Thiàⁿ Kap Sià-bián
聖劇 腓利門 獨幕
Tē it kéng
Jı̂n-bu̍t: O-nı̂-se-bó͘.
(O-nı̂-se-bó͘ 登台, ka-kı̄ kóng: Goá O-nı̂-se-bó͘, tı̄ chú-lâng Hui-lı̄-bûn ê chhù choè lô͘-châi, í-keng ū jı̄-cha̍p goā nı̂ kú. Ta̍k jı̍t choè kang thoa-boâ lô-khó͘, m̄-bat hióng-siū jı̂n-kan chū-iû ê khoài-lo̍k. Sim-lāi ta̍k sı̂ teh phāu put-pêng kap put-boán; choè-kūn siūⁿ ài tô-cháu ê liām-thâu, tiāⁿ-tiāⁿ tı̄ goá ê sim-lāi teh puh-íⁿ. Goá ài cháu-khı̀ hn̄g-hn̄g ê só͘-chāi, tı̄ hia choè chū-iû ê lâng, kè khoài-lo̍k ê jı̍t-chí. Thiaⁿ kóng, bı̂n-á chá-khí 5 tiám cheng, ū chı̍t chiah chûn beh tùi hia khí-sin khı̀ Lô-má. Taⁿ goá siūⁿ hó-sè lah. Ê-hng poàⁿ-mı̂, tng ta̍k lâng teh hó-khùn ê sı̂, goá beh chiong chú-lâng Hui-lı̄-bûn hit kha toé chu-pó ê siuⁿ-á the̍h cháu, jiân-āu tah chit chiah chûn khı̀ Lô-má. Kàu Lô-má ê sı̂, goá chiū thang hióng-siū jı̂n-kan ta̍k khoán ê khoài-lo̍k, ho͘-khip chū-iû ê khong-khı̀. Taⁿ goá O-nı̂-se-bó͘ teh-beh chhut-thâu-thiⁿ lah (下台chhut-khı̀).
Tē jı̄ kéng
Jı̂n-bu̍t:
Hui-lı̄-bûn, kán-siá “Hui”
A-hui-a: Hui-lı̄-bûn ê hū-jı̂n-lâng, kán-siá “A.”
A-ki-pò͘: Hui-lı̄-bûn ê kiáⁿ, kán-siá “Pò͘.”
Khek-lia̍p-khek: Hui-lı̄-bûn ê lô͘-châi, kán-siá “Khek.”
Hui: (登台chin tio̍h-kip ê khoán). A-hui-a, A-hui-a, lí tı̄ tá-lo̍h?
A: (Kín-kín chhut-lâi). Goá tı̄ chia. Ū sím-mı̍h tāi-chı̀ hō͘ lí chiah tio̍h-kip?
Hui: Goá hit kha toé chu-pó ê siuⁿ-á lí ū koāⁿ khı̀ khǹg tı̄ pa̍t-ūi bô? Cháiⁿ-iūⁿ bô tı̄ tû-á lāi?
A: M̄-chai A-ki-pò͘ ū khoàⁿ-kı̀ⁿ bô, goá lâi khı̀ kiò i lâi mn̄g khoàⁿ-bāi leh. (下台 chhut-khı̀).
Hui: (Ka-kı̄ kóng). Chin kı̂-koài, goá ê mı̍h to m̄-bat phah-m̄-kı̀ⁿ. Tàu-tí siáⁿ lâng oē choè chit hō tāi-chı̀?
Pò͘: (A kap Pò͘ saⁿ-kap teng-tâi). Pa-pa, ū sím-mı̍h tāi-chı̀?
Hui: Goá pêng-sò͘ toé chu-pó hit kha siuⁿ-á hut-jiân chhē bô, m̄-chai lí ū chù-ı̀ á bô?
Pò͘: Chit kúi-jı̍t goá tı̄ goā-kháu teh pang-chān poê-lêng pò͘-tō ê kang-chok, soà lóng bô sı̂-kan thang chù-ı̀ kàu ke-lāi ê sū.
