“Thiàⁿ lí iân-koè thong sè-kan”
(Chheng-hûn chheng-liân sı̂-tāi ka-kı̄ ê hoê-ek-tâm).
1
Ū chı̍t ē-po͘ goá chhut-khı̀ goán chhù-āu ê thê-hông sàn-pō͘. Goá ê chhù sı̄ tı̄ chı̍t ūi siok-chêng ê chhân-chng, sı̀-piⁿ ū chē-chē chhân-hn̂g, koh ū chı̍t-tiâu toā-khe lâu tùi goán chng-piⁿ koè. Ú kı̂ ū hoàn-lām ê gûi-hiám, só͘-í ū chō chı̍t tiâu thê-hông, chō khí chin toā koh kian-kò͘. Sı̀-piⁿ chin hó kéng-tı̀, sı̄ chı̍t-ūi chin hó iû-siúⁿ ê só͘-chāi.
Bı̂-bı̂ ê liâng-hong tùi lâm pêng chhe--lâi, goá khiā tı̄ thê-hông ê téng-bı̄n, khoàⁿ tùi sai-pêng khı̀. tùi hia koh lí-goā-lō͘, sı̄ it-bōng bû-chè ê bông-bông toā-hái. Jı̍t tú beh lo̍h, se̍k-iông ê hông-hâ hoán chiàu tı̄ chúi, thiⁿ sio-chiap thian-gâi ê hit pêng piⁿ. Tông-sı̂ kúi chiah kui-hông ê hı̂-chûn, koà khí boán hong ê pe̍h-phâng tı̄ chúi-bı̄n teh cháu. Iā chı̍t-tı̄n ê hái-gān chiàu chhù-sū pâi-tı̄n poe tı̄ khong-tiong. Put-kak chàn-thàn ú-tiū ê sı̂n-pı̀, hit ê hiông-tāi ê kéng-siōng oán-jû chı̍t-pak ê toā bí-su̍t-oē tián khui tı̄ goá ê ba̍k-chêng.
Tú tô-chùi tı̄ chit ê toā chū-jiân bí-kéng ê sı̂, hut-jiân tùi hn̄g-hn̄g ū chı̍t-chūn chin chheng-chhùi lú ko-im ê koa-siaⁿ thoân--lâi, chin-chiàⁿ sı̄ chheng-liāng, jiû-nńg, iat-ní khó-ài ê koa-siaⁿ, Goá put kak siū i ê bê-le̍k só͘ giú, chiū chēng pō͘ liam kha ǹg chhiùⁿ-koa ê hong-hiòng chı̀n-chêng. Thiaⁿ-kı̀ⁿ chhiùⁿ kóng. “Goá ê sèⁿ-miā hiàn hō͘ lí…..kàu chı̍t…sı̀…Goá ê thiàⁿ…..thiàⁿ lí iâⁿ-koè thong sè-kan” khó-sioh koa-siaⁿ ê tiong-kan làng-chām làng-chām, ū chām thiaⁿ bē bêng. Kiám-chhái sı̄ ūi-tio̍h hō͘ hong chhoe-tōng só͘-tı̀ iā ū. Siāng-toā ê goân-in sı̄ tı̄ koa-siaⁿ tiong oán-jû ū chham-chhap iu-būn, chhám-chheh, khek-âu ê cha̍p-im, tı̀-kàu thiaⁿ bē cha̍p-hun bêng.
Khí-thâu goá sı̄ kā i lia̍h choè sı̄ chı̍t ê lú-sèng ūi-tio̍h siàu-liām i ê loân-jı̂n, sim-būn teh chhiùⁿ-koa. Ūi-tio̍h chheng-liân ê hò͘ⁿ-kı̂-sim goá chiū liam-kha ài kā i khoàⁿ chit ê lú-sèng tauh-tí sı̄ seⁿ-choè sím-mı̍h khoán. Tāi-khài sı̄ hō͘ goá chhi-chhi chhia̍t-chhia̍t ê kha-pō͘ siaⁿ phah kiaⁿ tio̍h. I káⁿ-sı̄ kám-kak āu-bı̄n ū lâng teh lâi, siaⁿ hut-jiân tńg sè, iā chiap-soà gı̂m.
“Goá lı̍p-chı̀ hiàn ka-kı̄, Éng-éng choan-choan kui hō͘ Lí” À-bēng. Hit-sı̂ I sı̄ chē tı̄ thê-hông téng chı̍t châng toā chhêng-chhiū-kha ê chio̍h-thâu téng. Gı̂m liáu chiū ha̍p-chheh. Siâng-sı̂ soà oa̍t koè--lâi, khoàⁿ-kı̀ⁿ goá khiā tı̄ i ê āu-bı̄n, tùi goá khin-khin tı̀m-thâu tiām-tiām chiū koh oa̍t-koè goân-ǹg hit pêng, chēng-chēng chē, bı̄n khoàⁿ tùi hái-nih khı̀.
Goá chit-sı̂ ka-kı̄ kám-kak 10 hun ê pháiⁿ-sè. Sim koaⁿ-kó͘ pho̍k-pho̍k-chhéng, bı̄n chiū hoat-hōng, tāi-khài káⁿ ū âng-âng. Nā-sı̄ i tian-tò sı̄ chin tāi-hong hāi-chāi. Goá chı̍t-sı̂ sui-jiân sı̄ chin pháiⁿ-sè, m̄-kú it-kiàn tùi chit ê lú-sèng ná-chún tı̄ sím-mı̍h só͘-chāi bat khoàⁿ i ê bı̄n, jı̂-chhiáⁿ sı̄ chin se̍k, oán-jû chá bat saⁿ-bat ê khoán-sit. Nā-sı̄ chit-sı̂ khah siūⁿ to siūⁿ put-chhut i ê miâ.
Thêng chı̍t-ē-á i koh hian i ê chheh chiap-soà tiām-tiām teh khoàⁿ. Goá iā lia̍h-tiāⁿ goá ê sim, chēng-chēng chù-sı̂n khoàⁿ i ê poè-iáⁿ. Chiah chai i sı̄ chı̍t ê 20 hoè chó-iū ê sió-chiá. Oa̍t koè--lâi ê sı̂ khoàⁿ tio̍h i ê bı̄n phı̄ⁿ koân-koân, ba̍k-chiu toā-toā lúi têng-sûn, tn̂g-tn̂g cha̍t-cha̍t ê ba̍k-chiah-mn̂g. Khó-ài o͘-thô-hêng ê chhùi, siang-pêng ê chhùi-phoé âng-âng, bô boah-hún, bô tiám ian-chi chin phok-sò͘. Chóng-sı̄ tùi moá-moá chhiong-moá oa̍h-miā-la̍t jiû-nńg iù-sè ku̍t-tia̍h ê phoê-hu, ū hoat-chhut chı̍t-khoán bē thang hêng-iông-tit chū-jiân-bí ê kong-hui. M̄-kú koh chı̍t-bı̄n tı̄ i bí-lē ê bı̄n-chiūⁿ ná-chún ū bat lâu koè ba̍k-sái ê hûn-jiah. Ná-chún piáu-hiān tı̄ i ê sim-pâng-tiong ū kóng bē chhut ê pi-ai. Put-kak hō͘ goá ê sim soà seⁿ chhut chı̍t-khoán ài-bō͘ tông-chêng ê sim. Āu-bı̄n se nn̄g-tiâu thâu-chang boé-á, pa̍k o͘-pò͘ tiâu-á tı̄ boé-liu, tı̀n tı̄ siang-pêng ê keng-thâu téng. It-kiàn sı̄ chı̍t ê Siok-tek khó-ài ê lú-sèng.
