Boē chip-koat-tit
Ló͘ Ai-kong mn̄g Khóng-chú kóng, Kiáⁿ thàn pē ê bēng-lēng sı̄ ū hàu mah? Sı̂n thàn kun ê bēng-lēng sı̄ chı̄n-tiong mah? Án-ni liân-liân mn̄g saⁿ pái, Khóng-chú lóng bô ı̀n i. Āu-lâi Khóng-chú chhut-lâi tùi Chú-kòng teh kóng, Tú-chiah Ló͘-kun teh mn̄g goá, khoàⁿ kiáⁿ thàn pē ê bēng-lēng, sı̄ ū hàu á m̄ sı̄, sı̂n thàn kun ê bēng-lēng sı̄ chı̄n-tiong á m̄ sı̄, goá khiok bô ı̀n i, m̄ chai lí phah-sǹg cháiⁿ-iūⁿ? Chú-kòng kóng, Kiáⁿ thàn pē ê bēng-lēng chū-jiân sı̄ hàu; sı̂n thàn kun ê bēng-lēng chū-jiân sı̄ tiong; thài ū sím-mı̍h thang koh ı̀n i? Khóng-chú kóng, Chú-kòng lí chin-chiàⁿ sı̄ siáu-jı̂n ê lâng. Kiám m̄-bat thiaⁿ-kı̀ⁿ kóng, Kó͘-chá ê sı̂ ū chı̍t bān tiuⁿ chiàn-chhia ê kok, chiū ū sı̀ ê káⁿ hó-táⁿ lâi kàn-chèng ê jı̂n-sı̂n, i ê kok chiah boē hō͘ lâng koah-khı̀; ū chı̍t chheng tiuⁿ chiàn-chhia ê kok, tio̍h ū saⁿ ê káⁿ kàn-chèng ê jı̂n-sı̂n, i ê siā-chek chiah bô gûi-hiám; iā ū chı̍t pah tiuⁿ chiàn-chhia ê ke, iā tio̍h ū nn̄g ê káⁿ kàn-chèng ê lâng, i ê chong-biāu chiah boē húi khı̀. Choè kiáⁿ ê lâng, ū chêng-lí thang kap in lāu-pē saⁿ-chiⁿ, boē kóng tit sı̄ bô lé-sò͘, choè pêng-iú ê lâng, oē chiàu lí-khı̀ lâi saⁿ-chiⁿ, boē kóng tit sı̄ bô chiàu kong-gı̄. Só͘-í kiáⁿ thàn pē ê bēng-lēng, bē kàu-gia̍h thang kóng sı̄ ū hàu, sı̂n thàn kun ê bēng-lēng, bē kàu-gia̍h thang kóng sı̄ chı̄n-tiong; eng-kai tio̍h chim-chiok, khoàⁿ i só͘ choè sı̄ tio̍h á m̄ tio̍h, thang thàn á m̄-thang; sı̄ boē chip-koat tit. Án-ni chiah oē chheng-ho͘ tit choè ū hàu, á-sı̄ chheng-ho͘ choè chı̄n-tiong tit.
Hiān-sı̂ ū chı̍t khoán ê lâng, nā tú-tio̍h lâng khǹg i tio̍h sı̀n Iâ-so͘ lâi jı̍p Sèng-kàu, i chiū ké kàu chhin-chhiūⁿ chin thàn in lāu-pē ê bēng-lēng ê khoán, chiū the-sı̂ kóng, Goán lāu-pē m̄ chún, á sı̄ kóng, Goán lāu-bú m̄ khéng. Kı̂-sı̍t chit ê thàn kàu ê sū, sı̄ chhut tı̄ lâng ê liông-sim. Siat-sú lán siūⁿ tek-khak sı̄ hó chiū thàn i. Nā phah-sǹg sı̄ m̄ tio̍h lán chiū lı̄-khui i. Mih-sái ké-iàⁿ thoa pē-bú lâi teh the-sı̂ leh.
Lāu bé oē jı̄n lō͘
Koán Tiōng kap Chê Hoân-kong thè Ian-kok khı̀ cheng-hoa̍t Ko͘-tiok kok, phah jı̍p khı̀ chin hn̄g. Ko͘-tiok ê peng tòng lóng boē tiâu, chiū siūⁿ chı̍t ê to̍k pō͘, ēng tām-po̍h peng chà pāi, ín-iú Chê-kok ê peng, tùi Bān-lí Sa-bo̍k ê só͘-chāi khı̀. Hit tè sı̄ Tiong-kok pak hng, kap Ngô͘-lô kau-kài ê só͘-chāi; kó͘-chá ê sı̂ lâng lóng m̄-bat khı̀ hia, só͘-í choân sı̄ iá-siù kap to̍k choâ; koh sı̀-koè lóng bô chúi thang chia̍h, nā khí hong, chiū bı̄n-tùi-bı̄n to bô khoàⁿ-kı̀ⁿ lâng, beh chhut-lâi iū m̄ chai lō͘. Āu-lâi Koán Tiōng chiah siūⁿ kóng, Chiàn-bé khah choē sı̄ tùi pak pêng ê só͘-chāi khı̀ ê; koh nā sı̄ lāu bé, i ê lō͘ iā kiâⁿ khah choē, ū khah chai-iáⁿ. Chiū kéng chı̍t chiah lāu bé, chiong kā-kiuⁿ kā tháu-khí-lâi, pàng hō͘ i ka-kı̄ kiâⁿ, chiah bēng-lēng kun-peng tāi-ke tè chit chiah bé lâi kiâⁿ. Āu-lâi kó-jiân chhē-tio̍h hit tiâu toā-lō͘ thang chhut-lâi.
Nā lūn-kàu Koán Tiōng, sǹg sı̄ kó͘-chá chin chhut-miâ, toā châi-tiāu ê lâng, i ê tı̀-sek chhong-bêng iā sǹg chin chiok, i iáu kam-goān khò hit chiah lāu-bé lâi ín-chhoā i ê lō͘, ná chhin-chhiūⁿ jı̄n i choè sian-siⁿ. Hô-hòng lán ê pêng-siông lâng, thài thang ka-kı̄ chū-chiok chū-ko, m̄ khéng kiû lâng kà-sı̄ leh?
Chha̍k kê ka-kı̄ giâ
Sòng ông mn̄g i ê cháiⁿ-siòng Tn̂g Iòng kóng, Goá só͘ thâi ê lâng, iā sǹg sı̄ chin choē; chóng-sı̄ chiah-ê chèng jı̂n-sı̂n thài lóng iáu-kú sı̄ m̄ kiaⁿ goá, che sı̄ sím-mı̍h iân-kò͘? Tn̂g Iòng kóng, Ông só͘ thâi ê, put-kò sı̄ hiah-ê pháiⁿ lâng. Ông thâi hiah-ê pháiⁿ lâng, só͘-í hó lâng ná m̄ kiaⁿ. Ông nā ài chèng jı̂n-sı̂n ta̍k ê kiaⁿ lí, put-jû m̄ bián hun-piat hó pháiⁿ, lia̍h lâi chiū kā i thâi; án-ni chèng jı̂n-sı̂n tek-khak oē kiaⁿ lah. Kè bô kúi jı̍t, Sòng ông chiū chiong Tn̂g Iòng kā i thâi khı̀. Sio̍k-gú kóng, Choè ba̍k-chhiūⁿ chha̍k kê ka-kı̄ giâ; iā kóng, Lı̂m Tō͘-khiân chù chhèng phah ka-kı̄. In-ūi Lı̂m Tō͘-khiân, (chāi-chá Tâi-oân ê hái-chha̍t), ū chù chı̍t khoán ê chhèng lâi ēng; bô siūⁿ āu-lâi kè bô joā-kú, ka-kı̄ hō͘ hit khoán ê chhèng phah sí. Chhin-chhiūⁿ chit khoán ê chū-chok chū-siū, chiàⁿ tú-hó kap Tn̂g Iòng ê sū saⁿ-tâng.
