Sè-tı̀ kóng, Goá phah-sǹg sı̄ án-ni: bô châi-chêng ê lâng chhin-chhiūⁿ lí gōng-siūⁿ siuⁿ chhim ê sū-chêng, sim-koaⁿ siông-siông jû-loān; hit-ê gōng-siūⁿ m̄-nā hō͘ i hoat-kông tiā-tiāⁿ, ia̍h hō͘ i khı̀ sàn-ián, mn̄g i ài beh tit-tio̍h sím-mı̍h mı̍h, i ka-kı̄ hoán-tńg m̄-chai; goá khoàⁿ lí sı̄ chhin-chhiūⁿ án-ni.
Ki-tok-tô͘ kóng, Goá chai ka-kı̄ só͘ beh tit-tio̍h ê chiū-sı̄ beh tit-tio̍h pàng chit-ê tāng-tàⁿ, thang hō͘ sim-koaⁿ pêng-an.
Sè-tı̀ kóng, Chit-ê lō͘ kú choē-choē gûi-hiám, lí ài tit-tio̍h pêng-an, siáⁿ-sū tùi chit tiâu lō͘? Nā beh thiaⁿ goá ê oē, goá oē kà-sı̄ lí, án-cháiⁿ-iūⁿ thang chiâⁿ lí só͘ ài, ia̍h oē bián-tit chit tiâu lō͘ ê gûi-hiám; koh tit-tio̍h hit-ê kiù ê hong-hoat tı̄ chia bô hn̄g. Lí nā thàn goá ê oē, m̄-nā oē bián-tit lóng-chóng ê gûi-hiám tiā-tiāⁿ, ia̍h oē tit-tio̍h an-ún, jı̍t-jı̍t kap hó lâng khiā-khí, ta̍k hāng ê tāi-chı̀ chiok-ı̀.
Ki-tok-tô͘ kóng, Chun-kà--ah, lí oē ê hó-pō͘, chhiáⁿ lí khai-kái goá thiaⁿ.
Sè-tı̀ kóng, Tı̄ chit-ê chêng-bı̄n ê hiuⁿ-chng [chng], miâ kiò Siu-hēng, ū chı̍t-lâng miâ Sı̄-hoat ; put-chí ū tı̀-sek ê lâng, koh ū hó mIâ-siaⁿ, gâu pang-chān lâng pàng chit-hō ê tàⁿ, che sı̄ goá só͘ chhim chai; koh lâng kiám-chhái in-ūi hō͘ tāng-tàⁿ teh, sim-koaⁿ khioh hoat-kông, i ia̍h oē i-hó hit-hō pı̄ⁿ; lí khı̀ kı̀ⁿ--i, liâm-piⁿ chiū pang-chān lí, i ê chhù lı̄ chia nā ū saⁿ-lí lō͘ tiā-tiāⁿ. Hit-ê lâng nā bô tı̄-teh, i ū chı̍t-ê kiáⁿ, bı̄n-māu hó-khoàⁿ, miâ kiò Sı̍p-lé ; i ia̍h oē pang-chān lí chhin-chhiūⁿ in lāu-pē chı̍t-poaⁿ-iūⁿ; lí kàu hit só͘-chāi, chiū tit-thang pàng chit-ê tàⁿ, tit-tio̍h pêng-an. Lí kiám-chhái bô sim siūⁿ beh tò-khı̀ pún kū ê siâⁿ, goá ia̍h bô khǹg lí tio̍h án-ni, chiū thang poaⁿ-chhiáⁿ lí ê bó͘-kiáⁿ lâi; chit-tia̍p hiuⁿ-chng--nı̍h ū kúi-nā keng khang-chhù, sè-chı̂ⁿ bô kùi, mı̍h--nih hó, kè-chı̂ⁿ--nı̍h pan-gı̂; koh ū hó ê chhù-piⁿ, siong-sı̀n siong-kèng, só͘-í lí khiā-khí tı̄ hia, it-hoat ke-thiⁿ pêng-an.
Hit-sı̂ Ki-tok-tô͘ thiaⁿ-kı̀ⁿ chiah-ê oē, tiû-tû bē koat-ı̀, chiū ka-kı̄ phah-sǹg chit lâng ê oē nā-sı̄ chin, m̄ ta̍h-tio̍h thàn--i; chiah koh mn̄g i kóng, Chun-kà--ah, hit-ê gâu-lâng ê chhù, tùi tah-lo̍h chı̍t-tiâu lō͘ khı̀?
Taⁿ hia ū chı̍t-ê soaⁿ, miâ Se-nái soaⁿ, Sè-tı̀ kóng, hit-ê koâiⁿ-soaⁿ lí khoàⁿ-kı̀ⁿ á bô? Ìn kóng, Khoàⁿ-kı̀ⁿ chin bêng.
