Ki-tok-tô͘ chiū kóng, Lí kap chit-ê lāu lâng soah-bé cháiⁿ-iūⁿ?
Chı̄n-tiong kóng, Goá thiaⁿ-kı̀ⁿ i ê oē chhin-chhiūⁿ hó, khí-thâu siūⁿ ài beh kap i khı̀. Kap i chē kóng oē, liâm-piⁿ khoàⁿ i ê thâu-hia̍h ū chhiah jı̄ kóng, ‘Lâng chiàu hit-ê kū ê sim-sèng, kap kū ê khoán-sit lóng tio̍h pàng hiat-ka̍k.’
Ki-tok-tô͘ kóng, iáu--ê cháiⁿ-iūⁿ?
Chı̄n-tiong kóng, Hit-tia̍p goá liâm-piⁿ oē-hiáu-tit, chin-tiuⁿ chai i ê oē khiok tiⁿ, nā-sı̄ goá kap i tò-khı̀, chiū tek-khak hō͘ i boē khı̀ choè lô͘-po̍k.Goá chiah kā i bo̍h-tit kóng, goá lóng m̄-káⁿ lı̂-lı̂-á hoa̍h kàu i ê hō͘-tēng-kha. Tùi hit-tia̍p, lāu lâng mē goá, kóng beh chhe chı̍t lâng jip goá, hō͘ goá oh kiâⁿ lō͘. Hit-tia̍p goá tú-tú khí-sin beh khı̀, chai-kiò chit ê lāu-lâng, chhut-la̍t lâi lia̍h goá, khiú goá kap i khı̀.Goá thong seng-khu ê kut kap bah chhin-chhiūⁿ hō͘ i khiú-khı̀; goá chin-chiàⁿ thàng-thiàⁿ, toā siaⁿ kiò kóng, ‘Chin kan-khó͘ sı̄ goá’. Tùi hit-tia̍p goá chiah peh-chiūⁿ soaⁿ, peh bē chı̍t-poàⁿ, goá oa̍t-kè-lâi khoàⁿ, khoàⁿ-kı̀ⁿ chı̍t-lâng teh jip goá kín kàu ná hong--nih. Goá boē kham-tit i jip, kàu hit-ê soaⁿ-téng khioh khit i jip--tio̍h.
Ki-tok-tô͘ chiū kóng, Goá bô koan-sim, chhı̀n-chhní lâi chē teh hioh-khùn chiū-sı̄ hia, hit-tia̍p goá heng-chêng ū chı̍t-pún pı̂n-kù ê chheh bô tiuⁿ-tı̂ lak--khı̀.
Chı̄n-tiong kóng, Lí bān-chiah kóng, thèng-hāu goá kóng soah chiah kóng. Cheh lâng jip--tio̍h goá iáu-bē kap goá kóng poàⁿ kù phah--goá, hō͘ goá tó hí toē--nı̍h hiám-hiám sí. Kàu lio̍h-á cheng-sı̂n, mn̄g i phah goá siáⁿ-sū? I kóng, goá sı̄ kiò lí thàn Chêng ê A-tong. Hit-tia̍p i lóng bô-hun bô-hē, chiū koh phah goá ê heng-khám, hō͘ goá hiòng thian tó-teh, chiàu chêng hiám-hiám sí chı̍t-poàⁿ. Goá lı̂-á koh cheng-sı̂n, chiū toā siaⁿ kiò i khó-lı̂n. Kóng liáu chiū koh phah goá tó hí toē--nı̍h, nā m̄-sı̄ chı̍t-lâng tú-tú tùi hia kè, lâi kà i m̄-thang, tek-khak hō͘ i phah-sí. Ki-tok-tô͘ kóng, Kah i m̄-thang sı̄ chı̄-chiū? Chı̄n-tiong kóng, Goá tāi-seng m̄-bat--i; kàu i beh khı̀, goá khoàⁿ-kı̀ⁿ i ê chhiú-tiong-sim ū teng-jiah; chiah chai I sı̄ lán ê Chú. Goá chiū khí-lâi chiūⁿ soaⁿ.
Ki-tok-tô͘ kóng, Jip lí, chiū-sı̄ Mô͘-se. I ê khoán-sit lâng nā hoān-tio̍h i ê hoat-tō͘, lóng bô beh khó-lı̂n.