Lóng tio̍h jı̄n chit
Chông-á kap Kok-á nn̄g lâng saⁿ-kap khı̀ chhı̄ iûⁿ, iā nn̄g lâng ê iûⁿ lóng ū phah-m̄-kı̀ⁿ. Ū lâng mn̄g Chông-á khoàⁿ sı̄ àn-cháiⁿ-iūⁿ thài oē phah-m̄-kı̀ⁿ iûⁿ. Chông-á kóng, Goá sı̄ in-ūi chhı̄-iûⁿ ê sı̂ teh khoàⁿ chheh. Ia̍h mn̄g Kok-á khoàⁿ sı̄ ūi siáⁿ-sū sit-lo̍h iûⁿ. Kok-á kóng, Sı̄ in-ūi khoàⁿ-iûⁿ ê sı̂-chē teh poa̍h-kiáu. Án-ni in nn̄g lâng só͘ choè ê sū sui-jiân sı̄ bô saⁿ tâng, phah-m̄-kı̀ⁿ iûⁿ khiok sı̄ siāng chı̍t khoán.
Sè-kan lâng bô lūn choè sím-mı̍h tāi-chı̀, lóng tio̍h ài ū choan-sim, chū-jiân kiàn choè kiàn sêng-kong,kı̀ⁿ pān kı̀ⁿ hó-sè. Iā nā beh chhiú teh choè chı̍t hāng, sim-koaⁿ teh siūⁿ hit hāng, lâng khiā tı̄ chit pêng soaⁿ, sim-koaⁿ teh siūⁿ hit pêng; án-ni chū-jiân tek-khak boē oē sêng-kong. Lâng kóng, Sı̍p gē kiú put sêng, iā kóng, Sè-siōng bû lân sū, to͘ iû sim put choan, sı̍t-chāi kó-jiân sı̄ án-ni.
Iûⁿ chhēng hó͘ phê
Iông-chú bat kóng Ū chı̍t chiah iûⁿ, seng-khu moa chı̍t niá hó͘-phê, kiâⁿ kàu tı̄ khòng-iá nı̍h; chı̍t-ē khoàⁿ-kı̀ⁿ chháu hoat kàu chin o͘-iù, chiū hoaⁿ-hí kàu boē kò͘ tit. Chı̍t-ē khoàⁿ-kı̀ⁿ chhâi-lông, chiū put-chí kiaⁿ, iā khiok boē kı̀-tit seng-khu ū tà hit niá hó͘-phê.
Chhin-chhiūⁿ sè-kan ū chı̍t khoán ké-hó ê siáu-jı̂n, sui-jiân sı̄ pah-poaⁿ ê iám-sek, chng kàu ná-chún chèng-keng lâng, ké kàu chin ū kun-chú ê khı̀-khài, m̄-kú i ê teh kiâⁿ-ta̍h kap kóng-oē, iû-goân siông-siông oē hián-chhut i ê pún-siòng lâi. Tāi-ha̍k ê chheh ū kóng, Ū chin-sı̍t tı̄ sim-lāi, chiū oē hián-chhut hit ê hêng-iông tı̄ goā-bı̄n; chiū-sı̄ kóng-khí lâng ê hêng-tōng kú-chí sı̄ boē ké choè tit.
Hô͘ ká hó͘ ui
Chāi-chá Chiau Hê-sut choè Chhó͘-kok ê cháiⁿ-siòng; hit sı̂ Chhó͘-kok ê peng chin kiông, lia̍t-kok lóng ùi-khū i; tı̀-kàu i ê ông iā teh khı̄-khek, siūⁿ beh thâi Chiau Hê-sut, Ū chı̍t jı̍t Chhó͘ Soan-ông chē tiān ê sı̂, mn̄g chèng jı̂n sı̂n kóng, Pak-hng ê kok lóng kiaⁿ Chiau Hê-sut, che sı̄ sím-mı̍h iân-kò͘?
Chèng tiâu-sı̂n lóng chai ông ū beh thâi i ê ı̀-sù, só͘-í bô lâng káⁿ chhap-chhùi. Khiok ū chı̍t lâng, miâ-kiò Kang It, chhut pan lâi chàu kóng, Ū chı̍t chiah hó͘ chhut-lâi thó chia̍h ê sı̂-chūn, tit-tio̍h chı̍t chiah hô͘-lı̂, hit chiah hô͘-lı̂ chai-kiò cháu boē lı̄, chiū kā hó͘ kóng, Lí m̄-thang chia̍h goá, in-ūi Thian-tè ū bēng-lēng goá choè pah hāng siù ê sı̄-toā; lí nā chia̍h goá, sǹg sı̄ ûi-ke̍h Thian-tè ê bēng-lēng. Lí nā m̄ sı̀n goá ê oē, chhiáⁿ lí hō͘ goá choè thâu-chêng kiâⁿ, lí tè goá ka-chiah-āu, iā kā khoàⁿ pah hāng siù kı̀ⁿ-tio̍h goá ê sı̂, tek-khak oē sı̀-soàⁿ siám-pı̄ goá. Hó͘ chiū beh chhı̀-khoàⁿ ū iáⁿ bô, tè hô͘-lı̂ ê ka-chiah-āu khı̀; kó-jiân pah hāng siù kı̀ⁿ-tio̍h lóng cháu-pı̄ i; iā hit chiah hó͘ m̄ chai pah siù teh kiaⁿ i, lia̍h-choè chin-chiàⁿ ū iáⁿ teh kiaⁿ hit chiah hô͘-lı̂. Taⁿ Chiau Hê-sut sı̄ choè Chhó͘-kok ê cháiⁿ-siòng, chiáng-koán kun-peng kap kok-lāi ê sū. Só͘-í pak-hng ê kok teh kiaⁿ i, sı̍t-chāi m̄ sı̄ teh kiaⁿ Chiau Hê-sut, sı̄ teh kiaⁿ tāi-ông ê peng-bé chiah-nı̍h choē. Chhó͘ Soan-ông thiaⁿ-liáu ū chêng-lí, chiū bô siūⁿ beh thâi Chiau Hê-siut.