Goá chit-sı̂ siūⁿ beh chū án-ni tiām-tiām oa̍t-cháu, iū siūⁿ boē bián-tit siuⁿ bô ı̀-sù. M̄-kú chı̍t-sı̂ iā siūⁿ put-chhut sím-mı̍h oē thang kap i kóng chiū hó-táⁿ ké se̍k-sāi, seng khui-chhùi tùi i kóng: “Kin-á-jı̍t chin hó-thiⁿ hò͘ⁿ”
I khin-khin sè-siaⁿ ı̀n kóng “Sı̄, chin-chiàⁿ sı̄ chin lân-tek ê hó-thiⁿ.” Hit ê siaⁿ-im ê chheng-chhùi, thài-tō͘ ê un-jiû hō͘ goá chin kám-kak.
Goá chiap-soà koh mn̄g i kóng: “Kan-ta lí chı̍t-lâng tı̄ chia thit-thô á m̄-sı̄?”
Hit-sı̂ i oa̍t koè-lâi khoàⁿ goá ê bı̄n, iā khin-khin tı̀m-thâu kóng “Sı̄,” chiū koh oa̍t koè khı̀. Chiap-soà tiām-tiām khoàⁿ i ê chheh. Goá chı̍t-sı̂ chin sit-bāng. Goá sı̄ ǹg-bāng i beh kap goá kóng-oē, bô phah-sǹg soà koh oa̍t koè khı̀. Goá chiū tia̍p-á-kú tiām-tiām khiā tı̄ i ê āu-bı̄n chiap-soà khoàⁿ i ê hō͘-chu. Nn̄g-tiâu thâu-chang boé-á tin tı̄ i ê keng-thâu téng.
Put-kak goá tùi i kóng, “Chài-hoē.” I iā khiā khí--lâi ēng bı̂-chhiò hó-ı̀ ê bı̄n ǹg goá, ı̀n kóng “Chài-hoē.” I koh chē lo̍h-khı̀, goá chiū án-ni oa̍t-tńg-sin ǹg chhù-nih tò-khı̀. Chóng-sı̄ sim-lāi kám-kak ū chı̍t ê boē-hiáu kóng ê chêng-kám, kap it-seng boē bē kı̀-tit ê ı̀n-siōng.
2
Tng beh tò-khı̀ ê lō͘-tiong, goá iân-lō͘ kiâⁿ iân-lō͘ siūⁿ. Goá tauh-tí tı̄ sím-mı̍h só͘-chāi, ná-chún bat khoàⁿ-kı̀ⁿ chit ê sió-chiá? Iā i só͘ chhiùⁿ ê koa tauh-tí sı̄ sím-mı̍h ı̀-sù? Iā teh gı̂m ê sı̂ siáⁿ-sū oán-jû ū hâm-khǹg bû-hān ê pi-ai tı̄ i sim-lāi, siông-siông khek-âu, jı̂-chhiáⁿ tı̄ i bí-lē ê bı̄n-iông, iā ná-chún ū ba̍k-sái ê hûn-jiah. Tauh-sí tı̄…?
Siūⁿ liáu thâu-chı̍t-hāng, i só͘-chhiùⁿ ê koa tāi-khài m̄-sı̄ liû-hêng-koa, in-ūi gı̂m liáu bé-kù kı̀-tit ū chhiùⁿ: “A-mngh.” Chiàu só͘ oē kı̀-tit tû Ki-tok-kàu ê si-koa í-goā, bô. Iā koh khoàⁿ i ê thāi-tō͘ kap chhiú-nı̍h só͘ the̍h hit pún hù-phó͘ ê koa-chheh, kā i chhin siūⁿ--khí-lâi, ná-chún sı̄ lo̍h-kàu ê khoán-sit. M̄-kú soah kā i siūⁿ tò-tńg, goán chng-nih chāi-lâi to m̄ bat thiaⁿ-kı̀ⁿ kóng ū lâng khı̀ lo̍h Ki-tok-kàu. Án-ni chit-ê sió-chiá tàu-tí sı̄ sím-mı̍h lâng? Iā thiaⁿ hit-ê koa-sû, bô-gı̂ sı̄ tùi i ê tùi-siōng, piáu-hiān cha̍p-jı̄ bān-hun ê thiàⁿ-chêng. Tàu-tí i sim-lāi só͘ su-bō͘ ê ı̀-tiong-jı̂n kó-jiân sı̄ siáng?
Goân-lâi tng goá 13 hoè ê sı̂ goá bat toè goán ka-hū, ka-bó khı̀ tāi-lio̍k Hoâ-pak, Pē-bó tı̄ hia choè seng-lí, goá tı̄ hia tha̍k chheh. Jiân-āu ūi-tio̍h to͘-ha̍p siōng in seng tò--lâi. Goá iáu lâu tı̄ hia tha̍k-chheh. Kàu tāi-lio̍k lûn-hām tı̄ kiōng-sán ê chhiú, hit-sı̂ goá chiah keng-koè chhian-sin bān-khó͘, bān-poaⁿ ê keng-hiám chiah tô-chhut thih-bō͘. Chin-chiàⁿ sı̄ kiú-sú it-seng ê gûi-hiám lâi koh tâu-jı̍p chū-iû ê hoâi-phāu kò͘-hiong ê Tâi-oân. Tng tı̄ tāi-lio̍k ê sı̂ goá tı̄ Kok-lı̍p ê toā-o̍h tha̍k-chheh, iáu chhun chı̍t-nı̂ chiū ē pı̍t-gia̍p. Tò--lâi ū chiap-soà phian-lı̍p Tâi-oân tāi-ha̍k, nā-sı̄ ūi-tio̍h ū hong-khò chı̍t-nı̂, só͘-í tio̍h ke tha̍k chı̍t-nı̂, hēng-tit goá ê sêng-chek iáu bē-bái. Iā chit-pái sı̄ sú-ká tò-lâi hioh-joa̍h.
Kiâⁿ kàu-chhù, chiū chiong chiah ê sū kóng hō͘ goán ma-mah thiaⁿ. Goán ma-mah kā goá soat-bêng. Goá chiah chai sı̄ goán chhù-piⁿ lı̄ bô goā-hn̄g Tân chek-chek ê toā chhian-kim Bí-biāu sió-chiá. Iā chai Tân chek-chek āu-lâi ū khı̀ kap lâng lo̍h-kàu thiaⁿ tō-lí. Khó-sioh tı̄ bô loā-kú chêng ū koè-sin khı̀, pàng kúi-nā ê sè-kiáⁿ. Bí-biāu sió-chiá tı̄ kū-nı̂ pı̍t-gia̍p Tâi-lâm Tióng-êng lú-chú ko-tiong. Jiân-āu siū kiám-tēng ha̍p-keh, chit-sı̂ tı̄ pún-hiuⁿ ê kok-bı̂n ha̍k-hāu chip kàu-pian.
