Sı̀-kim kóng, Lí kóng ê ı̀-sù goá lóng bêng-pe̍k. Chhiáⁿ chiah-ê hiaⁿ-tı̄ thiaⁿ goá koé-bêng. Tāi-seng goá beh kóng bo̍k-su. Phı̀-lūn ū chı̍t-ê bo̍k-su choè lâng chin hó, thàn chı̂ⁿ chin chió, khoàⁿ-kı̀ⁿ pa̍t só͘-chāi ū chı̍t-ê thâu-lō͘ chin hó thàn. Hit-tia̍p i ia̍h ū ki-hoē thang khı̀ toà, cháiⁿ-iūⁿ chiah thang khı̀ toà? Chiah tio̍h pí chêng koh-khah khûn-khûn kàu-khàm tō-lí, soà tio̍h koh-khah chia̍p-chia̍p khı̀ kóng tō-lí, iū i só͘ kóng ê tō-lí tio̍h ha̍h chiah-ê kàu-lāi ê lâng ê só͘ ài, hō͘ in lâi chhiáⁿ, i nā oē chiàu che kiâⁿ, goá ia̍h kóng-kiò i sı̄ sêng-sı̍t. Che sı̄ cháiⁿ-iūⁿ? Chiah ài-tit ū khah hó ê thâu-lō͘, ū sím-mı̍h m̄-thang, iū sı̄ Siōng-tè siúⁿ-sù--i, m̄-sı̄ i lām-sám khı̀ kiû lâng ê, ū sím-mı̍h thang hiâm? I chiū nā ū chı̍t-ê thâu-lō͘ ia̍h sı̄ thang.
Koh chı̍t-hāng, i ài tit-tio̍h chit-ê thâu-lō͘, liâm-piⁿ ná káng-kiù tō-lí, ná khûn-khûn thoân tō-lí, iū-koh bô chip ka-kı̄ ê phiah, oē ha̍h kàu-hoē ê ı̀-sù, che sı̄ i ê phín-hēng ta̍k jı̍t ná ū chı̀n-pō͘, chiū ná chiong sió-khoá ê thâu-lō͘, oāⁿ toā thâu-lō͘, kám thang kóng-kiò i tham. Che chiū-sı̄ khûn-kín i ê tāi-chı̀, hō͘ i ê châi-tiāu it-hoat kiàn-tiông, thang ǹg-bāng pa̍t jı̍t ū khah hó ê ki-hoē thang pò-iông Siōng-tè ê tō-lí, chiū-sı̄ án-ni.
Taⁿ beh kóng hit-ê seng-lí lâng, kiám-chhái i ê seng-lí bô sím-mı̍h ka-ia̍h, nā oē khûn-khûn thàn tō-lí, ū-sı̂ oē tit-tio̍h choē-choē chú-kò͘ thang kau-koan, ū-sı̂ oē chhoā-tio̍h hó-gia̍h ê bó͘, tùi án-ni khoàⁿ-kı̀ⁿ--lâi, ū sím-mı̍h m̄-hó? Chāi goá khoàⁿ che lóng sı̄ tio̍h. Cháiⁿ-iūⁿ-á? Sı̄ kóng-kiò thàn chin ê tō-lí ho̍k-sāi Siōng-tè, chin-chiàⁿ sı̄ hó. Koh chhoā-tio̍h hó-gia̍h ê bó͘, ū choē-choē ê chú-kò͘, kám sı̄ boē choè-tit mah? Tùi chia khoàⁿ-kı̀ⁿ--lâi, i oē tit-tio̍h hó-gia̍h ê bó͘, koah oē tit-tio̍h chú-kò͘, iū kiam oē thàn chı̂ⁿ, che lóng sı̄ tùi jia̍t-sim ho̍k-sāi Siōng-tè. Goá chiah kóng-kiò lâng pài Siōng-tè beh tit-tio̍h chí sè-kan ê lı̄-ek sı̄ put-chí thang.