A: Lín siūⁿ, chha̍t-á oē lâi thau-the̍h khı̀ á boē?
Hui: (Tùi Pò͘ kóng). Chhiáⁿ lí khı̀ kiò O-nı̂-se-bó͘ kap Khek-lia̍p-khek lâi.
Pò͘: Hó. (下台 chhut-khı̀).
A: Lí choè-āu sı̄ sím-mı̍h sı̂ khoàⁿ-kı̀ⁿ chit kha siuⁿ-á?
Hui: Cha-mı̂ beh khùn ê sı̂ iáu tı̄-teh. Tú-chiah goá chiah hoat-hiān chit kha siuⁿ-á bô khı̀.
Hui: (Pò͘ kap Khek teng-tâi). O-nı̂-se-bó͘ cháiⁿ-iūⁿ bô lâi?
Khek: Thâu-ke, goá tùi chá-khí gō͘ tiám cheng khí-lâi kàu taⁿ, chiū lóng bô khoàⁿ-kı̀ⁿ O-nı̂-se-bó͘, goá kiò sı̄ thâu-ke ū chhe i chhut-mn̂g.
Hui: Bô, goá bô chhe i chhut mn̂g. Khek-lia̍p-khek, lí bat khoàⁿ-kı̀ⁿ siⁿ-hūn lâng lâi lán chia bô, cháiⁿ-iūⁿ goá chit kha siuⁿ-á bô khı̀?
Khek: Thâu-ke, chit ê toā chha̍t-kó͘ ún-tàng sı̄ O-nı̂-se-bó͘. Goá khoàⁿ i chit kúi-jı̍t kap pêng-siông lóng bô siāng-khoán. M̄-chai thâu-ke khéng hō͘ goá chhéng-kà chhut-khı̀ chhē i á bô? Nā chhē tio̍h, tek-khak tio̍h lòng hō͘ i sí. Chit khoán bô liông-sim ê lâng, m̄-thang hō͘ i oa̍t tı̄ sè-kan.
Hui: Khek-lia̍t-khek, lí tò-tńg khı̀ choè lí ka-kı̄ ê kang, m̄-bián chhap chit ê tāi-chı̀.
Khek: Chiàⁿ-sı̄, Thâu-ke! (下台).
A: Lí siūⁿ, O-nı̂-se-bó͘ káⁿ choè chit ê tāi-chı̀ bô?
Hui: Siat-sú i nā bô tò-lâi, chit kha siuⁿ-á khó-lêng sı̄ i the̍h-khı̀. Chóng-sı̄ lán ǹg-bāng i ū chı̍t jı̍t oē hoé-kái.
Pò͘: Chā-ā-jı̍t goán khui pò͘-tō-hoē ê toê-ba̍k sı̄ lūn sı̍p-jı̄-kè téng ê chha̍t hoé-kái ê sū. Siat-sú O-nı̂-se-bó͘ nā hoé-kái, lán iû-goân tio̍h sià-bián i.
Hui: Sı̄, lán tio̍h siông-siông ūi-tio̍h i kı̂-tó. Taⁿ lán ta̍k lâng lâi khı̀ choè ka-kı̄ ê kang (saⁿ lâng 下台 chhut-khı̀).
Tē saⁿ kéng
Jı̂n-bu̍t: Pó-lô: kán siá “Pó.”
O-nı̂-se-bó͘: kán siá “O.”
Ló͘-pin: kán siá “Ló͘.”