Goá thiaⁿ-liáu chiū bêng-pe̍k it-chhè. Chiah kı̀-tit sè-hàn goá 12 hoè ê sı̂, Bí-biāu sı̄ 8 hoè. In-ūi chhù-piⁿ lı̄ bô hn̄g, beh khı̀ tha̍k Kong ha̍k-hāu ê sı̂ (Kok-bı̂n ha̍k-hāu, tong-sı̂ kiò-choè Kong ha̍k-hāu) siông-siông sio-chio. Tı̄ ha̍k-hāu choè-hoé thit-thô, bat chı̍t-pái i hō͘ khah toā-hàn ê cha-po͘ gín-ná khi-hū, goá thoè i chhut-thâu ūi i. Ū-sı̂ hō͘ pa̍t ê cha-bó͘ gín-ná kāng, goá chiū ūi i kap lâng sio-phah lâi hián-bêng goá ê gı̄-kiap-sim. Tong-sı̂ sui-jiân sı̄ sè-hàn iáu-kú chin siong hó. Siông-siông chhoā-chhut chhoā-jı̍p. Bô phah-sǹg ba̍k-chı̍t-nih í-keng koè-khı̀ 10 liân-nı̂ lah. Nā-sı̄ Biāu hoa̍t-phoat, thian-chin lān-bān ê sèng-chit, hit-tùi ba̍k-chiu, kap ài-kiau ê chhùi, chhiò ê sı̂ siang-pêng ê chiú-khut-á, khó-ài ê chu-thài, jêng-jiân chiàu-kū tı̄-teh. Chin-chiàⁿ sı̄ hō͘ lâng it-kiàn lân-bông. Chı̍t-sı̂ sim-oân ı̀-má sùn-kan kah hoê-ek kàu gín-ná sı̂-tāi ê sū, bêng-bêng ná-chún tı̄ ba̍k-chêng. Bí-biāu tò-khı̀ iā chiong hit ē-po͘ ê sū kóng hō͘ in ma-mah thiaⁿ. In lāu-bú iā kā i soat-bêng kā i kóng tāi-khài sı̄ lín pa-pa ê hó pêng-iú Lı̂m peh-peh ê hāu-siⁿ Chheng-hûn hiaⁿ. Bí-biāu tùi án-ni iā siūⁿ-tio̍h gín-ná sı̂-tāi ê sū, put-kak sim-tiong iā seⁿ-khí chı̍t-khoán oh-tit thang hêng-iông ê sim-chêng.
Ū chı̍t ê lé-pài-jı̍t ê thàu-chá, goá siūⁿ ài khı̀ ke-nih bé tām-po̍h mı̍h. Chhut chng-kháu ê sı̂ hn̄g-hn̄g khoàⁿ tio̍h ū chı̍t ê sió-chiá chin tāi-hong, chhiú-nih the̍h chı̍t-pau chhin-chhiūⁿ chheh bı̄n ǹg ke-nih teh kiâⁿ. Pún-té goá siūⁿ beh kā i tèⁿ choè bô khoàⁿ-kı̀ⁿ, m̄-kú tùi poè-iáⁿ siông-sè kā i khoàⁿ, chiū chai tek-khak sı̄ chêng-jı̍t tı̄ thê-hông só͘ tú-tio̍h ê Bí-biāu sió-chiá. Só͘-í goá chiū kó͘-lē ka-kı̄ ê sim, hùn-hoat sok-pō͘ kā i jiok. Bô loā-kú chiū jiok kàu i ê āu-bı̄n. Hit-sı̂ goá ê sim-chōng koh chı̍t-pái pho̍k-pho̍k-chhéng, iā kiaⁿ, iā hoaⁿ-hí, iā chū-kak pháiⁿ-sè, m̄-kú kı̀m bē tiâu chiū khui-siaⁿ, khin-khin tùi āu-bı̄n kā i kiò. “Biāu chá-an” I hut-jiân thiaⁿ āu-bı̄n ū lâng ēng chhin-chhiat ê siaⁿ-im teh kiò--i, gông-ngia̍h chiū oa̍t koè--lâi. chı̍t ē khoàⁿ tio̍h sı̄ goá, hián-bêng hoaⁿ-hí ê bı̄n ı̀n goá, “Chá-an” chhiò-chhiò bô koh kóng sím-mı̍h. Tng 4 lúi ba̍k-chiu ê sı̄-soàⁿ saⁿ-chiap ê sı̂, hit ê thiàⁿ-chêng oán-jû chá-sı̂ choè gín-ná sı̂-tāi ê chhin-bı̍t. Tāi-ke chiū tiām-tiām saⁿ-kap pēng-kian choè-hoé kiâⁿ. Hit-sı̂ goá ka-tı̄ kám-kak ná-chún chin bô chū-jiân, tāi-khài goá ê bı̄n poh-káⁿ ū âng-âng, in-ūi goá ka-tı̄ kám-kak bı̄n chin sio-hōng. Nā-sı̄ biāu tian-tò chin tāi-hong chū-chāi. Iā ná-chún ū sím-mı̍h chin iàu-kín, chin bô-êng ê sū ài koáⁿ-kín khı̀ ke-á ê khoán.
Goá ê sim chin kı̀m bē tiâu, chhoē ki-hoē chin ài koh kap i kóng-oē, só͘-í goá chiū koh khui-chhùi mn̄g i: “Lí beh khı̀ tó-ūi?” “Goá beh khı̀ ke-nih.” “Beh khı̀ chhòng sím-mı̍h?” “Beh khı̀ pài-tn̂g lé-pài.”
Thiaⁿ i ê siaⁿ-im khin-khoài jiû-nńg, khoán-sit chhiò-iông un-sûn, hián-bêng hó-ı̀, bô kū-choa̍t goá ê mn̄g. só͘-í goá ê sim chiū khah an-tiāⁿ, hó-táⁿ koh kā i mn̄g. “Thài tio̍h hiah-nih chá khı̀ ah?” “Goá ài tàu kà Chú-jı̍t-o̍h, hū-tam iù-tı̄-kho, só͘-í ài liōng-chá kàu lé-pài-tn̂g.” Kóng-liáu i ná-chún lé-sò͘-chiūⁿ iā soà hoán mn̄g goá. “Chheng-hûn hiaⁿ lí beh khı̀ tó-ūi?” “Goá iā beh khı̀ ke-nih.”
Goá sim-lāi àm-àm hoaⁿ-hí kóng, án-ni Biāu iáu ē kı̀-tit--goá. Tùi án-ni nn̄g lâng chiū chēng-chēng chiap-soà pèng-kian choè-hoé kiâⁿ.