Sè-tı̀ kóng, Tùi hit-ê soaⁿ khı̀, thâu kàu hit keng, sı̄ i ê chhù.
Ki-tok-tô͘ án-ni pàng-sak goân lō͘, beh khı̀ kiû hit-ê Sı̄-hoat pang-chān i. Kiâⁿ kūn hit-ê soaⁿ, khoàⁿ-kı̀ⁿ soaⁿ-sè put-chí koâiⁿ, koh tò-khàm lo̍h-lâi, chiū put-chí kiaⁿ-hiâⁿ, m̄-káⁿ koh chı̀n-chêng, kiaⁿ-liáu tùi i ê thâu-khak téng khàm lo̍h-lâi, só͘-í khiā-teh, m̄-chai beh cháiⁿ-iūⁿ; ka-kı̄ ia̍h phah-sǹg só͘ pē ê tàⁿ, pí kiâⁿ goân-lō͘ sı̄ koh khah tāng; soaⁿ koh ū hé-iām sih chhut, Ki-tok-tô͘ kiaⁿ-liáu hō͘ i sio-khı̀, só͘-í ngiāu-ngiāu-chhoah, kàu boē-kò͘-tit, seng-khu lâu chhı̀n-koāⁿ. Chiàⁿ chhin-chhiūⁿ si kóng:
Iâ-so͘ ha̍k-seng thàn Sè-tı̀,
Lı̄-khui chiàⁿ-lō͘, pa̍t ūi khı̀;
Gōng-siūⁿ sià tàⁿ, tit pêng-an,
Hoán-tńg tú-tio̍h khah kan-lân.
Hit-sı̂ Ki-tok-tô͘ teh iu-būn ut-chut thàn Sè-tı̀ ê oē, khoàⁿ-kı̀ⁿ Thoân-tō lâi, chiū put-chí kiàn-siàu. Thoân-tō ná kiâⁿ ná kūn--i, bı̄n put-chí ū ui-giâm thang kiaⁿ, mn̄g--i kóng, Ki-tok-tô͘, lí siáⁿ-sū lâi chia? Ki-tok-tô͘ chi8-ē thiaⁿ-kı̀ⁿ, bô oē thang ı̀n, chiū chēng-chēng, ná chhâ khiā--teh. Thoân-tō koh kóng, Chiong-bông siâⁿ goā, goá tú-tio̍h chı̍t-lâng teh thı̂-khàu toā siaⁿ kiò, kiám m̄-sı̄ lí mah? Ìn kóng, Sı̄.
Thoân-tō koh mn̄g, Khı̀ hit-ê oe̍h-mn̂g lō͘, goá kiám bô kā lí kóng? Ìn kóng, Ū.
Thoân-tō kóng, Nā-sı̄ án-ni, hit-ê lō͘ lí siáⁿ-sū kàu chiah kín pàng-sak, lâi kiâⁿ chit-ê chha lō͘?
Ki-tok-tô͘ ı̀n kóng, Goá kiâⁿ kè Iu-ut ê thô͘-khut, tú-á gū-tio̍h chı̍t-lâng kā goá kóng, tı̄ chit-ê chêng-bı̄n ê hiuⁿ-chng, ū lâng oē pàng goá ê tàⁿ.
Thoân-tō mn̄g, lí só͘ tú-tio̍h--ê sı̄ sím-mı̍h lâng?
Ki-tok-tô͘ ı̀n kóng, Tùi goá khoàⁿ--i, sı̄ bûn-lí ê lâng; i ēng choē-choē oē khǹg goá, kàu lō͘-bé goá sı̀n, chiah lâi chia. In-ūi khoàⁿ-kı̀ⁿ soaⁿ-sè koâiⁿ, koh tò-khàm lo̍h--lâi, goá chiū khiā--teh, m̄-káⁿ chı̀n-chêng, kiaⁿ-liáu soaⁿ pang--lo̍h-lâi.
Thoân-tō kóng, hit-ê lâng kā lí kóng sím-mı̍h?
Ki-tok-tô͘ ı̀n kóng, I mn̄g goá beh to̍h-khı̀, goá ēng sêng-sı̍t kā i kóng.
Thoân-tō kóng, I chiū kóng cháiⁿ-iūⁿ?
Ki-tok-tô͘ ı̀n, I mn̄g goá ū ke-koàn á-bô, goá chiàu-sı̍t kā i kóng, Ū. Goá ia̍h kā i kóng in-ūi chit-ê tàⁿ tāng-tāng teh goá, goá sui ū bó͘-kiáⁿ, boē-oē chiàu-kū kap in hoaⁿ-hí.
Thoân-tō kóng, I chiū koh kóng cháiⁿ-iūⁿ?
