Tē-it-pún
Ē-mn̂g Kó͘-lōng-sū Chūi-keng-tông ı̀n
1897
Bûn Iok-hān chiū-sı̄ choè chit-pún chheh ê lâng. Sı̄ Tāi-eng kok lâng, chhut-sı̀ 1628 nı̂, sí 1688 nı̂.
Goá kiâⁿ chit sè-kan ê khòng-iá, tú-tio̍h chı̍t-só͘-chāi ū hia̍t, goá tı̄ hit só͘-chāi tó-teh khùn, khùn chiū bāng-kı̀ⁿ chı̍t-ê bāng: Bāng-kı̀ⁿ chı̍t-lâng, saⁿ put-chí phoà-noā, khiā tı̄ chı̍t-só͘-chāi, bı̄n bô ǹg i ê chhù, khoàⁿ pa̍t ūi, chhiú the̍h chheh, keng-thâu-téng ū tāng-tàⁿ. Koh khoàⁿ i hian chheh teh khoàⁿ, kiaⁿ kàu ngia̍uh-ngia̍uh-chhoah, lâu ba̍k-sái, tòng-boē-tiâu, chiū chhut toā ai-chhám ê siaⁿ kóng, Goá tio̍h cháiⁿ-iūⁿ choè? I ê chêng-hêng chhin-chhiūⁿ án-ni; āu-lâi chiū tò-khı̀, bián-kióng bô lâu ba̍k-sái, gia̍uh-ngia̍uh-chhoah, hō͘ bó͘-kiáⁿ khoàⁿ-kı̀ⁿ i ê iu-khó͘, chóng-sı̄ in-ūi m̄-ài i ê iu-khó͘ chiām-chiām khah tāng, kàu lō͘-bé boē-oē chēng-chēng. Só͘-í ēng hit-ê sū kā i ê bó͘-kiáⁿ kóng, Háiⁿ! hiân-chhe--ah, ài-chú--ah, lín sı̄ goá chı̀-chhin, taⁿ in-ūi tāng-tàⁿ teh--goá tit-beh bia̍t-bô; ia̍h tek-khak chai lán chit-ê siâⁿ tit-beh hō͘ thiⁿ-hé sio--khı̀; tú-tio̍h che châu-bia̍t ê sı̂, goá, kap hiân-chhe ài-chú, beh lóng-chóng siū chhiⁿ-chhám bia̍t-bô; nā m̄-sı̄ tāi-seng chhē chı̍t-tiâu oa̍h lō͘, beh án-cháiⁿ-iūⁿ siám-pı̄ i? nā-sı̄ bē chai ū chit-ê lō͘ á-bô.
I ê bó͘ kiáⁿ chı̍t-ē thiaⁿ-kı̀ⁿ chit-ê oē, put-chí kiaⁿ-hiâⁿ, che m̄-sı̄ sı̀n i ê oē sı̄ chin--e, sı̄ phah-sǹg i teh hoat-kông tiāⁿ-tiāⁿ; só͘-í jı̍t beh àm, ǹg-bāng i nā khùn, sim kiám-chhái oē tiāⁿ-tio̍h; chiū koáⁿ-kín hû i khı̀ khùn. Chóng-sı̄ i thong-mı̂ chhin-chhiūⁿ jı̍t--sı̂, sim-koaⁿ sı̍t-chāi bô pêng-an; khùn boē chiâⁿ bı̂n, kui mı̂ ná thó͘-khùi, ná lâu ba̍k-sái; kàu thiⁿ-kng, ke-lāi ê lâng lâi mn̄g an; i ı̀n kóng, Jú kú jú m̄ an; koh ēng tāi-seng kóng ê oē têng-thâu kóng. I ke-lāi ê lâng hut-lio̍k i ê oē, m̄ thiaⁿ--i, phah-sǹg nā ēng put-chêng khoán-thāi--i, kiám-chhái thang tû-khı̀ i ê pı̄ⁿ, só͘-í ū-sı̂ ki-chhı̀ chhiò--i. ū-sı̂ chek-pı̄ mē--i, ū-sı̂ lóng bô chiàu-kò͘--i. Hit-ê lâng chiū jı̍p-khı̀ ka-kı̄ ê pâng, chı̍t-ê siong-pi ka-kı̄ ê chhám, chı̍t-ē lı̂n-bín i ke-lāi ê lâng, thoè in kı̂-tó. Koh ū-sı̂ toaⁿ-sin kiâⁿ tı̄ chhân--nih ê tiong-kan, hut-jiân khoàⁿ chheh, hut-jiân kı̂-tó, keng-kè kúi-nā jı̍t lóng sı̄ án-ni.