Lūn-kàu hô͘ ké hó͘ ui chit-khoán, sè-kan lâng khah choē sı̄ án-ni; nā hit-ê lâng ū tām-po̍h chı̂ⁿ-châi iah sè-le̍k, chiū tāi-ke lóng ài khı̀ kap i kau-poê, ū-sı̂ iā bô siū-tio̍h i ê hó-lé chiap-chiap saⁿ-khoán-thāi, nā chhut-lâi kàu tè chiū phín-phóng hit-ê lâng sı̄ chham i joā hó tú joā-hó, kı̂-sı̍t iā bô-iáⁿ bô-jiah, put-kò sı̄ hit-chióng ài khò lâng ê sè ê, ka-kı̄ chông chhut-lâi; ū-sı̂ iā m̄ saⁿ-bat, iā tùi pa̍t lâng phín kóng sı̄ in ê sím-mı̍h chhin-chiâⁿ. Nā-sı̄ chit hō lâng, to chiàⁿ sı̄ beh khò lâng ê sè, thang khı̀ khi-hū lâng. M̄-kú iáu ū chı̍t khoán, hit ê ū sè-le̍k ê lâng, bô boeh hō͘ lâng khò, iā hit ê teh kap i kau-poê ê lâng, iā bô beh khò i ê sè-le̍k; chóng-sı̄ ū teh kap i lâi-óng ê sı̂, chiū ta̍k lâng iā khah khū-phàⁿ; kı̂-sı̍t in lóng bô chûn sim-mı̍h m̄ hó ê sim-koaⁿ. Chhin-chhiūⁿ cha̍p-sò͘ nı̂ chêng, ū pah goā ê thó͘-húi chū-chı̍p tı̄ A-lí-káng ē, oá Ka-la̍h-po͘ hit ê soaⁿ kap koaⁿ-peng teh tí-khòng. Āu-lâi Chèng-hú ū phài kun-tūi beh khı̀ bia̍t in; chit hō tāi-chı̀ boē bián-tit ū hit hō hó lâng hō͘ pháiⁿ lâng liân-lūi ê sū.
Chèng-hú chai-kiò lán kàu-hoē ê lâng khah bô chhap chit hō ê tāi-chı̀, in-ūi chai-kiò lán bô siū hiah-ê siâ-su̍t ê bê-he̍k, chiū ná teh so͘-sek ê sı̂, khah bô kiáu-jiáu tio̍h lán ê hoē-lú, ta̍k ê khoàⁿ liáu siūⁿ che khah oē khò tit; chiū ài beh chioh thiaⁿ tō-lí ê miâ thang pó-hō͘ in ê sin-ka. Ta̍k jı̍t lé-pài-tn̂g ê lâng lóng cha̍t thóng-thóng, nā tú-tio̍h lé-pài-jı̍t kui chng ê lâng choè chı̍t-ē piàⁿ-lâi, khiā kàu koe-lō͘ tiâⁿ-nı̍h lóng tı̄ⁿ that-that. Bô siūⁿ kàu so͘-sek ê sū chı̍t-ē kè-khı̀ chiū tı̍t-tı̍t liu-khı̀; taⁿ hiān-sı̂ chin léng-tām. Hài--ah! Chhin-chhiūⁿ chit khoán oē hiáu kò͘ jio̍k-thé, iā boē hiáu-tit kò͘ lêng-hûn; sı̄ bô koh-iūⁿ kap hit ê khò lâng ê sè-le̍k sio-siāng.
Ēng Chin-chu toāⁿ chiáu-á
Chāi-chá Sûi Hô͘ ū tit-tio̍h chı̍t lia̍p chin-chu, chin toā lia̍p koh chin chheng-liāng; sǹg sı̄ sè-kài bô tè thang chhú ê pó-poè. Ū chı̍t ê lâng khoàⁿ-kı̀ⁿ khong-tiong chı̍t chiah chiáu, in-ūi sim-lāi put-chí ı̀-ài, chiū the̍h Sûi Hô͘ hit lia̍p chu, chún choè toāⁿ chí, lâi toāⁿ khong-tiong hit chiah chiáu. Bô siūⁿ hit chiah chiáu phah to bô tio̍h, iā hit lia̍p chu soà m̄ chai ka-la̍uh tùi toh-lo̍h khı̀ lah.
Taⁿ lán ta̍k lâng ka-kı̄ ê miā sı̄ bô siang tiâu, kiám m̄ sı̄ bô tè thang khı̀ chhú ê pó-poè mah? Kiám m̄ sı̄ pí Sûi Hô͘ ê chu khah tùi-tiōng mah? Khó-sioh sè-kan lâng choē-choē sı̄ in-ūi in ê su-io̍k khoàⁿ choè hó ê só͘-chāi, chiū phe-miā khı̀ choè. Kiám bô chhin-chhiūⁿ ēng Sûi Hô͘ ê chu teh toāⁿ chiáu-á chı̍t poaⁿ-iūⁿ? Sio̍k-gú kóng, Jı̂n ūi châi sú, niáu ūi sı̍t bông; chit hō oē chin chiàⁿ sı̄ hô͘-tô͘. Chhı̀ mn̄g khoàⁿ lâng oē ēng sím-mih khı̀ oāⁿ i ê sı̀ⁿ-miā tit á boē. M̄-kú lâng choē-choē sı̄ oē hiáu-tit án-ni kóng, iā m̄ khéng pàng-sak su-io̍k lâi kò͘ sı̀ⁿ-miā, siūⁿ-liáu chin thang thó͘-khùi.
Tham sió Sit toā
Chiàn kok ê sı̂, oá-kūn Chı̀n-kok ê só͘-chāi, ū chı̍t kok sió kok kiò choè Kiû-iû. Chı̀n-kok ê cháiⁿ-siòng Tı̀-pek siông-siông siūⁿ beh khı̀ bia̍t i, m̄-kú hit ê lō͘-chháu chin oe̍h chin soè tiâu, koh choan khiⁿ-kau liáu-liáu chin pháiⁿ kiâⁿ, siūⁿ liáu lóng bô ki-hoē. Āu-lâi chiū siūⁿ chı̍t ê hoat-tō͘, tiâu-kò͘-ı̀ chù chı̍t ê chin toā ê cheng, pí chhia-lō͘ ū nn̄g pē khoah; chiū phài lâng khı̀ kā Kiû-iû kok ê ông kóng chit ê cheng beh sàng i. Kiû-iû kok ông chiū beh phài lâng khı̀ siu-lí tō-lō͘, chiong hit ê khah koâiⁿ ê phiⁿ hō͘ kē, iā chiong hiah-ê khiⁿ-kau thūn khí--lâi, pı̄-pān thang hó ūn-poaⁿ chit ê toā cheng.
I ū chı̍t ê jı̂n-sı̂n, miâ-kiò Chhek-chiong Bān-chi, khó͘-khǹg i kóng, Kó͘-chá ê sı̂ ū teh kóng, Chí ū tio̍h siú hoat-tō͘ chiah oē hō͘ kok-nı̍h pêng-tiāⁿ; lán thài thang bô iân bô kò͘ sêng-siū i Tı̀-pek chit ê toā cheng? Chiàu khoàⁿ Tı̀-pek ê choè lâng sı̄ tham-sim koh bô sı̀n-sı̍t, tek-khak sı̄ in-ūi beh kong-phah lán, siūⁿ liáu bô ki-hoē,só͘-í chù chı̍t ê pí chhia-lō͘ siang pē toā ê cheng lâi sàng hō͘ tāi-ông; tāi-ông nā khı̀ ngiâ-chih chit ê cheng, tio̍h koâiⁿ ê hoāⁿ thoáⁿ hō͘ i pı̂ⁿ, khiⁿ-kau thūn hō͘ i tı̄ⁿ, i chiū thang thàn chit ê ki-hoē chı̀n-peng lâi kong-phah lán. I chiong chit hō oē lâi khó͘-khǹg i ê ông chin kú. I ê ông lóng m̄ thiaⁿ i, hoán-tńg kóng, In sǹg sı̄ toā kok beh kap lán kau-poê, lán nā m̄ sêng-siū tek-khak oē hō͘ in koè-siàu. Sûi-sı̂ chhe lâng khı̀ thūn lō͘, soà khı̀ ngiâ-chih hit ê toā cheng. Chhek-chiong Bān-chi thè-tiâu tò-lâi chiū kóng, Choè lâng ê jı̂n-sı̂n nā bô chı̍t tiám chı̄n-tiong ê sim-koaⁿ sǹg choè sı̄ ū choē; nā sı̄ lán ū chı̍t tiám chı̄n-tiong ê sim, ông bô beh thiaⁿ lán, án-ni lán tio̍h siám-pı̄ khah hn̄g leh. Sûi-sı̂ tùi sió-lō͘ tô-cháu khı̀ Oē-kok; kè ū chhit jı̍t kú nā-tiāⁿ hit ê Kiû-iû kok kó-jiân hō͘ Tı̀-pek bia̍t-khı̀.