Ki-tok-tô͘ ı̀n, I hoan-hù goá kín-kín pàng chit-ê tàⁿ; goá kā i kóng, pàng chit-ê tāng tàⁿ, chiah tit-tio̍h pêng-an, tú-á sı̄ goá ê só͘ kiû. Taⁿ beh khı̀ hit-ê oe̍h-mn̂g, ǹg-bāng kàu hia tek-khak ū lâng kà-sı̄ goá tùi tah-lo̍h tit-tio̍h kiù. Hit-ê lâng chiū kóng, Ū chı̍t-tiâu lō͘ pí Sian-siⁿ lí só͘ chí-tiám ê, koh-khah hó, lō͘ bô hn̄g, koh boē gûi-hiám, tùi hit-ê lō͘ khı̀, chiū tú-tio̍h chı̍t-lâng gâu pàng chit-hō ê tàⁿ; goá chiū sı̀n, chiah pàng-sak goân-lō͘, lâi chia, ǹg-bāng kiám-chhái chá-chá pàng chit-ê tàⁿ; tú-á kàu chia, khoàⁿ-kı̀ⁿ chêng-hêng sı̄ án-ni, chiū kiaⁿ-hiâⁿ thêng--teh, taⁿ soah m̄-chai tio̍h chái-iūⁿ.
Hit-sı̂ Thoân-tō kóng, Lí chhiáⁿ teh-khiā, goá ēng Siōng-tè ê oē hō͘ lí thiaⁿ.
Ki-tok-tô͘ khiā--teh ngiāu-ngiāu-chhoah. Thoân-tō chiū ín Sèng-chheh kóng, “Tio̍h soè-jı̄, bo̍h-tit kū-choa̍t tùi lí kóng--ê. Hit-ê tı̄ toē--nih thoân bēng-lēng, nā kū-choa̍t--i, kú boē-oē bián-tit hêng-hoa̍t, hô-hòng tùi thiⁿ--nı̍h kóng--ê, lán nā hoán-poē--i, hit-ê hêng-hoa̍t beh cháiⁿ-iūⁿ oē siám-tit.” Koh kóng, ū gı̄ ê lâng tùi sı̀n tit-tio̍h oa̍h; nā-sı̄ hoán-poē tō-lí, goá m̄ hoaⁿ-hí--i. Thoân-tō koh kóng, Jı̍p che khó͘-thàng ê tiong-kan, chiū-sı̄ lí, lí taⁿ kū-choa̍t Chı̀-koâiⁿ-ê ê bēng-lēng, pàng-sak pêng-an ê lō͘, kàu tit-beh tı̂m-lûn.
Ki-tok-tô͘ chı̍t-ē thiaⁿ-kı̀ⁿ chit-ê oē, kiaⁿ kàu siak-tó tı̄ i ê bı̄n-chêng, chhin-chhiūⁿ beh sí, toā siaⁿ kiò kóng, Chhám--ah, goá soah--lah!
Thoân-tō khoàⁿ-kı̀ⁿ i án-ni-siⁿ, chiū khan i ê chhiú, ín Sèng-chheh kóng, Kı̀ⁿ-nā choē-ok, húi-pòng, siat-to̍k, hit-ê lâng thang tit-tio̍h sià-bián. Koh kóng, “Eng-kai sı̀n bo̍h-tit gı̂-ngái”.
Ki-tok-tô͘ án-ni lio̍h-á hoê-hûn, khí-lâi, iû-goân khiā tı̄ Thoân-tō ê bı̄n-chêng, kiaⁿ kàu ngiāu-ngiāu-chhoah.