Ū chı̍t-sı̂, goá khoàⁿ-kı̀ⁿ i tú-á kiâⁿ tı̄ chhân--nih, iû-goân khoàⁿ chheh, sim-koaⁿ put-chí iu-būn ai-chhám, khoàⁿ chheh ê sı̂ chhin-chhiūⁿ tāi-seng chhut siaⁿ toā kiò kóng, Goá tio̍h cháiⁿ-iūⁿ choè, chiah oē tit-tio̍h kiù? Koh khoàⁿ chia, khoàⁿ hia, chhin-chhiūⁿ tit-beh cháu chı̍t-poaⁿ-iūⁿ, nā-sı̄ iáu-kú teh khiā. Goá khoàⁿ hit-ê chêng-hêng sı̄ in-ūi m̄-chai tio̍h tùi tah-lo̍h chı̍t-tiâu lō͘ thang khı̀. Hit-sı̂ goá chiū khoàⁿ-kı̀ⁿ chı̍t-lâng, miâ kiò Thoân-tō, chiū-kūn mn̄g, kóng, Lí siáⁿ-sū ai-ai kiò? hit-ê lâng ı̀n kóng, Chun-kà--ah, goá khoàⁿ chhiú-tiong ê chheh, chai goá tek-khak sí, sí liáu-āu tek-khak siū sím-phoàⁿ: án-ni ka-kı̄ mn̄g goá ê sim-koaⁿ: sí, goá m̄ goān; sím-phoàⁿ, goá ia̍h oh-tit tng.
Thoân-tō chiū kā i kóng, Sè-kan choē-choē kan-khó͘, lí siáⁿ-sū m̄ goān sí? hit-ê lâng ı̀n kóng, Goá kiaⁿ-liáu keng-thâu-téng ê tàⁿ teh goá pí bōng khah kē, chiū-sı̄ hām-lo̍h goá tı̄ tē-ge̍k. Chun-kà--ah, goá jı̍p kaⁿ-lô siōng-chhiáⁿ oh-tit tng, hô-hóng tú-tio̍h sím-phoàⁿ, thoa kàu sí-toē; goá siūⁿ chit-ê sū-chêng chiū ai-ai kiò.
Thoân-tō kóng, Lí ê chêng-hêng nā án-ni-siⁿ, siáⁿ-sū iáu-kú khiā tı̄ chia, m̄ khı̀? Ìn kóng, In-ūi m̄-chai eng-kai tùi tah-lo̍h khı̀. Thoân-tō chiū hō͘ i chı̍t-kńg phê, lāi-bı̄n siá kóng, Tit-beh kàu ê siū-khı̀, eng-kai cháu siám-pı̄.
Hit-ê lâng khoàⁿ chit chat, chiū ba̍k-chiu chù-sı̂n khoàⁿ Thoân-tō kóng, Goá eng-kai cháu siám-pı̄, khı̀ tah-lo̍h? Thoân-tō ēng chńg-thâu-á kí kóng, Tı̍t-tı̍t khı̀ khòng-iá goā, hit-ê oe̍h-mn̂g, lí khoàⁿ-kı̀ⁿ á bô? Ìn kóng, Bô. Koh kóng, hit-ê kng-kng, lí khoàⁿ-kı̀ⁿ á bô? Ìn kóng, Ū--ah, lı̂-a khoàⁿ-kı̀ⁿ. Thoân-tō chiū kóng, hit-ê kng, lí eng-kai ba̍k-chiu chù-sı̂n tı̍t-tı̍t khı̀ chiū-kūn--i, chiah oē khoàⁿ-kı̀ⁿ hit-ê oe̍h-mn̂g; lí nā phah mn̂g, tek-khak ū lâng beh kā lí kóng só͘ tio̍h kiâⁿ--ê. Chiàⁿ chhin-chhiūⁿ si ū kóng,
Chhíⁿ-gō͘ chai choē tio̍h tı̂m-lûn,
Kiaⁿ-liáu bô thang kiù lêng-hûn;
Kai-chài Thoân-tō lâi chí-bêng,
Ū thang bián-sí, tit éng-seng.
