Hit-sı̂ goá bāng-kı̀ⁿ Ki-tok-tô͘ koh kiâⁿ, kàu chı̍t-ê kē-toē, lō͘-piⁿ ū saⁿ lâng tāng-bı̂n teh khùn, kha lóng ū kha-khàu. In miâ kiò Gû-gōng, Lán-tō kap Chū-sı̄. Ki-tok-tô͘ khoàⁿ-kı̀ⁿ in án-ni, ài kiò in chhíⁿ, chiū oá in ê sin-piⁿ, kiò kóng, ‘Lín khùn chit-nı̍h ná khùn ûi-bé, ē-toé ū sí-hái, chiū-sı̄ bô toé chhim-khiⁿ; tio̍h kín-mé chhíⁿ, kap goá lâi-khı̀. Lín nā beh, goá chiū chān lín tǸg-khı̀ kha-khàu.’ Koh kā in kóng, Ū Sat-tàn ‘chhin-chhiūⁿ háu ê sai sı̀-koè kiâⁿ’, i nā tùi chia kè, lín tek-khak hō͘ in pō͘-chia̍h. Saⁿ lâng chiū kia̍h-ba̍k khoàⁿ--i; Gû-gōng kóng, Goá bô khoàⁿ-kı̀ⁿ sím-mı̍h gûi-hiám; Lán-tō kóng, Goá beh koh khùn tiap-á-kú; Chū-sı̄ kóng, Lí hoān lí, goá hoān goá, bô lí ê tāi-chı̀.
Saⁿ lâng koh tó-teh khùn, Ki-tok-tô͘ chiah khí-sin koh kiâⁿ, sim-koaⁿ hoân-ló; hoân-ló in tiàm gûi-hiám ê só͘-chāi, ài kiò in chhíⁿ khǹg in, koh ài kā in thǹg kha-khàu, thiàⁿ in kàu án-ni, hoán-tńg hō͘ in khoàⁿ-khin. Tú-tú teh án-ni hoân-ló, chiū koh khoàⁿ-kı̀ⁿ nn̄g lâng tùi tò-pêng ê phian-lō͘, kông-kông poâⁿ chhiûⁿ jı̍p-lâi, kín-kín jip kàu. Che nn̄g lâng, chı̍t-ê miâ kiò Sı̄-gı̂ , chı̍t-ê miâ kiò Gūi-siān . Ki-tok-tô͘ khoàⁿ-kı̀ⁿ in lâi, chiū mn̄g in kóng.Lín jı̄-ūi tùi tah-lo̍h lâi, beh tah-lo̍h khı̀?
In nn̄g lâng ı̀n kóng, Goán chhut-sı̀ tı̄ Hu-êng ê toē-hng, ài hó miâ-siaⁿ, só͘-í tit-beh khı̀ Sûn-soaⁿ.
Ki-tok-tô͘ ı̀n kóng, Lō͘-thâu ū oe̍h-mn̂g, lín beh-thái m̄ tùi hia lâi, kiám m̄-chai Sèng-chheh kóng, “Bô tùi mn̂g jı̍p, tùi pa̍t ūi poâⁿ-kè lâi, sı̄ thau-the̍h--ê, sı̄ kiap-chha̍t?”
In nn̄g lâng kóng, Tùi hit-ê jı̍p, goán hia ê lâng lóng hiâm lō͘ hn̄g, só͘-í siông-siông tùi khah té ê lō͘ poâⁿ-jı̍p, chhin-chhiūⁿ goán tú-á ê só͘ kiâⁿ.
Ki-tok-tô͘ kóng, Lán beh khı̀ thiⁿ-siâⁿ, hit siâⁿ ê Chú í-keng ū bēng-lēng, lín án-ni choè hoān-tio̍h i ê bēng-lēng, kiám boē hō͘ i chek-pı̄ mah?
In nn̄g lâng kóng, M̄-sái lí hoân-ló chit-ê tāi-chı̀, goán kiâⁿ án-ni lóng chiàu kū-khoán, lí m̄-sái gı̂-ngái, goán í-keng án-ni kiâⁿ ū chheng-goā nı̂ kú.
Ki-tok-tô͘ kóng, Nā chiàu lu̍t-hoat lâi toàn, án-ni kiâⁿ sı̄ tio̍h á m̄-tio̍h?