Thoân-tō koh kóng, Goá beh ēng tō-lí kà-sı̄ lí, eng-kai choan-sim, m̄-thang boē-kı̀-tit. Taⁿ goá beh hō͘ lí chai, bê-he̍k lí--ê sı̄ chı̄-chūi, lí beh khı̀ kı̀ⁿ--ê; ia̍h-sı̄ chı̄-chūi. Bê-he̍k lí--ê, i ê miâ sı̄ Sè-tı̀, i ê miâ ha̍p i ê khoán, in-ūi só͘ ài chiū-sı̄ sè-kan ê tō-lí, m̄-sı̄ Siōng-tè ê tō-lí. I khı̀ lé-pài, chiū-sı̄ Siu-hēng ê hiuⁿ-chng, m̄-sı̄ Hok-im ê hiuⁿ-chng; i ài chit sè-kan ê tō-lí, sı̄ in-ūi beh bián-tit hō͘ lâng pek-tio̍k, i ê sim-koaⁿ chhin-chhiūⁿ án-ni, só͘-í ài loān-loān koé Chú chèng-keng ê tō-lí. Taⁿ chit-ê lâng khǹg lí--ê, tiong-kan ū saⁿ-hāng ê sū-chêng, lí tio̍h tiāⁿ-tiāⁿ oàn-hūn: Tē it hāng, sı̄ hō͘ lí pàng-sak chèng-tı̍t ê lō͘; tē-jı̄ hāng, sı̄ hō͘ lí iàm-chiān chèng-keng tō-lí ê kan-khó͘; tē saⁿ hāng, sı̄ chhoā lí bô kiâⁿ oa̍h-lō͘, khı̀ kiâⁿ sí ê hng-hiùⁿ. I bê-he̍k lí pàng-sak chèng-tit ê lō͘, lí ia̍h thiaⁿ i ê oē, chiū goān kù-chhoa̍t Siōng-tè ê bēng-lēng, hoán-tńg tùi-tiōng Sè-tı̀ ê oē, che ê sū lí eng-kai chhim-chhim oàn-hūn. Chú ū kóng, “Eng-kai chı̄n la̍t jı̍p oe̍h-mn̂g, in-ùi chhoā kàu oa̍h ê, hit-ê mn̂g sı̄ oe̍h, hit-ê lō͘ sı̄ soè, tit-tio̍h ê lâng sı̄ chió”, che chiū-sı̄ goá kah lí khı̀ ê mn̂g. Taⁿ chit-ê pháiⁿ-lâng ū bê-he̍k lí hoán-tńg lı̄-khui oe̍h-mn̂g, pàng-sak chèng-tı̍t ê lō͘, kàu tit-beh tı̂m-lûn ê toē-pō͘, só͘-í lí eng-kai oàn-hūn i ê bê-he̍k lí; koh in-ūi lí thiaⁿ i ê oē, lí eng-kai ka-kı̄ oàn-hūn. Koh i bê-he̍k lí iàm-chiān chèng-keng tō-lí ê kan-khó͘, lí tio̍h oàn-hūn, in-ūi che tō-lí ê kan-khó͘, pí sè-kan ê châi-pó, lí tio̍h sǹg choè sı̄ khah pó-poè, koh êng-kng ê Chú í-keng kā lí kóng, “Sioh siⁿ-miā ê lâng, hoán-tńg sit-lo̍h.” “Lâng chiū-kūn goá, nā bô thiàⁿ goá khah thiàⁿ pē-bú, bó͘-kiáⁿ, hiaⁿ-tı̄, chí-bē, kap ka-kı̄ ê sı̀ⁿ-miā, boē tit-thang choè goá ê ha̍k-seng.” Àn-ni-siⁿ goá sı̄ ín Siōng-tè ê oē lâi kóng--ê, koh kóng chheng-chheng chit-ê lō͘ sı̄ éng-oán-oa̍h ê lō͘, lâng nā án-ni kóng, kiâⁿ chit tiâu lō͘ sı̄ sí, chiū chit ê só͘ kóng lí tio̍h chhim-chhim oàn-hūn. Koh i chhoā lí khı̀ sí ê hng-hiùⁿ, chit-ê tāi-chı̀ tio̍h oàn-hūn--i. Nā ài chai tio̍h oàn-hūn i ê iân-kò͘, thang siūⁿ lí só͘ beh khı̀ kı̀ⁿ, sı̄ sím-mı̍h hō lâng, ia̍h tio̍h siūⁿ i oē pàng lí ê tàⁿ á boē? Hit lâng miâ Sı̄-hoat, sı̄ kán siⁿ--ê, m̄-sı̄ niû siⁿ--ê; hit-ê kán kap i ê kiáⁿ lóng sı̄ choè lô͘-châi, koh khiā-khí tı̄ Se-nái ê kéng-kài, chhut-sı̀ chiū-sı̄ choè lô͘-châi; pún-sin í-keng choè lô͘-châi, beh-thài-oē pàng lán, hō͘ lán choè chū-chú? Só͘-í Sı̄-hoat lóng boē-oē pàng lí ê tàⁿ. Thàn Sı̄-hoat, lâi pàng chit-hō ê tàⁿ, tùi kó͘-chá kàu taⁿ, iáu-kú bē ū án-ni, koh kàu lō͘-bé ia̍h bô, in-ūi Sèng-chheh kóng, “Oá-khò lu̍t-hoat, án-ni kiâⁿ, bô lâng oē tit-tio̍h chheng choè-gı̄”; í-keng boē tit-thang chheng sı̄ gı̄, beh-thài-oē pàng che ū choē ê tàⁿ? Só͘-í Sè-tı̀ sı̄ sè-sio̍k ê peh-sı̀ⁿ, m̄-sı̄ Thian-koh ê peh-sı̀ⁿ. Sı̄-hoat ia̍h sı̄ phiàn--lâng ê lâng; koh i ê kiáⁿ Sı̍p-lé, bı̄n sui-bóng súi, ia̍h sı̄ ké-hó, boē-oē pang-chān lí. Lí tio̍h sı̀n goá, hit-hō o͘-àm lâng ê choē-oē, ài lí pàng-sak goá só͘ chí-tiám ê lō͘, put-kò sı̄ kè-bô͘ phiàn lí, hō͘ lí boē tit-tio̍h kiù.