Sı̀-kim án-ni kóng liáu, chèng-lâng kóng i ê oē sı̄ tio̍h, kóng-kiò chiàu án-ni kiâⁿ, chin-chiàⁿ sı̄ hó, koah ū lı̄-ek. Hit-tia̍p Ki-tok-tô͘, Hiân-bōng chı̀n-chêng teh kiâⁿ, sı̀ lâng liâm-piⁿ tâng-sim chı̍t-choê teh jip in, beh chiong che oē piān-tó chit nn̄g ê ha̍k-seng. Jip bē tio̍h, ū toā siaⁿ kiò in, nn̄g ê chiah thêng kha, thèng-hāu in lâi. Sı̀ lâng bē kàu nn̄g ê ha̍k-seng hit-tia̍p, tāi-ke ū chham-siông, khoàⁿ tio̍h sím-mı̍h lâng chhut-thâu kap in kóng. Siūⁿ-kiò Lı̄-tô͘ chêng ū kap i piān-pok, kah i kóng, sı̄ khah m̄ hó-sè, chiah beh hō͘ Sı̀-kim kap i kóng. Í-keng kàu, ū kap nn̄g ê ha̍k-seng kiâⁿ lé, Sı̀-kim chiah mn̄g i téng-bı̄n teh kóng ê tāi-chı̀, kah i tio̍h kóng, i teh siūⁿ kàu chit chân sı̄ cháiⁿ-iūⁿ.
Hit-tia̍p Ki-tok-tô͘ kóng, Chiàu án-ni kóng, chiū kóng kàu chiâⁿ-chheng-bān kù, chiū lio̍h-lio̍h-á chai sèng ê tō-lí ê lâng, ia̍h oē-hiáu piān-pok. Chiàu Sèng-chheh kóng, lâng ūi-tio̍h piáⁿ, hı̂, beh lâi tè Iâ-so͘, iáu-kú sı̄ toā lı̂m thang hiâm, bô kóng-kiò lâng chiong Kiù-chú pún-sin kap i ê tō-lí beh tit-tio̍h chí sè-kan ê lı̄-ek, kám m̄-sı̄ koh-khah khó-ò͘ⁿ. Lâng nā án-ni, chiū-sı̄ pài ngó͘-siōng ê lâng, ké hó ê lâng, siâ-kúi, âng-ı̂ hit-hō ê. Beh kóng pài ngó͘-siōng ê lâng, chêng Hap-boat, Sı̄-kiàm ı̀-sù ài beh tô͘-bô͘ Ngá-kok ê cha-bó͘-kiáⁿ kap i ê cheng-siⁿ, nā m̄-sı̄ niá koah-lé bô thang tit-tio̍h. In chiū kā i ê chong-cho̍k ê lâng kóng, ‘Lán chèng-lâng nā o̍h i ê koah-lé, chiū Ngá-kok ê ke-hé, cheng-siⁿ, lóng kui hō͘ lán.’ I kam-goān thàn Siōng-tè ê peh-sı̀ⁿ, lóng sı̄ beh tô͘-bô͘ i ê ke-hé, chiah ū án-ni. Beh kóng kàu hit-ê ké hó--ê, chiū-sı̄ Hoat-lı̄-sài lâng lóng sı̄ hit-ê khoán. Sı̄ in ài thun chiú-koáⁿ ê ke-hé, chiah ū ēng chia̍p-chia̍p kı̂-tó, lâi choè tô͘-bô͘ ê lō͘-ēng, nā-sı̄ i āu-lâi oē siū-tio̍h Siōng-tè tāng-tāng ê hêng-hoa̍t. Beh kóng kàu mô͘-kúi ê ha̍k-seng, chiū-sı̄ boē Iâ-so͘ ê Iû-tāi, i ia̍h sı̄ chit-hō khoán. I thàn Kiù-chú ài tit-tio̍h tē-á lāi ê gûn; nā-sı̄ chit lâng soah-bé ia̍h oē phah-bô, hō͘ Siōng-tè m̄-tı̍h.
Án-ni kóng, lín sı̄ oē chai goá ê ı̀-sù, nā-sı̄ lia̍h lín ê oē kóng-kiò sı̄ tio̍h, chiū-sı̄ o̍h chiah-ê pài ngó͘-siōng, ké hó, Mô͘-kúi ê ha̍k-seng, pa̍t jı̍t siū pò-èng, ia̍h tek-khak chhin-chhiūⁿ án-ni. Hit-tia̍p sı̀ lâng gông-ngia̍h, saⁿ-khoàⁿ, chēng-chēng teh khiā, bô oē thang ı̀n. Ki-tok-tô͘ kóng cheh oē, hit-tia̍p Hiân-bōng ia̍h kóng-kiò sı̄ tio̍h, chí sı̀ lâng it-hoat chēng-chēng bô oē. In chiah khiā ná m̄ an, ûn-ûn-á teh kiâⁿ, niū nn̄g ê ha̍k-seng tāi-seng khı̀.