In nn̄g lâng kóng, Chit-ê chheng-goā nı̂ ê kū-khoán, kong-tō ê koaⁿ lâi gí-toàn, tek-khak lia̍h i sı̄ tio̍h. Koh lâng nā kàu tı̄ chiàⁿ-lō͘, mı̍h-sái mn̄g tùi tah-lo̍h jı̍p-lâi? i tı̄ chiàⁿ-lō͘, chiū hó. Lí sui-jiân tùi oe̍h-mn̂g jı̍p, put-kò sı̄ tı̄ chit-ê lō͘ tiā-tiāⁿ, goán sui-jiân poâⁿ chhiûⁿ jı̍p, ia̍h sı̄ tı̄ chit-ê lō͘, án-ni lí pí goán ū sím-mı̍h khah iâⁿ?
Ki-tok-tô͘ kóng, Goá chiàu Chú ê lu̍t-hoat lâi kiâⁿ, lín chiū chiàu ka-kı̄ ê ı̀-sù lâi choè. Chit tiâu lō͘ ê Chú í-keng gí lín sı̄ chha̍t, kàu lō͘-bé kiám oē lia̍h lín chò hó lâng mah? Lín bô thàn i ê bēng-lēng, lâi lām-sám jı̍p, āu-lâi tek-khak bô tit-tio̍h i ê un, tio̍h khang-khang chhut-khı̀.
In nn̄g lâng thiaⁿ-kı̀ⁿ án-ni bô oē thang ı̀n, chiū kóng, Lí kò͘ lí ê tāi-chı̀ chiū hó͘. Saⁿ lâng chiah ta̍k-ê choè i kiâⁿ, bô siáⁿ saⁿ-kap kóng-oē, chí-ū kóng kúi-kù nā-tiāⁿ, chiū-sı̄ Sı̄-gı̂, Gûi-siān in nn̄g lâng kā Ki-tok-tô͘ kóng, Chiah-ê lu̍t-hoat kap lé-sò͘, goán nā sió-sim lâi kiâⁿ, káⁿ ia̍h boē su lí, só͘-í goán kap lí bô sím-mı̍h cheng-choa̍h, nā ū saⁿ bô chhin-chhiūⁿ tiāⁿ-tiāⁿ, lí chit niá saⁿ káⁿ sı̄ chhù-piⁿ siá-sı̀ lí, jia lí ê seng-khu, bián-tit kiàn-siàu?
Ki-tok-tô͘ kóng, Lín bô tùi oe̍h-mn̂g jı̍p-lâi, thàn lu̍t-hoat kap lé-gı̂, éng-éng boē tit-tio̍h kiù. Goá sin-chiūⁿ chit niá saⁿ, sı̄ Chú só͘ siúⁿ-sù, chin-chiàⁿ chiàu lí só͘ kóng--ê, sı̄ hō͘ goá jia seng-khu, bián-tit kiàn-siàu. Goá khoàⁿ-kı̀ⁿ chit niá saⁿ chiū-sı̄ Chú ê thiàⁿ goá, in-ūi goá óng-jı̍t ê saⁿ put-chí phoà-noā. Koh kiâⁿ lō͘ ê sı̂, goá siông-siông ka-kı̄ an-ùi, phah-sǹg kàu thiⁿ-mn̂g, tek-khak tit-tio̍h Chú jı̄n goá, in-ūi goá sin-chiūⁿ ū i ê saⁿ, chiū-sı̄ thǹg goá phoà-saⁿ ê jı̍t, Chú só͘ siúⁿ-sù ê. Koh goá thâu-hia̍h ū kı̀-hō, lín káⁿ bē khoàⁿ-kı̀ⁿ, chit-ê chiū-sı̄ goá pàng-tàⁿ ê jı̍t, Chú chı̀-chhin ê tâng-phoāⁿ só͘ tǹg--ê; hit-sı̂ koh ū hō͘ goá chı̍t-kńg bûn-pı̂n, tı̄ lō͘--nı̍h thang tha̍k an-ùi sim-koaⁿ, koh hoan-hù goá kàu thiⁿ-mn̂g, tio̍h chiong chit-ê bûn-pı̂n kau-la̍p choè jı̍p mn̂g ê pı̂n-chún; che kúi-nā hāng ê mı̍h lí káⁿ lóng bô, in-ūi lín bô tùi oe̍h-mn̂g jı̍p.