Thoân-tō kóng liáu, chiū koh toā-siaⁿ kiò thiⁿ kan-chèng i só͘ kóng ê oē, liâm-piⁿ Se-nái soaⁿ ū siaⁿ kap hé chhut.
Ki-tok-tô͘ kiaⁿ kàu mn̂g-kńg-chhi khiā, hit-ê siaⁿ kóng, “Chheng-chheng oá-khò lu̍t-hoat siū chiù-chó͘; Sèng-chheh kóng, Bô siông-siông thàn lu̍t-hoat só͘ kı̀-chài án-ni khı̀ kiâⁿ, siū chiù-chó͘.”
Hit-sı̂ Ki-tok-tô͘ í-keng m̄-káⁿ ǹg-bāng oa̍h, put-chí thı̂-khàu, ka-kı̄ kóng, Beh soe--lah! tú-tio̍h hit-ê Sè-tı̀; ka-kı̄ gōng-gōng, thiaⁿ i ê oē. Koh Ki-tok-tô͘ in-ūi hō͘ Sè-tı̀ su-io̍k ê oē bê-he̍k i, kàu pàng-sak chèng-tı̍t ê lō͘, i chiū put-chí kiàn-siàu, āu-lâi ǹg Thoân-tō kóng, Chun-kà--ah, lí phah-sǹg goá iáu-kú thang ǹg-bāng tit-kiù á-bô? Goá taⁿ beh tò-tńg goân-lō͘ khı̀ hit-ê oe̍h-mn̂g thang mah? I beh kū-choa̍t goá, hō͘ goá kiàn-siàu tò-tńg á-bô? Tāi-seng lām-sám thiaⁿ sè-tı̀, taⁿ iu-būn hoán-hoé, goá ê choē thang sià á-bô?
Thoân-tō kóng, Lí ê choē put chí tāng, in-ūi só͘ kiâⁿ ê pháiⁿ ū nn̄g hāng: chı̍t-hāng, sı̄ pàng-sak chèng-tı̍t ê lō͘, chı̍t-hāng, sı̄ kiâⁿ tı̄ hoān-kı̀m ê toē. Sui-bóng án-ni, kò͘-mn̂g--ê ê sim sı̄ lı̂n-bín, tek-khak chiap-la̍p lí; nā-sı̄ lí tio̍h soè-jı̄, bo̍h-tit koh lām-sám kiâⁿ, kiaⁿ-liáu Chú sió-khoá siū-khı̀, lí chiū sí tı̄ lō͘--nih.
Hit-sı̂ Ki-tok-tô͘ beh tò-tńg goân-lō͘, Thoân-tō chiah ba-bún-chiò, kóng, Goān lí chit lō͘ pêng-an. Ki-tok-tô͘ chiū kín-kín kiâⁿ, lō͘-nı̍h bô beh kap lâng kóng-oē, ū-ê mn̄g--i ia̍h m̄-káⁿ ı̀n, i kiâⁿ chhin-chhiūⁿ ta̍h-tio̍h hoān-kı̀m ê toē, iáu-bē kàu goân-lō͘, sim-koaⁿ siông-siông tah-tah hiahN-hiahN, í-keng kàu goân-lō͘, sim chiah lio̍h-á an. Āu-lâi Ki-tok-tô͘ kàu hit-ê oe̍h-mn̂g; mn̂g-téng siá kóng, “Phah mn̂g chiū kā lín khui”, i liâm-piⁿ liân-liân phah, hit-sı̂ kóng,
Lâng cháu lı̄-khui Chiong-bông siâⁿ,
Lâi phah oe̍h-mn̂g, kiû Chú thiaⁿ,
Khún-kiû lı̂n-bín khui oa̍h lō͘,
Chiap-la̍p choē-jı̂n jı̍p sèng só͘.
Tia̍p-á-kú ū chı̍t-lâng, bı̄n-māu toan-chong, miâ Hūi-chû , lâi mn̄g kóng, Sı̄ chı̄-chūi--ah? Ta̍h-lo̍h lâng? Beh sím-mı̍h tāi-chı̀--ah?
Ki-tok-tô͘ ı̀n kóng, Goá sı̄ chı̍t-ê kan-khó͘ ū choē ê lâng, tùi Chiong-bông siâⁿ lâi, beh khı̀ Sûn-soaⁿ, ài bián-tit tú-tio̍h beh kàu ê siū-khı̀. Ū kà-sı̄ goá--ê kóng, eng-kai tùi chit-ê mn̂g lâi, chhiáⁿ mn̄g Chun-kà, goān ín goá jı̍p-khı̀ á-bô?