Koh ū chı̍t ê kò͘-sū iû-goân kap chit-ê beh saⁿ-tâng. Pí téng-bı̄n só͘ kóng chit chân khah chá oá ū nn̄g pah nı̂, iā sı̄ tı̄ Chı̀n kok-nı̍h. Hit sı̂ sı̄ Hiàn-kong teh chē ūi. Hiàn-kong siūⁿ beh khı̀ bia̍t Kek-kok; m̄-kú tio̍h tùi Gû-kok keng-kè, chiah oē-tit kàu Kek ê toē-hng. Án-ni siūⁿ-liáu chin bô hoat-tō͘, chiū kap i ê jı̂n-sı̂n chham-siông. I ū chı̍t ê bô͘-sū, miâ-kiò Sûn Sek chhut-lâi kóng tio̍h tùi Gû-kok kā i chioh lō͘ kè. Hiàn-kong kóng, Gû-kong beh thài khéng chioh lán? Sûn Sek chiah kóng, Goá chai Gû-kong ê lâng sı̄ chin tham-sim; nā ēng Sûi-kek ê pó-ge̍k kap Khut só͘ chhut ê pó bé chit nn̄g hāng lâi khı̀ sàng i, i chiū oē chioh lán kè. Hiàn-kong kóng, Chit nn̄g hāng sı̄ lán kok-nı̍h ê pó-poè, thài thang khı̀ sàng pa̍t lâng? Sûn Sek kóng, Che sı̄ ná chhin-chhiūⁿ kià i khǹg, āu-lâi chiah kā i thó. Hiàn-kong thiaⁿ-liáu ū chêng-lí, chiū chiong ge̍k kap bé kau-tāi Sûn Sek khı̀ sàng Gû-kong. Gû-kong chhiú-nı̍h the̍h hit tè pó-ge̍k, ba̍k-chiu teh khoàⁿ pó bé, sim-lāi toā hoaⁿ-hí.
I iā ū chı̍t ê gâu ê jı̂n-sı̂n miâ-kiò Kiong Chi-kı̂ kàn-chèng i kóng, Tek-khak m̄-thang siu i chit nn̄g hāng lé-mı̍h. Nā siu i ê sı̂ tek-khak tio̍h lō͘ chioh i kè, ia̍h āu-lâi chı̀n bia̍t Kek-kok liáu-āu chóng bô tiāⁿ-tiāⁿ kā lán chioh lō͘ khı̀ koán hia ê peh-sı̀ⁿ; tek-khak liân lán ê kok iā oē bô--khı̀. Lâng kóng, Tûn-bông chhí-hân (chhùi-tûn bô--khı̀, chhùi-khí chiū oē koâⁿ)chiū-sı̄ chit ê ı̀-sù. Só͘-í tek-khak m̄-thang chún i ê peng tùi chia kè. Chóng-sı̄ Gû-kong ê sim-koaⁿ í-keng hō͘ hit ê pó bé kap pó-ge̍k bê khı̀, chiū ı̀n Kiong Chi-kı̂ kóng, Chı̀n kap Gû sǹg sı̄ siāng jı̄-sı̀ⁿ ê kok, i káⁿ put-jím lâi bia̍t goá. Koh goá teh chè-sū put-chí khiân-sêng, iā ēng chin choē hó mı̍h án-ni sı̂n-bêng tek-khak oē pó-pı̀ goá. Kiong Chi-kı̂ kóng, Che lóng boē khò tit ê sū, Chı̀n oē hiah toā kok iā sı̄ ū thun-chiàm chong-cho̍k lāi kúi-nā kok, koh hiān-sı̂ beh khı̀ bia̍t i ê Kek-kok, kiám m̄ sı̄ iû-goân siāng chong-cho̍k? Ia̍h hit ê sı̂n-bêng ê sū sǹg-sı̄ bông-bông biáu-biáu, bô iáⁿ bô chiah; siat-sú Chı̀n nā chiong Gû-kok bia̍t khı̀ liáu, iā iû-goân ēng hó mı̍h lâi chè-hiàn, hit ê sı̂n-bêng kiám ū kóng oē thò͘ chhut lâi hêng i mah? Só͘-í che lóng sı̄ boē khò tit ê sū. Kiong Chi-kı̂ án-ni ū chhùi kóng kàu bô noā, m̄-kú bô hoat-tō͘ thang i-tı̄ Gû-kong ê tham-sim. Só͘-í Gû-kong m̄ thiaⁿ i khó͘-khǹg; kèng-jiân tùi Chı̀n-kok ê sù-chiá tah-èng lō͘ beh chioh i kè.
Kiong Chi-kı̂ chiū tò-khı̀, kàu in chhù ê sı̂ chiū tùi lâng kóng, Lán ê jı̂n-kun kóng kiò sı̂n-bêng oē pó-pı̀ i, goá khoàⁿ chiah-ê sı̂n-bêng kin-nı̂ ê jı̄-káu-mı̂ bô thang koh-chài chia̍h tio̍h Gû-kok ê chè-mı̍h. Kóng-liáu chiū chiong i ê bó͘-kiáⁿ iā soà poaⁿ chhut kok-goā, cháu khı̀ tiàm tı̄ Chô-kok. Kó-jiân tı̄ hit nı̂ ê nı̂-bé, Chı̀n ê peng khı̀ bia̍t Kek-kok liáu-āu khái-soân beh tò-lâi ê sı̂, iû-goân tùi Gû-kok keng-kè, chiū sūn-soà chiong Gû-kok kā I bia̍t khı̀, soà lia̍h Gû-kong kap in ê tāi-hu-koaⁿ Pek-lí Hê tò-khı̀ in kok-nı̍h.
Lâng kóng, Chai thang kàu-gia̍h chiū boē siū lêng-jio̍k, chai thang hioh-khùn chiū boē ū gûi-hiám. Che sı̄ teh kéng-kài lâng tio̍h an-hūn siú-kí, m̄-thang sim-koaⁿ siuⁿ toā ê. Chóng-sı̄ kóng khiok sı̄ khah khoài; nā-sı̄ beh chiàu án-ni lâi kiâⁿ sı̄ chin oh. In-ūi chı̍t tiám tham ê sim-koaⁿ chin oh-tit tû khı̀. Tùi kó͘-chá kàu taⁿ ū-ê bia̍t kok, ū-ê kheng ka, ū-ê pāi-hoāi miâ-siaⁿ, ū-ê sit-lo̍h sı̀ⁿ-miā, choē-choē sı̄ tùi chit jı̄ lâi. Ū-ê khah lı̄-hāi ê pı̀ⁿ kàu hông-tè choè kè chhiú, sı̀ⁿ-miā chiah bô--khı̀. Ū-ê bē-chēng-bē sū chiū phoà, hō͘ koaⁿ--lâng lia̍h-khı̀ tēng sí-hêng; bô m̄ sı̄ ūi-tio̍h tham lâi khí-kiàn. Só͘-í tùi soè-hàn ê sı̂ eng-kai tio̍h seng tùi chit hāng ê siu-sin lâi tı̀-ı̀. Chiū-sı̄ ta̍k lâng bô m̄ tio̍h ēng téng-bı̄n hit nn̄g chām ê kò͘-sū lâi choè kéng-kài. Sio̍k-gú ū kóng, Tham--jı̄ pı̂n--jı̄ khak, só͘-í lâng nā oē chai-chiok chiū sim-koaⁿ hô sı̂ m̄ pêng-an. Sèng-keng iā ū kóng, Tham-châi sı̄ choè bān hāng pháiⁿ ê kun-goân. Kı̂-sı̍t bô lūn sím-mı̍h sū nā ū chı̍t jı̄ tham--jı̄ tı̄ sim-lāi, chiū lóng kàu-gia̍h thang hāi lâng.