In nn̄g lâng thiaⁿ-kı̀ⁿ án-ni, lóng chēng-chēng bô ı̀n, chheng-chheng saⁿ-khoàⁿ chhiò tiāⁿ-tiāⁿ. Hit-sı̂ goá khoàⁿ-kı̀ⁿ saⁿ-lâng chı̀n-chêng kiâⁿ. Ki-tok-tô͘ khah tı̄ thâu-chêng, bô koh kap in nn̄g lâng kóng-oē, sı̄ ka-kı̄ chēng-chēng teh siūⁿ, ū sı̂ thó͘-khùi, ū sı̂ hoaⁿ-hí. Koh the̍h hit-ê êng-kng chhàn-lān--ê só͘ hō͘ i ê bûn-pı̂n, ta̍uh-ta̍uh khui khoàⁿ lâi tha̍k, sim-koaⁿ tit-tio̍h an-ùi.
Chí saⁿ lâng kiâⁿ kàu Kan-lân soaⁿ, soaⁿ-kha ū chheng ê chúi-choâⁿ, hit só͘-chāi ū nn̄g tiâu lō͘, kap chiàⁿ-lō͘ sio kau-kài, chı̍t-tiâu tùi tò-chhiú oat kè-lâi, chı̍t-tiâu tùi chiàⁿ-chhiú oat kè-khı̀, nā chit tiâu chiàⁿ-lō͘ tı̍t-tı̍t thàu kàu soaⁿ-téng, tùi chit tiâu chiūⁿ soaⁿ put-chí oh, só͘-í hō-chò Kan-lân soaⁿ. Ki-tok-tô͘ tāi-seng kàu soaⁿ-kha, chiū khı̀ hit-ê chúi-choâⁿ lim chúi, cheng-sı̂n sóng-khoài, chiah toā-hoa̍h chiūⁿ soaⁿ, hit-sı̂ kóng,
Kan-lân ê soaⁿ sui-jiân chin-kiā,
Iáu-kú bô hiâm pháiⁿ kiâⁿ;
In-ūi goá chai chit tiâu ê lō͘,
Un2-tàng tı̍t-thàu sèng-siâⁿ.
Sı̄-gı̂, Gūi-siān lō͘-bé kàu hit-ê soaⁿ-kha, khoàⁿ-kı̀ⁿ soaⁿ-sè koâiⁿ koà chhiâ, soaⁿ-piⁿ ū nn̄g tiâu lō͘, phah-sǹg ché nn̄g tiâu lō͘ se̍h kè soaⁿ-io káⁿ kap chiàⁿ-lō͘ sio-chiap, chiū koat-ı̀ tùi soaⁿ-piⁿ ê lō͘ khı̀. Chí nn̄g tiâu lō͘, chı̍t-tiâu hō choè Gûi-hiám, chı̍t-tiâu hō choè Pāi-bông; chı̍t-lâng tùi Gûi-hiám lō͘ khı̀, bê-loān tı̄ chhim soaⁿ-nâ, chı̍t-lâng tùi Pāi-bông lō͘ khı̀, lō͘ jı̍p khòng-iá, soaⁿ lóng o͘-àm, hut-jiân tak-tio̍h poa̍h-tó, bô koh khí-lâi.
Oe̍h-mn̂g choè thâu, hok choè bé,
Poàⁿ-lō͘ poâⁿ-chhiûⁿ, choè chha̍t-hé;
Gūi-siān, Sı̄-gı̂ thau jı̍p-khı̀,
Hām-jı̍p pāi-bông ka-kı̄ tı̀.
Hit-sı̂ Ki-tok-tô͘ chiūⁿ soaⁿ, goá khoàⁿ i khí-thâu tı̍t-tı̍t cháu, āu-lâi ná cháu ná bān, lō͘-bé in-ūi soaⁿ koâiⁿ koà chhiâ, bô tâ-oâ, chiah choè sı̀-kha-káu pê chiūⁿ-khı̀. Kàu poàⁿ soaⁿ ū chı̍t-ê khoài-lo̍k-têng, chiū-sı̄ soaⁿ-chú khí--ê, hō͘ kha sng ê lâng thang hioh-khùn. Ki-tok-tô͘ kàu hit só͘-chāi siān-siān, chiū chē-teh hioh, the̍h kûi-lāi ê bûn-pı̂n, khui khoàⁿ lâi an-ùi sim-koaⁿ. Sı̍p-jı̄-kè piⁿ só͘ tit-tio̍h ê saⁿ, hit-sı̂ ia̍h koh siông-sè khoàⁿ. Tú-á teh hoaⁿ-hí, khioh tuh-ka-chē khùn-khı̀, soà tiàm tı̄ hia kàu jı̍t beh àm, khùn kàu chhiú ê bûn-pı̂n soà ka-la̍uh. Hit-sı̂ ū chı̍t-lâng lâi kiò i chhíⁿ kóng, ‘Pı̂n-toāⁿ ê lâng--ah, lí khoàⁿ káu-hiā teh, tio̍h siūⁿ i ê ûn-khûn, lâi o̍h i ê tı̀-sek.’