O: (登台 chhut-lâi ka-kı̄ kóng). Goá lâi Lô-má í-keng beh poàⁿ-nı̂ lah. Pún-jiân siūⁿ kóng sı̄ beh lâi chia hióng-hok, bô phah-sǹg hoán-tńg sı̄ lâi siū-khó͘. Hiān-chāi só͘ ū ê mı̍h lóng tǹg liáu-liáu lah. Siūⁿ ài chhē kang choè, mā ta̍k lâng jı̄n-chhut goá choè lô͘-châi ê kı̀-hō, bô lâng káⁿ ēng goá. Taⁿ goá chit kúi-jı̍t lóng bô thang chia̍h kàu pá, pak-tó͘ iau kah tı̍t-tı̍t beh nńg-kha lo̍h-khı̀. M̄-nā án-ni, goá ê liông-sim tiāⁿ-tiāⁿ teh chek-pı̄ goá, hō͘ goá bô sı̂-khek pêng-an. Taⁿ goá tû chū-sat í-goā, sı̍t-chāi bô lō͘ thang kiâⁿ (ka-kı̄ phō thâu-khak teh siūⁿ). Ū iáⁿ to-tio̍h, Pó-lô Sian-siⁿ kiám m̄-sı̄ khiā tı̄ Lô-má. Taⁿ goá tio̍h lâi khı̀ thàm-thiaⁿ Lô-má ê Ki-tok-tô͘. In tek-khak oē kā goá kóng, Pó-lô Sian-siⁿ khiā tı̄ tó-ūi. Nā oē-thang chhē-tio̍h Pó-lô Sian-siⁿ, i tek-khak oē pang-chān goá. (下台)
(Pó-lô kap peng-á 登台)
Pó: Ló͘-pin, goá téng-jı̍t kà lí àm-liām hit chat kim-kù, lí iáu oē kı̀-tit boē?
Ló͘: Bô siáⁿ oē kı̀-tit, chhiáⁿ lí koh kà goá chı̍t piàn.
Pó: Iâ-so͘ kóng, “Lín kı̀ⁿ-nā tio̍h-boâ taⁿ tāng-tàⁿ ê, tio̍h chiū-kūn Goá; Goá beh hō͘ lín an-hioh. Goá sim-lāi un-jiû khiam-sùn; lín pē Goá ê taⁿ, lâi tùi Goá o̍h, chiū lín ê sim-sı̂n oē tit-tio̍h an-hioh. In-ūi Goá ê taⁿ sı̄ khoài, Goá ê tàⁿ sı̄ khin.” Taⁿ oē hiáu-tit boē?
Ló͘: Sian-siⁿ, chit chat kim-kù chin oh kı̀, chhiáⁿ lí chı̍t kù chı̍t kù, ûn-ûn-á kà goá. (Pó-lô kap Ló͘-pin chı̍t kù chı̍t kù ûn-ûn-á liām, O-nı̂-se-bó͘ tı̄ goā-bı̄n teh thiaⁿ).
O: (Hut-jiân cháu lâi phak tı̄ Pó-lô ê kha-chêng). Pó-lô Sian-siⁿ! Pó-lô Sian-siⁿ! Lí tio̍h kiù goá.
Pó: O-nı̂-se-bó͘; lí chái-iūⁿ oē lâi tı̄ chia?
O: Choē-ok khó͘-chhó͘ goá, liông-sim chek-pı̄ goá, bô chı̍t só͘-chāi ū pêng-an, só͘-í goá lâi kàu lí chia, chhiáⁿ lí pang-chān goá.
Pó: “Lâng nā jı̄n ka-kı̄ ê choē, Siōng-tè sı̄ sı̀n-sı̍t ê, sı̄ kong-gı̄ ê, tek-khak beh sià-bián lán ê choē, soé-tû lán it-chhè ê put-gı̄.”
O: Chóng-sı̄ goá sı̄ cheō-jı̂n tiong ê toā choē-jı̂n, tû tē-ge̍k í-goā, bô lō͘ thang khı̀.
Pó: Iâ-so͘ lâi sè-kan sı̄ beh kiù choē-jı̂n. O-nı̂-se-bó͘! Goá chhoā lí jı̍p lāi-bı̄n sió hioh-khùn leh. Tán lí khah ū cheng-sı̂n, lán chiah koh lâi kóng (saⁿ lâng 下台 chhut-khı̀).
