Kèng-khiân kóng, hit-ê lâng só͘ bāng-kı̀ⁿ, bat kóng hō͘ lí thiaⁿ mah?
Ki-tok-tô͘ kóng, Ū, hit-ê bāng put-chí thang kiaⁿ. I kóng hit-ê bāng, goá ê sim-koaⁿ chiū pho̍k-pho̍k-chhéng. Sui-bóng án-ni, goá oē thiaⁿ-kı̀ⁿ che, ia̍h put-chí hoaⁿ-hí.
Kèng-khiân kóng, Lí tı̄ Sek-sı̄ ê chhù, chit-ê í-goā, kám bô koh khoàⁿ-kı̀ⁿ sím-mı̍h mah?
Ki-tok-tô͘ kóng, Ia̍h ū.Hit-sı̂ koh chhoā goá khı̀ khoàⁿ chı̍t-keng chhù, toā koh súi, lāi-bı̄n ê lâng lóng-chóng chhēng kim ê saⁿ, mn̂g--nih ū kia̍h to ê lâng teh khiā, beh chó͘-tòng, m̄-chún lâng jı̍p-khı̀. Hut-jiân ū chı̍t-ê hó-táⁿ ê lâng, ēng to phoà-khui chı̍t-tiâu lō͘ jı̍p-khı̀. Hit lāi-bı̄n ê lâng chiū chhiáⁿ i jı̍p-khı̀, lâi tit-tio̍h éng-oán ê êng-kng. Khoàⁿ kàu chit-ê tāi-chı̀, sı̍t-chāi hō͘ goá ê sim-koaⁿ put-chí hoaⁿ-hí. Hit-sı̂ nā m̄-sı̄ chai chit-tiâu lō͘ tio̍h koh kiâⁿ, che Sek-sı̄ ê chhù goá ài kú-kú tiàm-teh.
Kèng-khiân kóng, Chit-ê í-goā, lō͘--nı̍h ū koh khoàⁿ-kı̀ⁿ sı̄m-mı̍h?
Ki-tok-tô͘ kóng, Koh kiâⁿ bē loā hn̄g, chhin-chhiūⁿ khoàⁿ-kı̀ⁿ kè-téng tiàu chı̍t ê lâu-huih ê lâng. Goá chı̍t-ē khoàⁿ-kı̀ⁿ, hit-ê tàⁿ chiū liâm-piⁿ tùi keng-thâu téng lut--lo̍h-khı̀. HiahN-sı̂ goá ka-chiah pē tāng-tàⁿ thó͘-khùi, thı̂-khàu, kàu chit-sı̂ tàⁿ chiū lut-lo̍h lı̄-khui goá ê seng-khu. Goá tāi-seng bē bat khoàⁿ-kı̀ⁿ kàu án-ni-siⁿ, hit-sı̂ goá phah-sǹg sı̄ kı̂-koài. Só͘-í put-tek-put tio̍h khiā-teh khoàⁿ. Tú-á teh khoàⁿ ê sı̂, ū saⁿ-ê êng-kng--ê chiū-kūn goá. Tē-it ê, kan-chèng goá ê choē í-keng sià-bián; tē-jı̄ ê, kā goá thǹg phoà-saⁿ, ēng chit ê súi ê saⁿ hō͘ goá chhēng; tē-saⁿ-ê, tǹg-ı̀n tı̄ goá ê thâu-hia̍h choè kı̀-hō.
Hit-sı̂ Ki-tok-tô͘ koh the̍h kûi-lāi ê bûn-pı̂n kóng, Chit kńg khàm-ı̀n ê bûn-pı̂n ia̍h sı̄ i hō͘ goá.
Kèng-khiân kóng, Goá phah-sǹg lí káⁿ ū koh khoàⁿ-kı̀ⁿ pa̍t mı̍h?