Goá bāng-kı̀ⁿ hit-ê lâng sûi-sı̂ cháu, lı̄-khui in tau bē hn̄g, i ê bó͘-kiáⁿ khoàⁿ-kı̀ⁿ, chiū âu--i tò-lâi. Hit-ê lâng ēng nn̄g chhiú ng hı̄-khang tı̍t-tı̍t cháu, toā siaⁿ kiò kóng, Oa̍h! Oa̍h! éng-oán oa̍h! Lóng bô oa̍t-kè-lâi khoàⁿ, chheng-chheng ǹg pı̂ⁿ-iûⁿ ê tiong-ng, án-ni cháu.
Hit-sı̂ chhù-piⁿ ia̍h chhut-lâi khoàⁿ, khoàⁿ-kı̀ⁿ i kín-kín cháu, ū-ê ki-chhı̀ khoàⁿ-khin--i, ū-ê siū-khı̀ hoah--i, ia̍h ū-ê kiò i tio̍h tò--lâi. Tiong-kan ū nn̄g lâng koat-toàn beh jip, bián-kióng i tò lâi. In ê miâ sı̄ Kò͘-chip , Īⁿ-chhian . Hit-sı̂ hit-lâng ū cháu hiah hn̄g, nn̄g lâng iáu-kú teh jip--i, bē loā-kú jip--tio̍h. Hit lâng chiū kóng, Chhù-piⁿ--ah, lín beh siáⁿ-sū? Nn̄g lâng ı̀n kóng, Goán lâi khǹg lí kap goán saⁿ-kap tò-khı̀, hit-ê lâng ı̀n kóng, Che chhian-bān m̄-thang, lín khiā tı̄ Chiong-bông siâⁿ, goá ia̍h chhut-sı̀ tı̄ hia, chai hit-ê siâⁿ tit-beh bia̍t-bô. Lín nā tn̂g-tn̂g khiā tı̄ hit só͘-chāi, sı̄ tek-khak tūi-lo̍h pí bōng khah kē, chiū-sı̄ jı̍p tē-ge̍k jiû-n̂g hé sio ê só͘-chāi. Hó ê chhù-piⁿ--ah, eng-kai thiaⁿ goá, kap goá saⁿ-kap khı̀.
Kò͘-chip ı̀n kóng, Háiⁿ! Che án-cháiⁿ-iūⁿ kóng, kám sı̄ ài goán pàng-sak lóng-chóng ê pêng-iú, lóng-chóng ê khoài-lo̍k, kap lí khı̀ mah?
Hit lâng, miâ chiū-sı̄ Ki-tok-tô͘, ı̀n kóng, Tio̍h; in-ūi che lóng-chóng ê mı̍h, pí goá só͘ kiû ê hok-khı̀, bān-hūn m̄ ta̍h-tio̍h chı̍t-hūn. Lí nā kap goá khı̀, tùi khí-thâu kàu lō͘-bé bô pàng-sak, chiū goá só͘ tit-tio̍h--ê, lí iā tit-tio̍h, in-ūi goá só͘ khı̀ ê só͘-chāi, ta̍k-hāng kàu-gia̍h koh ū chhun, m̄ ta̍h--tio̍h saⁿ-kap khı̀, chhı̀-khoàⁿ goá ê oē.
Kò͘-chip ı̀n kóng, Lí í-keng kam-goān pàng-sak sè-kan só͘ ū ê, iáu beh kiû sim8-mı̍h mı̍h?
Ki-tok-tô͘ ı̀n kóng, Goán kiû boē pāi-hoāi, boē lâ-sâm, boē hoè-bô ê ke-gia̍p, ún-tàng ū, sı̄ tı̄ thiⁿ--nih; kı̀ⁿ-nā khûn-khûn kiû ê lâng, tiāⁿ-tio̍h ê sı̂ kàu, chiū hō͘--i. Chit-ê chheh ū kı̀-chài án-ni, lín nā khoàⁿ--i, chiū oē chai bêng.
Kò͘-chip kóng, Hé! Chūi-á beh khoàⁿ? Lí kam-goān kap goán tò-khı̀, á bô? Ìn--i kóng, Goá toàn-toàn m̄ tò--khı̀, in-ūi chhiú í-keng hoāⁿ hit-ê loê, m̄-thang oa̍t-thâu khoàⁿ.
Kò͘-chip chiū kā Īⁿ-chhian kóng, Nā-sı̄ án-ni, lán tio̍h tò-khı̀, chhut-chāi i khı̀; che chit-hō kông ê lâng, chı̍t-ē khí gōng-siūⁿ, chiū ka-kı̄ phah-sǹg pí chhit-ê gâu-lâng khah ū tı̀-sek. Īⁿ-chhian kóng, Bo̍h-tit mē--i, chit-ê Ki-tok-tô͘ só͘ kóng--ê, nā-sı̄ chin, chiū i ê só͘ kiû, pí lán ê só͘ kiû, tek-khak ū khak hó; i sı̄ goá ê chhù-piⁿ, goá ı̀-ài kap i khı̀.