Oē siú chiah sı̄ Gâu
Tiō Siong-chú khı̀ kong-phah Te̍k-kok ū tek-sèng. Te̍k-kok ū nn̄g ê siâⁿ kiò-choè Tiong-jı̂n Ló-jı̂n. Teh kò͘ hit nn̄g ê siâⁿ ê koaⁿ-hú ū chhe sù-chiá lâi beh kı̀ⁿ Siong-chú, kam-goān chiong in ê siâⁿ-tı̂ lâi kui-hâng; hit-sı̂ Siong-chú tú-á teh chia̍h ē-tàu thiaⁿ-liáu iā bô sím-mı̍h hoaⁿ-hí ê khoán. I ê kun-lâng khoàⁿ-liáu chin kı̂-koài; chiū mn̄g i kóng, Chı̍t jı̍t ê tiong-kan, tit-tio̍h nn̄g chō ê siâⁿ-tı̂, iū-koh bô sím-mı̍h toā chhut-la̍t, á-sı̄ liáu siuⁿ choē pún, án-ni sǹg sı̄ chı̍t kiāⁿ thang hoaⁿ-hí ê tāi-chı̀, cháiⁿ-iūⁿ chú-kong ê bı̄n hoán-tńg ū iu-chhiû ê khoán, che hō͘ goán chin boē hiáu-tit. Siong-chú chiū ı̀n i kóng, Hit-hō kang-hô ê toā lâu-chúi, put-kò saⁿ nn̄g jı̍t chiū chiām-chiām thè khı̀; hit hō hē-thiⁿ ê toā hong-hō͘ ke̍k-kú chı̍t poàⁿ jı̍t iā chiū pêng-chēng. Hiān-chāi lán Tiō-kok bô ū sím-mı̍h toā tek-hēng, chı̍t jı̍t tit-tio̍h nn̄g chō ê siâⁿ-tı̂, í-keng sǹg choè sı̄ kiâⁿ kàu ke̍k koâiⁿ ê só͘-chāi; kiaⁿ oē tùi án-ni liáu-āu chiū chiām-chiām soe-pāi khı̀ lah.
Hit sı̂ Khóng-chú thiaⁿ-kı̀ⁿ chit ê tāi-chı̀ chiū kóng, Tiō-kok sı̄ teh beh heng ê tiāu-thâu; tùi kó͘-chá í-lâi hoân-ló iu-chhiû sı̄ oē hō͘ lâng heng-ōng; hoaⁿ-hí khoài-lo̍k sı̄ oē hō͘ lâng pāi-bông. Oē tek-sèng boē kóng-tit sı̄ oh ê sū, tio̍h oē pó-siú-tit kàu kiú-oán, he chiah sı̄ ûi-lân ê tāi-chı̀.
Kó͘ lâng giân kóng, Hiān-sı̂ ê sè-kài, m̄-tān-nā chhòng sū-gia̍p ûi-lân, beh lâi oē pó-siú-tit iā m̄ sı̄ iông-ı̄ⁿ ê sū, sı̍t-chāi chin ū-iáⁿ. Chóng-sı̄ lâng nā tı̄ khoài-lo̍k ê sı̂ m̄-thang boē kı̀-tit kan-khó͘ hit-tia̍p, iā m̄-thang chia̍h pá boē kı̀-tit iau sı̂. Án-ni chiah lio̍h-á oē pó-tit i chı̍t-sı̀ lâng boē siuⁿ lı̄-keng; nā bô chiū nn̄g-lı̀n-poàⁿ iū-koh péng-lo̍h lâi. Chóng-sı̄ lán kàu-hoē lāi ê lâng iā tio̍h ài chin soè-jı̄. Ū chı̍t khoán ê hoē-iú chı̍t-ē jı̍p-kàu, ia̍h chiū hia-hia pai-pai ka-kı̄ chin tek-ı̀, ná-chhin-chhiūⁿ thian-kok ê só-sı̂ í-keng tı̄ i chhiú tiong-ng-nı̍h, hit ê thian-kok ê bián-liû í-keng tı̄ i hau-pau-á lāi. Lóng bô siūⁿ kàu Sèng-keng-nı̍h iā ū bêng-bêng kóng-kè. Kı̀ⁿ-nā chheng-ho͘ goá, Chú ah, Chú ah hit hō ê lâng bı̄ pit-jiân lóng oē chı̀n-jı̍p thian-kok. Án-ni thang chai chit hō jı̍p-kàu ê sū, sui-jiân sı̄ chin iàu-kín, chóng-sı̄ hit hō chin-chiàⁿ kàu-iú ê tek-hēng, sı̄ kèng koh khah tio̍h iàu-kín.
Chı̍t lâng chı̍t hāng tio̍h
Chāi-chá tı̄ Chi-ná Soaⁿ-tang Chê Ló͘ nn̄g kok ê kau-kài, hit só͘-chāi ū chı̍t ê lâng siⁿ saⁿ ê kiáⁿ; in lāu-pē chiū thè i chhē chhut-miâ ê sian-siⁿ lâi kà-sı̄ i jı̂n-gı̄ ê tō-lí. Āu-lâi kàu chut-gia̍p tò-lâi, in lāu-pē mn̄g in kóng, Jı̂n-gı̄ ê tō-lí cháiⁿ-iūⁿ kóng? Hit ê toā kiáⁿ chiū ı̀n kóng, Jı̂n-gı̄ sı̄ kiò goá tio̍h thiàⁿ-sioh seng-khu, jiân-āu choè-chiâⁿ hó ê miâ-siaⁿ. Hit ê tē jı̄ kiáⁿ kóng, Jı̂n-gı̄ sı̄ kiò goá tio̍h pàng-sak seng-khu, lâi chiâⁿ jı̂n-ài ê miâ-siaⁿ. Hit ê tē saⁿ kiáⁿ kóng, Jı̂n-gı̄ sı̄ kiò goá tio̍h pó-hō͘ seng-khu, chiàu-kò͘ miâ-siaⁿ, nn̄g hāng lóng oē chiâu-chn̂g. Taⁿ in chit saⁿ ê hiaⁿ-tı̄-á siāng sı̄ chı̍t ê sian-siⁿ kà-sı̄ in, m̄-kú in tāi-ke ê kiàn-kái lóng sı̄ toā-toā bô saⁿ-tâng.