Ki-tok-tô͘ chiū chhíⁿ-lâi khí-lâi, kín kiâⁿ, kàu soaⁿ-téng koh tú-tio̍h nn̄g lâng tùi chêng-bı̄n chhiong-pōng cháu lâi, chı̍t-ê miâ kiò Sim-keng, chı̍t ê miâ kiò Hoâi-gı̂. Ki-tok-tô͘ mn̄g in kóng, Mih-tāi--ah? Lín cháu tò-tńg-lâi, chhò lah.
Sim-keng ı̀n kóng, Goán tit-beh khı̀ Sûn-soaⁿ, í-keng kè chit-ê kan-lân ê só͘-chāi, kiâⁿ ná hn̄g ná gûi-hiám, só͘-í oa̍t-thâu beh tò-lâi khı̀.
Hoâi-gı̂ kóng, Ū-iáⁿ; in-ūi lı̄ chia bô loā hn̄g, ū nn̄g chiah sai phak tı̄ lō͘--nih, m̄-chai khùn á chhíⁿ, kiaⁿ-liáu keng-kè hia hō͘ i oa̍h-oa̍h peh-sí.
Ki-tok-tô͘ kóng, Lín kóng án-ni, goá ia̍h kiaⁿ, taⁿ beh siám tùi tah-lo̍h khı̀ chiah bô gûi-hiám? Nā tò-khı̀ pún-siâⁿ, hit-ê siâⁿ tit-beh bia̍t-bô, nā oē kàu Thiⁿ-siâⁿ, tek-khak an-jiân bô kiaⁿ. Goá tio̍h chhı̀ chı̀n-chêng khı̀; boē sí ia̍h káⁿ, khioh oē sí, ia̍h tek-khak tit-tio̍h éng-oa̍h. Goá í-keng koat-ı̀ beh chı̀n-chêng khı̀.
Hoâi-gı̂, Sim-keng, chiū lı̄-pia̍t Ki-tok-tô͘, cháu lo̍h-soaⁿ khı̀; Ki-tok-tô͘ iû-goân chı̀n-chêng kiâⁿ. Siūⁿ chí nn̄g lâng só͘ kóng ê oē, hit-sı̂ chhun chhiú thàm-khoàⁿ kûi-lāi, ài beh the̍h bûn-pı̂n lâi tha̍k, thang an-ùi i ê sim-koaⁿ. Nā-sı̄ piàn chhē kûi-lâi hit kńg khioh bô-khı̀--lah; chiū toā iu-būn, kàu m̄-chai beh cháiⁿ-iūⁿ, sı̄ in-ūi bô hit kńg thang an-ùi i ê sim-koaⁿ; koh jı̍p Thiⁿ-siâⁿ ia̍h bô hit kńg thang choè pı̂n-chún. Só͘-í tiû-tû iu-būn teh khiā, m̄-chai beh cháiⁿ-iūⁿ, āu-lâi chiah kı̀-tit i ū khùn tı̄ hit têng-á; chiū kūi-lo̍h-khı̀, jı̄n i ê lām-sám kiâⁿ, kiû Siōng-tè sià-bián--i; koh tò-tńg goân lō͘ khı̀ chhē hit kńg.