Kò͘-chip kóng, Háiⁿ! I kông, lí ia̍h kông. Lí eng-kai tè goá tò--khı̀, chūi-á chai, chit-hō sim-koaⁿ hoat-kông ê lâng, beh chhoā lí tah-lo̍h khı̀? Lí eng-kai tò--khı̀, bo̍h-tit ka-kı̄ gōng.
Ki-tok-tô͘ chiū kóng, M̄-thang án-ni, lí kap lí ê pêng-iú, ia̍h eng-kai saⁿ-kap khı̀, goá tú-á só͘ kóng, sı̍t-chāi ū chit-hō sū-chêng, che í-goā, iáu ū choē-choē ê êng-kng: nā m̄ sı̀n goá, chhiáⁿ khoàⁿ chit-ê chheh, tiong-ng só͘ kı̀-chài lóng sı̄ chin, in-ūi choè chit-ê chheh, chiū-sı̄ lâu i ê huih choè kan-chèng.
Īⁿ-chhian kā Kò͘-chip kóng, Hó ê chhù-piⁿ--ah! Goá ê sim-koaⁿ chha-put-to koat-toàn, beh phoāⁿ chit-ê hó-lâng saⁿ-kap khı̀, put-lūn tú-tio̍h hó-pháiⁿ, goá iā kam-goān. Chiū tùi Ki-tok-tô͘ kóng, Hó ê tâng-phoāⁿ--ah, khı̀ hoaⁿ-hí ê só͘-chāi, lí bat lō͘ mah?
Ki-tok-tô͘ ı̀n kóng, Ū chı̍t-lâng, miâ Thoân-tō, kí hō͘ goá khoàⁿ kóng, chêng-bı̄n ū chı̍t-ê oe̍h-mn̂g, tio̍h koáⁿ-kín chiū-kūn--i, nā kàu hia, tek-khak ū lâng chí-tiám lán hit-ê lō͘ tùi tah-lo̍h khı̀. Īⁿ-chhian kóng, Hó ê chhù-piⁿ--ah, nā án-ni, lán tio̍h khı̀. Nn̄g lâng chiū saⁿ-kap khı̀.
Kò͘-chip kóng, Goá tek-khak beh tò-khı̀ goán tau, chit-hō bóng-tóng ê lâng, goá tek-khak m̄ kap i choè phoāⁿ.
Hit-sı̂ goá khoàⁿ-kı̀ⁿ Kò-chip í-keng tò-khı̀, Ki-tok-tô͘ kap Īⁿ-chhian chiām-chiām kiâⁿ kè pı̂ⁿ-iûⁿ ê tiong-kan, Ki-tok-tô͘ chiū kā Īⁿ-chhian kóng, Lí thàn goá ê oē, goān kap goá khı̀, goá sim-koaⁿ put-chí hoaⁿ-hí. Hit-ê kò͘-chip nā oē chhin-chhiūⁿ goá chhíⁿ-gō͘, chai hit-ê iáu-bē oē khoàⁿ-kı̀ⁿ kap put-chí thang kiaⁿ ê sū-chêng, tek-khak bô án-ni sûi-piān pàng-sak lán.
Īⁿ-chhian kóng, Taⁿ lí goá tı̄ chia, beh khı̀ ê só͘-chāi sı̄ cháiⁿ-iūⁿ? Koh cháiⁿ-iūⁿ oē tit-tio̍h? Chhiáⁿ siông-sè kā goá kóng.
Ki-tok-tô͘ ı̀n kóng, Goá lio̍h-á oē siūⁿ, bē oē kóng; nā-sı̄ lí ài beh chai, goá chiū chiong chit-ê chheh tha̍k hō͘ lí thiaⁿ.
Īⁿ-chhian kóng, Chit-ê chheh só͘ kóng--ê, lí phah-sǹg tek-khak lóng sı̄ chin mah?
Ki-tok-tô͘ ı̀n kóng, Tek-khak sı̄ chin, in-ūi tù chit-ê chheh, i sı̄ chin-sı̍t bô pe̍h-chha̍t.
Īⁿ-chhian kóng, Chit-ê oē sı̄ hó; nā-sı̄ só͘ kı̀-chāi ê sū-chêng sı̄ cháiⁿ-iūⁿ?