Tē sı̀ kéng
Jı̂n-bu̍t: O-nı̂-se-bó͘
O: (登台 chhut-lâi ka-kı̄ kóng). Hiān-chāi goá í-keng hoé-kái chiâⁿ-choè chı̍t ê sin chhòng-chō ê lâng lah. Goá ê sim-lāi ū kóng boē chhut ê pêng-an kap khoài-lo̍k. Ah! Kap Pó-lô Sian-siⁿ saⁿ-kap toà, sı̍t-chāi sı̄ chhin-chhiūⁿ toē-chiūⁿ ê thian-tông. Pó-lô Sian-siⁿ sı̄ hiah-nih chhin-chhiat, hiah-nih un-jiû, hiah-nih ū thiàⁿ-sim. Goá sı̍t-chāi chin ài chı̍t-sı̀-lâng kap i saⁿ-kap toà lâi ho̍k-sāi i. M̄-kú chit kúi-jı̍t hō͘ goá kám-kak chin bô pêng-an, chiū-sı̄ Pó-lô Sian-siⁿ tı̍t-tı̍t khǹg goá tio̍h tò-khı̀ Ko-lô-se, tng-bı̄n kā chú-lâng Hui-lı̄-bûn jı̄n-choē. Chóng-sı̄ goá kiám ū bı̄n thang khı̀ kı̀ⁿ chú-lâng? Koh siat-sú chú-lâng m̄-khéng sià-bián goá, i kiám m̄-sı̄ ka-kı̄ chhú sí? Taⁿ goá sı̍t-chāi m̄-chai tio̍h kéng tó chı̍t tiâu lō͘ (kiâⁿ-lâi kiâⁿ-khı̀ teh siūⁿ). M̄-kú Pó-lô Sian-siⁿ só͘ kóng ê oē, kù-kù sı̄ Ki-tok Iâ-so͘ ê khé-sı̄. Goá nā m̄ thàn i ê oē, kiám m̄-sı̄ ûi-poē Iâ-so͘ ê bēng-lêng? (ǹg thiⁿ), Ah! Chú Iâ-so͘ ah! Goá beh soán-te̍k Lí só͘ kā goá an-pâi ê lō͘, chiū-sı̄ tio̍h sí iā kam-goān. Taⁿ goá beh lâi khı̀ kā Pó-lô Sian-siⁿ kóng, goá hoaⁿ-hí tò-tńg khı̀ Ko-lô-se, tùi chú-lâng Hui-lı̄-bûn jı̄n-choē (下台 chhut-khı̀).
Tē gō͘ kéng
Jı̂n-bu̍t: Hui-lı̄-bûn. O-nı̂-se-bó͘. Khek-lia̍p-khek.
Khek: (登台 chhut-lâi ka-kı̄ kóng). Chit ê bô liông-sim ê O-nı̂-se-bó͘, thau-the̍h thâu-ke ê châi-pó, m̄-chai tùi tá-lo̍h khı̀, chit kúi ge̍h jı̍t lâi, i ê kang soà tio̍h hō͘ goá thoè i choè. Goá nı̂-kí iā teh-beh la̍k-cha̍p lah. Ta̍k jı̍t thoa-boâ lô͘-khó͘, kut-thâu koh beh chı̍h liáu-liáu khı̀. Chit-ê khó-ò͘ⁿ ê O-nı̂-se-bó͘, nā ū chı̍t jı̍t goá oē koh tú-tio̍h i, tek-khak beh chiong chit ê lāu-bah kap i phoè chhı̀n-thâu.
Êⁿ! Hn̄g-hn̄g teh kiâⁿ lâi hit ê lâng khoàⁿ liáu ná chhin-chhiūⁿ O-nı̂-se-bó͘. Chóng bô sı̄ “Kóng lâng, lâng kàu; kóng kúi, kúi kàu?” Êⁿ, ná kūn koh ná chhin-chhiūⁿ i. Chóng bô i chin-chiàⁿ hiah káⁿ sí, káⁿ koh tò-tńg lâi?
O: (登台 kiâⁿ jı̍p-lâi). Khek-lia̍p-khek pêng-an!
Khek: Ah, O-nı̂-se-bó͘, lí chit ê boē kiàn-siàu ê siáu-kúi-á, lí kin-á-jı̍t koh ū bı̄n thang tńg-lâi. Taⁿ goá beh kap lí toā sǹg-siàu lah. Goá tek-khak beh kiò thâu-ke kā lí tèng sí tı̄ sı̍p-jı̄-kè.
