Thé-sut Khı̂m-siù
Phı̀-jū ū bó͘-lâng chò chı̍t-hāng-mı̍h, i sı̍t-chāi m̄-ài pa̍t-lâng pāi-hoāi hit-ê mı̍h. Siōng-tè ū chhòng-chō khı̂m-siù, só͘-í i iā m̄-ài lâng lām-sám khoán-thāi in.
Khı̂m-siù sı̄ chin sim-sek ia̍h ū toā lō͘- ēng. Lâng nā khoeh-khiàm in, chiū bē-bián-tit toā kan-khó͘ .
Lâng sı̄ khah-gâu khı̂m-siù, ia̍h ū-sı̂ i- ê la̍t sı̄ khah-toā in-ê, só͘-í i khoài-khoài ē ap-chè iâⁿ-koè in . Hoān-nā ióng-kiāⁿ-- ê kó͘-chhiáⁿ khok-hêng loán-jio̍k--ê, chiū i tio̍h siū kiàn-siàu .
Ū-sı̂ lâng bô chiàu hoat-tō͘ khoán-thāi khı̂m-siù, sı̄ in-ūi i bô siūⁿ-tio̍h á-sı̄ bē- kı̀-tit i só͘ chò ê tāi-chı̀ sı̄ m̄-ha̍p-gı̂ .
In-ūi Siōng-tè ê chin-lí tı̄ Sai-kok ū èng-giām kun-sı̂n, ū siat-lı̍p bēng-lēng kı̀m-lâng pháiⁿ-khoán-thāi khı̂m-siù, ia̍h ū jı̂n-ài ê lâng chò-hoē siông-siông kín- sı̄n, khoàⁿ ū sím-mı̍h lâng hoān-tio̍h kok-hoat, chiū ū liâm-piⁿ kò hō͘ koaⁿ-hú chai. Sím-mn̄g liáu nā tēng-choē chiū hêng-hoa̍t sı̄ tāng .
Hiān-sı̂ tı̄ Tāi-Eng-kok ū chı̍t-ê lāu cháiⁿ-siàng. Káⁿ-sı̄ tı̄ thong sè-kan bô koh chı̍t-lâng ê gâu sı̄ khah-toā tı̄ i-ê . Chit-ê tāi-sı̂n ū chin-toā thé-sut ê sim . Tng i siàu-liân tı̄ o̍h--nı̍h chò ha̍k-seng ê sı̂, ū bat chı̍t-koè khoàⁿ-kı̀ⁿ pa̍t-ê ha̍k- seng teh chho͘-chhân chhòng-tı̄ chı̍t- chiah-ti , chiū hó-táⁿ kā in kóng nā bô soah, i beh phah in . Án-ni-seⁿ , nā sè- hàn ū chû-sim , kàu toā-hàn ia̍h ū .
Khó-sioh! Tı̄ Tiong-kok lâm-lú ló-iù chē-chē lóng bat chò chân-jím pháiⁿ- khoán-thāi khı̂m-siù. Ū lâng pa̍k ti ê sı̀-ki-kha chò-hoé,chiū tiàu tı̄ pùn-taⁿ lâi kng á-sı̄ taⁿ , ū-ê chiong chı̍t-ki-mn̂g chhng-koè tı̄ ke-phı̄ⁿ beh hō͘ i cheng-sı̂n, ū-ê ēng chho͘-thûi-á kòng gû, ū-ê chiong kún-chúi lâm káu ,ia̍h ū-ê ( khah-siông sı̄ gín-ná ) thiah chiáu-á ê siū hāi i-ê kiáⁿ , liàm hô͘-sı̂n ê sı̍t khí-lâi , kap tiàu sih-sut ê gê-chhiu , hit-hō. Lēng-goā lâng só͘ thàn chân-jím ê hoat-tō͘ sı̄ sǹg bē-liáu .
Sio̍k kàu-hoē ê lâng , he̍k-sı̄ toā-hàn he̍k-sı̄ sè-hàn, siông-siông tio̍h o̍h thàn hó-khoán-thāi khı̂m-siù ê bô͘-iūⁿ. Ki- tok-tô͘ eng-kai tio̍h hián-chhut toā ê kng chhiō-tio̍h sè-sio̍k lâng . Lūn-kàu téng- bı̄n só͘ gı̄-lūn ê tāi-chı̀, in tio̍h chiong ka-tı̄ ê hó só͘ kiâⁿ chí-sı̄ pa̍t-lâng lâi kui êng-kng tı̄ Siōng-tè . Káⁿ-sı̄ chit-chat- sū kok-ūi kàu-hoē ê hiaⁿ-tı̄ chí-moāi tio̍h chhoē ki-hoē lâi gı̄-lūn , ia̍h kiám-chhái ē siūⁿ chhut ū thang siat sím-mı̍h kui-kí, kiám-chió pêng-sò͘ chân-jím khoán-thāi khı̂m-siù ê khoán-sit. Khı̂m-siù bē-hiáu kóng-oē, iáu-kú ē-hiáu hun-pia̍t pêng-iú tùi-te̍k. Goān lán tāi-ke lı̍p-ı̀ chiông-kim í-āu beh pàng-sak ta̍k-hāng chân-jím ê hoat-tō͘ . Nā chò án-ni , koat- toàn bô beh sit-lo̍h pò-siúⁿ .
(Tâi-oân Hú-siâⁿ Kàu-hoē-pò tē 105 koàn, 1894 nı̂ 1 ge̍h)