Ki-tok-tô͘ kóng, Í-keng kā lí kóng--ê, sı̄ hit ê khah toā hāng--ê, chiah-ê í-goā chin-chiàⁿ iā ū koh khoàⁿ-kı̀ⁿ pa̍t mı̍h. In-ūi goá lâi ê sı̂, khoàⁿ-kı̀ⁿ ū saⁿ lâng tı̄ lō͘-piⁿ teh khùn, miâ kiò Gû-gōng, Lán-tō , Chū-sı̄, ta̍k-lâng ê kha ū thih-liān liān-teh. Goá chhut-la̍t kiò in chhíⁿ, lí phah-sǹg in ū beh thiaⁿ mah? Ia̍h ū koh khoàⁿ-kı̀ⁿ Sı̄-gı̂ , Gūi-siān , nn̄g lâng lām-sám poâⁿ-chhiûⁿ jı̍p-lâi, kan-ta kóng beh khı̀ Sûn-soaⁿ; bē loā-kú, in chiū kiâⁿ bê-lō͘ khı̀ sí. Goá ū kā in kóng oē tú-tio̍h hit-ê chai-ē, in ia̍h m̄-sı̀n. Koh goá tit-beh chiūⁿ chit-ê soaⁿ, chai-kiò sı̄ put-chí kan-khó͘, tùi sai ê bı̄n-chêng keng-kè ia̍h chin oh. Siat-sú Kò͘-mn̂g lâng bô kiò goá, kiaⁿ-liáu kàu bé ia̍h tò-tńg khı̀. Taⁿ kám-siā Siōng-tè hō͘ goá kàu tı̄ chit-nı̍h, ia̍h to-siā lín chiap-la̍p goá.
Hit-sı̂ Hiân-tı̀ phah-sǹg ū kúi-nā hāng tāi-chı̀ tio̍h koh siông-sè mn̄g--i; chiū chhiáⁿ Ki-tok-tô͘ koé-bêng hō͘ i thiaⁿ. Chiū mn̄g kóng, Lí lı̄-khui pún-hiuⁿ, ū-sı̂ káⁿ ū siàu-liām mah?
Ki-tok-tô͘ kóng, Ū--ah; siông-siông teh siàu-liām. M̄-kú sim-koaⁿ kiàn-siàu, oàn-hūn, koat-toàn bô siūⁿ beh tò--khı̀. Nā ài beh tò--khı̀, tek-khak ū ki-hoē. Nā-sı̄ goá beh kiû khah hó ê toē-hng, chiū-sı̄ tı̄ thiⁿ-nih--ê.
Hiân-tı̀ kóng, Lí chêng koàiⁿ-so͘ ê pháiⁿ , taⁿ kiám lóng bô?
Ki-tok-tô͘ kóng, Sim-lāi iáu-kú ū, nā-sı̄ su-io̍k pháiⁿ ê liām-thâu m̄-sı̄ goá só͘ hoaⁿ-hí--ê. Goá tāi-seng kap pún-siâⁿ ê lâng chin-chiàⁿ hoaⁿ-hí chiah-ê su-io̍k, chit-tia̍p chiah-ê tāi-chı̀ lóng sı̄ hō͘ goá ê sim iu-būn, goá só͘ him-bō͘--ê, nā oē tit-tio̍h, chiū éng-éng bô koh siūⁿ chiah ê. “Nā-sı̄ ài kiâⁿ hó ê sı̂, siâng-siâng ū pháiⁿ tı̄ bı̄n-chêng.”
Hiân-tı̀ kóng, hit-ê su-io̍k kiáu-jiáu lí--ê, ū-sı̂ lí kiám bô khah-iâⁿ--i mah?
Ki-tok-tô͘ kóng, Ū-sı̂ ū, nā-sı̄ khah hán-tit. Khioh ū chit-hō ê sı̂, goá pó-sioh i chhin-chhiūⁿ kim-ge̍k.
Hiân-tı̀ kóng, hit-ê su-io̍k kiáu-jiáu lí ê sim, ū-sı̂ ná bô khı̀, hit-ê in-toaⁿ sı̄ cháiⁿ-iūⁿ? Lí oē kóng á boē?
Ki-tok-tô͘ kóng, Oē. Tāi-seng sı̍p-jı̄-kè só͘ khoàⁿ-kı̀ⁿ chiah-ê sū-chêng, sim-lāi siūⁿ i, chiū chai hit-ê pháiⁿ chhin-chhiūⁿ bô--khı̀. Khoàⁿ seng-khu chit-niá saⁿ, á-sı̄ khui khoàⁿ kūi-lāi ê bûn-pı̂n, á-sı̄ sim-lāi siūⁿ tit-beh khı̀ ê só͘-chāi, che lóng oē hō͘ goá ka-kı̄ khoàⁿ hit-ê pháiⁿ ná chhin-chhiūⁿ í-keng bô--khı̀.
Hiân-tı̀ kóng, Lí sím-mı̍h iân-kò͘ chiah tiâu-tı̂ beh khı̀ Sûn-soaⁿ?