Hit-tia̍p tò-tńg ê sı̂, chı̍t-lō͘ iu-būn, kóng ia̍h boē chı̄n, ū-sı̂ thó͘-khùi, ū-sı̂ thı̂-khàu; koh siông-siông ka-kı̄ oàn-hūn chek-pı̄ kóng, Chú khí chit-ê têng-á, put-kò beh hō͘ lâng thêng-séng hioh-siān, m̄-sı̄ beh hō͘ lâng khùn, goá hoán-tńg khùn tı̄ chit-nı̍h, chin-chiàⁿ sı̄ gōng. Chı̍t-lō͘ khoàⁿ-lâi khoàⁿ-khı̀, ǹg-bāng kiám-chhái oē koh tit-tio̍h tı̄ lō͘--nı̍h an-ùi sim-koaⁿ hit chı̍t-kńg. Tı̍t-tı̍t kiâⁿ kàu koh khoàⁿ-kı̀ⁿ tāi-seng chē teh khùn ê têng-á, sim-koaⁿ it-hoat chai choē, Ia̍h it-hoat iu-būn. Hit-sı̂ Ki-tok-tô͘ chhin-chhiūⁿ án-ni kiâⁿ, thó͘-khùi i ê lām-sám khùn kóng: Goá khó͘ ah, goá jı̍t-sı̂ khùn, kan-lân ê sı̂-chūn teh khùn. Chú khí chit-ê têng-á sı̄ beh hō͘ lâng thang hioh-siān, lâi ióng cheng-sı̂n, goá hoán-tńg ēng i choè êng-sin ê só͘-chāi. Hāi--ah! Goá lām-sám thàn chêng-io̍k kàu án-ni. Taⁿ óng-hoê chiū-sı̄ khang kiâⁿ chı̍t-choā lō͘, chhin-chhiūⁿ Í-sek-lia̍t ê peh-sı̀ⁿ tek-choē Siōng-tè, tio̍h tò-thè kiâⁿ tı̄ khòng-iá. Taⁿ hō͘ goá pō͘-pō͘ kiâⁿ, pō͘-pō͘ iu-būn; nā-sı̄ bô lām-sám lâi tek-choē, chiū pō͘-pō͘ kiâⁿ, pō͘-pō͘ hoaⁿ-hí; kàu chit-tia̍p m̄-chai koh kiâⁿ kàu loā hn̄g--lah. Kiâⁿ chit tiâu lō͘ chı̍t-pái tùi chia kè chiū hó, goá óng-hoê í-keng ū saⁿ pái; koh jı̍t tit-beh àm, tio̍h thàu-mı̂ kiâⁿ. Goá siáⁿ-sū khùn--ah?
Hit-sı̂ Ki-tok-tô͘ í-keng koh kàu têng-á-lāi, chē ū hiah kú teh thı̂-khàu; āu-lâi tit-tio̍h Siōng-tè ê un-tián, tú-á teh iu-būn ê sı̂, hut-jiân khoàⁿ-kı̀ⁿ hit-ê bûn-pı̂n, tı̄ tāi-seng chē ê í-kha. Chiū gı̍h-gı̍h-chhoah, kín-mé khioh khǹg tı̄ kûi-lāi. Ki-tok-tô͘ koh chhē--tio̍h chit kńg bûn-pı̂n, chiū hoaⁿ-hí kàu boē-kò͘-tit, in-ūi tit-tio̍h oa̍h kap jı̍p Thiⁿ-siâⁿ, lóng tio̍h chit kńg choè pı̂n-kù, só͘-í chim-chiok khǹg tı̄ kûi-lāi, to-siā Siōng-tè ê chí-sı̄, hō͘ i koh-chài chhē-tio̍h. Hit-sı̂ ia̍h iu-būn, ia̍h hoaⁿ-hí, koh khí pō͘ kiâⁿ ǹg soaⁿ peh-khı̀, kha-pō͘ it-hoat khin-khoài. Nā-sı̄ peh bē kàu soaⁿ-téng, jı̍t í-keng lo̍h, chiah siūⁿ-tio̍h i ê lām-sám khùn, koh ka-kı̄ thó͘-khùi kóng, Goá án-ni khùn, m̄-nā tek-choē, ia̍h ū gûi-hiám, í-keng lām-sám khùn, taⁿ tio̍h àm-mı̂ kiâⁿ, boē kı̀ⁿ-tio̍h thiⁿ-jı̍t, moá lō͘ o͘-àm, kiaⁿ-liáu thiaⁿ-kı̀ⁿ iá-siù ê siaⁿ hu-hu-háu, lóng sı̄ hit-ê lām-sám khùn ê só͘ tı̀. Chêng Hoâi-gı̂, Sim-keng kā i kóng khoàⁿ-kı̀ⁿ sai ê sū-chêng, hit-sı̂ i koh siūⁿ--tio̍h, só͘-í ka-kı̄ phah-sǹg, chit-ê iá-siù mı̂-sı̂ sı̀-koè thó-chia̍h, goá nā hō͘ i tú-tio̍h, beh-thài-oē cháu-tit i peh sí?