Ki-tok-tô͘ ı̀n kóng, Ū chı̍t-ê éng-oán tı̄-teh ê kok, koh ū éng-oán oa̍h beh siúⁿ-sù lán, hō͘ lán oē-tit-thang tn̂g-tn̂g khiā tı̄ hia.
Īⁿ-chhian kóng, Chit-ê oē sı̄ hó, iáu--ê, sı̄ án-cháiⁿ-iūⁿ?
Ki-tok-tô͘ ı̀n kóng, Ū êng-kng ê bián-liû, kap kng-kng ê saⁿ beh siúⁿ-sù lán, hō͘ lán ê seng-khu chhàn-lān chhin-chhiūⁿ thiⁿ--nih ê jı̍t.
Īⁿ-chhian kóng, Nā-sı̄ án-ni sı̄ put-chí hó; iáu--ê sı̄ cháiⁿ-iūⁿ?
Ki-tok-tô͘ ı̀n kóng, Hit só͘-chāi lóng bô thı̂-khàu hoân-ló, in-ūi hit só͘-chāi ê Chú beh chhit lán ê ba̍k-sái.
Īⁿ-chhian kóng, Lán nā-sı̄ khiā tı̄ hia, kap chı̄-chūi-á choè phoāⁿ?
Ki-tok-tô͘ ı̀n kóng, Kap thiⁿ-sài saⁿ-kap tiàm, in ê kng toa̍t lâng ê ba̍k-chiu, koh tāi-seng lán khı̀ hia ū chheng-chheng bān-bān lâng, lí khı̀ ia̍h oē kı̀ⁿ--tio̍h in; in bô saⁿ-hāi, lóng saⁿ-thiàⁿ, tāi-ke sı̄ sèng, pài-kı̀ⁿ Siōng-tè, hō͘ Siōng-tè hoaⁿ-hí, án-ni éng-oán khiā tı̄ Chú ê bı̄n-chêng. Pau-hâm lâi kóng, nā kàu hit só͘-chāi, tek-khak khoàⁿ-kı̀ⁿ hiah-ê lāu-toā, chhēng pe̍h ê saⁿ, tı̀ kim ê bián-liû; ia̍h khoàⁿ-kı̀ⁿ hiah-ê chāi-sek-lú, ta̍k-ê chhiú the̍h kim ê khı̂m. Koh ū lâng in-ūi thiàⁿ Chú, thàn i ê bēng-lēng, án-ni hō͘ sè-kan lâng hām-hāi, kiám-chhái tú-tio̍h koah kàu chhùi-chhùi, á-sı̄ hō͘ hé sio, á-sı̄ hiat hō͘ iá-siù chia̍h, á-sı̄ thiām lo̍h hái, hiah-ê lâng taⁿ í-keng ióng-ióng, chhēng éng-oán-oa̍h ê saⁿ, lán kàu hia tek-khak oē tit-thang kı̀ⁿ-tio̍h in.
Īⁿ-chhian kóng, Taⁿ khoàⁿ-kı̀ⁿ lí ê oē, chin-chiàⁿ oē toa̍t lâng ê sim-koaⁿ; nā-sı̄ chit-ê hok-khı̀ ū-iáⁿ, oē tit-tio̍h á-bô? Koh tio̍h cháiⁿ-iūⁿ kiâⁿ, chiah oē tit-tio̍h?
Ki-tok-tô͘ ı̀n kóng, Lí taⁿ só͘ mn̄g, hit só͘-chāi ê Chú ū bat kı̀-chài tı̄ chit-ê chheh, hit-ê tāi-lio̍k sı̄ kóng, chit-ê hok-khı̀ lán nā sêng-sı̍t ài, Chú chiū hoaⁿ-hí pe̍h-pe̍h hō͘ lán.
Īⁿ-chhian kóng, Án-ni chin hó; goá thiaⁿ-kı̀ⁿ che put-chí hoaⁿ-hí; hó ê tâng-phoāⁿ--ah, taⁿ tio̍h koáⁿ-kín kiâⁿ.
Ki-tok-tô͘ ı̀n kóng, Goá ài kín-kín kiâⁿ, nā-sı̄ keng-thâu ū chit-ê tāng-tàⁿ, só͘-í hō͘ kha boē thàn sim.