Ki-tok-tô͘ ı̀n kóng, Tāi-seng só͘ khoàⁿ-kı̀ⁿ tiàu tı̄ kè-téng í-keng sí--ê, goá ǹg-bāng kàu hit-nı̍h tek-khak khoàⁿ I oa̍h oē tı̄-teh; koh chit-tia̍p teh kiáu-jiáu goá ê pháiⁿ, kàu hit-nı̍h lóng-chóng ia̍h oē choa̍t-tn̄g, koh bat thiaⁿ-kı̀ⁿ lâng kóng, hit só͘-chāi éng-éng bô sí-sit, koh kàu hit-nı̍h, tek-khak tit-tio̍h só͘ hoaⁿ-hí ê lâng lâi choè phoāⁿ. Goá sı̍t-chāi kā lí kóng, Chú kā goá pàng hit-ê tàⁿ, chiū goá put-chí thiàⁿ i; sim-lāi ê pē-pēng, goá put-chí oàn-hūn; éng-oa̍h ê só͘-chāi put-chí ài kàu; koh tı̄ hia chèng-lâng o-ló Chú, siông-siông toā siaⁿ kiò kóng, ‘Sèng-chāi, sèng-chāi, sèng-chāi’, chiū goá put-chí ài kap in choè-tui.
Jı̂n-ài chiū mn̄g Ki-tok-tô͘ kóng, Lí ū bó͘-kiáⁿ á-bô?
Ki-tok-tô͘ ı̀n kóng, Ū--ah; chı̍t-ê bó͘, sı̀ ê kiáⁿ.
Jı̂n-ài koh mn̄g kóng, Siáⁿ-sū m̄ chhoā in lâi?
Ki-tok-tô͘ chiū lâu ba̍k-sái, kóng, Hāi--ah! Goá put-chí ài, nā-sı̄ goá kiâⁿ thiⁿ-lō͘, khah su bó͘-kiáⁿ lóng m̄ hoaⁿ-hí.
Jı̂n-ài kóng, In iáu-kú khiā-khí put2 só͘-chāi, hit-ê gûi-hiám, lí éng-kai bêng-bêng kā in kóng.
Ki-tok-tô͘ kóng, Ū--lah; chiàu Siōng-tè chí-sı̄ goá pún-siâⁿ tit-beh bia̍t-bô, goá bat lóng-chóng kā in kóng, nā-sı̄ in ia̍h lia̍h-choè kóng chhiò-oē, lóng m̄ sı̀n.
Jı̂n-ài koh mn̄g, Lí án-ni kā in kóng, lí koh ū kiû Siōng-tè kám-hoà in ê sim-koaⁿ hō͘ in sı̀n á-bô?
Ki-tok-tô͘ kóng, Ū--ah; ta̍uh-ta̍uh thoè in kı̂-tó, sim-koaⁿ put-chí pek-chhiat, in-ūi bó͘ kiáⁿ, sı̄ goá tē-it thiàⁿ--ê, lí só͘ chai--ê.
Jı̂n-ài kóng, Tit-beh bia̍t-bô ê chêng-iû phah-sǹg lí hit-sı̂ siông-sè chai, taⁿ ū ēng ka-kı̄ iu-būn kap kiaⁿ-hiâⁿ kā in kóng á-bô?
Ki-tok-tô͘ kóng, Ū--ah; goá ēng án-ni chài-saⁿ kóng; koh goá siūⁿ tit-beh kàu ê siū-khı̀, chiū kiaⁿ-hiâⁿ ngia̍uh-ngia̍uh-chhoah, bı̄n iu-būn ai-chhám lâu ba̍k-sái, in khoàⁿ chiū ka-kı̄ chai, chóng-sı̄ m̄ ài kap goá lâi.
Jı̂n-ài kóng, Án-ni m̄ lâi, in ū sím-mı̍h oē thang kóng?
Ki-tok-tô͘ kóng, Goá ê bó͘ it-tio̍h chit-ê sè-kan, kiáⁿ-jı̂ iáu-kú siàu-liân ài thit-thô, só͘-í lóng-chóng pàng-sak hō͘ goá ka-kı̄ kiâⁿ.
Jı̂n-ài kóng, Lí sui-bóng án-ni khǹg in, kiám-chhái lí ê só͘ kiâⁿ bē ū tú-hó, chiū bô-chhái lí ê kang-chêng.