Án-ni chiū chı̀n-chêng kiâⁿ, tú-á teh thó͘-khùi i ê sit-chhò, kia̍h-ba̍k hut-liân khoàⁿ-kı̀ⁿ chı̍t-chō tiān, koâiⁿ koà toā, miâ kiò Bí-kiong , tú-á kūn tı̄ lō͘-piⁿ. Hit-sı̂ goá bāng-kı̀ⁿ Ki-tok-tô͘ kín-kín kiâⁿ, ǹg-bāng hit só͘-chāi thang chioh hioh. Kiâⁿ bô loā hn̄g, lō͘ chiū khah oe̍h; koh lı̄ tiān-mn̂g liōng-iok ū poàⁿ lí, Ki-tok-tô͘ siông-sè khoàⁿ chêng-bı̄n ê lō͘, hut-jiân khoàⁿ-kı̀ⁿ nn̄g chiah sai, chiàⁿ-sı̄,
Āu-bı̄n kan-lân, chêng-bı̄n ū kiaⁿ,
Soaⁿ-téng nā kàu, chiah sai chhut siaⁿ,
Sèng-tô͘ an-lo̍k oh-tit tiông-kú,
Kan-khó͘ kè-liàu liâm-piⁿ koh tú.
Hit-sı̂ Ki-tok-tô͘ kóng, Goá chit-tia̍p só͘ khoàⁿ-kı̀ⁿ chiū-sı̄ Hoâi-gı̂, Sim-keng in só͘ kóng ê tāi-chı̀.Nn̄g chiah sai chin-chiàⁿ ū thih-liān pa̍k-teh, Ki-tok-tô͘ chit-sı̂ m̄-chai. Sim toā iu-būn, phah-sǹg nā chı̀n-chêng khı̀, tek-khak sí, siūⁿ beh o̍h Hoâi-gı̂, Sim-keng koh hoê-thâu khı̀. Hit-sı̂ Kò͘-mn̂g ê lâng, miâ Kéng-séng, khoàⁿ-kı̀ⁿ Ki-tok-tô͘ thè pō͘ bô kiâⁿ, chhin-chhiūⁿ beh hoê-thâu ê ı̀-sù, chiū toā siaⁿ kiò i kóng, Lí hiah sió-táⁿ, sı̍t-chāi m̄-sái kiaⁿ. Chiah-ê sai ū thih-liān liān teh, hē tı̄ hia tiâu-tı̂ beh chhı̀-khoàⁿ lâng ū sı̀n á-bô. Choè lí tùi tiong-ng kiâⁿ lâi, chiah boē hō͘ in siong-hāi. Hit-sı̂ goá khoàⁿ-kı̀ⁿ Ki-tok-tô͘ chı̀n-chêng kiâⁿ, tùi sai ê bı̄n-chêng kè-khı̀, sim put-chí kiaⁿ, nā-sı̄ chiàu kò͘-mn̂g ê lâng só͘ hoan-hù khı̀ kiâⁿ, sui-bóng ū thiaⁿ-kı̀ⁿ sai teh háu, ia̍h boē hō͘ hāi--tio̍h. Í-keng kè liáu, chiū tah chhiú toā hoaⁿ-hí, tı̍t-tı̍t kiâⁿ kàu tiān-mn̂g, mn̄g kò͘-mn̂g--ê kóng, Chit keng sı̄ sím-mı̍h chhù? Kim-mı̂ goá thang hioh tı̄ chia, á m̄-thang?
Kò͘-mn̂g--ê kóng, Chit keng sı̄ soaⁿ-chú khí--ê, in-ūi kiâⁿ chit tiâu lō͘ ê lâng lâi khí, beh chín-chè in ê khiàm-kheh, kiù in ê gûi-hiám.
Kò͘-mn̂g ê lâng koh mn̄g kóng, Lí tùi tah-lo̍h lâi, beh tah-lo̍h khı̀?
Ki-tok-tô͘ kóng, Goá tùi Chiong-bông siâⁿ lâi, beh khı̀ Sûn-soaⁿ, taⁿ jı̍t àm, beh chioh hioh chit-nı̍h; m̄-chai thang á m̄-thang?