Tı̄ Ìn-tō͘ ê só͘-chāi bat ū lâng khan chı̍t chiah chhiūⁿ tùi koe-chhı̄-nı̍h kè,ū lâng kóng hit chiah chhiūⁿ sı̄ o͘-ê, ū lâng kóng hit chiah chhiūⁿ sı̄ pe̍h-ê, ū lâng kóng hit chiah chhiūⁿ sı̄ hoe-sek ê; tāi-ke chı̀ⁿ kàu khiā chin khiā hiān, lóng m̄ khéng sio-niū, tı̍t-tı̍t beh oan-ke khí lâi. Āu-lâi lâng chiah khı̀ chhâ khoàⁿ tàu-tí sı̄ sím-mı̍h sek, chiah chai saⁿ lâng só͘ kóng ê oē lóng ū chı̍t hāng tio̍h. In-ūi hit chiah chhiūⁿ chı̍t pêng sı̄ o͘-ê, chı̍t pêng sı̄ pe̍h-ê. Tı̄ chiàⁿ pêng ê kan-ta khoàⁿ-kı̀ⁿ pe̍h-sek, só͘-í kóng sı̄ pe̍h chhiūⁿ; tı̄ tò-pêng ê kan-ka khoàⁿ-kı̀ⁿ o͘ sek, só͘-í kóng sı̄ o͘ chhiūⁿ. Iā hit ê tı̄ thâu-chêng ê khoàⁿ-kı̀ⁿ iā ū pe̍h iā ū o͘, só͘-í kóng sı̄ hoe-sek ê chhiūⁿ.
Koh ū chı̍t hāng chhin-chhiūⁿ hoà-seng ê lūi. Ū chı̍t khoán thâng, chham kim-ku beh saⁿ-siāng khoán, chóng-sı̄ i ê sek-tı̄ chı̍t jı̍t pı̀ⁿ kúi-nā sek. Bat tı̄ chá-khí sı̂ lia̍h lâi kā i khoàⁿ sı̄ kim ê sek-tı̄; kàu ē-po͘ kā i khoàⁿ pı̀ⁿ choè chhiⁿ-ê; bı̂n-á-chá khí iū pı̀ⁿ choè o͘-ê, á-sı̄ pı̀ⁿ choè hoe-sek ê, lóng bô tiāⁿ-tio̍h. Sı̄ chhin-chhiūⁿ lâng teh chhı̄ chhâm-á (niû-á); chá-khí khoàⁿ sı̄ thâng, ē-po͘ khoàⁿ chı̍t lia̍p pho̍k-á(chhâm-kián); bı̂n-á-chài kā the̍h chhut lâi khoàⁿ-liáu chı̍t lia̍p chhin-chhiūⁿ thô͘-tāu-jı̂n; keh chı̍t poàⁿ jı̍t iū pı̀ⁿ chiah bé-ia̍h chhut-lâi; ia̍h chiū oē kang-bú saⁿ thı̄n, koh pàng nn̄g lâi pı̀ⁿ-choè chhâm-á. Chóng-sı̄ nā he lóng m̄-bat khoàⁿ-kı̀ⁿ ê lâng, thiaⁿ-lián chiū chin giâu-gı̂.
Iā koh chı̍t khoán kò͘-chip put-ho̍k-jı̂n ê, chhin-chhiūⁿ khoàⁿ-kı̀ⁿ chhiūⁿ ê chı̍t pêng, chiū lia̍h choè i ba̍k-chiu só͘ khoàⁿ sı̄ án-ni, chiū ngı̄-ngı̄ lia̍h choè án-ni tio̍h. Chóng-sı̄ nā chhin ba̍k khoàⁿ-kı̀ⁿ án-ni chı̀ⁿ iáu oē kóng-tit. Ū chı̍t chéng hiah-ê bê-sı̀n kúi-sı̂n ê sū, bêng-bêng to bô iáⁿ ê tāi-chı̀ iā saⁿ-kap hū hoē-chōng kàu chin tú chin, hiān tú hiān, bo̍h-kioh ba̍k-chiu ū khoàⁿ-kı̀ⁿ ê sū, chū-jiân tek-khak sı̄ beh chı̀ⁿ kàu iâⁿ. Án-ni khó-kiàn sè-kan sū sı̄ chin khoah, m̄-thang ēng ka-kı̄ sió-khoá ê tı̀-sek, chiū beh kā i toàn kóng sı̄ cháiⁿ-iūⁿ; lóng tio̍h khoàⁿ hit ê sū-thé ū ha̍p tō-lí thàn hoat-tō͘ á bô, chiah thang khı̀ kiâⁿ.
Oē chiū bô Ûi-lân
Ho̍k Chú-chiān teh choè Siān-hú ê toē-hng koaⁿ, hit sı̂ Iú-jio̍k khı̀ chhē i; khoàⁿ-kı̀ⁿ i pı̀ⁿ chin siau-sán, chiū mn̄g i sı̄ sím-mı̍h iân-kò͘. Ho̍k Chú-chiān ı̀n i kóng, Lí lóng m̄ chai mah? Goá sı̄ bô lō͘-ēng ê lâng, phài goá lâi choè Siān-hú ê toē-hng koaⁿ; in-ūi tāi-chı̀ chin choē, put-chí bô êng, sim-lāi iā chin hoân-ló, só͘-í seng-khu chiah oē chiah-nı̍h siau-sán lah. Iú-jio̍k kóng, Kó͘-chá ê sı̂, Sùn teh choè hông-tè, i toâⁿ ngó͘-hiân ê khı̂m, chhiùⁿ lâm-hong ê si, choè i an-hân chū-chāi, thong kok iû-goân sı̄ liāu-lí kàu hó-sè hó-sè. Hiān-chāi chit ê sió-sió khoá-khoá ê Siān-hú nā-tiāⁿ, lí chiū hoân-ló kàu lóng boē hiáu-tit thang tı̄-lí; siat-sú hō͘ lí choè hông-tè lâi koán kui kok, ia̍h beh án-cháiⁿ-iūⁿ leh?
Lán lâng tı̄ chit sè-kan, tio̍h ū hit-hāng ê pún-sū, chiah oē pān tit hit-hāng ê sū-gia̍p. Siat-sú to bô hit hō toā châi-tiāu, kan-ta siūⁿ beh choè hit hō toā sū-gia̍p, tek-khak sı̄ chiong hiah-ê tio̍h-boâ kui tı̄ khang-khang. Sio̍k-gú kóng, Tı̀ chio̍h cheng-khū teh thiàu ka-koan; chhut chin choē la̍t koh m̄ hó khoàⁿ, chiū-sı̄ chit ê ı̀-sù. Chóng-sı̄ téng-bı̄n só͘ kóng, Ho̍k Chú-chiān choè Siān-hú ê toē-hng koaⁿ, sui-jiân sı̄ bô toā châi-tiāu, khiok iā chı̄n sim lâi liāu-lí; só͘-í boâ kàu ka-kı̄ ê sin-thé lóng siau-sán khı̀. M̄-kú Siān-hú ê kàu-hoà toā heng-khí, án-ni sǹg sı̄ toā hó ê koaⁿ-oân. Nā pí-phēng iáu chı̍t khoán, chhin-chhiūⁿ chit hō châi-tiāu iū bô, chı̀-khı̀ iū toā, kan-ta kò͘ i ka-kı̄ oē pûi, m̄ koán peh-sı̀ⁿ cháiⁿ-iūⁿ kan-khó͘, che chiū thian chha tı̄ ian lah.