Ki-tok-tô͘ kóng, Goá ê phín-hēng ka-kı̄ chai ū choē-choē m̄-tio̍h, m̄-káⁿ kóng bô, ia̍h chai ēng hó--ê lâi khǹg lâng, kiám-chhái só͘ kiâⁿ bô ha̍h, chiū só͘ khǹg ia̍h bô lı̄-ek; chóng-sı̄ goá káⁿ kóng pêng-sò͘ put-chí kín-sı̄n, kiaⁿ-liáu goá ê m̄-hó oē chó͘-tòng in kiâⁿ thiⁿ-lō͘, chiū chai goá ê kín-sı̄n, in hoán-tńg kóng goá siuⁿ soè-jı̄, chiū ū tāi-chı̀, in phah-sǹg sı̄ bô iàu-kín--ê, goá ūi-tio̍h in m̄-káⁿ kiâⁿ. Siat-sú goá ê só͘ kiâⁿ ū chó͘-tòng in kiâⁿ thiⁿ-lō͘, phah-sǹg bô pa̍t-mı̍h, tek-khak sı̄ in-ūi goá ê sim put-chí kiaⁿ, m̄-káⁿ tek-choē Siōng-tè, soà hāi-tio̍h lâng.
Jı̂n-ài kóng, Lâng khiok ū án-ni, chāi-chá Kai-ún kiâⁿ pháiⁿ, chiū oàn-hūn i ê sió-tı̄ kiâⁿ hó; nā lí án-ni ê só͘ kiâⁿ, bó͘ kiáⁿ ê iàm-chiān, sı̄ in bêng-bêng oàn-hūn hó, chiū in lêng-hûn boē tit-tio̍h kiù, m̄-sı̄ lí ê choē-sio̍k.
Chèng-lâng án-ni teh chē, saⁿ-kap kóng-oē, kàu ē-hng tǹg chhòng-piān, tāi-ke lâi chē-toh, ta̍k hāng mı̍h pûi koh noā, chiú sûn koh tiⁿ. Chē-toh só͘ kóng ê oē, lóng sı̄ gı̄-lūn soaⁿ-chú, kóng i ê só͘ kiâⁿ, siáⁿ-sū án-ni kiâⁿ, koh siáⁿ-sū khí chit-ê Bí-kiong.
Chiàu in kóng, Chú sı̍t-chāi ióng-béng, mô͘-kúi pêng-sò͘ hāi lâng, Chú khah-iâⁿ--i, hit-tia̍p put-chí gûi-hiám kàu lâu huih, kiâⁿ án-ni chheng-chheng in-ūi thiàⁿ peh-sı̀ⁿ, che toā-un chin-chiàⁿ hō͘ lâng oē thiàⁿ-tit, oē him-bō͘-tit. Koh in ū lâng kóng, Chú tèng-sí liáu-āu, bat koh tú-tio̍h i oa̍h tı̄-teh, ia̍h bat thiaⁿ-kı̀ⁿ i pún-sin kóng-oē, chai-kiò Chú gâu thiàⁿ kiâⁿ thiⁿ-lō͘ ê lâng, chiū-sı̄ thong thiⁿ-ē lóng bô lâng oē pí-tit Chú, chı̍t-hāng ê pı̂n-kù, chiū-sı̄ Chú lı̄ ka-kı̄ ê êng-kng lâi kiù hoān-choē ê lâng; ia̍h bat thiaⁿ Chú bêng-bêng kóng, m̄-ài ka-kı̄ chı̍t-lâng toà tı̄ Sûn-soaⁿ, ài tit choē-choē lâng kap i tı̄--teh, án-ni-siⁿ kiâⁿ thiⁿ-lō͘ ê lâng choē-choē, sui-jiân chāi-siⁿ choè khit-chia̍h tı̄ pùn-sò khiā-khí, ia̍h í-keng hō͘ Chú kú-khí choè kun-ông.
Tāi-ke án-ni saⁿ-kap kóng-oē kàu kiⁿ-chhim, chiū kiû Chú pó-pı̀ chiah khı̀ khùn, hō͘ Ki-tok-tô͘ tiàm tı̄ toā-lâu--nih khùn, pâng ê thang-á ǹg jı̍t chhut ê só͘-chāi, pâng ê miâ sı̄ Pêng-an. Ki-tok-tô͘ tı̄ hit ūi-á khùn kàu thiⁿ kng, chhíⁿ chiū chhiùⁿ-koa kóng,
Chhiáⁿ-hí goá hioh Pêng-an pâng,
Sı̄ Chú sià-bián ū choē lâng;
Un-tián, thiàⁿ-thàng bô thang pí,
Bí-kiong lı̄ thiⁿ káⁿ kúi lí.