3
Tı̄ hit ê choè-hoé kiâⁿ ê sı̂ goá ê sim-tiong put-kak ı̀-sek ná-chún chū goá choè lâng thâu-pái kám-kak sim-lāi ū bû-hān ê sóng-khoài. Ná-chún jı̂n-seng bô-liâu khang-hi iu-būn ê sim-pâng, ū tit-tio̍h sím-mı̍h hong-hù sio-lō ê thiàⁿ-chêng lâi thūn-ba̍t ê khoán-sit. Goá ǹg-bāng chit-tiâu thàng kàu ke-á 5, 6 tâi-lí té-té ê lō͘, ē iân-tiông kàu bû-hān ê hn̄g. Bô phah-sǹg chá-khí án-choáⁿ kám-kak ē kiâⁿ tio̍h ke chin kín. Ē kı̀-tit chit-ē-á nā-tiāⁿ, chin phah-sńg chit tiâu tiⁿ-bı̍t ê lō͘ kèng-jiân kiâⁿ beh thàu lah. Tú teh siūⁿ m̄-kam beh pun-khui ê sı̂, tng beh ta̍h-jı̍p chhı̄-ke ê kúi-pō͘ chêng, Biāu hut-jiân hián-chhut 12 hun chhin-chhiat ê bı̄n tùi goá chio-ho͘ kóng:
“Chheng-hûn hiaⁿ lí chá-khí m̄-chai ū sı̂-kan á-bô? Nā bô te̍k-pia̍t ê chó͘-tòng, chhiáⁿ lí kap goá choè tı̄n lâi khı̀ lé-pài-tn̂g thiaⁿ tō-lí hó bô?”
Chı̍t-sı̂ goá ê sim soà hóng-hut bâng-loān. In-ūi chhin-chhiūⁿ siū m̄-kam beh pun-khui ê àm-hûn bı̍t-tà ê sim-pâng, hut-jiân khoàⁿ tio̍h phek-le̍k ê siám-kng. Chek-sı̂ bô-ı̀-sek tùi-chhùi ı̀n i “Hó.”
In-ūi hí-chhut bōng-goā ê siū chio-ho͘, chiap-soà thang kiâⁿ. Kı̂-sı̍t choè-hoé kiâⁿ to iā m̄-káⁿ kóng-oē, lóng sı̄ tiām-tiām teh kiâⁿ. M̄-kú hit ê khoài-lo̍k bē hiáu kóng; beh pun-khui iū kak-tek chin m̄-kam. Kı̂-sı̍t pài-tn̂g tauh-tí sı̄ seⁿ-choè ı̂ⁿ á-píⁿ. Goá sı̄ put-koán. Hoâiⁿ-tı̍t saⁿ-chhit jı̄-cha̍p-it, nā ē-tit koh chiap-soà tâng-kiâⁿ chiū hó. Nā hō͘ goá ka-tı̄ kiâⁿ goá ún-tàng bē kiâⁿ tùi pài-tn̂g khı̀.
Tùi án-ni koh chēng-chēng kiâⁿ bián loā kú chiū kàu pài-tn̂g ê toā-mn̂g. Chit keng pài-tn̂g khí liáu bô chhò. Chin tông-hông chòng-koan, chêng-bı̄n ū 3 chàn lâu ê cheng-thah. Pài-tn̂g-thiaⁿ lé-pài tı̄ lâu-téng, ē-bı̄n choè Chú-jı̍t-o̍h ê lé-tn̂g, kap kàu-sek. Ha̍k-seng 200 goā ê. Āu-bı̄n koh khí chı̍t-choā kàu-sek sio-liân 10 goā keng. Siōng-chhiáⁿ sı̄ bô kàu ēng. Lı̄-iōng pài-tn̂g ko͘-lāi tı̄-chia, tı̄ hia ê toā-chhiū-kha ê ı̀m-ńg. 10 ê, 8 ê ê ha̍k-seng choè chı̍t-hoé, choè chı̍t ê sió-cho͘, jı̄n-chin teh kàu-sı̍p. Tû Su-hoān-kho, Sèng-keng-kho, Chheng-liân-kho, Sêng-jı̂n-kho, Iù-tı̄-kho ēng kui kàu-sek thóng-chè-tek ê kàu-siū-hoat í-goā, kı̂-û ê lóng sı̄ chū-iû-sek ê kò-jı̂n kàu-siū ê khoán-sit. Thiaⁿ kóng kı̄n-lâi ê khò-pún kàu-châi ū oāⁿ. Iā Chú-jı̍t-o̍h ê chong-kàu kàu-io̍k tiong-sim ū tùi kà B. Ch. Chh. am-ap iam-iap ê jı̄-bó, chı̀n-kàu ín-chhoā lâng bat Iâ-so͘ khah iàu-kín.
Āu-lâi thiaⁿ Bo̍k-su teh soat-kàu, kóng lâng ê jı̍p sı̀n siū sé-lé sı̄ 13 hoè khí kàu 14 hoè siāng-chē. In-ūi hit ê sı̂ sim tan-sûn. Kàu 17, 8 hoè khí ū chham-chhap lâm-lú kiû-ài ê sim-chêng, nā ē-tit kín hō͘ i seng bat Iâ-so͘ án-ni sı̄ chin hó. Nā tı̄ kiat-hun chêng bē tit hō͘ i jı̍p-sı̀n niá sé-lé. Kàu kiat-hun āu ta̍h jı̍p siā-hoē, siū sio̍k-sū tı̂ⁿ-poàⁿ ê sı̂, te̍k-pia̍t kàu hām-jı̍p tı̄ bêng, lı̄, choē-ok ê soân-o, cho̍k-liû ê sı̂ chiah beh lâi kā i giú tò khí--lâi sı̍t-chāi chin oh. Só͘-í Chú-jı̍t-o̍h ê chong-kàu kàu-io̍k, nā kan-ta tiàm hia b, ch, chh, cháu-bē-lı̄ sı̍t-chāi chin khó-sioh. Jı̄-bó tha̍k-phoà kúi-nā pún, tha̍k 3 nı̂ poàⁿ tùi boé-á koāⁿ khí-lâi khoàⁿ. Iáu-boē thang tha̍k-koè sèng-keng, sı̍t-chāi sı̄ chin kai-sí. Múi lé-pài to-sı̄ teh liū hiah ê kò͘-sū. Kóng-kóng chhiò-chhiò leh koè-khı̀. Kàu 13, 4 hoè lah chı̍t-pún jı̄-bó iáu sı̄ teh am-ap, iam-iap, iap koè lâi, iap koè khı̀, soà loé-chı̀ m̄ koh lâi. Chin khó-lı̂n sian-siⁿ iū kóng i jı̄-bó iáu ho͘ bē lâi, to jı̍p chho͘-tiong lah iáu-sı̄ teh hō͘ i tha̍k jı̄-bó, á-sı̄ si-chó͘, ah! khó-lı̂n. Chú-jı̍t-o̍h m̄-sı̄ án-ni, Chú-jı̍t-o̍h m̄-sı̄ pe̍h-oē-jı̄ ha̍k-hāu, Chú-jı̍t-o̍h sı̄ beh chhoā gín-ná, toā-lâng sı̀n Iâ-so͘. Lán só͘ kà ê ha̍k-seng, bē tit chhin-chhiūⁿ Hui-le̍k teh chí-tō Kan-tāi-ki ê thài-kàm. Kàu-boé thài-kàm tùi Hui-le̍k kóng “Goá ài niá sé-lé sı̀n Iâ-so͘”. Lán nā bē tit choè kàu hia sı̍t-chāi chin liáu-jiân. Hiān-chāi Tâi-oân kàu-hoē, choè hū-heng ê lâng chin toā-chhò. Siông-siông kiaⁿ kiáⁿ-jı̂ bē tit seng-ha̍k, pek in thàu-chá, thàu-àm, tha̍k sè-kan-chheh. Lé-pài-jı̍t iā soà khı̀ kin lāu-su tha̍k-chheh. Kan-ta chè-chō toā-thâu pēⁿ ê āu-tāi. Bē kı̀-tit kiáⁿ-jı̂ iā ū lêng-hûn, chı̍t-jı̍t, chı̍t-lé-pài to m̄-bat chı̍t-pái léng-tō i ê kiáⁿ tha̍k sèng-keng, á-sı̄ choè-hoé ka-têng lé-pài. Só͘-í tng tha̍k kok-bı̂n ha̍k-hāu 4, 5 liân ê sı̂, iáu ū bóng khı̀ Chú-jı̍t-o̍h. Kàu 5, 6 liân ê sı̂ chiū lı̄-khui Chú-jı̍t-o̍h. Án-ni hū-heng sı̄ bô iàu-kín āu-tāi ê sı̄-sè chiap-sio̍k sı̀n-gióng ê khoán. Nā ū sè-kan ê châi-lı̄, miâ-siaⁿ, tē-ūi, sè-kiáⁿ chiong-lâi bô sı̀n-gióng bô iàu-kín ê khoán.
