Chú-jı̍t-o̍h chá-khí,
Lí tı̄ tâi-téng chhiùⁿ-koa.
“Pa-pa goá ài lí”
Chhiùⁿ ū-kàu toā-siaⁿ.
Lí chhiò-gı̄-gı̄,
Kap tâng-phoāⁿ khiā sio-oá.
Bô lâng chai lí ê sin-sè.
Bô lâng siūⁿ-koè,
Bô pē ê kiáⁿ choáⁿ-iūⁿ koè-cheh.
Goá kā ba̍k-sái thun-lo̍h nâ-âu,
Chhin-chhiūⁿ sio-thǹg-thǹg ê chı̀ⁿ,
Chha̍k-jı̍p sim-koaⁿ-thâu.
Lán bat pān-kong-hoé-á,
Lí the̍h saⁿ-sian ang-á,
Chı̍t-sian choè lí ka-kı̄,
Chı̍t-sian choè goá,
Lēng-goā chı̍t-sian lí kóng sı̄ pa-pa.
“Kiám it-tēng ài ū pa-pa?”
“Pa̍t-lâng in tau lóng ū.
Tiān-sı̄ lāi-té mā ū.”
Koh chı̍t-nı̂ koè kāng chı̍t-ê cheh,
“Tio̍h kám-siā lāu-pē,” Chú-jı̍t-o̍h lāu-su hoan-hù.
“Goá m̄-bián kám-siā, in-ūi goá bô pē.”
Lí án-ni kā hāu-tiúⁿ kóng.
I soah boē hiáu ı̀n-oē.
Ha̍k-hāu tiau-cha ka-têng chōng-hóng.
Lí kóng chhù--nih chí-ū ma-ma kap-lí.
Pêng-iú mn̄g lí pa-pa cháu-khı̀ toh-ūi,
Lí kóng bô pa-pa, in soah teh chhiò lí.
Tē-it-pái lí tāi-seng mn̄g-khí,
Lāu-pē sı̄ án-choáⁿ choè i khı̀?
M̄-thang hām tı̄ chū-chek--nih,
Goá ê gín-á,
Koè-sit bô chhut chāi lí.
Koè-sit chı̍t-poàⁿ chhut chāi goá,
Choē-chek hō͘ goá lâi taⁿ.
M̄-thang bâi-oàn ūn-miā,
Oàn-thàn chhin-chhiūⁿ khin-khin ê ian,
Hong chhoe chiū soàⁿ.
Oàn-giân chhin-chhiūⁿ khang-khang ê iáⁿ,
Jı̍t-lo̍h chiū bô iáⁿ-jiah.
M̄-thang oàn-hūn pa̍t-lâng,
Khioh-hūn chhin-chhiūⁿ chhâ-phāng ê chiù-thâng,
Àm-chı̄ⁿ kā lí ê lêng-hûn gè-khang.
Siū-khı̀ chhin-chhiūⁿ piah-kak ê to̍k-choâ,
Kā lí ê ı̀-chı̀ thāu-noā.
Tio̍h sià-bián hiah-ê ko͘-hū lán--ê,
Chhin-chhiūⁿ thiⁿ--nih ê pē it-tı̍t khoán-thāi lán--ê.
Kı̂-sı̍t.
Thiⁿ--nih ê pē m̄-bat kā lí pàng-lı̄.
Thiⁿ--nih ê pē mı̂-jı̍t kap lí khiā-khí.
Sui-bóng sit-lo̍h lâng ê lāu-pē,
Thiⁿ-pē ê thiàⁿ beh iâⁿ-koè choē-choē.
Lán beh saⁿ-kap biān-tùi
Toaⁿ-chhin ê tông-nı̂.
Thâu-chêng ê lō͘ sui-jiân kiā,
Thiⁿ-pē beh ín-chhoā, kap lán tâng-kiâⁿ.
Poē tı̄ keng-thâu ê sı̍p-jı̄-kè,
Beh chiâⁿ-choè un-tián têng-poē.
Goān thiⁿ--nih ê pē
Bô khoàⁿ goá ê bı̂-sè,
Chhiâⁿ lí choè êng-kng i ê khı̀-kū.