Chı̄n-tiong kóng, Án-hiaⁿ, lí kóng chin-chiàⁿ tio̍h. Goá chêng ia̍h bat tú-tio̍h Mô͘-se. Goá tı̄ ke-lāi teh khiā, ún-tàng bô kiaⁿ, ū chı̍t-lâng lâi kóng, goá nā-sı̄ iû-goân khiā hia, i tek-khak beh hō͘ goá kap chhù lóng-chóng khit hé sio-lio-khı̀; cheh lâng chiū-sı̄ Mô͘-se.
Ki-tok-tô͘ kóng, Lí tı̄ soaⁿ-piⁿ tú-tio̍h Mô͘-se, soaⁿ-téng ū chı̍t-keng chhù, hit-tia̍p lí ū khoàⁿ-kı̀ⁿ á-bô?
Chı̄n-tiong kóng, Ū; bē kàu hit keng, khoàⁿ-kı̀ⁿ ū nn̄g chiah sai; in lóng bô lâi kiáu-chhá goá. Hit-tia̍p tú-tú jı̍t-tàu; iok-lio̍k sai hit-tia̍p tek-khak teh khùn. Goá khoàⁿ-kı̀ⁿ jı̍t iáu-bē àm, ū tùi chhù-chêng tı̍t-tı̍t lo̍h soaⁿ.
Ki-tok-tô͘ kóng, hit-ê kò͘ mn̂g--ê khoàⁿ-kı̀ⁿ lí tùi hia kè, ū kā goá kóng, goá chin ài lí jip khı̀, lí nā jı̍p khı̀, i beh ēng lāi-bı̄n chiah-ê pó-poè kı̂-koài ê mı̍h hō͘ lí khoàⁿ, hō͘ lí chı̍t-sı̀-lâng tiāⁿ-tiāⁿ kı̀-tit. Lí tı̄ Ku-khiam ê soaⁿ-kha hit-tia̍p tú-tio̍h siáⁿ lâng?
Chı̄n-tiong kóng, Tú-tio̍h chı̍t-lâng miâ kiò Lân-chiok, ài goá kap i tò--khı̀; kóng chit soaⁿ-kha put-chí hā-chiān ê só͘-chāi. Koh kóng goá nā kiâⁿ cheh soaⁿ-kha sı̄ bô sūn Kiau-ngō͘, Chū-ko, Sè-êng, kap lán lóng-chóng pêng-iú ê ı̀-sù, sı̄ goá chin-chiàⁿ ka-kı̄ lia̍h choè sió-khoá lâng, kam-goān lâi kiâⁿ chit-ê soaⁿ-kha, chiah-ê lâng tek-khak toā-lı̂m m̄ hoaⁿ-hí.
Ki-tok-tô͘ kóng, Án-hiaⁿ, lí ēng sím-mı̍h oē ı̀n i?
Chı̄n-tiong kóng, Goá ı̀n--i kóng, lí só͘ kóng chiah-ê lâng, sı̍t-chāi sı̄ goá kut-jio̍k ê chı̀-chhin. Tùi goá kiâⁿ lō͘ hit-tia̍p, in chiū m̄-jı̄n goá, goá ia̍h kū-choa̍t in; taⁿ kap goá lóng bô chhin-jia̍t, mih-sái kiû in hoaⁿ-hí? Goá koh kóng, lí kóng cheh soaⁿ-kha put-chí hā-chiān, bô tek-khak ū-iáⁿ. ‘Tāi-seng nā-sı̄ oē khiam-pi, āu-lâi tek-khak chun-kùi, nā-sı̄ ka-kı̄ kiau-ngō͘, āu-lâi tek-khak chhia-tó.’ Goá chiah kam-goān kè chit-ê soaⁿ-kha, ài tit-tio̍h tı̀-sek ê lâng só͘ tùi-tiōng ê chun-kùi, m̄ ài kiû lí ê khang-khang hó khoàⁿ.
Ki-tok-tô͘ kóng, Cheh soaⁿ-kha lí koh tú-tio̍h sím-mı̍h mah?
Chı̄n-tiong kóng, Ū; tú-tio̍h chı̍t-lâng miâ kiò Ùi-thí . Goá lō͘--nı̍h tú-tio̍h, lóng bô chı̍t-lâng chhin-chhiūⁿ--i, chiah-nih bô kiaⁿ kiàn-siàu, i ê miâ sǹg sı̄ bô ha̍p. Goá tùi pa̍t lâng nā ēng tō-lí lâi at-chí, i liâm-piⁿ chiū chēng-chēng, m̄-káⁿ kóng; chí-ū chit-ê Ùi-thí lóng m̄-chai kiàn-siàu; goá m̄ thiaⁿ--i, i iû-goân chia̍p-chia̍p kóng, lóng m̄ soah.