Hit-sı̂ goá bāng-kı̀ⁿ pı̂ⁿ-iûⁿ ê tiong-kan ū chı̍t-ê thô͘-khut, chiū-sı̄ miâ Iu-ut ê thô͘-khut. Nn̄g lâng oē kóng liáu, tú-á kūn hit-ê só͘-chāi, in-ūi kiâⁿ bô soè-jı̄, hut-jiân poa̍h-lo̍h hit-ê thô͘-khut, chı̍t-sı̂ loān-loān noà, thô͘-bê kô͘ chı̍t seng-khu. Ki-tok-tô͘ in-ūi keng-thâu-téng ê tàⁿ sı̄ tāng, ná noà ná chhim.
Īⁿ-chhian kā Ki-tok-tô͘ kóng, Taⁿ lí sı̄ cháiⁿ-iūⁿ? Ìn kóng, Goá chin-chiàⁿ m̄-chai.
Īⁿ-chhian siū-khı̀, toā him Ki-tok-tô͘ kóng, Hǹg! Káⁿ-sı̄ lí kā goá kóng ê hok-khı̀ mah? Lán tú-á chiūⁿ lō͘ chiū tú-tio̍h che, hô-hòng tùi chia khı̀ kàu lō͘-bé! Goá nā oē thoat-chhut chia, sui ū hó ê só͘-chāi, lí thang ka-kı̄ khı̀. I chiū oa̍t-thâu ǹg in chhù hit-bı̄n, ēng la̍t kùn nn̄g-saⁿ ē, hut-jiân peh khí-lâi thô͘ -khut hoāⁿ, chiū tò-khı̀. Ki-tok-tô͘ bô koh khoàⁿ-kı̀ⁿ--i.
Hit-sı̂ Ki-tok-tô͘ tı̄ Iu-ut thô͘-khut ê tiong-ng ka-kı̄ hoan-lâi hoan-khı̀, it-hoat chhut-la̍t lı̄ i ê chhù, ǹg hit-ê oe̍h-mn̂g, sim-koaⁿ chin-chiàⁿ ài án-ni, in-ūi tàⁿ tāng chiah boē thoat-lı̄.Hit-sı̂ goá koh bāng-kı̀ⁿ chı̍t-lâng, miâ Un-chō͘, chiū-kūn--i kóng, Lí beh thái oē tı̄ chia?
Ki-tok-tô͘ ı̀n kóng, Ū chı̍t-lâng, miâ Thoân-tō, chí-tiám goá eng-kai tùi chia khı̀ hit-ê oe̍h-mn̂g, chiah thang siám-pı̄ beh kàu ê siū-khı̀; goá tú-á beh khı̀, chiū poa̍h-lo̍h tı̄ chia.
Un-chō͘ kóng, Lí siáⁿ-sū bô khoàⁿ-kı̀ⁿ thô͘-tiong ū chio̍h-teng, chiah ta̍h i lâi kiâⁿ.
Ki-tok-tô͘ ı̀n kóng, Goá put-chí kiaⁿ-hiâⁿ, chiū tùi chit tiâu lō͘ koáⁿ-kín cháu, chiah poa̍h-lo̍h tı̄ chia.
Un-chō͘ kóng, Lí chhun chhiú; i ê chhiú chiū chhun, liâm-piⁿ pu̍ih i chhut, hō͘ i khiā tı̄ sı̍t-toē, bēng-lēng i chiūⁿ lō͘ koh khı̀.
Hit-sı̂ goá chiū-kūn Un-chō͘, mn̄g i kóng, Tùi Chiong-bông siâⁿ khı̀ hit-ê oe̍h-mn̂g, tio̍h tùi chia keng-kè, siáⁿ-sū m̄ siu-pı̂ⁿ chit só͘-chāi, hō͘ kè-lō͘ lâng an-ún khı̀?