Hoē-iú èng-kai tio̍h chài kiám-thó. Beh hō͘ chı̍t ê chheng siàu-liân tùi 13 hoè--17,8 hoè ê tiong-kan ē kín lâi niá sé-lé jı̍p-sı̀n, tio̍h 3 hong-bı̄n kín-bı̍t ê ha̍p-chok chiah ē. 1. Chú-jı̍t-o̍h ê chong-kàu kàu-io̍k. 2. Ka-têng ê kèng-khiân, pē-bó ê kin-sim. 3. Chheng-liân thoân-khè ê poê-iúⁿ, saⁿ hong-bı̄n tio̍h kín-bı̍t liân-hê hia̍p-chok. Siat-kàu pah-chiu-nı̂ kàu-hoē poē-ka-ūn-tōng, jiáng-kàu toā-sè siaⁿ, chin hó. nā-sı̄ toā ǹg-bāng m̄-thang pàng hiat-ka̍k lêng gû-thâu khı̀ giú gû-boé ê kang-chok. Lán chhı̀-siūⁿ khoàⁿ hiān-sı̂ 5 hoè iù-tı̄-kho ê gín-ná koh 10 nı̂ āu in sı̄ 15 hoè ê siàu-liân, hiān-sı̂ 10 hoè ê gín-ná koh 10 nı̂ āu in sı̄ 20 hoè ê chheng-liân. Chiah ê gín-ná hiān-sı̂ tı̄ lán ê kàu-hoē kiám m̄-sı̄ tı̀n beh chı̍t poàⁿ, chiah ê nā 10 nı̂ āu lóng bô hō͘ i lāu cháu khı̀, che 10 nı̂ āu kiám bô poē-ka. Chiah ê pàng hō͘ i cháu khı̀, iā chiah lâi khı̀ chhàu lō͘-kô͘-moâi té thoa, giú ǹg-bāng tit-tio̍h poē-ka ê lâng jı̍p-lâi. Tó chı̍t pêng khah khoài? ah! pàng khoài--ê khı̀ kiû oh--ê, sı̍t-chāi kang ke kúi-nā poē, sêng-chek koh bē tit chin hó. M̄-sı̄ kóng tùi goā giú lâng lâi poē ka, chı̍t-lâng chio chı̍t-lâng sı̄ m̄-hó. chin hó. Tio̍h piàⁿ-la̍t choè. Chóng-sı̄ m̄-thang bē kı̀-tit Chú-jı̍t-o̍h ê kang. Che chiàⁿ-chiàⁿ sı̄ kàu-hoē poē-ka-ūn-tōng ê toā kang-chok.
Chiah ê sı̄ Bo̍k-su hit chá-khí ê soat-kàu tê-ba̍k “Jı̂-tông chong-kàu kàu-io̍k ê sin-sı̂-tāi.” goá thiaⁿ liáu siū chin toā ê kám-bêng. Goá sui-bóng thâu pái thiaⁿ soat-kàu bô 10 hun bat Bo̍k-su ê só͘ kóng, nā-sı̄ tùi sū-gia̍p siōng kàu-hoē ê heng-liông-siōng ê goân-lí kā i siūⁿ khí--lâi sı̄ chin ū lí-khı̀ ê sū.
Sū koh kóng tò-tńg--lâi. Tú kàu lé-pài-tn̂g ê sı̂, Biāu chiū kā goá kài-siāu kap Bo̍k-su saⁿ-bat. Tú hó bo̍k-su iā sèⁿ Lı̂m, tāi-ke jı̄n pún-ke. bo̍k-su chin chhin-chhiat, kài-siāu goá chham-koan Chú-jı̍t-o̍h. Sui-jiân thiⁿ-khı̀ chin joa̍h, nā-sı̄ ha̍k-seng chē-chē tı̄ chhiū-kha, hut-jiân ná-chún sı̄ teh chham-koan hā-lēng ê lı̂m-kan ha̍k-hāu chı̍t-iūⁿ. Te̍k-pia̍t Iù-tı̄-kho iok 40 chó-iū ê ha̍k-seng. Bo̍k-su ê lēng-ài Siok-hūi sió-chiá teh toâⁿ-khı̂m. Biāu khiā tı̄ tiong-ng, kı̂-û ê gín-ná, kı̂-sı̍t lóng sı̄ iok 5 hoè ê sió tı̄-tı̄, sió moāi-moāi, tāi-ke phah ı̂ⁿ-khoân lâi ûi lāu-su. Tāi-ke chhiùⁿ-koa hô khı̂m ê ūn-lu̍t. O̍h tiong-ng ê lāu-su ê hêng-tōng lâi thiàu-bú. Ná-thiàu ná-chhiùⁿ ná se̍h ı̂ⁿ-khoân. Ū sı̂ phah-chhiú, ū-sı̂ chhah-io, khah-thêng kha thiàu, khah-thêng chhiú bú. Im-ga̍k koa-seng hô-hâi thiàu-bú kheng-khoài chê-cháⁿ ná-chún chı̍t-kûn ê sió thiⁿ-sài tı̄ lı̂m-kan thiàu-bú sàn-hoa ê khoán-sit, chin-chiàⁿ kám-kek.