Ki-tok-tô͘ kóng, I kóng cháiⁿ-iūⁿ?
Chı̄n-tiong kóng, I kóng kèng Siōng-tè, che sı̄ m̄ hó; ho̍k-sāi Siōng-tè, che sı̄ m̄ tio̍h. Koh kóng, pài Siōng-tè éng-éng khǹg lâng choè hó, che sı̄ chhàu-chiān bô châi-tiāu; koh kóng só͘ kóng só͘ kiâⁿ lóng soè-jı̄, m̄-káⁿ chhun kha-chhiú, che sı̄ bô táⁿ koah hō͘ lâng chhiò; koh kóng, tùi chāi-chá kàu taⁿ, sè-kan ū sè-thâu hó-gia̍h, tı̀-sek, chiah-ê hán-tit ū thàn cheh tō-lí, chiông-tiong nā kiám-chhái ū chit-hō lâng, tek-khak sı̄ tāi-seng hı̄-khang khin; thiaⁿ lâng kóng, kam-goān ka-kı̄ gōng, m̄-ài chí sè-kan ê mı̍h khı̀ kiû bô lâng khoàⁿ-kı̀ⁿ ê tāi-chı̀; koh kóng, ta̍k-tāi kiâⁿ thiⁿ-lō͘, lóng sı̄ hā-chiān chho͘-sio̍k boē hiáu-tit kàu-khàm; koh kóng kúi-nā hāng ê tāi-chı̀, goá ài beh kóng--i, ia̍h boē liáu. Taⁿ iok-lio̍k lâi kóng--i, chiū-sı̄ lâng thiaⁿ tō-lí, ū-ê ka-kı̄ thó͘-khùi, ka-kı̄ hoán-hoé, i kóng che sı̄ thang kiàn-siàu; tò--khı̀ koh ka-kı̄ hoân-ló, ka-kı̄ oàn-hūn, i kóng che ia̍h sı̄ thang kiàn-siàu; lio̍h-lio̍h-á tek-choē tio̍h chhù-piⁿ thâu-bé, liâm-piⁿ ka-kı̄ jı̄n kiò i m̄-tio̍h, i kóng che ia̍h sı̄ thang kiàn-siàu; àm-chı̄ⁿ tit-tio̍h bô kong-tō ê chı̂ⁿ kong-hêng lâi hêng lâng, i kóng che ia̍h sı̄ thang kiàn-siàu; koh kóng, lâng nā thàn cheh tō-lí khoàⁿ hó-gia̍h kùi-khı̀ nā lı̂-lı̂-á m̄-tio̍h, chiū m̄ kap i kau-poê, khoàⁿ chı̍t-ê sòng-hiong hā-chiān--ê, nā ū láu-sı̍t tiong-hō͘, tek-khak kèng--i, thiàⁿ--i; i kóng che kám m̄-sı̄ thang kiàn-siàu mah?
Ki-tok-tô͘ kóng, Án-hiaⁿ, lí hit-tia̍p ēng sím-mı̍h oē ı̀n--i?
Chı̄n-tiong kóng, Khí-thâu goá boē-hiáu ı̀n--i; koh hō͘ i pek goá, hō͘ goá âng-bı̄n, hiám-hiám kóng boē iâⁿ--i, goá chiah siūⁿ Sèng-chheh ū kóng, ‘Lâng tùi-tiōng--ê, chiū-sı̄ Siōng-tè oàn-hūn--ê.’ Koh siūⁿ Ùi-thí ê oē sı̄ thàn sè-kan lâng ê ı̀-sù, m̄-sı̄ thàn Siōng-tè; koh siūⁿ kàu lō͘-bé jı̍t, Siōng-tè sím-mn̄g chèng lâng, ū-ê tio̍h hō͘ i oa̍h, ū-ê tio̍h hō͘ i sí, lóng m̄-sı̄ thàn lâng ê ı̀-sù, tek-khak sı̄ chhut-chāi Siōng-tè chú-ı̀, goá chiah siūⁿ kóng, Siōng-tè ê tō-lí chin tio̍h, thong sè-kan nā hiâm--i, thàn i ia̍h sı̄ tio̍h. Kiû thiⁿ-kok, lâng khoàⁿ i sı̄ gōng, i sı̍t-chāi sı̄ ū tı̀-sek. Koh kóng, sòng-hiong lâng kèng Iâ-so͘, sı̄ khah-iâⁿ hit-ê pù-lâng m̄ kèng Iâ-so͘; goá siūⁿ kàu chia, chiū kóng, Ùi-thí, lí tio̍h kín-kín thè-khı̀; lí sı̄ goá ê tùi-te̍k, hō͘ goá boē tit-tio̍h kiù, goá kám tio̍h poē goá ê Kiù-chú lâi thiaⁿ lí mah? Kiù-Chú koh lâi, goá beh siáⁿ bı̄n lâi kı̀ⁿ--i? Chit-tia̍p nā-sı̄ lia̍h i ê tō-lí choè kiàn-siàu, koh m̄-tı̍h i ê peh-sı̀ⁿ, thái-thó thang ǹg-bāng i ê hok-khı̀? Chit-ê Ùi-thí sı̍t-chāi m̄-chai kiàn-siàu; koáⁿ--i, iáu m̄ khı̀, ta̍uh-ta̍uh lâi tı̂ⁿ goá, siông-siông oá hı̄-khang soè siaⁿ lâi kā goá kóng, kóng thàn Siōng-tè ê tō-lí sı̄ choē-choē hāng thang kiàn-siàu. Goá ū kā i kóng, Lí nā Koh kóng, sı̄ khang-khang bô lō͘-ēng; lí lia̍h choè kiàn-siàu, goá lia̍h choè thé-biān. Ùi-thí chiū khı̀, goá chiah koh kiâⁿ. Hit-sı̂ ū gı̂m si kóng,
Thiⁿ-pē Siōng-tè chin-chiàⁿ hó;
Lán kiâⁿ thiⁿ-lō͘ bián hoân-ló,
Khó-lı̂n thiàⁿ-thàng I lóng ū,
Tiàu lán beh khı̀ chò khı̀-khū,
Mô͘-kúi chûn-sim chı̄n lı̄-hāi,
Ta̍k hāng kè-bô͘ sı̄ pháiⁿ tāi;
Ū ēng sek-io̍k lâi bê-he̍k,
Ài lán sı̂n-hûn lo̍h tē-ge̍k.
Kiù-chú Iâ-so͘ ū tı̀-sek,
Chı̍t lō͘ kap i choè tùi-te̍k;
Mô͘-kúi chai-kiò pok boē iâⁿ,
I thiaⁿ chiū cháu, lán koh kiâⁿ.
Ki-tok-tô͘ kóng, Án-hiaⁿ lí oē chhut-la̍t at-chí cheh bô hē-lo̍h ê lâng, goá put-chí hoaⁿ-hí. Lí kóng i m̄-chai kiàn-siàu chin-chiàⁿ sı̄ tio̍h. Khoàⁿ-kı̀ⁿ i hó-táⁿ ta̍uh-ta̍uh lâi tı̂ⁿ--lán, ài hō͘ lâng chhiò--lán, khoàⁿ m̄ chiūⁿ ba̍k--lán, che bêng-bêng sı̄ m̄-chai kiàn-siàu. Ū chit-hō Ùi-thí, lán tio̍h chhut-la̍t lâi tû-khı̀, sı̄ Chú bat kóng, “Kı̀ⁿ ū lia̍h goá kap goá ê tō-lí choè kiàn-siàu, Jı̂n-chú ēng ka-kı̄ chham Pē kap sèng ê chhe-sài, nā kàu ia̍h tek-khak hō͘ hit lâng kiàn-siàu.”
Chı̄n-tiong kóng, Lán lâng tı̄ sè-kan, Kiù-Chú chiū ài lán chhut-la̍t lâi kiâⁿ i ê tō-lí; taⁿ hō͘ Ùi-thí chó͘-tòng, tio̍h Kiù-chú lâi chān lán, hō͘ lán m̄ thàn--i.
Ki-tok-tô͘ kóng, Tio̍h; lí tı̄ Ku-khiam soaⁿ-kha iáu ū koh tú-tio̍h mah?
Chı̄n-tiong kóng, iáu bô; kai-chài chı̍t lō͘ ū chhut jı̍t hō͘ goá oē tit-thang kè cheh soaⁿ-kha, koh oē tit-thang kè Sí-ı̀m soaⁿ-kha.