Chèng-lâng khùn chhíⁿ khí-lâi, kap Ki-tok-tô͘ koh tâm-lūn, ia̍h kā i kóng Lí m̄-sái liâm-piⁿ khí-sin, thèng-hāu chhoā lí khoàⁿ chit só͘-chāi koh-iūⁿ pó-poè ê mı̍h-kiāⁿ. Chiū chhoā i tāi-seng jı̍p chu-pâng, hō͘ i khoàⁿ-kı̀ⁿ kó͘-chá ê chheh, tiong-kan siá Chú ê sè-hē, kóng, Chú sı̄ bô khí-thâu--ê ê Kiáⁿ, Chú ia̍h sı̄ bô khí-thâu. Chheh-lāi ia̍h siông-sè siá Chú só͘ kóng, só͘ kiâⁿ; ia̍h kı̀ kúi-nā-pah lâng ê miâ, chiū-sı̄ Chú só͘ kú-khí choè chhe-ēng, hō͘ in khiā kú-tn̂g boē pāi-hoāi ê chhù-the̍h; koh Chú ê chhe-ēng só͘ kiâⁿ ê hó-sū, chiū-sı̄ khah iâⁿ te̍k-kok, kiâⁿ kong-gı̄, tit-tio̍h só͘ ín ê hok-khı̀, that sai ê chhùi, thoat-lı̄ hé-iām, siám-pı̄ lāi-kiàm, jio̍k pı̀ⁿ kiông, kau-chiàn oē ióng, phoà tùi-te̍k ê tı̄n. Chiah-ê tāi-chı̀ chheh-lāi lóng ū kı̀-chài, it-chı̄n tha̍k hō͘ Ki-tok-tô͘ thiaⁿ. Koh lâng pêng-sò͘ khoàⁿ-khin Chú, bú-bān i ê só͘ kóng, só͘ kiâⁿ, Chú iáu-kú sià-bián i ê choē, ēng un-tián chiap-la̍p i, chit-hō sū choē-choē hāng ia̍h ū kı̀-chài. Lēng-goā koh kı̀-chài kı̂-koài ê tāi-chı̀, chiū-sı̄ kó͘-chá, hiān-sı̂ kap āu-lâi ê tāi-chı̀; chit-ê āu lâi ê tāi-chı̀ sı̄ sian-ti lâng só͘ tāi-seng kóng, kàu sı̂ ta̍k-hāng tek-khak oē èng-giām, hō͘ Chú ê tùi-te̍k kiaⁿ-hiâⁿ, sèng-tô͘ hoaⁿ-hí an-sim; che só͘ kı̀ Ki-tok-tô͘ lóng-chóng ū khoàⁿ-kı̀ⁿ.
Bı̂n-á-chài koh chhoā i jı̍p kun-chong-ke̍k, tiong-ng siu hiah-ê sı̂n-lêng kau-chiàn ê khı̀-kū, chiū-sı̄ Sèng-sı̂n ê kiàm, Sı̀n-chú ê pâi, Iú-gı̄ ê kah, Kiù-hō͘ ê khoe, Hok-im ê oê, che oê chhēng kàu kú ia̍h boē pháiⁿ, koh ū khı̀-kū hō choè Siông-siông Kı̂-tó. Chiah-ê khı̀-kū lóng sı̄ Chú só͘ pı̄-pān hō͘ kiâⁿ thiⁿ-lō͘ ê lâng thang ēng. Sui-jiân ho̍k-sāi Chú ê lâng chhin-chhiūⁿ soa hiah choē, iáu-kú ū kàu-gia̍h thang ēng.
Kó͘-chá Chú ê lô͘-châi kiâⁿ koh-iūⁿ ê tāi-chı̀, só͘ ēng ê khı̀-kū ia̍h hō͘ Ki-tok-tô͘ khoàⁿ, chhin-chhiūⁿ Mô͘-se só͘ ēng ê koáiⁿ-á, hū-jı̂n-lâng nngá-lí só͘ ēng tèng-sí Se-sián-lia̍p hit-ê thûi kap thih-teng; Ki-tiân só͘ ēng koáⁿ-cháu Bí-tiân ê kun-peng hiah-ê pân, teng, hô-thâu; San-kah phah-sí la̍k-pah lâng hit-ê gû-thûi; Chham-sun phah-sí chı̍t-chheng lâng hit-ê lû ê gê-chô kut; Tāi-pı̍t tı̀m-sí Ka-te̍k lâng Kho-lı̄-a, hit-ê chio̍h kap hiat chio̍h ê soh; koh Chú āu-lâi tı̄ toā siū-khı̀ ê jı̍t, khí-lâi thâi hit-ê pháiⁿ ê thâu-lâng, só͘ beh ēng ê kiàm. Lēng-goā choē-choē hāng hó-mı̍h lóng-chóng hō͘ Ki-tok-tô͘ khoàⁿ. Ki-tok-tô͘ toā hoaⁿ-hí, khoàⁿ bêng-pe̍k chèng-lâng koh khı̀ khùn.