Kò͘-mn̂g--ê kóng, Lí miâ kiò sím-mı̍h?
Ki-tok-tô͘ ı̀n kóng, Goá pún-jiân miâ kiò Chiông-io̍k , taⁿ miâ kiò Ki-tok-tô͘.
Kò͘-mn̂g--ê kóng, Lí lâi kàu chiah oàⁿ! Jı̍t to àm lah!
Ki-tok-tô͘ kóng, Hāi--ah! Nā m̄-sı̄ lām-sám khùn tı̄ soaⁿ ê têng-á-lāi, í-keng chá-chá kàu chit-nı̍h. Koh, nā m̄-sı̄ khùn ê sı̂ sit-lo̍h bûn-pı̂n, ia̍h khah chá kàu. In-ūi tú-á tit-beh poâⁿ-soaⁿ ê sı̂, chiah chai bûn-pı̂n phah-m̄-kı̀ⁿ, chhē lóng bô, ko͘-put-chiong hoê-thâu khı̀ hit-ê lām-sám khùn ê só͘-chāi chhē; kai-chài koh chhē-tio̍h. Goá kàu chit-tia̍p chiah lâi, sı̄ in-ūi án-ni.
Kò͘-mn̂g--ê kóng, Nā-sı̄ án-ni, chit lāi-bı̄n sèng ê peh-sı̀ⁿ, goá chhiáⁿ chı̍t-lâng chhut-lâi thiaⁿ lí só͘ kóng ê oē; phah-sǹg nā thang, i chiū chiàu chit keng ê ka-hoat, beh chhoā lí kap thong-ke ê lâng sio-kı̀ⁿ.
Kò͘-mn̂g ê lâng chiū kòng-cheng, lāi-bı̄n thiaⁿ-kı̀ⁿ cheng siaⁿ, chiū ū chı̍t-ê cha-bó͘ gín-ná chhut-lâi, bı̄n-māu toan-chiàⁿ, koà súi, miâ kiò Khûn-sı̄n , mn̄g Kò͘-mn̂g ê lâng kóng, Kiò goá mih-tāi?
Kò͘-mn̂g--ê ı̀n kóng, Chit lâng tùi Chiong-bông siâⁿ lâi, beh khı̀ Sûn-soaⁿ, in-ūi kiâⁿ lō͘ ià-siān, koh jı̍t àm--lah, beh hioh tı̄ chit-nı̍h, mn̄g goá ‘Thang mah?’ Goá ū kā i kóng, beh chhiáⁿ lí chhut-lâi khoàⁿ cháiⁿ-iūⁿ. Taⁿ lí kap i kóng, chiàu ka-hoat thang á m̄-thang.
Khûn-sı̄n chiū mn̄g Ki-tok-tô͘ tùi tah-lo̍h lâi, beh tah-lo̍h khı̀. Ki-tok-tô͘ chiū chiong ı̀n kò͘-mn̂g--ê ê oē lâi ı̀n i.
Koh mn̄g kóng, Lí cháiⁿ-iūⁿ lâi chit tiâu lō͘? Ki-tok-tô͘ chiū kā i kóng-bêng.
Koh mn̄g kóng, Lō͘--nih só͘ tú-tio̍h sı̄ cháiⁿ-iūⁿ? Ki-tok-tô͘ ia̍h chı̍t-hāng chı̍t-hāng kā i kóng.
Āu-lâi koh mn̄g kóng, Lí miâ kiò sím-mı̍h?
Ìn kóng, Goá miâ kiò Ki-tok-tô͘; thiaⁿ-kı̀ⁿ soaⁿ-chú khí chit-ê tiān, sı̄ beh chín-chè kiâⁿ lō͘ ê só͘ khiàm-kheh, kiù in ê gûi-hiám, goá chiah it-hoat ài hioh tı̄ chia.