Khoàⁿ kūn bô khoàⁿ hn̄g
Bó͘ só͘-chāi ū chı̍t ūi toā-ke kháu-chèng ê lâng, in ê chàu-kha tún kàu chı̍t tui chhâ, iā hit ê ian-tâng chàu-chhùi koh tú hó ǹg tı̄ hia. Ū chı̍t ê lâng khoàⁿ-liáu chiū siūⁿ án-ni put-chí gûi-hiám; chiū tùi chú-lâng kóng, Tio̍h chiong ian-tâng chhùi soá tùi piⁿ-á khı̀, iā chiong hiah-ê chhâ-chháu poaⁿ-soá khı̀ pa̍t-ūi, chiah bô gûi-hiám; nā bô, kiaⁿ-liáu ū hé-chai. Chú-lâng m̄ thiaⁿ i.
Kè bô joā-kú, kó-jiân tùi hiah-ê chhâ-chháu ê tiong-kan khí hé, chiū ū kúi-nā lâng lâi kap i tàu kha-chhiú, phah hé hō͘ hoa. Chóng-sı̄ tāi-ke í-keng sio kàu chhàu-thâu noā-hı̄; āu-lâi chú-lâng pı̄-pān iân-sia̍h, lâi kā tāi-ke seh to-siā, chiū chhiáⁿ hiah-ê chhàu-thâu noā-hı̄ ê chē toā-ūi; iā hit ê kà i soá ian-tâng poaⁿ chhâ-chháu ê lâng, khiok bô khı̀ chhiáⁿ i. Só͘-í hiān-sı̂ ê lâng ū chı̍t kù oē kóng, Khiok tu̍t soá sin, bû un-te̍k; chiau thô͘ lān ge̍k ûi siōng kheh. (Chiū-sı̄ kóng, tāi-seng kah i tı̂-hông, oāⁿ ian-tâng chhùi, soá-khui chhâ-chháu, chit hō liōng-chá tiuⁿ-tı̂ ê khùi-la̍t chı̄n toā, in lóng bô siàu-liām i ê un-te̍k. Iā thoè in phah hé hiah-ê lâng ū-ê sio kàu chhàu thâu, ū-ê noā hia̍h, in chiū siūⁿ kóng, Che kiù lán ê kín-kip kong-lô chin choē, chiū chhiáⁿ in lâi choè siōng-téng ê lâng kheh).
Sè-kan ū chin choē hit hō ûi-hui chok-tái, ta̍k hāng káⁿ choè ê lâng, iā siông-siông ū lâng khó͘-khǹg i tio̍h hoán-hoé koé-pı̀ⁿ lâi kui Siōng-tè ê chin-lí, thang bián-khı̀ āu-lâi ê chai-ē; iā m̄ bián choè kàu āu-lâi sū phoà hoān-choē, siū kaⁿ-lô ê kan-khó͘. Chóng-sı̄ in lóng bô beh thiaⁿ i. Kàu āu-lâi i nā tı̄ hit ê kan-khó͘ hoān-lān ê tiong-kan, nā lâng the̍h tām-po̍h-á chı̂ⁿ pang-chān i, i chiū kám-un put-chı̄n; iā khiok bô siūⁿ kàu hit ê khó͘-khǹg lán hoán-hoé ê lâng sı̄ hó sim; i ê kong-lô pí ēng chı̂ⁿ-châi chín-chè lán ê sı̄ khah toā; in-ūi lán nā thiaⁿ i ê chhùi, kin-á-jı̍t m̄ bián kàu chit ê toē-pō͘. Chóng-sı̄ khah choē lóng bô siūⁿ án-ni; khah choē sı̄ kap téng-bı̄n ê kò͘-sū hit ê chú-lâng sio-siāng.
Kín-sı̄n só͘ kiâⁿ
Sam-kok chheh kı̀ chı̍t chām Koan Hûn-tióng pó-hō͘ in nn̄g ê hiaⁿ-só beh kap Chô Chhò chiūⁿ kiaⁿ khı̀. Tı̄ lō͘-nı̍h Chô Chhò tiâu-kò͘-ı̀ ēng chı̍t keng pâng hō͘ in saⁿ lâng toà, ı̀-sù sı̄ beh hun-loān in kun-sı̂n ê lé-sò͘. Chóng-sı̄ Koan Hûn-tióng choè i tiám la̍h-chek chhut lâi chhù-goā khoàⁿ chheh kàu thiⁿ-kng, lóng bô sió-khoá ià-lán ê bı̄n-sek. Chô Chhò khoàⁿ-kı̀ⁿ án-ni, ná koh-khah kèng-tiōng i.
Koan Hûn-tióng ê só͘ choè sǹg kun-chú ê só͘ kiâⁿ sı̀-chiàⁿ kong-bêng; lóng bô kò͘-ı̀ chng-choè. Khoàⁿ Sam-kok chheh ê lâng lóng kóng i sı̄ ài kò͘-ı̀ choè kun-chú ê miâ-siaⁿ, chiah án-ni lâi siám-pı̄ hiâm-gı̂; nā-sı̄ chāi Koan Hûn-tióng ê ı̀-sù chiū bô án-ni kóng, in-ūi Koan Hûn-tióng só͘ kò͘ chiū-sı̄ Lâu Pı̄ ê bı̄n-chiūⁿ, kap in hiaⁿ-só ê tek-hēng. Chèng lâng ê lām-sám kóng tio̍h m̄-tio̍h i lóng bô khoà-ı̀.
Chiàu án-ni kā i siūⁿ, lán kàu-hoē lāi ê hoē-iú nā oē chiàu i ê hoat-tō͘ lâi kiâⁿ, ū kun-chú ê kha-pō͘, kiám m̄-sı̄ chin hó mah? Kı̀ⁿ-nā ū hiâm-gı̂ ê só͘-chāi, chhin-chhiūⁿ chiú-lâu, hı̀-hn̂g, hoa-ke liú-hāng, kiáu-tiûⁿ, che lóng m̄-thang khı̀, m̄-tān-nā pó-choân ka-kı̄ ê miâ-siaⁿ, chiū lán ê Chú kap kàu-hoē ê miâ-siaⁿ koh-khah iàu-kín tio̍h pó-choân.
Sèng-keng ū kóng, “Só͘ kiâⁿ tio̍h toan-chiàⁿ, chhin-chhiūⁿ tı̄ jı̍t-sı̂; bo̍h-tit hòng-chhiòng chiú-chùi, bo̍h-tit hò͘ⁿ-sek siâ-ı̂m, bo̍h-tit saⁿ-chiⁿ oàn-tò͘.”(Lô-má 13:13)
Chèng tāu siu tāu
Chi-ná chiàn-kok ê sı̂, ngó͘-pà chāi-lāi hit ê Chı̂n Bo̍k-kong, ū chı̍t pái khı̀ Niû-soaⁿ ê só͘-chāi phah la̍h. Hit mı̂-hng phah m̄ kı̀ⁿ kúi-nā chiah-ê hó bé, chiū phài lâng sı̀-koè khı̀ chhē. Keh bô joā kú ū lâng lâi pò kóng, Tı̄ Ki-soaⁿ ê lâm-pêng, ū chha-put-to saⁿ pah ê thó͘ lâng, í-keng chiong bé thâi khı̀ lah; hiān-sı̂ teh chú beh khı̀ chia̍h; nā àm-chı̄ⁿ phài peng khı̀, oē lóng-chóng lia̍h tio̍h. Chı̂n Bo̍k-kong thiaⁿ-liáu thó͘-khùi kóng, Goá phài lín khı̀ chhē, sı̄ ǹg-bāng oē koh-tit-tio̍h hiah-ê bé. Taⁿ bé í-keng sí, hoān-choē ê lâng iū hiah-nı̍h choē, nā lóng kā i lia̍h lâi pān, boē bián-tit hō͘ lâng kóng goá khoàⁿ cheng-siⁿ khah tùi-tiōng, lia̍h lâng ê sı̀ⁿ-miā khoàⁿ khah khin. Koh goá thiaⁿ-kı̀ⁿ kóng, chia̍h hó bé ê bah, bô chia̍h chiú khı̀ chān i siau-hoà, chiū oē tı̀ pı̄ⁿ; hiah-ê thó͘ lâng lóng m̄ chai chit khoán ê lı̄-hāi. Chiū kiò lâng chiong i só͘ toà lâi ê hó chiú, taⁿ khı̀ hō͘ hiah-ê thó͘ lâng, kah in sûi-ê pun tām-po̍h khı̀ chia̍h; hiah-ê lâng thiaⁿ-liáu put-chí kám-kek.