Ki-tok-tô͘ kóng, Che sı̄ chin kai-chài. Nā-sı̄ goá só͘ tú-tio̍h--ê, toā-lı̂m cheng-chha. In-ūi goá jı̍p Ku-khiam soaⁿ-kha chiū tú-tio̍h pháiⁿ-kúi, miâ A-pho-lûn, kap goá saⁿ-thâi kú-kú, sè-bı̄n chı̄n-chāi hiám.Hit-tia̍p chhia goá tı̄ hoé--nı̍h, ēng toā-la̍t teh goá, beh hō͘ goá seng-khu teh kàu noā-kô͘-kô͘; goá chhiú--nı̍h ê kiàm soà lak-khı̀. I iā kóng toā-oē tek-khak beh hō͘ goá sí. Goá siūⁿ-kiò hit-tia̍p tio̍h sí--lah, chiah ‘kı̂-tó Siōng-tè, Siōng-tè ū thiaⁿ goá, hō͘ goá siám chit-ê kan-khó͘.’ Khah thêng jı̍p Sí-ı̀m soaⁿ-kha, lō͘ lóng o͘-àm, goá siūⁿ-kiò kúi-nā pái tio̍h sí. Kàu poàⁿ-lō͘ kai-chài thiⁿ kng, jı̍t-chhut kiâⁿ cheh lō͘ lı̂-lı̂-á pêng-an.
Goá bāng-kı̀ⁿ, chí nn̄g-lâng hit-tia̍p chı̀n-chêng teh kiâⁿ, Chı̄n-tiong khoàⁿ-kı̀ⁿ piⁿ-á chı̍t-lâng teh kiâⁿ, miâ Hò͘ⁿ-giân. Hit só͘-chāi lō͘ khah khoah, oē kham-tit kúi-nā lâng saⁿ-pâi kiâⁿ. Chit-lâng chin lò, bı̄n hn̄g-hn̄g khoàⁿ sı̄ hō͘-tiōng hó-khoàⁿ, kūn-oá chı̍t-ē khoàⁿ khiok bô. Hit-tia̍p Chı̄n-tiong mn̄g i kóng, Pêng-iú--ah, lí beh ta̍h-lo̍h khı̀? Sı̄ beh khı̀ thiⁿ-kok mah?
Hò͘ⁿ-giân chiū kóng, Goá sı̄ beh khı̀ hit-nı̍h.
Chı̄n-tiong kóng, Che chin hó, ū lí thang choè-phoāⁿ.
Hò͘ⁿ-giân kóng, Kap lí choè phoāⁿ, goá chin ài.
Chı̄n-tiong kóng, Nā-sı̄ án-ni, tio̍h lâi saⁿ-pâi kiâⁿ khah hó, thang kóng chèng-keng oē lâi kè-jı̍t.
Hò͘ⁿ-giân kóng, Kóng chèng-keng oē, put-koán sı̄ lí ia̍h sı̄ pa̍t-lâng, lóng hoaⁿ-hí kóng. Kai-chài lí ū sim beh kóng chèng-keng ê oē. Taⁿ goá kā lí kóng, lâng teh kiâⁿ-lō͘, lóng ài kóng chhiàu-tâm kap êng-á oē liáu-liáu. Goá khoàⁿ-kı̀ⁿ chin hoân-ló.
Chı̄n-tiong kóng, Che chin-chiàⁿ thang hoân-ló, nā-sı̄ lóng-chóng ta̍t tō-lí ê oē, iáu m̄ ta̍t-tio̍h Siōng-tè ê tō-lí.
Hò͘ⁿ-giân kóng, Lí kóng chin tio̍h, goá chin hoaⁿ-hí--lí. Siōng-tè ê tō-lí chin iú-ek thang toā-lı̂m hoaⁿ-hí. Put-koán sı̄ tāi-chı̀ ê lâi-le̍k, á-sı̄ ke̍k chhim ê tō-lí, kı̂-koài ê tāi-chı̀, sı̂n-jiah, koh-iūⁿ ê tiāu-thâu, lâng ài kóng, chit-hō chiū Sèng-chheh ū kı̀-chài, ia̍h ū kù-tāu thang khoàⁿ. Iáu ū sím-mı̍h chheh thang kap Sèng-chheh pí-phēng mah?
Chı̄n-tiong kóng, Chin-chiàⁿ tio̍h, chóng-sı̄ lán beh kóng tio̍h ū ı̀-sù koat-toàn beh tit-tio̍h lı̄-ek.