Hut-jiân thiaⁿ tio̍h pı̀-khò ê cheng-siaⁿ tân, chı̍t tūi chı̍t-tūi chhoā jı̍p lé-tn̂g hù pı̀-khò sek. Chiàu goá hit-jı̍t tùi Chú-jı̍t-o̍h ê koan-kám, nā lūn kàu-ha̍k it-chhè ê siat-pı̄, kap kui-kí ê chéng-chê sı̍t-chāi ū su phó͘-thong ê ha̍k-hāu. Nā lūn su-seng kan ê thiàⁿ-chêng hô-khı̀ ai-ai, sı̍t-chāi ū iâⁿ put-koán tó-ūi ê ha̍k-hāu. Nā lūn jı̂n-keh ê poê-io̍k sı̍t-chāi m̄-sı̄ pêng-siông ê o̍h-tn̂g só͘ ē thang khoàⁿ-tio̍h ê. Tùi Sèng-keng-kho khí, kàu Sêng-jı̂n-kho, hit ê tha̍k-keng ha̍k-sı̍p ê khiân-sêng, sı̍t-chāi chin thang kám-poē.
Chham-koan āu goá kap Lı̂m Bo̍k-su chhoā jı̍p kheh-thiaⁿ chē. Koh chı̍t ē-á chiū toā lé-pài, kin-á-jı̍t sı̄ goá it-seng thâu-pái jı̍p pài-tn̂g ê jı̍t. Tú sı̄ 8 goe̍h 1 hō, sı̄ chı̍t ê chin hó ê keng-giām kap kı̀-liām.
Tùi hit jı̍t liáu-āu goán nn̄g-lâng chiū ke chin chhin-bı̍t se̍k-sāi. Ū ki-hoē goá iā siông-siông khı̀ chhoē Tân lāu thài-thài chē. Iā bat siông-siông hō͘ in lâu tı̄ hia chham-ka àm-sı̂ ê ka-têng lé-pài. Tùi Tân chek-chek koè-sin liáu-āu, in kám-kak khah bô-lām ê khoán-sit. Só͘-í in chin hoan-gêng goá khı̀ in tau. In iā chin mı̂-noā kóng tō-lí hō͘ goá thiaⁿ. Put-ti put-kak goá iā seⁿ-chhut bō͘-tō ê sim.
Ū chı̍t ê pài 6 ē-po͘. Biāu tùi goā-bı̄n jı̍p--lâi, seng-khu hō͘ hō͘ ak kàu chin tâm, goá tú-tú tı̄ in hia, goá chiū mn̄g i sı̄ ūi sím-mı̍h in-toaⁿ? Khı̀ tó-ūi? Hō͘ i ak-kàu hiah-tâm. I ı̀n goá kóng sı̄ khı̀ sàng-chòng. Kóng in iù-tı̄-kho ū chı̍t ê ha̍k-seng Ông sian-siⁿ ê lēng-ài kiò-choè Hūi-cheng. Kin-nı̂ tú 6 hoè, koè-sin khı̀. Kin-á-jı̍t chhut-chòng. thióng-tē tı̄ soaⁿ-téng, beh tò--lâi gū-tio̍h sai-pak-hō͘. Lı̂m Bo̍k-su í-hā sàng-chòng ê lâng to lóng hō͘ hō͘ ak kàu ta̍k ê ná lo̍h-thng-ke chı̍t-iūⁿ. Biāu bô-khoà thǹg i ê tâm-saⁿ liân-siaⁿ tı̍t-tı̍t o-ló Hūi-cheng sió moāi-moāi ê sı̀n-gióng.
Kóng 6 hoè kiáⁿ beh chia̍h io̍h, chù-siā ê tāi-seng, lóng ē-hiáu kı̂-tó. Kàu i beh sí ê chiâⁿ tiám cheng chêng, kiò in ma-mah the̍h tiàu tı̄ i khùn-pâng piah-nih Iâ-so͘ ê siōng hō͘ i. The̍h koè chhiú ǹg Iâ-so͘ kim-kim khoàⁿ, khoàⁿ liáu kā I chim, chim liáu koh khoàⁿ. Chhin-chhiūⁿ án-ni liân-liân kúi-nā pái. Āu-lâi chiong siōng khǹg tı̄ sim-koaⁿ thâu hia. Siang-chhiú ha̍p-chióng kiong-kèng chhiùⁿ: “Iâ-so͘ thiàⁿ goá, goá chai bêng” iā kiò i ê ma-mah kap i saⁿ-kap chhiùⁿ. In ma-mah lâu ba̍k-sái nâ-âu-kńg tı̄ⁿ chhiùⁿ bē chhut siaⁿ. Hūi-cheng kā ma-mah kóng: “Ma-mah m̄-thang hoân-ló, Iâ-so͘ thiàⁿ goá saⁿ-tâng kiâⁿ, tı̄ goá sin-piⁿ bián kiaⁿ-hiâⁿ. Goá nā thiàⁿ I kàu lō͘-boé, I oē chhoā goá kı̀ⁿ Thiⁿ Pē.” Kóng soah ê sı̂ ba̍k-chiu pàng kheh-kheh chhiú jêng-jiân ha̍p-chióng chhin-chhiūⁿ teh kı̂-tó ê khoán-sit, ma-mah iā thoè i kı̂-tó.
Ông thài-thài kı̂-tó soah ba̍k-chiu peh-khui, kā i khoàⁿ. Thài-thài khui-siaⁿ kiò Hūi-cheng goá kiáⁿ, Hūi-cheng goá kiáⁿ. Nā-sı̄ kiáⁿ ê bı̄n su-bûn chhiò-chhiò, bô ı̀n-siaⁿ, Thài-thài chiah chai kiáⁿ éng-oán kap i lı̄-pia̍t, seng tò-khı̀ Thiⁿ Pē tau lah! Kóng kàu chia Biāu ba̍k-chiu kâm ba̍k-sái hián-bêng chin m̄-kam ê khoán-sit. Chı̍t-bı̄n iā ná-chún teh khoaⁿ-iāu i ê ha̍k-seng, ū hó ê sı̀n-gióng. Goá thiaⁿ-liáu sim-té iā àm-àm chàn-thàn chong-kàu kàu-io̍k hāu-le̍k ê úi-tāi.
4
Sı̂-jı̍t chin khoài koè, ba̍k chı̍t-nih hioh-joa̍h í-keng beh koè lah, chí-ū chhun kúi-jı̍t-á nā-tiāⁿ. Tı̄ hioh-joa̍h tiong tùi án-ni khí goá tāi-khài ta̍k lé-pài to lóng ū khı̀ lé-pài. Tit-tio̍h Lı̂m Bo̍k-su ê chí-tō, kap sàng chē-chē chheh, iā kám-siā Siōng-tè ê Sı̂n ín-chhoā, goá ê sı̀n-gióng toā-toā chı̀n-pō͘. Goá ê pē-bú iā bô chó͘-tòng, in iā-sı̄ ū lí-kái sı̀n-gióng chū-iû ê lâng.