O: Goá chai-iáⁿ goá ka-kı̄ ê choē, chóng-sı̄ goá í-keng hoé-kái lah. Goá tńg-lâi chia, chiū-sı̄ beh hō͘ thâu-ke kā goá hêng-hoa̍t.
Khek: Hó, kā goá tiāⁿ-tiāⁿ khiā tiàm chia, Goá lâi khı̀ chhiáⁿ thâu-ke chhut-lâi.
O: (Kia̍h thâu ǹg thiⁿ). Chú Iâ-so͘ ah! Kiû Lí pang-chān goá, ke-thiⁿ goá ê khùi-la̍t!
O: (Khek kap Hui chiūⁿ tâi, O-nı̂-se-bó͘ cháu khı̀ kūi tı̄ Hui-lı̄-bûn ê bı̄n-chêng). Thâu-ke ah! Goá ū tek-choē thiⁿ, iā ū tek-choē lí, taⁿ liáu-āu, bô-lūn sím-mı̍h khoán ê hêng-hoa̍t goá lóng khéng siū.
Hui: (Hû i khí-lâi). O-nı̂-se-bó͘, goá chá tı̄ Ki-tok thiàⁿ ê lāi-bı̄n sià-bián lí lah. Goá ta̍k jı̍t teh thoè lí kı̂-tó, ǹg-bāng lí ū chı̍t jı̍t oē hoé-kái koh tò-tńg lâi. Hiān-chāi Chú ū thiaⁿ goá ê kı̂-tó, tio̍h kám-siā Chú; O-nı̂-se-bó͘, goá chin hoan-gêng lí koh tò-tńg-lâi. (Khek-lia̍p-khek ēng gông-ngia̍h ê bı̄n teh khoàⁿ).
O: (Chin kám-kek kàu lâu ba̍k-sái ê khoán). Che sı̄ khó-lêng ê mah? Goá thau-the̍h lí ê chu-pó, cháu khı̀ hn̄g-hn̄g ê só͘-chāi, taⁿ tò-tńg lâi, lí m̄-nā bô hêng-hoa̍t goá, hoán-tńg kóng, hoan-gêng goá tò-lâi. Thâu-ke ah! Che sı̄ put khó-lêng ê.
Hui: Chāi tı̄ lâng só͘ choè boē kàu ê, chāi tı̄ Siōng-tè bô só͘ m̄-oē.
O: Kám-siā Chú, Iâ-hô-hoa ê miâ sı̄ eng-kai tio̍h o-ló ê. Thâu-ke, Pó-lô Sian-siⁿ ū chı̍t tiuⁿ phoe beh hō͘ lí. (The̍h phoe hō͘ Hui).
Hui: (Ná khoàⁿ phoe, ná thı̀m-thâu, jiân-āu chiong chit kù tha̍k chhut siaⁿ). “M̄-sı̄ koh choè lô͘-po̍k, sı̄ chhin-ài ê hiaⁿ-tı̄.” (Khan O-nı̂-se-bó͘ ê chhiú). Sı̄, O-nı̂-se-bó͘, taⁿ liáu-āu goá beh khoán-thāi lí chhin-chhiūⁿ chhin-ài ê hiaⁿ-tı̄. Lán beh chhiú khan chhiú saⁿ-kap chhut-la̍t ūi Chú choè kang.
O: A-bēng, kám-siā Chú, o-ló Chú.
Khek: (Khiā lâi tiong-ng). Siat-sú Ki-tok-kàu nā chiâⁿ-sı̍t ū chiah toā ê thiàⁿ kap sià-bián, goá Khek-lia̍p-khek tùi kin-á-jı̍t khí, koat-toàn beh lâi sı̀n.
Ián-oân choân-thé saⁿ-kap gı̂m Sèng-si tē 169 siú tē 1 chat, jiân-āu tāi-ke gı̂m tē 2, 3, 4 chat.
(Lú-soan Ge̍h-khan tē 34 kı̂, 1962 nı̂ 10 ge̍h)