Hò͘ⁿ-giân kóng, Goá iā sı̄ án-ni, sı̄ kóng-kiò gı̄-lūn iú-ek ê tāi-chı̀, lâng nā án-ni saⁿ-kap kóng, tek-khak oē ná chai sè-kan ê hó khoàⁿ, thiⁿ-kok ê iú-ek, i ê tāi-chı̀ sı̄ án-ni. Nā beh ta̍k-hāng kóng, chai--kiò lâng tek-khak tio̍h têng-thâu-siⁿ, chiah oē tit thang jı̍p thiⁿ-kok; ia̍h chai--kiò lâng khò ka-kı̄ ê kong-lô m̄-sı̄ gı̄, tek-khak tio̍h khò Iâ-so͘ ê kong-lô chiah thang chheng gı̄. Iáu--ê, chiū-sı̄ hoán-hoé choē, sı̀n Kiù-chú, kı̂-tó, tng kan-khó͘.
Chı̄n-tiong kóng, Lí kóng ta̍k kù tio̍h; goá thiaⁿ-kı̀ⁿ che chin hoaⁿ-hí.
Hò͘ⁿ-giân kóng, Hāi! Khó͘-á! Lâng lóng bô saⁿ-kap gı̄-lūn chin tō-lí, chiah m̄-chai tio̍h sı̀n Iâ-so͘, koh m̄-chai sim-koaⁿ tio̍h hō͘ Sèng-sı̂n kám-hoà, chiah oē éng-éng oa̍h; lām-sám khò pún-sin ê kong-lô. Nā-sı̄ khò pún-sin ê kong-lô kàu bé beh jı̍p thiⁿ-kok chin-chiàⁿ boē.
Chı̄n-tiong kóng, Tek-choē heh! Chhiáⁿ thiaⁿ goá kóng chı̍t kù, lâng oē chai cheh tāi-chı̀ tek-khak tio̍h tit-tio̍h Sèng-sı̂n chí-sı̄--i, nā m̄-sı̄ án-ni, lâng chiū ná khûn-khûn tha̍k koà kàu-khàm lóng boē hiáu-tit.
Hò͘ⁿ-giân kóng, Lí kóng goá lóng chai, sı̄ Sèng-chheh ū kóng, “M̄-sı̄ thiⁿ hō͘ lán lâng bô thang siū--tio̍h.” Koh kóng, che lóng sı̄ Siōng-tè pe̍h-pe̍h ê un hō͘ lán, m̄-sı̄ tùi lâng ê kong-lô. Sèng-chheh kı̀ che chin choē, goá lóng oē ín.
Chı̄n-tiong kóng, Taⁿ lí goá ài saⁿ-kap kóng to̍h-lo̍h chı̍t-hāng thang sǹg choè tē-it iàu-kín?
Hò͘ⁿ-giân kóng, Chhut chāi lí kóng. Khoàⁿ lí sı̄ beh kóng thiⁿ, á-sı̄ kóng toē; sı̄ beh kóng iu̍t-hoat, á-sı̄ beh kóng hok-im; sı̄ beh kóng sèng ê tāi-chı̀, á-sı̄ beh kóng sè-sio̍k ê tāi-chı̀; sı̄ beh kóng kè liáu ê tāi-chı̀, á-sı̄ beh kóng bē lâi ê tāi-chı̀; sı̄ beh kóng goā-pang, á-sı̄ beh kóng pún-kok, lóng hó. Iàu-kín tio̍h iú-ek chiah thang.
Hit-tia̍p Chı̄n-tiong thiaⁿ-kı̀ⁿ cheh oē, i chiah cháu khı̀ kūn Ki-tok-tô͘, soè-siaⁿ kā i kóng, Che tâng-kiâⁿ ê lâng, siáⁿ-sū chiah gâu? Goá siūⁿ cheh lâng, tek-khak sı̄ gâu kiâⁿ thiⁿ-lō͘.
Ki-tok-tô͘ thiaⁿ-kı̀ⁿ cheh oē, bún-bún-á chhiò kóng, Án-hiaⁿ, lí hoaⁿ-hí cheh lâng, i ê oē sı̄ ha̍h lí ê sim. Boē hiáu-tit ê lâng choē-choē hō͘ i ê chhùi-súi koái--khı̀.
Chı̄n-tiong kóng, Án-hiaⁿ lí bat--i mah?
Ki-tok-tô͘ kóng, Thái-thó m̄-bat--i? Bat i kàu ū chhun.
Chı̄n-tiong kóng, HehN! Che sı̄ sím-mı̍h lâng?
Ki-tok-tô͘ kóng, Cheh lâng chiū-sı̄ Hò͘ⁿ-giân, kap lán siāng só͘-chāi. Án-hiaⁿ lí siáⁿ-sū m̄-bat--i? Á-sı̄ in-ūi siâⁿ chin toā, chiah m̄-bat i mah?
