Thàu-hong ê Jı̍t-chí

Goá chū sè-hàn tiō ài thiaⁿ hong teh chhoe ê siaⁿ, hit-chióng siaⁿ chin tia̍t-pia̍t. Sè-hàn toà tı̄ Hoa-lian, goán chhù āu-piah pún-chiâⁿ ū 1-toā-phiàn tek-nâ; tı̄ goá kok-sió 2-nı̂ ê sı̂ tek-nâ bô--khı̀-a, piàn-chò ha̍k-hāu, chū án-ne liáu-āu, goá koh khah án-choáⁿ mā khoàⁿ bē tio̍h hong tı̄ kui-phiàn tek-nâ nǹg-lâi nǹg-khı̀ ê chêng-hêng--loh. Gín-á sı̂, goá tiāⁿ-tiāⁿ khiā tı̄ thang-á piⁿ thiaⁿ hong ê siaⁿ. In tı̄ tek-nâ lāi-bı̄n sńg kah chin hoaⁿ-hí, án-ne goá tiō ē khoàⁿ-kı̀ⁿ ba̍k-chiu-chêng ū 1-phiàn chhiⁿ-sek ê hái-éng khin-khin-á tùi goá éng--lâi. Hoa-lian ê koâⁿ--lâng hong chin thàu. Nā sı̄ kiâⁿ tı̄ lō͘-tiong-hng, khióng-kiaⁿ chhiūⁿ goá hiah-nı̄ sè-hàn ê gín-á, lóng ē hông chhoe kah m̄-chai toh-ūi khı̀ mā bô tiāⁿ-tio̍h--leh. Ta̍k-piàn chim-chiok thiaⁿ hong ê siaⁿ, lóng ē kám-kak tio̍h sim-lāi ū 1-chióng hēng-hok-kám. Hit chióng siaⁿ tiō ká-ná tê-kó͘ lāi ê chúi tng teh kún ê siaⁿ; mā chhin-chhiūⁿ teh kho͘-si-á, 1-siaⁿ lām koè 1-siaⁿ, hiah-nı̄ chheng-chhó, hiah-nı̄ hó-thiaⁿ. Nā sı̄ thiaⁿ tio̍h hong ê siaⁿ, iah sı̄ hong lâi lòng thang-á ê sı̂-chūn, goá tiō ē chông kàu thang-á piⁿ, chin hoaⁿ-hí kā in kóng: “Goá ê pêng-iú, lín koh lâi--a!” Goá phak tı̄ hia, hō͘ hong chhoe goá ê bı̄n, chù-sı̂n thiaⁿ in teh kóng-oē. Kok-sió 2-nı̂ beh seng 3-nı̂ ê sı̂, hit phiàn tek-nâ soah chiām-chiām siau-sit--khı̀-a. Ū kúi lō kang lóng khoàⁿ tio̍h koài-chhiú kā 1-châng koh 1-châng tek-á ê kin oé--khí-lâi, hong-poe-soa sı̀-kè poe; chhù--nih ê thang-á lóng koaiⁿ kah ba̍t-ba̍t-ba̍t. Tek-nâ bô--khı̀-a. Liân-soà kúi jı̍t àm-mı̂, goá lóng thiaⁿ tio̍h hong teh toā-siaⁿ háu. In it-tı̍t toā-la̍t lòng thang-á, ká-ná siūⁿ beh mn̄g--goá: “Chhiⁿ-sek ê hái-éng toh-ūi khı̀--a, goán nah ē lóng khoàⁿ bô?” Goá bô khı̀ khui thang-á, mā bô kā ı̀n-oē. Ta̍k-àm, goá lóng kâm ba̍k-sái khùn--khı̀. Poaⁿ lâi Tâi-pak kúi lō nı̂--a, mā chiok kú m̄-bat thiaⁿ koè hong tng teh thàu ê siaⁿ. Ta̍k-pái siūⁿ khí hit-chūn Hoa-lian thàu hong ê jı̍t-chí, tiō chhin-chhiūⁿ hong koh teh kā goá mn̄g: “Chhiⁿ-sek ê hái-éng tı̄ toh-ūi? Goán nah ē lóng bô khoàⁿ--kı̀ⁿ?” (TGB Thong-sı̀n tē 23 kı̂, 2001 nı̂ 8 goe̍h)