Un-chō͘ kóng, Che sı̄ chhim thô͘-khut ê só͘-chāi, sı̍t-chāi oh--tit siu pı̂ⁿ, chiū-sı̄ lâng chhíⁿ-gō͘ i ê choē, hiah-ê só͘ hoat-chhut che-tái ú-oè it-chı̄n lâu-lo̍h tı̄ chia, só͘-í miâ kiò Iu-ut ê thô͘-khut, in-ūi ū choē ê lâng chai i tit-beh bia̍t-bô ê chêng-hêng, sim-koaⁿ choē-choē iu-būn, kiaⁿ-hiâⁿ, ut-chut, lóng-chóng kiat-lia̍t chū-chı̍p tı̄ chia, só͘-í chit-ê toē chiâⁿ choè noā-toē; nā-sı̄ toē noā, m̄-sı̄ Chú ê ı̀-sù, in-ūi Chú choè kang ê lâng bat thàn in ê kàm-tok ê kà-sı̄, chiah ū tio̍h-boâ tı̄ chia, í-keng chı̍t-chheng poeh pah goā nı̂, kiám-chhái oē siu pı̂ⁿ. Bat ê lâng kóng, nā beh siu pı̂ⁿ chit só͘-chāi, m̄ ta̍h-tio̍h ēng hok-im ê kà-sı̄; koh goá chai hit-ê kà-sı̄ choē-choē tiâu, siông-siông tùi sı̀-koè taⁿ lâi thūn tı̄ chia; hit-ê só͘ thūn--ê chiū-sı̄ lóng-chóng koé iu-ut ê kà-sı̄, kè-kiōng ū kúi-nā bān tàⁿ, chiū kóng i ū chheng-bān tàⁿ ia̍h thang; nā-sı̄ chit tè-á toē, iû-goân sı̄ thô͘-khut ê só͘-chāi. Án-ni Chú lóng-chóng choè kang ê lâng, sui-bóng chı̄n ka-kı̄ só͘ oē--ê lâi choè, kàu bé ia̍h tek-khak miâ i choè Iu-ut ê thô͘-khut. Sui-jiân án-ni, hit-ê thô͘-khut ê tiong-ng, chiàu Chú ê bēng-lēng, ū chio̍h pho͘--teh, an-ún koh kian-kò͘, nā-sı̄ lo̍h-hō͘ ê sı̂, hit-ê lâ-sâm thô͘ sı̀-koè lâu--lâi, kàu hō͘ chio̍h boē thang khoàⁿ-kı̀ⁿ, siông-siông in-ūi thâu-khak hı̂n, gōng-chhò ta̍h-lio̍h hit-ê piⁿ-á--nı̍h, koh, sui ū chio̍h-thâu, iā bak-tio̍h lâ-sâm. Lâng nā jı̍p oe̍h-mn̂g, hit-pêng chiū-sı̄ sı̍t-toē.
Hit-sı̂ goá bāng-kı̀ⁿ Īⁿ-chhian tò-khı̀ kàu in chhù, chhù-piⁿ lâi kı̀ⁿ--i. Ū ê khoàⁿ-kı̀ⁿ i tò--lâi, kóng i sı̄ tı̀-sek; ū ê in-ūi i kam-goān siū gûi-hiám tè Ki-tok-tô͘ khı̀, chhiò i gû-gōng; iā ū ê kā i kóng, Lí í-keng chhı̀-khoàⁿ hit-ê lō͘, sı̍t-chāi m̄-thang in-ūi sió-khoá ê iân-kò͘ lâi pàng-sak--i. Chiū chhiò i sió-táⁿ; só͘-í Īⁿ-chhian kiàn-siàu, hit-sı̂ chē tı̄ in tiong-kan, lóng m̄-káⁿ kia̍h-thâu, tiap-á-kú i ê bı̄n chiàu-goân, chèng-lâng hoán-lı̀n-tńg, chhiò-mē Ki-tok-tô͘, kóng i ka-chiah-āu oē.
Hit-sı̂ Ki-tok-tô͘ toaⁿ-sin bô kio̍k teh kiâⁿ, hn̄g-hn̄g khoàⁿ-kı̀ⁿ chı̍t-lâng, keng-kè chhân--nih lâi, tú-á sio tú-tio̍h. Hit-ê lâng miâ Sè-tı̀, khiā-khí tı̄ Sio̍k-chêng ê siâⁿ; hit-ê siâⁿ put-chí toā, kūn Ki-tok-tô͘ só͘ chhut ê siâⁿ. Hit-ê lâng lio̍h-á chai Ki-tok-tô͘ ê sū-chêng, in-ūi i cháu lı̄ Chiong-bông siâⁿ, hit-sı̂, lâng toā pò-iông i ê tāi-chı̀, m̄-nā tı̄ Ki-tok-tô͘ pún só͘-chāi tiā-tiāⁿ, chiū pa̍t só͘-chāi ia̍h ū kóng. Só-í Sè-tı̀ khoàⁿ-kı̀ⁿ ū thó͘-khùi teh kiâⁿ ê lâng, hêng-chōng put-chí lô-khó͘, phah-sǹg tek-khak sı̄ Ki-tok-tô͘, chiah mn̄g i kóng, Lí ê hêng-chōng kàu chiah lô-khó͘, sı̄ beh to̍h-lo̍h khı̀?