Ū chı̍t-jı̍t hut-jiân chiap-tio̍h pêng-iú tùi Séng-to͘ kòng-tiān lâi, kóng ài goá thê-chá seng kàu ha̍k-hāu. Tı̀-kàu chin chhong-hông, kín khı̀ kap Tân lāu thài-thài saⁿ-sı̂. Chóng-sı̄ bē-tit kı̀ⁿ Biāu ê bı̄n, in-ūi i khı̀ ha̍k-hāu chiūⁿ-pan, iáu-boē hā-pan. Sim kám-kak chhin-chhiūⁿ put-chiok chı̍t-hāng sím-mı̍h iàu-kín ê sū iáu-boē choè. Loân-loân put-sià, m̄-kam lı̄-khui Tân chek-chek ê chhù. Lāu thài-thài ná-chún liam-piⁿ chhai-chhut goá ê sim-lêng ê khoán-sit, seng khui chhùi tùi goá kóng, “Biāu nā tò--lâi, goá chiah thoè lí kā i kóng lí ū lâi saⁿ-sı̂. Taⁿ í-keng chhut-hoat khı̀ Séng-to͘ lah.” Chı̍t-sı̂ goá ê sim chin hoaⁿ-hí, ı̀n i kóng “Pài-thok, pài-thok, chhiáⁿ lí chiah thoè goá kā i saⁿ-sı̂.” Sim kám-kak kúi-hun khah khin-sang, chiū tò--lâi kín chhut-hoat.
Keh bô loā-kú hioh-koâⁿ ê kı̂ beh kàu lah. Tng Chiok sèng-tàn ê sı̂, kàu-hoē ū beh kā chı̍t-pan ê chheng-liân kiâⁿ sé-lé. Tiong-kan goán Tāi-ha̍k se̍k-sāi ê pêng-iú iā ū kúi-nā ê. Chng Bo̍k-su iā chin kó͘-bú goá niá-sé-lé jı̍p kàu-hoē. Goá chı̍t-sim chin ài, chóng-sı̄ chı̍t-sim iáu ū khoà-lū. In-ūi pē-bú sui-jiân bô toā chó͘-tòng, chóng-sı̄ chèng-keng beh niá sé-lé jı̍p kàu, lāu-lâng tauh-tí kàu-sı̂ m̄-chai cháiⁿ-iūⁿ? In-ūi goán chng-nih tû-khı̀ Tân chek-chek in chı̍t-ke í-goā thang kóng bô lâng pài Siōng-tè. Só͘-í goá chiū hó-táⁿ siá-phoe lâi teng-kiû Biāu ê ı̀-kiàn,
Phoe ê loē-iông tāi-khài sı̄ siá án-ni:
“Biāu sió-chiá, lí thâu-pái chih-tio̍h goá ê phoe ún-tàng ē tio̍h-kiaⁿ. Pún goá m̄-káⁿ sûi-piān siá-phoe hō͘ lí. In-ūi goá pêng-sı̂ chin khim-gióng lí ê toan-chong siok-tek, kap lí ê sûn-kiat, chhim-sı̀n. Chóng-sı̄ goá sim-lāi ū chı̍t-hāng tiu-tû put-koat ê sū, chin ài chhéng-kàu lí. Chhiáⁿ lí hoaⁿ-hí hoê-phoe chí-sı̄ goá. bô siū-khı̀, bô hiâm hùi-khı̀ kā goá kóng. Goá chin hoaⁿ-hí chiàu lí ê chí-sı̄ lâi chı̀n-hêng.
Chiū-sı̄ tı̄ chit ê chiok sèng-tàn, goá khı̀ lé-pài ê kàu-hoē ū beh tùi chı̍t-pan ê chheng-liân kiâⁿ sé-lé. Goá ê tông-chhong iā ū kúi-nā ê beh siū sé-lé. Chng Bo̍k-su chin teh kó͘-bú goá iā siū sé. Goá chin tiu-tû, in-ūi chhù-nih lóng bô lâng sı̀n Chú. Khah toā-táⁿ goá chin su-bō͘ lí, Biāu moāi-moāi lí hoaⁿ-hí choè goá sı̀n-gióng ê pang-chān. Chān goá saⁿ-kap kiâⁿ chit-tiâu lō͘ hó bô? Goá chiū kak-tit khah hó-táⁿ. Nā bô, goá kiaⁿ-liáu tı̄ ka-têng tiong ko͘-toaⁿ, tı̄ chiong-lâi oh tit thàu-boé. Tı̄ chit-ê chı̀n-thoè ê su-lū tiong lí ē-tit chān goá ê le̍k-liōng á-bē? Chhiáⁿ lí chí-sı̄.
Tı̀-ı̀ ēng án-ni pài-kiû lí ê kùi-ı̀, soà chhéng-an Lēng-tông pêng-an. Chiok lí ê khong-lo̍k. Chài-hoē Lí ê hó pêng-iú Hûn kià.”
Keh kúi-nā-jı̍t lóng bô chiap tio̍h hoê phoe, sim chin tio̍h-kip, sı̂-sı̂ tán-hāu. Hut-jiân tı̄ chı̍t ê mńg-po͘ pàng-khò āu ū iû-chhai the̍h chı̍t-tiuⁿ phoe lâi. Khoàⁿ hit ê phoe-lông chiū chai sı̄ chı̍t ê lú-sèng kià ê phoe. Goá tı̍t-kak sı̄ Biāu kià--ê. Chiap--lâi chiū cháu-khı̀ chı̍t-ūi siok-chēng ê só͘-chāi lâi khui. Kó-jiân sı̄, chin hoaⁿ-hí kā i tha̍k. Lāi-iông siá án-ni:
“Chheng-hûn hiaⁿ……Lūn lí koat-sim beh jı̍p sèng-hoē ê sū, goá chin kā lí kiong-hí, chū-jiân chin chàn-sêng. Chóng-sı̄ m̄-thang ló-chhó, m̄-thang ūi-tio̍h chı̍t-sı̂ ê kám-chêng. M̄-thang khoàⁿ tông-phoāⁿ beh jı̍p, lí iā-jı̍p. Iā m̄-bián koan-chêng kò͘-āu lâi khoà-lū, chí-ū tio̍h chù-sı̂n khoàⁿ Iâ-so͘. I sı̄ lán sı̀n ê goân-thâu kap chhiâⁿ-boé. Tı̍t-tı̍t cháu chı̀n-chêng, khoàⁿ thang tit-tio̍h Ki-tok, chhin-chhiūⁿ I tit-tio̍h lí án-ni, Chú kap lí tı̄-teh. I tiàm tı̄ lí, lí tiàm tı̄ I. Chí tio̍h sı̀n m̄-bián kiaⁿ, m̄-bián khoàⁿ lâng, bián khoàⁿ khoân-kéng kap goā-bı̄n, chí-tio̍h sı̀n, bāng Iâ-so͘, chı̍t-lō͘ toè Chú kàu chó͘-ke.