Chı̄n-tiong kóng, Che chı̄-chūi-á ê hāu-siⁿ, khiā to̍h-lo̍h?
Ki-tok-tô͘ kóng, Che sı̄ Lêng-giân ê kiáⁿ, tāi-seng khiā Phêng-lūn lí, lâng lóng bat--i; nā-sı̄ i ê chhùi chiū nā gâu kóng, kun-tit ia̍h sı̄ gōng-lâng.
Chı̄n-tiong kóng, Goá khoàⁿ i ê bı̄n, khiok hó-khoàⁿ.
Ki-tok-tô͘ kóng, Boē hiáu-tit ê lâng, khoàⁿ-liáu chiū-sı̄ án-ni, chóng-sı̄ cheh lâng goā-phê khiok oē khoàⁿ-tit, lāi-bı̄n chin pháiⁿ; chhin-chhiūⁿ ūi, hn̄g-hn̄g khoàⁿ chám-jiân oē khoàⁿ-tit, chı̍t-ē kūn khoàⁿ-liáu lóng bô kio̍k.
Chı̄n-tiong kóng, Tú-tú khoàⁿ-kı̀ⁿ Án-hiaⁿ lí bún-bún-á chhiò, goá lia̍h-choè sı̄ kún-chhiò.
Ki-tok-tô͘ kóng, Bô, goá án-ni kóng, lóng m̄-sı̄ kún-chhiò, ia̍h m̄-sı̄ lām-sám ka-kı̄ teh liōng-iok lâng. Beh chai i ê siông-sè, thang thiaⁿ goá koh kóng. Chí lâng put-koán kau sím-mı̍h lâng; kóng sím-mı̍h tāi-chı̀, lóng oē choè-tit. Lūn chia̍h-chiú ê lâng, i ia̍h oē hiáu kap i kóng, chia̍h-chiú ná choē ná hèng-kóng. I ê sim kap ke-lāi lóng bô kèng-pài Siōng-tè, chheng-chheng ēng chı̍t-ki chhùi kèng-pài tiāⁿ-tiāⁿ.
Chı̄n-tiong kóng, Nā án-ni, goá hō͘ chit-ê lâng moâ--khı̀.
Ki-tok-tô͘ kóng, Án-hiaⁿ, i chin-chiàⁿ m̄-tio̍h; lí tio̍h siūⁿ kàu Siōng-tè ê kok, m̄-sı̄ chheng-chheng ēng chhùi kóng, sı̄ tio̍h sı̍t-sim kiâⁿ. Cheh lâng chiū nā oē kóng kàu kı̂-tó, hoán-hoé choē, sı̀n Kiù-chú, têng-thâu-siⁿ, i put-kò sı̄ ēng khang-khang ê oē lâi kóng nā-tiāⁿ. Goá bat kàu in tau soè-jı̄ khoàⁿ i lāi-goā kiâⁿ sím-mı̍h kha-pang. Goá kóng sı̍t-chāi bô cheng-chha; lūn kı̂-tó, hoán-hoé choē, kèng-pài Siōng-tè, i ê ke lóng bô che: cheh lâng ho̍k-sāi Siōng-tè chin-chiàⁿ m̄-ta̍t-tio̍h khı̂m-siù, i sı̍t-chāi sı̄ ū lâ-sâm, bak-tio̍h sèng ê tō-lí, hō͘ chhù-piⁿ hiuⁿ-lí lóng húi-pòng cheh tō-lí. kı̀ⁿ-ū bat i ê lâng lóng kóng i ê goā-phê sı̄ choè sèng ê ha̍k-seng, lāi-bı̄n sı̄ choè mô͘-kúi: chiū i ke-lāi ê lâng ia̍h lóng chai. I koh khek-po̍k pō͘-jio̍k ē-kha-chhiú lâng, éng-éng ēng bô chêng-lí khoán-thāi--i; bô siáⁿ-sū siū-khı̀ koh mē--i, hō͘ ē-kha-chhiú lâng beh kap i kóng-oē, lóng boē-hiáu cháiⁿ-iūⁿ kóng, chiah hō͘ i hoaⁿ-hí, Koh kap i kau-koan, hiah-ê lóng-chóng kóng kap chit-hō lâng kau-koan m̄ ta̍t-tio̍h kap m̄-sı̀n tō-lí ê lâng khah hó; sı̄ Hò͘ⁿ-giân hoân-sū lóng bô chiàu kong-tō, tú-tio̍h oē thun-tit, oē phiàn-tit, chiū sūn-soà khı̀ thun-phiàn: m̄-nā án-ni-siⁿ, iáu ū kà i ê kiáⁿ o̍h i ê khoán. I ê kiáⁿ nā ū sūn-liông chèng-tı̍t, liâm-piⁿ chiū mē i gōng, chhin-chhiūⁿ toā tiâu han-chû, bô beh ēng tāi-chı̀ hō͘ i pān; tùi lâng ia̍h m̄ o-ló--i. Goá siūⁿ kàu chit-ê lâng ê pháiⁿ kàu án-ni-siⁿ sı̄ oē hāi choē-choē lâng. Nā m̄-sı̄ Siōng-tè iok-sok--i, tek-khak ná oē hāi lâng.