Hūi-chû ı̀n kóng, Goá put-chí kam-goān. chiū khui-mn̂g.
Ài thoat sí toē, chiūⁿ oa̍h lō͘,
Eng-kai jı̄n choē, bo̍h kiau-ngō͘,
Lâi phah oe̍h-mn̂g chiah oē jı̍p,
Jiân-āu chin tō lóng ha̍k-sı̍p
Hit-sı̂ Ki-tok-tô͘ tú-á beh jı̍p, hit-ê lâng kín-kín tioh i jı̍p, Ki-tok-tô͘ kóng, Siáⁿ-sū án-ni? I ı̀n, kóng, Lı̄ chit-ê mn̂g bô loā-hn̄g, ū chı̍t-ê kian-kò͘ ê chè, Sat-tàn chiú-teh, kap i ê mô͘-kúi kha-á, thèng-hāu lâng beh jı̍p chit-ê mn̂g, in chiū tùi hit-ê chè téng, ēng chı̀ⁿ siā i, ǹg-bāng lâng bē jı̍p, kiám-chhái oē khit i siā--sí.
Hit-sı̂ Ki-tok-tô͘ ia̍h hoaⁿ-hí, ia̍h kiaⁿ-hiâⁿ. Í-keng jı̍p oe̍h-mn̂g, Kò͘-mn̂g ê lâng mn̄g i, Chı̄-chūi-á kah lí lâi?
Ki-tok-tô͘ ı̀n, Ū Thoân-tō bēng-lēng goá, lâi phah chit-ê mn̂g, koh kā goá kóng, lí tek-khak ē kà-sı̄ goá tio̍h cháiⁿ-iūⁿ kiâⁿ.
Hūi-chû kóng, Tı̄ lí chêng-bı̄n, mn̂g sı̄ khui, bô lâng oē koaiⁿ.
Ki-tok-tô͘ kóng, Goá tāi-seng siū gûi-hiám, taⁿ tit-tio̍h lı̄-ek.
Hūi-chû kóng, Beh thái lí ka-kı̄ chı̍t-lâng lâi?
Ki-tok-tô͘ ı̀n kóng, Goán hí chhù-piⁿ nı̍h, bô lâng chhin-chhiūⁿ goá ka-kı̄ chai gûi-hiám.
Hūi-chû kóng, In tiong-kan ū lâng chai lí lâi á-bô?
Ki-tok-tô͘ ı̀n kóng, Goá tú-á cháu-chhut, bó͘-kiáⁿ khoàⁿ-kı̀ⁿ, chiū tùi goá ê kha-chiah-āu, kiò goá tò-tńg; koh ū chhù-piⁿ khiā-teh kiò goá tò-khı̀, nā-sı̄ goá kú ēng nn̄g-chhiú ng hı̄-khang tı̍t-tı̍t cháu.
Hūn-chû kóng, In kiám bô lâng lâi jip lí, beh khǹg lí tò-khı̀?
Ki-tok-tô͘ ı̀n kóng, Ū, chiū-sı̄ Kò͘-chip, Īⁿ-chhian hí nn̄g lâng; āu-lâi khoàⁿ-kı̀ⁿ goá m̄ thiaⁿ--i, Kò͘-chip lia̍h goá mē-nē choè i tò-khı̀, nā ū Īⁿ-chhian chhiáⁿ kap goá teh kiâⁿ.
Hūi-chû kóng, I siáⁿ-sū poàⁿ lō͘ chiū soah?
Ki-tok-tô͘ ı̀n kóng, Goán nn̄g lâng saⁿ-kap kiâⁿ, kàu Iu-ut ê thô͘-khut, hut-jiân poa̍h-lo̍h tı̄ hit-ê tiong-kan, Īⁿ-chhian chiū loé-chı̀, m̄-káⁿ koh chı̀n-chêng; só͘-í oa̍t-lı̀n-tńg ǹg i ê chhù, chiah tùi hit-ê thô͘-khut chhut, chiū kā goá kóng, “hit-ê hó ê só͘-chāi, lí thang ka-kı̄ tit-tio̍h.” Án-ni i choè i kiâⁿ i ê lō͘, goá ia̍h choè goá kiâⁿ goá ê lō͘; i khı̀ tè kò͘-chip, goá lâi chia.
Hūi-chû chiū kóng, khó-sioh hit-ê lâng án-ni khoàⁿ-khin thiⁿ--nih ê êng-kng, sǹg sı̄ khah m̄-ta̍t sió-khoá ê kan-khó͘!