Goá koh khah ǹg-bāng lí, m̄-thang ūi-tio̍h…choè tùi-siōng lâi chı̀n kàu. Lūn lí tùi goá ê hó-ı̀, thiàⁿ goá, goá chin kā lí kám-siā. Chóng-sı̄ goá ài lí seng thiàⁿ Siōng-tè. Seng thiàⁿ Chú Iâ-so͘. Phah-sǹg lí iáu kı̀-tit tı̄ thê-hông téng, lí thâu-pái thiaⁿ goá gı̂m-si ê oē, “Thiàⁿ lí iâⁿ koè thong sè-kan” hit siú si. Che sı̄ goá ê ka-hū tng i beh lı̂m-chiong pia̍t-sè ê í-chêng kiò goán chí-moāi-á kap sió-tı̄ tı̄ i ê bı̂n-chhn̂g-chêng choè-hoé gı̂m ê si. I iā gı̂m, gı̂m kàu i bô siaⁿ, tng tı̄ gı̂m-si tiong i khùi-tn̄g lı̄-khui sè-kan. Tng i boē-sí ê í-chêng chhiáⁿ Bo̍k-su lâi, tāi-ke tı̄ hia siú Chú choè-āu ê boán-chhan. Tı̄ Bo̍k-su ê lı̍p-hoē ē, chiong I ê su-châi-sán kéng siāng-hó ê chı̍t-hūn chhân hiàn hō͘ Siōng-tè beh choè kàu-hoē ê lō͘-ēng. Iā hiàn-tē kap chhù ài choè pài-tn̂g. I ûi-giân kiò goá tio̍h chiap-soà i ê ûi-chı̀, tio̍h chiong pún-sin hiàn hō͘ Chú, chiong-lâi tı̄ pún-hiuⁿ lâi kiàn-siat kàu-hoē. Tı̄ chit ê iân-hái o͘-àm ê tē-kài lâi heng-khí Chú ê hok-im. Goá kı̀-jiân tùi ka-hū siū chit ê ûi-giân, goá koat-sim tek-khak beh koàn-thiat chit ê ûi-chı̀. Lâi an-ùi ka-hū tı̄ thiⁿ-nı̍h ê bêng-kiong.
Chheng-hûn hiaⁿ lí nā ē-tit kap goá saⁿ-kap hū-khí chit ê tiōng-chek, goá chū-jiân… Chóng-sı̄ chit chân sū tio̍h chiàu sūn-sū keng-koè Sı̄-toā-lâng kap Bo̍k-su ê chàn-sêng chiah thang chı̀n-hêng. Goá khiok ū chiong lí ê phoe tha̍k hō͘ goán ma-mah thiaⁿ. I iā chàn-sêng hoaⁿ-hí lí niá sé-lé. Jiân-āu ê sū kin-āu khoàⁿ-pān. Bāng lí pó-tiōng gio̍k-thé ha̍k-gia̍p sêng-kong, jiân-āu chiah……Kiû Thiⁿ-pē sù-hok pó-hō͘ lí… Só͘ chun-kèng ê Chheng-hûn hiaⁿ chài-hoē. Moāi Biāu kín-siá. 12 goe̍h 10 jı̍t.”
Goá tha̍k liáu chin kám-kek, goá chiah liáu-kái chêng Biāu tı̄ thê-hông só͘ gı̂m ê si. “Goá ê sèⁿ-miā hiàn hō͘ lí….. Thiàⁿ Lí iâⁿ-koè thong sè-kan….. Éng-éng choan-choan kui hō͘ Lí.” Chit 3 kù, tek-khak m̄-sı̄ chhin-chhiūⁿ it-poaⁿ lâm-lú só͘ siūⁿ ê sio̍k-liām. Sı̍t-chāi sı̄ jı̂n-lūi choè chông-ko, tùi Sı̂n, tùi Kiù-chú só͘ èng-kai hiàn-siōng ê sim-chêng. Iā sı̄ sûn-kiat ê lú-tô͘ tùi it-chhè ê lâm-sèng só͘ iau-kiû. Goān tāi-ke tâng-sim thiàⁿ Chú, thiàⁿ Siōng-tè ûi tē-it ê ho͘ ā siaⁿ. Seng hiàn sèⁿ-miā hō͘ Chú. Thiàⁿ Chú iâⁿ-koè thong sè-kan. Sı̂n tē-it, chiong ka-tı̄ éng-éng choan-choan kui tı̄ I. án-ni chiah tio̍h.
Jı̂n-lūi choè-ko ài ê tùi-siōng sı̄ Sı̂n, éng-oán ê Kiù-chú. Iā lâng tùi lâng sı̄ tio̍h tı̄ tâng sı̀n-gióng, tâng ǹg-bāng, tâng chhù-bı̄, ē-tit tâng pō͘-tiau ê ē-bı̄n lâi kiat-chiâⁿ ê thiàⁿ chiah ē bí-moá, chiah ū éng-oán. Kàu chit sı̂ goá chiah hiáu-ngō͘. Tùi án-ni goá soà it-hoat ài-bō͘ Biāu ê siok-tek. Khí-thâu sı̄ tùi jio̍k-thé ê kám-chêng ê kiû-ài chhut-hoat. Taⁿ kàu chit-sı̂ goá í-keng chai èng-kai tio̍h tı̄ sı̀n, ǹg-bāng, thiàⁿ ê tâng-pō͘-tiau ê tiong-kan, chiah ē thang kiàn-lı̍p bí-moá ê ka-têng. Bí-moá ê ka-têng m̄-sı̄ kiàn-siat tı̄ bu̍t-chit, jio̍k-io̍k ê téng-bı̄n. Sı̄ kiàn-siat tı̄ sı̀n-gióng kap sûn-kiat ê thiàⁿ ê téng-bı̄n.
Phoe tha̍k-liáu put-kak soà kūi-lo̍h, kiû Sı̂n sià-bián goá ê sio̍k-liām, kiû Chú têng-thâu-siⁿ goá, hō͘ goá ē hó-táⁿ siū sé-lé chı̀n-kàu, jı̄n Chú ê miâ bô kiaⁿ kiàn-siàu. Iā kiû Sı̂n nā ha̍p I ê sèng chí-ı̀ chiū ín-chún goá kap…..ē tit-thang tâng kang, hū-khí kiàn-siat Chú ê teng-thah tı̄ kò͘-hiong lâi kng-chiò o͘-àm ê iân-hái tē-tài. Ū-hūn tı̄ chit ê kiù-lâng ê sū-gia̍p. Koh khah ē tit tâng-sim hōng-hiàn tı̄ Chú-jı̍t-o̍h jı̂-tông chong-kàu Kàu-io̍k ê kang. Goá chhim-sı̀n chit ê sı̄ múi ê sûn-kiat chhim-sı̀n ê Ki-tok lú-tô͘ tùi choân-séng, choân-kok ê chheng-liân só͘ iau-kiû, tāi-ke èng-kai khan-chhiú saⁿ kap lâi chı̄n ê gı̄-bū. (Oân.)