Chı̄n-tiong kóng, Án-hiaⁿ, lí án-ni kóng, goá sı̍t-chāi tio̍h sı̀n, sı̄ lí chêng bat--i, koh sı̄ Ki-tok ê ha̍k-seng, tek-khak m̄-sı̄ lām-sám ka-kı̄ liōng-iok i ê khoán-sit sı̄ án-ni, ia̍h m̄-sı̄ kap i pháiⁿ chiah lâi chhı̀n-chhái kóng--i.
Ki-tok-tô͘ kóng, Lí án-ni kóng ia̍h tio̍h, chóng-sı̄ goá kiám-chhái chhin-chhiūⁿ lí m̄-bat chit-ê lâng, ia̍h-sı̄ thiaⁿ-kı̀ⁿ bô sı̀n tō-lí ê lâi kóng--i, goá ia̍h chám-jiân gı̂ in sı̄ teh húi-pòng. Pháiⁿ lâng éng-éng ài húi-pòng sı̀n tō-lí chiah-ê lâng; nā-sı̄ goá kóng, lóng sı̄ pún-sin chin-tiuⁿ chai. Iáu ū chı̍t-hāng thang hō͘ lán gı̂--i, chiū-sı̄ hó lâng lia̍h chit-ê lâng choè kiàn-siàu, bô beh kap i choè pêng-iú.
Chı̄n-tiong kóng, Tùi án-ni khoàⁿ kı̀ⁿ-lâi, chiah chai kóng kap kiâⁿ ū nn̄g hō, iàu-kín tio̍h hun-pia̍t.
Ki-tok-tô͘ kóng, Tio̍h, sı̄ kóng nā bô kiâⁿ i ê oē sı̄ khang-khang. Chhin-chhiūⁿ seng-khu nā bô sı̂n-hûn, chiū-sı̄ sí ê seng-khu. Kóng khí--lâi kèng-pài Siōng-tè tàu-tí tio̍h sı̍t-sı̍t khı̀ kiâⁿ. Sèng-chheh ū kóng, “Tùi kan-khó͘ ê sı̂-chūn chiàu-kò͘ ko͘-toaⁿ chiú-koáⁿ, tiàm sè-kan ka-kı̄ chiàu-kò͘ bô lâ-sâm-sia̍h, che chin-chiàⁿ sı̄ sêng-sı̍t kèng-pài; tùi Pē Siōng-tè ê bı̄n-chêng lóng bû lı̂-lı̂-á kiaⁿ-hiâⁿ.” Hò͘ⁿ-giân lóng m̄-chai che; i siūⁿ sèng ê tō-lí nā sái hı̄-khang thiaⁿ-kı̀ⁿ, chhùi kóng chiū oē choè Ki-tok hó ê ha̍k-seng, che lóng sı̄ ka-kı̄ phiàn. Lâng thiaⁿ tō-lí chhin-chhiūⁿ iā chéng-chí, oē ēng chhùi thoân tō-lí, chin-chiàⁿ bô kàu-gia̍h thang kan-chèng i sim-lāi ū sı̀n tō-lí. Kàu sím-mn̄g hit jı̍t ta̍k-ê chiàu i ê só͘ kiâⁿ kiat-àn. Hit jı̍t Siōng-tè m̄-nā mn̄g lán ū sı̀n á-bô, soà mn̄g lán ū kiâⁿ bô, chiah ū kiat-àn. Sè-kan soah-bé pí-phēng chhin-chhiūⁿ siu-sêng hit-tia̍p, gō͘-kak tùi-tiōng tio̍h oē kiat-chí, che sı̄ lí lóng chai. Tùi chia khoàⁿ-kı̀ⁿ--lâi, Hò͘ⁿ-giân lām-sám kóng sèng ê ha̍k-seng, kàu soah bé-jı̍t tek-khak hō͘ Chú m̄-tı̍h.
