Thian-lô-pán

Joa̍h-thiⁿ í-keng kūn lah. Khong- khı̀ jı̍t-jı̍t ná sio-lō. Koh bô kú chiū toā joa̍h. Joa̍h nā kàu tāi-ke chiū kan- khó͘. Sui-jiân chhēng joa̍h-saⁿ chhut- la̍t ia̍t sı̀ⁿ, á-sı̄ chia̍h peng chúi iā sı̄ boē chhiu-chhı̀n. Jı̍t-thâu chı̍t-ē iām chhù-lāi liâm-piⁿ jia̍t phóng-phóng. Chhù-téng pha̍k chı̍t-ē sio, sio-khı̀ tùi téng-bı̄n hah lo̍h-lâi, bô kú koāⁿ chiū chhap-chhap tih, sı̀ⁿ koh khah ia̍t to boē chhiu-chhı̀n. Chhù-lāi pha̍k kàu jia̍t kún-kún, gín- ná toā-soè tāi-ke iā sı̄ kan-khó͘. Hip joa̍h liáu pı̄ⁿ iā liâm-piⁿ kàu. Ū-ê siⁿ pùi-á, ū-ê siⁿ lia̍p-á, ū-ê hoat-khí jia̍t- chèng, joa̍h kàu, chèng-thâu iā kàu. Taⁿ m̄-chai ū sím-mı̍h hó hoat-tō͘ thang hō͘ chhù-lāi khah liâng,khah chhiu-chhı̀n bô ? Ū, ū chı̍t ê hó hoat- tō͘. Chhù-lāi tio̍h tèng thian-lô-pán. Chhù nā bô thian-lô-pán, chhù-téng pha̍k sio, sio khı̀ liâm-piⁿ hah lo̍h-lâi. Chhù-lāi nā ū thian-lô-pán sio khı̀ chiū hah boē lo̍h-lâi. Sio khı̀ ka-kı̄ oē tùi ian-lâu chhut-khı̀. Án-ni chhù-lāi khah bô sio khı̀. Chhù nā chhòng thian-lô- pán chı̀-chió oē ke chhiu-chhı̀n 5 tō͘. Án-ni m̄-sı̄ sió-khoá. Koh chı̍t hāng. Thian-lô-pán m̄-nā oē hō͘ chhù-lāi khah liâng, ū thian-lô-pán chhù-lāi iā oē khah chheng-khı̀, khah boē eng-ia. Koh-chài ke hó khoàⁿ chin-choē. Lán Tâi-oân ê chhù tē-it khiàm sı̄ 2 hāng. It: thian-lô-pán; jı̄: toā ê thang-á. In-ūi chhù bô thian-lô-pán, thang-á bô kàu-gia̍h toā, só͘-í joa̍h-thiⁿ ê sı̂ chhù oē hiah-nı̍h hip. Thang-á nā chhòng khah toā, chhù-lāi khah ū khong-khı̀, chū-jiân chiū khah chhiu- chhı̀n. Koh-chài oē khah kng. In-ūi ū chiah ê lı̄-ek ê só͘-chāi, taⁿ bāng tāi-ke nā choè oē kàu, kin-nı̂ joa̍h-thiⁿ kā i chhı̀-khoàⁿ. Chhù-lāi kín tèng thian-lô-pán. Ēng pang tèng Jı̍t- pún khoán m̄ bián loā-choē chı̂ⁿ. Iā thang-á thiah khah toā leh. Joa̍h-thiⁿ nā kàu chiū m̄ bián koh hip joa̍h lâi tú-tio̍h pı̄ⁿ. Siat-sú kok pài-tn̂g ê siok-sià nā chhòng, iā oē chin toā lı̄-ek tı̄ thoân-tō-su ê sin-thé. (Tâi-oân Kàu-hoē-pò tē 400 koàn, 1918 nı̂ 7 ge̍h)