Goá bāng-kı̀ⁿ Ki-tok-tô͘ keh jı̍t khùn-khí, tit-beh chiūⁿ lō͘, tāi-ke koh lâu i, kóng, Chhiáⁿ thèng-hāu, bı̂n-á-chài nā hó thiⁿ-sı̂, chiū beh chhoā lí khoàⁿ hit-ê tı̄ hn̄g-hn̄g ê Lo̍k-san . Lí nā khoàⁿ-kı̀ⁿ hit-ê soaⁿ, chiū oē it-hoat an-sim, in-ūi hit-ê soaⁿ pí lán chit só͘-chāi khah kūn thiⁿ-siâⁿ. Ki-tok-tô͘ chiū ín, hō͘ in lâu.
Kàu bı̂n-á chá-khí, jı̍t chhut, chhoā i chiūⁿ lâu-téng, ǹg lâm teh khoàⁿ, khoàⁿ-tio̍h khoài-lo̍k ê toē-hng, soaⁿ choē, chhiū ām, koh ū phû-tô-hn̂g, pah-hāng ê ké-chí, ta̍k hāng kı̂-iūⁿ ê hoe, chheng-chheng ê chúi-choâⁿ lâu-chhut, kéng-tı̀ put-chí kah ba̍k. Ki-tok-tô͘ chiū mn̄g, hit-ê sı̄ sím-mı̍h só͘-chāi? Ìn kóng, Sı̄ Í-má-loē-lı̄ ê toē. Hit-ê soaⁿ kap chit só͘-chāi lóng sı̄ hō͘ kiâⁿ thiⁿ-lō͘ ê lâng kong-ēng. Lí nā kàu hit-nı̍h, khiā hit soaⁿ ê Bo̍k-chiá tit-beh chí-tiám lí khoàⁿ thiⁿ-siâⁿ ê mn̂g.
Hit-tia̍p Ki-tok-tô͘ siūⁿ tio̍h khí-sin koh kiâⁿ lō͘. Tāi-ke kóng, Hó, nā-sı̄ tāi-seng tio̍h koh jı̍p kun-chong-ke̍k. Í-keng jı̍p, chiū ēng kian-kò͘ ê kah, lāi ê peng-khı̀, piàn seng-khu lóng ū pó-hō͘, tı̂-hông lō͘--nı̍h ê tùi-te̍k.
Ki-tok-tô͘ chhēng khoe-kah bêng-pe̍k, chiū kap chiah-ê pêng-iú kiâⁿ kàu goā mn̂g, mn̄g kò͘-mn̂g--ê kóng, Ū kè-lō͘ ê lâng tùi chia keng-kè á-bô? Kò͘-mn̂g--ê ı̀n--i kóng, Ū--ah. Ki-tok-tô͘ mn̄g, Lí bat i mah? Kò͘-mn̂g--ê kóng, Goá mn̄g i ê miâ, i ı̀n kóng, Goá miâ kiò-choè Chı̄n-tiong.
Ki-tok-tô͘ kóng, Chit-ê lâng goá bat, sı̄ goá ê chhù-piⁿ, tùi goá pún siâⁿ lâi. Lí phah-sǹg i thâu-chêng kiâⁿ, taⁿ ū loā hn̄g?
Kò͘-mn̂g--ê kóng, Taⁿ chha-put-to kàu soaⁿ-kha.
Ki-tok-tô͘ kóng, Hó. Taⁿ kò͘-mn̂g--ah, lí khoán-thāi goá thâu kàu bé put-chí hó, goān Chú siông-siông pı̀-iū lí, ke-thiⁿ lí choē-choē hok-khı̀.
Ki-tok-tô͘ tit-beh koh kiâⁿ, Khûn-sı̄n, Kèng-khiân, Jı̂n-ài, Hiân-tı̀, sàng i lo̍h soaⁿ. Án-ni tāi-ke saⁿ-kap kiâⁿ, koh-chài gı̄-lūn tāi-seng ê oē. kiâⁿ kàu soaⁿ-pho tit-beh lo̍h-khı̀, Ki-tok-tô͘ chiū kóng, Goá chêng-jı̍t chiūⁿ chit ê soaⁿ, hit-sı̂ chai put-chí oh, taⁿ tit-beh lo̍h, phah-sǹg ia̍h sı̄ hûi-hiám.