Ki-tok-tô͘ kóng, Goá só͘ kóng Īⁿ-chhian ê tāi-chı̀ sı̄ ū-iáⁿ. Nā kóng goá pún-sin ê sū-chêng ia̍h kap i bô choa̍h; i chin-chiàⁿ tò-khı̀ i ê chhù, goá chiū thàn Sè-tı̀ ê oē, chhı̀n-chhái pàng-sak chèng-tı̍t ê lō͘, khı̀ kiâⁿ sí ê hng-hiùⁿ.
Hūi-chû kóng, HaihN! Lí kiám tú-tio̍h Sè-tı̀ mah? I ài lí tùi Sı̄-hoat kiû pêng-an, tio̍h mah? Hí nn̄g lâng, chin-chiàⁿ lóng sı̄ phiàn lâng--ê. Lí thàn i ê oē á-bô?
Ki-tok-tô͘ kóng, Khí-thâu ū thàn--i, āu-lâi chiū m̄-káⁿ; in-ūi tı̄ Sı̄-hoat ê só͘-chāi ū Se-nái soaⁿ, goá beh kiû Sı̄-hoat pang-chān, khoàⁿ-kı̀ⁿ soaⁿ-sè ê koâiⁿ, koh tò-khàm--lo̍h-lâi; kiaⁿ i khàm-tio̍h goá, só͘-í m̄-káⁿ koh chı̀n-chêng.
Hūi-chû kóng, hit-ê Se-nái soaⁿ í-keng hāi-sí choē-choē lâng, āu-lâi ia̍h sı̄ án-ni; lí bián-tit hō͘ i teh-tio̍h chhùi-chhùi, sı̄ put-chí kai-chài.
Ki-tok-tô͘ kóng, Goá nā tiàm tı̄ hit-ê soaⁿ-kha, lō͘-bé beh cháiⁿ-iūⁿ, heh sı̄ oh kóng. Goá tú-á teh loān chau-chau ê sı̂, chiū siū Siōng-tè ê un, hō͘ Thoân-tō koh-chài lâi, nā m̄-sı̄ án-ni, goá lóng boē lâi chia. Chhin-chhiūⁿ goá chiah tāng choē, eng-kai hō͘ soaⁿ teh-sí, boē kham-tit khiā chia, kap Chú lí kóng, taⁿ iáu-kú ún goá jı̍p lâi, he! Un sı̄ ke̍k toā.
Hūi-chû kóng, Put-lūn sím-mı̍h lâng bô lūn pêng-sò͘ án-chái-iūⁿ kiâⁿ, nā kàu chia, goán lóng-chóng chiap-la̍p i, toàn-toàn bô koáⁿ--i. Chhiáⁿ lí kap goá kiâⁿ chı̍t-tè-á, goá beh kà-sı̄ lí só͘ eng-kai kiâⁿ ê lō͘. Hí chêng-bı̄n chı̍t-tiâu oe̍h lō͘, lí khoàⁿ-kı̀ⁿ á-bô? Chit-ê chiū-sı̄ lí eng-kai kiâⁿ --ê. Chit-ê lō͘ sı̄ lia̍t-chó͘, sian-ti, Ki-tok, Sù-tô͘ só͘ khui--ê, sı̄ tı̍t-tı̍t chhin-chhiūⁿ sı̂n-soàⁿ, che sı̄ lí eng-kai kiâⁿ ê lō͘.
Ki-tok-tô͘ kóng, Chit-ê lō͘ kiám bô oan-oat, hō͘ hn̄g ê lâng kiâⁿ m̄-tio̍h mah?
Hūi-chû kóng, Iah ū choē-choē tiâu oai-chhoa̍h ê lō͘; án-ni chiū thang hun-pia̍t, hiah-ê lō͘ lóng sı̄ oan-oat koh khoah, chheng-chheng chí chı̍t-tiâu ê lō͘ sı̄ chèng-tı̍t koh oe̍h.
Hit-sı̂ goá koh bāng-kı̀ⁿ Ki-tok-tô͘ keng-thâu téng ê tàⁿ, iáu-kú bē pàng--khı̀; nā bô lâng pang-chān i, hit-ê tàⁿ kàu lō͘-bé boē-oē ka-kı̄ pàng. Só͘-í koh mn̄g Hūi-chû kóng, Oē thoè goá pàng chit-ê tàⁿ á-bô?
Hūi-chû kóng, Lí eng-kai thun-lún, chhiáⁿ pē lí ê tàⁿ, nā kàu tit kiù ê só͘-chāi chiū ka-kı̄ lut--lo̍h-khı̀.
Hit-sı̂ Ki-tok-tô͘ pih-chah beh kiâⁿ lō͘, Hūi-chû kā i kóng, Lı̄ chit-ê mn̂g bô loā hn̄g, chiū-sı̄ Sek-sı̄ ê chhù; nā phah i ê mn̂g, tek-khak ēng ke̍k hó ê mı̍h hō͘ lí khoàⁿ.
