--A-pah tiòng-hong liáu-āu 8 chi chhit
Khà tiān-oē tńg-khı̀ hō͘ A-pah
It-tı̍t lóng tu-tu-tu
Khó-lêng tiān-oē-tiong
Ê-àm chiah koh khà
Ê-àm mā-sı̄ tu-tu-tu
Bı̂n-á-chài chiah koh khà
Bı̂n-á-chài mā-sı̄ tu-tu-tu
Khó-lêng sı̄ tiān-oē koà bô hó-sè?
Siá e-mail hō͘ cha-bó͘-sun-á
Kiò i khı̀ khoàⁿ-māi leh
I chin kín hoê-phe lâi
Kóng koà hó-sè ah
Koh-chài khà
Mā-sı̄ koh tu-tu-tu
Khó-lêng tiān-oē pháiⁿ--khı̀?
Tiān-oē pháiⁿ--khı̀
Bô hoat-tō͘ thiaⁿ-tio̍h A-pah ê siaⁿ
Ná-chhiūⁿ thêng-tiān
Sè-kài piàn chı̍t-ē àm-bı̂n-bong
Thêng-tiān ê sı̂-kan chin pháiⁿ tō͘
It-tēng ài tán siu-lí hó
Tán tiān koh lâi
Chiah bē tı̄ o͘-àm-tiong o͘-pe̍h-siūⁿ
Kip kah se̍h-lâi se̍h-khı̀
Ta̍h kha-hoe
Kı̂-sı̍t choè-kı̄n lú lâi lú chió
Kā a-pah khà tiān-oē
Pún-té chı̍t lé-pài khà chı̍t thong
Āu-lâi chı̍t kò goe̍h
Chit-piàn í-keng thoa nn̄g kò ge̍h bô khà
Kám ē a-pah teh tiuⁿ
Tiâu-kang kā tiān-oē-soàⁿ chhoah hō͘ tn̄g?
Tiâu-kang beh hāi goá khà bē tńg-khı̀
Beh hō͘ goá thé-hoē i tiòng-hong í-āu
Thêng-tiān it-chı̍t-poaⁿ
Àm-bı̂n-bong ê jı̍t-chí
Choè-kı̄n khà tiān-oē tńg-khı̀
A-pah oē lú kóng lú chió
Chiah kóng nn̄g kù
Tiān-oe tu hō͘ khàn-hō͘ ê goā-lô Evy
Kóng “Lí chham A-nı̂ kóng!”
Che-sı̄ tē saⁿ ê goā-lô cha-bó͘-gín-á
A-pah ta̍k-ê lóng kā kiò A-nı̂
Téng chı̍t ê Ìn-nı̂ A-nı̂
A-pah m̄-bat kā tiān-oē tu hō͘ i
A-pah tiān-oē tiong oē chin chē
Koh ē phêng-lūn chèng-tı̄
Hit-chūn Tâi-oân-lâng khai-sí hoāⁿ chèng-koân
I chin khı̀ hia-ê hoán-tùi-tóng
Mā in chheⁿ-mê-tóng
Lō͘ o͘-pe̍h tòng
Koh khí-lih hit-ê Ìn-nı̂ A-nı̂
A-pah mā m̄-bat kā tiān-oē tu hō͘ i
I tı̄ tiān-oē tiong
Mā Kok-bı̂n-tóng
Mā Tiong-kok goā-lı̄-á
Kā Tâi-oân bú kah lı̍h-sai-sai
Khang-chhùi chiah toā khang
A-pah tiòng-hong í-āu
Piàn chı̍t-ē
Hó-táⁿ--khí-lâi
A-pah tiòng-hong í-chêng
Khoàⁿ goá chhap chèng-tı̄ hoán Kok-bı̂n-tóng
Thiaⁿ keh-piah kóng sı̄m-chí chiūⁿ pò-choá
Chhù-chêng lō͘-kháu sûi-sı̂ ū seⁿ-sian-bı̄n--ê
Tı̄ hia joā-joā-sô
I chiok kiaⁿ
Kiò goá bē-sái chhap chèng-tı̄ hoán Kok-bı̂n-tóng
Nā beh chhap
I beh kap goá tn̄g-choa̍t pē-kiáⁿ koan-hē
Tiòng-hong í-chêng
A-pah chiok bô táⁿ
A-pah tiòng-hong liáu-āu
Piàn chin chē
Tiān-oē ke kóng chin kú
Thi-thi thuh-thuh
Làu-hong làu-hong
Lóng teh mā Kok-bı̂n-tóng iau-siū
Tâi-oân-lâng hiau-hēng
Choè-kı̄n m̄-chai àn-choáⁿ
Tiān-oē kóng bô kúi-kù to̍h m̄ kóng
To̍h beh tu hō͘ chham goá oē-gí bē thong ê
Ìn-nı̂ goā-lô A-nı̂
Chit-má kui-ê tiān-oē soah bē thong ah
Ná-chhiūⁿ a-pah kā chhah-tâu pak--khí-lâi
Bô beh kap goá thong tiān-oē
Beh kā tiān-goân chhiat hō͘ tn̄g
Hō͘ goá tı̄ thêng-tiān ê o͘-àm tiong
Hō͘ goá kiaⁿ
Hō͘ goá piàn chiok bô-táⁿ
Kiaⁿ tiān bē koh lâi
Kiaⁿ éng-oán thêng-liû tı̄ o͘-àm-tiong