Hiân-tı̀ kóng, Lí ê oē tio̍h, lâng lo̍h chit-ê soaⁿ, jı̍p Ku-khiam ê soaⁿ-kok, sı̍t-chāi oh, siông-siông ài ta̍h-thu̍t, só͘-í goán kap lí lâi, sàng lí lo̍h soaⁿ. Ki-tok-tô͘ án-ni lo̍h soaⁿ ûn-ûn-á kiâⁿ, chin chú-soè, iáu-kú ta̍h-thu̍t teh chı̍t, nn̄g pái.
Hit-sı̂ goá bāng-kı̀ⁿ Ki-tok-tô͘ í-keng lo̍h soaⁿ, chiah-ê pêng-iú chiū ēng piáⁿ chı̍t-ê, chiú chı̍t-kan, kap phû-tô-koaⁿ lâi sàng i. Ki-tok-tô͘ chiū chı̀n-chêng kiâⁿ. Kiâⁿ chit-ê Ku-khiam ê soaⁿ-kok lāi, hit-ê chêng-hêng put-chí kan-khó͘, in-ūi kiâⁿ bô loā hn̄g, hut-jiân khoàⁿ-kı̀ⁿ mô͘-kúi tùi khòng-iá lâi, miâ choè A-pho-lûn . Hit-tia̍p Ki-tok-tô͘ kiaⁿ kàu ke̍k, ka-kı̄ tiû-tû, m̄-chai tio̍h cháu tò-thè, á-sı̄ khiā chia thèng-hāu, ka-kı̄ kóng, Goá ê chiàn-kah oē kò͘ heng-chêng, boē kò͘ ka-chiah-āu, siat-sú oa̍t-lı̀n-tńg tò-thè, tio̍h-siong koh-khah khoài, nā-sı̄ ài pó-choân sı̀ⁿ-miā, ia̍h tio̍h tòng chia bô thè; koh siūⁿ tio̍h hiòng-chêng, chiū ûn-ûn-á kiâⁿ, A-pho-lûn ia̍h chı̀n-chêng lâi chiū-kūn i. I ê bı̄n-māu put-chí hiông, ia̍h hō͘ lâng oàn-hūn, ia̍h hō͘ lâng kiaⁿ, piàn seng-khu ū lân, ka-kı̄ tián-béng, lia̍h choè put-chí hó khoàⁿ, koh ū sı̍t chhin-chhiūⁿ lêng ê sı̍t, ū kha chhin-chhiūⁿ hı̂m ê kha, pak-tó͘ chhut hé-hun, chhùi chhin-chhiūⁿ sai chhùi. Í-keng kūn-oá Ki-tok-tô͘, chiū thán-chhiâ-ba̍k khoàⁿ i, kóng, Lí tùi ta̍t-lo̍h lâi, beh ta̍t-lo̍h khı̀?
Ki-tok-tô͘ kóng, Goá tùi Chiong-bông siâⁿ lâi, hit só͘-chāi sı̄ bān-hāng pháiⁿ ê só͘-chāi, taⁿ tit-beh khı̀ Sûn-soaⁿ.
A-pho-lûn kóng, Chiàu lí ê oē, lí tek-khak sı̄ goá ê peh-sı̀ⁿ, in-ūi hit-ê toē sio̍k goá, goá choè hit só͘-chāi ê ông, hiah-ê peh-sı̀ⁿ ê Siōng-tè. Lí siáⁿ-sū káⁿ án-ni poē-poān cháu-chhut? Nā m̄-sı̄ goá ǹg-bāng lí oē koh ho̍k-sāi goá, goá chit-tia̍p chiū phah chı̍t-ē hō͘ lí tó-toē.
Ki-tok-tô͘ kóng, Goá chin-chiàⁿ chhut-sı̀ tı̄ lí ê kok, nā-sı̄ ho̍k-sāi lí chin kan-khó͘, koh kang-chı̂ⁿ bô kàu thang iúⁿ-chhı̄ sı̀ⁿ-miā, in-ūi ho̍k-sāi lí ê sū sı̄ choē-ok ê sū, pò-èng tek-khak sí; só͘-í goá kàu tióng-sêng, chiū o̍h tı̀-hūi ê khoán-sit, sı̀-koè chhē khoàⁿ ū pa̍t-tiâu-lō͘ thang ke-thiⁿ ka-kı̄ ê lı̄-ek á-bô.