Hit-sı̂ Ki-tok-tô͘ kap i saⁿ-sı̂ khı̀, kiâⁿ kàu Sek-sı̄ ê chhù, chiū phah mn̂g, phah liáu koh phah, āu-lâi ū chı̍t-lâng lâi mn̄g kóng, Sı̄ chı̄-chiū-á?
Ki-tok-tô͘ ı̀n kóng, Goá sı̄ kè-lō͘ lâng, in-ūi chit-nı̍h chú-lâng ê pêng-iú, ū chí-tiám goá, nā lâi tek-khak tit-tio̍h lı̄-ek, só͘-í goá ài kı̀ⁿ chit-nı̍h ê chú-lâng.
Hit-ê lâng chiū thoè i khı̀ chhiáⁿ, chú-lâng liâm-piⁿ chhut-lâi kı̀ⁿ--i, mn̄g kóng, Lí beh siáⁿ tāi-chı̀?
Ki-tok-tô͘ kóng, Goá tùi Chiong-bông siâⁿ lâi, beh khı̀ Sûn-soaⁿ, kò͘ oe̍h-mn̂g ê lâng chí-tiám goá, nā lâi chia, lí tek-khak ēng ke̍k hó ê mı̍h hō͘ goá khoàⁿ, oē chān goá kiâⁿ-lō͘ ê lı̄-ek.
Sek-sı̄ kóng, Chhiáⁿ lí jı̍p--lâi, ū lı̄-ek lí ê mı̍h, goá beh hō͘ lí khoàⁿ, chiū kah i chhe-ēng--ê tiám chek, kiò Ki-tok-tô͘ tè i lâi, chhoā i jı̍p su-khia ê pâng, kah chhe-ēng-ê khui chı̍t-ê mn̂g, mn̂g khui chiū khoàⁿ-kı̀ⁿ piah--nih kùi chı̍t-pak siōng, hit-ê siōng put-chí toan-hong, ba̍k-chiu khoàⁿ thiⁿ, chhiú the̍h Sèng-chheh, chhùi-tûn siá chin-lí ê kà-sı̄, chiong sè-kan hiat tı̄ ka-chiah-āu, khiā-teh, ū khó͘-khǹg ê khoán-sit, thâu-khak ê téng-bı̄n kùi kim ê bián-liû.
Ki-tok-tô͘ kóng, Che sı̄ sím-mı̍h ı̀-sù?
Sek-sı̄ kóng, chı̍t chheng lâng ê tiong-kan chiah ū chı̍t-lâng chhin-chhiūⁿ chit pak chí chı̍t-lâng; i oē ēng tō-lí siⁿ-kiáⁿ, iā ū kan-khó͘ khioh, iā ū chû-pi iúⁿ-chhı̄. I ba̍k-chiu khoàⁿ thiⁿ, chhiú the̍h Sèng-chheh, chhiù-tûn siá chin-lí ê kà-sı̄; che lóng-chóng beh hō͘ lí chai i ê chit-jı̄m, sı̄ eng-kai bat chin-tō ò-biāu ê ı̀-gı̄, sı̂-sı̂ khui-thiah hō͘ ū choē ê lâng thiaⁿ kàu chai, só͘-í i khiā--teh ê khoán-sit sı̄ chhin-chhiūⁿ teh khó͘-khǹg lâng. Koh sè-kan hiat tı̄ i ka-chiah-āu, kim ê bián-liû kùi i thâu-khak téng, che hō͘ lí chai in-ūi i ài tio̍h-boâ, ho̍k-sāi Chú ê bô iàu-kín ba̍k-chiu chêng lóng-chóng ê mı̍h, só͘-í kàu lâi-sè tek-khak tit-tio̍h êng-kng ê pò-siúⁿ. Taⁿ lí beh khı̀ thiⁿ-siâⁿ, lō͘ ê tiong-kan nā tú-tio̍h gı̂-ngái, oh-kiâⁿ ê sı̂, chheng-chheng chí chit-pak chit-hō ê lâng, ū hōng Chú ê bēng-lēng, oē chhoā lí an-ún kiâⁿ; só͘-í goá khí-thâu ēng chit-pak chí-tiám lí, án-ni só͘ chí-tiám kap lí só͘ khoàⁿ-kı̀ⁿ--ê, eng-kai kín-sı̄n, bo̍h-tit boē kı̀-tit; ū ké choè chhoā thian-lō͘ ê lâng, in ê lō͘ sı̄ sí lō͘, goá chin-chiàⁿ kiaⁿ-liáu lō͘--nih ê tiong-kan tú-tio̍h che, lí tio̍h siông-siông tiuⁿ-tı̂--i.
