı̀ⁿ chhân-nih ê tiū-á lóng m̄ toā, put-chí hoân-ló; goá khiok ū siūⁿ-tio̍h chı̍t ê hoat-tō͘, thang pang-chān i toā châng. In hāu-siⁿ thiaⁿ-kı̀ⁿ án-ni, chiū koáⁿ-kín cháu khı̀ khoàⁿ; ó-hò, hiah-ê hō͘ i pu̍ih ê tiū-á, to lóng ta-ta-khı̀ lah.
Lūn-gú chheh ū kóng, Ài koáⁿ-kín chiū choè boē-tit thang kàu. Iā Tiong-iong ê ū kóng, Phı̀-jū chiūⁿ koâiⁿ, tio̍h tùi kē-kē lâi peh; phı̀-jū kiâⁿ hn̄g, tio̍h tùi kūn lâi kiâⁿ khí. Án-ni thang chai bô lūn choè sím-mı̍h sū, lóng tio̍h chiàu chhù-sū lâi kiâⁿ, chiah oē tit choè kàu sêng-kong. Nā sı̄ chhut-chāi in ka-kı̄ ê kín sèng-tē, boē oē kiâⁿ i chiū beh o̍h pháu, án-ni beh thài oē pó tit i boē poa̍h-tó leh? Chhin-chhiūⁿ Má-khó sı̀ chiūⁿ jı̄ cha̍p la̍k chat ū kóng, Siōng-tè ê kok chhin-chhiūⁿ lâng iā chéng-chí tı̄ toē-nih2, mı̂-sı̂ khùn, chá-khí sı̂ khí-lâi, hit ê chéng-chí chiū hoat-gê, chiām-chiām toā-khí-lâi, lâng iā boē hiáu-tit án-choáⁿ-iūⁿ oē án-ni. In-ūi toē teh siⁿ gō͘-kak, sı̄ chhut tı̄ chū-jiân ê, tāi-seng sı̄ ng, āu-lâi toā châng chiâⁿ sūi, kàu bé sūi-nı̍h chiū kiat kui lia̍p, iā hiah-ê lia̍p sêng-se̍k liáu, chiū ēng liâm-le̍k-á khı̀ koah, in-ūi siu-sêng ê sı̂-chūn kàu lah. Chiàu án-ni chiah ū chhut tı̄ chū-jiân; nā chhin-chhiūⁿ hit ê Sòng kok ê lâng só͘ teh choè, m̄-nā boē pang-chān i toā, sı̄ tian-tò hō͘ i khau sí liáu-liáu. Só͘-í sio̍k-gú koh teh kóng, Kín pháng bô hó se, kín choè bô hó ta-ke; chiū sı̄ kah lâng tio̍h chiàu chhù-sū lâi kiâⁿ.