Āu-lâi keh ū chı̍t nı̂ kú, Chı̂n Bo̍k-kong kap Chı̀n kok ê peng tı̄ Hân ê só͘-chāi kau-chiàn, Bo̍k-kong toā pāi, Chı̀n ê peng í-keng chiong Bo̍k-kong ê chiàn-chhia ûi-teh. Chı̀n ê niá peng koaⁿ Niû Iû-bı̂ iā í-keng khiú tio̍h Bo̍k-kong só͘ chē hit tiuⁿ chhia ê bé. Tng hit chām chin gûi-kip ê sı̂, hut-jiân khoàⁿ-kı̀ⁿ saⁿ pah goā lâng, iā bô khiâ bé, iā bô chē chhia, chhiú-nı̍h kia̍h toā to, ta̍k-ê chı̍t khiā chı̍t thò koâiⁿ, hiông kài-kài tı̍t-tı̍t phah jı̍p lâi, khoàⁿ-kı̀ⁿ Chı̂n Bo̍k-kong hō͘ Chı̀n kok ê peng ûi-teh, chiū phe sí miā, chiong hiah-ê peng phah thè, m̄-nā kiù-chhut Chı̂n Bo̍k-kong, hoán-tńg chiong Chı̀n Hūi-kong lia̍h-lâi.
Bo̍k-kong khoàⁿ-liáu chin hoaⁿ-hí, chiū tiàu in lâi mn̄g kóng; Lín sı̄ toh-lo̍h ê lâng, siáⁿ-sū kin-á-jı̍t lâi kiù goá? Hiah-ê lâng kóng, Goán chiū-sı̄ kū-nı̂ thau-khan kun-ông ê hó bé hiah-ê lâng; kám-liām kun ê toā un-te̍k, bô pān goán ê choē , koh kiaⁿ goán phoà-pı̄ⁿ. In-ūi kūn-jı̍t thiaⁿ-kı̀ⁿ tı̄-chia teh sio-thâi, só͘-í saⁿ-kap lâi beh pang-chān kun kau-chiàn; taⁿ chin-chiàⁿ ū thàn goán pò-tap kun ê sim. Bo̍k-kong thiaⁿ-liáu thó͘-khùi kóng, Chèng koe tit-tio̍h koe, chèng tāu siu-sêng tāu. Siat-sú goá kū-nı̂ chiong chiah-ê lâng lia̍h khı̀ pān choē, kin-á-jı̍t thài oē tit-tio̍h in ê la̍t lâi kiù goá leh? Chiū mn̄g in kóng, Lín kam-goān jı̍p iâⁿ choè peng m̄? Ta̍k-ê kóng, Goán sı̄ thó͘ lâng, boē hiáu siú kui-kú, m̄ káⁿ choè kun-peng. Bo̍k-kong chiū kiò lâng the̍h kim-gûn châi-pó siúⁿ-sù in; in iā lóng m̄ siu, choè in sio sı̂ tò-khı̀.
Sè-kan ê lâng, thang hun choè saⁿ téng. Ū chı̍t téng ê lâng, lí nā ēng un-hūi khoán-thāi i, i hoán-tńg ēng pháiⁿ lâi pò lí; che miâ kiò kúi tō. Ū chı̍t téng ê lâng, lí nā ēng hó khoán-thāi i, i iā ēng hó pò-tap lí; che kiò choè jı̂n-tō. Iā ū chı̍t téng-hō ê lâng, lí ēng pháiⁿ khoán-thāi i, i khiok ēng hó lâi khoán-thāi lí; che kiò choè thian-tō. Chhin-chhiūⁿ Bo̍k-kong teh khoán-thāi hiah-ê thau-khan bé ê lâng, chiàu khoàⁿ boē bián-tit ū siúⁿ-hoa̍t put bêng; m̄-kú choē put kı̍p chiòng, saⁿ pah goā lâng lóng in-ūi hit kúi chiah bé lâi siū choē, khiok iū siūⁿ-liáu put jím, iū-koh chai hiah-ê thó͘ lâng sı̄ lóng boē hiáu-tit hoat-lu̍t kap lı̄-hāi. Só͘-í put-jû choè chêng hō͘ in, m̄ sı̄ ài tit lâng in-ūi án-ni lâi o-ló i, á sı̄ ū ǹg-bāng in āu-lâi ê pò-tap i, só͘-í ū thang khó-chhú. Chhı̀ siūⁿ hiān-sı̂ ū chit hō ê lâng á bô; phah-sǹg bô. Khah choē lóng sı̄ hit hō bô siūⁿ lán khoán-thāi lâng cháiⁿ-iūⁿ, kan-ta oē hiáu hiâm lâng pháiⁿ khoán-thāi i. Iâ-so͘ kóng, Tio̍h thiàⁿ lí ê tùi-te̍k; iau tio̍h hō͘ i chia̍h, chhùi-ta tio̍h hō͘ i lim; che chiū-sı̄ ēng un-hūi lâi pò-tap pháiⁿ khoán-thāi lán ê lâng.
Kau chhián giân chhim
Sòng-kok ū chı̍t ê hó-gia̍h lâng, in chhù ê chhiûⁿ-á in-ūi chı̀m-chù hō͘ lo̍h siuⁿ kú, soà hō͘ pang chı̍t khiah khı̀. In hāu-siⁿ kā i kóng, Chit ê chhiûⁿ-á nā bô siu-lí, kiaⁿ-liáu oē hō͘ chha̍t jı̍p lâi. In ê chhù-piⁿ chı̍t ê lāu lâng iā sı̄ án-ni kóng. Bô siūⁿ hit ê-hng, kó-jiân ū chha̍t lâi thau chin choē mı̍h khı̀. Hit ê hó-gia̍h lâng chiū chin o-ló i ê kiáⁿ sı̄ chhong-bêng, iā giâu-gı̂ chhù-piⁿ hit ê lāu lâng choè chha̍t lâi thau i.
Taⁿ chiàu án-ni kā thiaⁿ, hit ê hó-gia̍h lâng ê kiáⁿ, kap in chhù-piⁿ lāu-lâng só͘ kóng ê oē, sı̄ siāng chı̍t iūⁿ, i khiok o-ló in kiáⁿ chhong-bêng, giâu-gı̂ chhù-piⁿ ê lâng choè chha̍t; in-ūi in kiáⁿ kap chhù-piⁿ ū chhin-so͘ ê hun-piat. Só͘-í siāng chı̍t khoán ê oē, ū nn̄g khoán ê khoán-thāi i. Khó-kiàn hoān-sū tio̍h chiong sim-koaⁿ phâng-pı̂ⁿ lâi siūⁿ; nā bô, lóng boē bián-tit ū chûn thán chhin ê sim tı̄-teh.