Ki-tok-tô͘ ı̀n kóng, Sı̍t-chāi lô-khó͘! Bē ū lâng pí goá khah lô-khó͘. Lí mn̄g goá beh to̍h-khı̀, goá kín-mé kā Sian-siⁿ lí kóng, sı̄ beh khı̀ hit-ê oe̍h-mn̂g, goá thiaⁿ-kı̀ⁿ nā kàu hit só͘-chāi, tek-khak ū lâng chí-tiám goá, cháiⁿ-iūⁿ tit-thang thǹg chit-ê tāng-tàⁿ.
Sè-tı̀ mn̄g kóng, Lí ū bó͘-kiáⁿ á-bô?
Ki-tok-tô͘ ı̀n kóng, Ū--ah, chheng-chheng in-ūi che tāng-tàⁿ teh--goá, sui ū bó͘-kiáⁿ, boē kò͘-tit chhin-chhiūⁿ tāi-seng kap in hoaⁿ-hí, ū ná-bô--nih.
Sè-tı̀ kóng, Goá nā khǹg lí, lí beh thiaⁿ á m̄?
Ki-tok-tô͘ ı̀n kóng, Lí nā ēng hó--ê khǹg goá, goá chiū thiaⁿ lí, in-ūi hó ê só͘ khǹg, tú-á sı̄ goá só͘ khiàm-ēng.
Sè-tı̀ kóng, Goá taⁿ khǹg lí chit-ê tàⁿ tio̍h koáⁿ-kín ka-kı̄ pàng hiat-ha̍k, nā bô, sim-koaⁿ kàu lō͘-bé bô pêng-an, koh Siōng-tè só͘ siúⁿ lí lóng-chóng ê hok-khı̀, ia̍h boē-tit-thang hióng-siū.
Ki-tok-tô͘ kóng, Goá ê só͘ kiû chiū-sı̄ ài pàng-khı̀ chit-ê tāng-tàⁿ, chóng-sı̄ goá ka-kı̄ boē pàng-khı̀, goá ê pún só͘-chāi ia̍h bô lâng oē thoè goá pàng--i; só͘-í goá taⁿ kiâⁿ chit-ê lō͘, sı̄ ài pàng chit-ê tāng-tàⁿ tiā-tiāⁿ.
Sè-tı̀ kóng, Chūi-á bēng-lēng lí kiâⁿ chit tiâu lō͘, tit-thang pàng chit-ê tàⁿ?
Ki-tok-tô͘ kóng, Ū chı̍t-ê lâng, chiàu goá khoàⁿ, tek-khak sı̄ chun-kùi ê lâng, miâ kiò Thoân-tō.
Sè-tı̀ kóng, Háiⁿ, i khǹg lí kiâⁿ chit tiâu lō͘--lah! Sè-kan lâng só͘ kiâⁿ ê lō͘ bē ū khah gûi-hiám lo-so chit tiâu lō͘, lí nā m̄ thiaⁿ goá, āu-lâi tek-khak ka-kı̄ chai; goá khoàⁿ lí ū tú-tio̍h--lah, in-ūi lí seng-khu ū Iu-ut ê thô͘, che put-kò sı̄ kiâⁿ chit-ê lō͘ ê lâng khí-thâu tú-tio̍h ê kan-khó͘ tiā-tiāⁿ. Goá pí lí khah choē hè, lí tio̍h thiaⁿ goá khǹg, lí kiâⁿ chit-ê lō͘, sè-bı̄n tek-khak ū hùi-khı̀, ià-lái, iau-gō, thǹg-pak-theh, gûi-hiám, to-siong, ok-siù, o͘-àm, sí-sit, lóng-chóng ê chāi-ē, bô chı̍t-hāng m̄ kàu; tek-khak ū che ê sū-chêng, in-ūi choē-choē lâng ū choè kan-chèng, lí kám thang thiaⁿ pông-pian lâng ê oē, án-ni sûi-piān ka-kı̄ pàng-sak?
Ki-tok-tô͘ kóng, Chun-kà--ah, goá siūⁿ, chí keng-thâu-téng ê tàⁿ, pí lí só͘ kóng lóng-chóng ê sū-chêng, koh khah ū thang kiaⁿ-hiâⁿ. Goá phah-sǹg nā oē pàng chit-ê tàⁿ, lō͘ ê tiong-kan sui ū che ê kan-khó͘, ia̍h lóng m̄-sái khoà-ı̀.
Sè-tı̀ kóng, Lí khí-thâu án-cháiⁿ-iūⁿ chai ū chit-ê tāng-tàⁿ?
Ìn kóng, Goá tha̍k chhiú-tiong chit ê chheh, liâm-piⁿ chai ū chit-ê tàⁿ.