A-pho-lûn kóng, Choè ông--ê éng-éng m̄ kam-goān i ê peh-sı̀ⁿ ka-kı̄ lı̄-khui, án-ni goá toàn-toàn m̄ pàng lí khı̀, lí nā hiâm ho̍k-sāi goá kan-khó͘, kang-chı̂ⁿ chió, tio̍h thiaⁿ goá só͘ khǹg tò-tńg--khı̀, goá ê kok só͘ ū ê mı̍h chiū hō͘ lí kàu kè-ı̀.
Ki-tok-tô͘ kóng, Goá í-keng ín beh ho̍k-sāi pa̍t ê Chú, chiū-sı̄ bān ông ê Chú, taⁿ thái-thó oē tit-thang poē-poān i lâi tè lí?
A-pho-lûn kóng, Lí kiâⁿ án-ni chhin-chhiūⁿ sio̍k-gú ū kóng, ‘Î chng soá chio̍h’. Lâng ka-kı̄ hâng-ho̍k chit-ê Chú bô loā-kú, àm-chı̄ⁿ poē-poān koh kui tı̄ goá, che sı̄ pêng-siông ê tāi-chı̀, lí nā án-ni ia̍h bô siong-hāi.
Ki-tok-tô͘ kóng, Goá kap chit-ê Chú lı̍p-iok chiù-choā beh chı̄n-tiong, taⁿ nā poē-poān chiū boē bián-tit hoán-poān ê hêng-hoa̍t.
A-pho-lûn kóng, Nā-sı̄ án-ni, lí cháiⁿ-iūⁿ tāi-seng poē-poān goá? Taⁿ lí nā kam-goān tè goá tò-tńg--khı̀, goá chiū pàng lí soah.
Ki-tok-tô͘ kóng, Goá tāi-seng ín ho̍k-sāi lí, chiū-sı̄ siàu-liân ê sı̂ lām-sám ê só͘ kiâⁿ, taⁿ goá só͘ ho̍k-sāi--ê, chiū-sı̄ choân-lêng ê Chú, i oē pàng goá; koh goá hiahN-sı̂ tè lí kiâⁿ pháiⁿ, Chú ia̍h oē lóng-chóng sià-bián. Hāi sı̀ⁿ-miā ê A-pho-lûn--ah, goá sı̍t-chāi kā lí kóng, ho̍k-sāi goá ê Chú, tit-tio̍h i ê kang-chı̂ⁿ, kau-poê i ê lô͘-po̍k, thàn i ê kok-hoat, tiâu-kı̀ⁿ i ê bı̄n, khiā-khí tı̄ i ê toē, chiah-ê tāi-chı̀ lóng-chóng khah hó lí ê; só͘-í lí m̄-sái koh kóng, goá chiū sı̄ Chú ê lô͘-po̍k, koat-toàn beh tè i.
A-pho-lûn kóng, Lí kiâⁿ chit tiâu lō͘, oē tú-tio̍h sı̄m-mı̍h ê chai-lān, eng-kai liōng-chá siūⁿ. Che Chú ê lô͘-châi, in-ūi tek-choē goá, hoān-tio̍h goá ê hoat-tō͘, chiū toā poàⁿ bô siān-chiong, choē-choē lêng-jio̍k sí, lí kiám m̄-chai? Lí beh thái oē phah-sǹg ho̍k-sāi i sı̄ khah hó ho̍k-sāi goá? I khiā-khí tı̄ hn̄g-hn̄g, bē bat lâi kiù i ê lô͘-châi, thoat-lı̄ goá ê chhiú; nā-sı̄ lâng chı̄n-tiong ho̍k-sāi goá, kiám-chhái hō͘ i kap i ê lô͘-châi só͘ lia̍h, chiū goá ta̍uh-ta̍uh chı̄n khùi-la̍t, chı̄n kè-bô͘ kiù--i, che sı̄ thong sè-kan só͘ chai; goá án-ni ia̍h beh kiù lí.
Ki-tok-tô͘ kóng, Chú bô liâm-piⁿ kiù i ê lô͘-po̍k, ı̀-sù sı̄ beh chhı̀-khoàⁿ in ū kèng-ài ê sim, kàu lō͘-bé chı̄n-tiong á-bô; koh lūn kàu bô siān-chiong, i ê lô͘-po̍k chiū lia̍h choè êng-kng ê tāi-chı̀, in-ūi in só͘ toā ǹg-bāng--ê, m̄-sı̄ ba̍k-chiu chêng ê kiù, sı̄ āu-lâi ê hok-khı̀, án-ni teh thèng-hāu, Chú hián-bêng i ê êng-kng kap i ê thiⁿ-sài lâi, i ê lô͘-po̍k tek-khak tit-tio̍h êng-kng.