Hit-sı̂ Khûn-sı̄n thiaⁿ-kı̀ⁿ Ki-tok-tô͘ ê oē, ia̍h hoaⁿ-hí, ia̍h pi-siong. Chiū kóng, Goá tio̍h chhiáⁿ ke-lāi kúi-nā lâng chhut-lâi. Chiū cháu kàu mn̂g-kha, chhiáⁿ Hiân-tı̀ , Jı̂n-ài, Kèng-khiân, saⁿ lâng chhut-lâi kap Ki-tok-tô͘ tâm-lūn. Tâm-lūn liáu, chiū chhoā i kap ke-lāi ê lâng saⁿ-kı̀ⁿ. Ke-lāi choē-choē lâng chhut-lâi ngiâ-chih--i, kā i kóng, “Siū Chú un-tián ê lâng--ah, chhiáⁿ jı̍p--lâi.” Soaⁿ-chú khí chit-keng chhù, tiâu-tı̄ sı̄ beh khoán-thāi chhin-chhiūⁿ lí teh kiâⁿ lō͘ ê lâng.
Ki-tok-tô͘ chiū tı̀m-thâu, tè i jı̍p-khı̀, í-keng jı̍p-khı̀ liáu, teh chē, chiū chhiáⁿ i chia̍h-tê. Hit-sı̂ ē-hng tǹg iáu-bē piān, chèng-lâng m̄-káⁿ hoè-sı̂, lóng-chóng chı̍t-sim ài siông-sè thiaⁿ Ki-tok-tô͘ ê tāi-chı̀. Chiū kéng Kéng-khiân, Hiân-tı̀, Jı̂n-ài kap i tâm-lūn.
Kèng-khiân chiū kóng, Hó ê Ki-tok-tô͘--ah, goán í-keng thiàⁿ-sioh lí, chiap-la̍p lí hioh chia, lō͘--nı̍h só͘ tú-tio̍h chiah-ê sū-chêng, chhiáⁿ lí lóng-chóng kóng-bêng, kiám-chhái oē lı̄-ek chèng-lâng.
Ki-tok-tô͘ kóng, Che sı̄ goá só͘ ài, lí án-ni kóng, goá put-chí hoaⁿ-hí.
Kèng-khiân kóng, Lí kiâⁿ Thiⁿ-lō͘ sı̄ tùi sím-mı̍h iân-kò͘?
Ki-tok-tô͘ kóng, Goá hiahN-sı̂ tı̄ goá pún-toē, hı̄-khang siông-siông ū thang kiaⁿ ê siaⁿ teh pek goá cháu-khui. Hit-ê siaⁿ chhin-chhiūⁿ kā goá kóng, nā iû-goân tiàm tı̄ pún-toē, tek-khak boē bián-tit bia̍t-bô.
Kèng-khiân kóng, Lí lı̄-khui pún-toē, siáⁿ-sū kiâⁿ chit-tiâu?
Ki-tok-tô͘ kóng, Che sı̄ Siōng-tè chí-ı̀. In-ūi goá hit-sı̂ chai gûi-hiám, kiaⁿ-hiâⁿ, m̄-chai tio̍h siám sím-mı̍h só͘-chāi; āu-lâi ū chı̍t-lâng miâ kiò Thoân-tō, khoàⁿ-kı̀ⁿ goá teh thı̂-khàu ngia̍uh-ngia̍uh-chhoah, i chiū chí-tiám goá khı̀ oe̍h-mn̂g. Nā m̄-sı̄ án-ni; goá éng boē tit-tio̍h jı̍p hit-ê mn̂g, kàu taⁿ ia̍h boē kàu chit nı̍h.
Kèng-khiân kóng, Lí lâi chit--nı̍h ū tùi Sek-sı̄ ê chhù keng-kè á-bô?
Ki-tok-tô͘ kóng, Ū--ah, goá hit só͘-chāi só͘ khoàⁿ-kı̀ⁿ ê tāi-chı̀, kàu chı̍t-sı̀-lâng m̄-káⁿ boē kı̀-tit. Tiong-kan ū saⁿ hāng khah iàu-kín--ê. Chı̍t hāng, chiū-sı̄ lâng sim-koaⁿ tit-tio̍h un-tián kám-hoà, mô͘-kúi sui ài beh bia̍t-bô--i, Ki-tok iáu-kú pó-choân--i. Chı̍t hāng, chiū-sı̄ lâng tek-choē Siōng-tè, tı̀-kàu m̄-káⁿ koh ǹg-bāng i ê un-tián. Chı̍t hāng chiū-sı̄ lâng teh khùn ê sı̂, bāng-kı̀ⁿ sím-phoàⁿ ê jı̍t-chí í-keng kàu, hit-sı̂ só͘ bāng-kı̀ⁿ chiah-ê sū-chêng. Chit saⁿ hāng chin sı̄ iàu-kín--ê.