Hit-tia̍p Ki-tok-tô͘ kā Hiân-bōng kóng, Cheh lâng kap goá piān-pok, siōng-chhiáⁿ tng boē tiâu, thái-thó oē tng-tit Siōng-tè ê sím-mn̄g?
Hit-tia̍p nn̄g ê ha̍k-seng chı̀n-chèng teh kiâⁿ, ū kàu chı̍t-ê pı̂ⁿ-tháⁿ, chin hó ê só͘-chāi, miâ kiò An-ia̍t. Nn̄g ê ha̍k-seng kiâⁿ chia chin hoaⁿ-hí, khó-sioh hit-ê só͘-chāi bô siáⁿ toā, chiah liâm-piⁿ kè-khı̀. Hit pêng ū chı̍t-ê soè soaⁿ, miâ kiò Châi-san , lāi-tiong ū chı̍t-ê kim-khàng. Tāi-seng tùi chia kè--ê, éng-éng kı̂-koài hit-ê soaⁿ, pàng hiat-ka̍k chèng-keng ê lō͘, khı̀ thàm-khoàⁿ--teh. Kiâⁿ oá hit-ê khòng-piⁿ, ē-toé thô͘ khang-khang khoah-khoah, liâm-piⁿ pang, lâng poa̍h sí hit--nı̍h. Ū-ê bô sí--ê ia̍h ū tio̍h-siong, chı̍t-sı̀-lâng boē hó.
Hit-tia̍p goá bāng-kı̀ⁿ lı̄ hit tiâu lō͘ bô siáⁿ hn̄g, ū chı̍t-lâng miâ kiò Tí-má, i ê khoán-sit put-chí hó khoàⁿ, khiā khí khòng-chêng éng-éng chio kiâⁿ thiⁿ-lō͘ ê lâng khı̀ khoàⁿ hit--nı̍h. Hit-tia̍p khoàⁿ-kı̀ⁿ nn̄g ê ha̍k-seng, chiū toā siaⁿ kiò in kóng, Lâi, ū chı̍t-hāng tāi-chı̀, chhiáⁿ lí khoàⁿ.
Ki-tok-tô͘ kóng, Ū sím-mı̍h tāi-chı̀ thang hō͘ goá pàng hiat-ka̍k chèng-keng lō͘ khı̀ khoàⁿ--ah.
Tí-má kóng, Chit--nı̍h ū chı̍t-ê kim-khàng, lāi-tiong ū lâng teh ku̍t kim, lí nā lâi chia, lı̂-á chhut-la̍t chiū oē toā pù.
Hiân-bōng kā Ki-tok-tô͘ kóng, Siáⁿ-sū m̄ khı̀ khoàⁿ--ah?
Ki-tok-tô͘ kóng, Goá tek-khak m̄ khı̀. Goá bat thiaⁿ-kı̀ⁿ chit--nı̍h ū choē-choē lâng sí. Koh tô͘-bô͘ châi--ê, éng-éng khit chı̂ⁿ-châi hāi, khioh boē-tit-thang kiâⁿ thiⁿ-lō͘. Liâm-piⁿ âu Tí-má kóng, Chit-nı̍h kám m̄-sı̄ hiám mah? Kám m̄-sı̄ choē-choē tòng lâng kiâⁿ thiⁿ-lō͘ mah?
Tí-má kóng, Chit nı̍h nā ka-kı̄ soè-jı̄, sı̍t-chāi sı̄ bô sím-mı̍h hiám. I ê oē khiok sı̄ án-ni kóng, nā-sı̄ i ê bı̄n-sek ū kiàn-siàu.
Ki-tok-tô͘ chiū kā Hiâm-bōng kóng, Goán chiū nā chı̍t-pō͘ ia̍h bô beh kiâⁿ khı̀ khoàⁿ, tio̍h tı̍t-tı̍t kiâⁿ chèng-keng lō͘.
Hiâm-bōng kóng, Goá siūⁿ-kiò Lı̄-tô͘ kàu chia, i nā chhiáⁿ--i, tek-khak khı̀ khoàⁿ.
Ki-tok-tô͘ kóng, Chin-chiàⁿ tio̍h, sı̄ i ê sim pún-jiân ǹg chia, i nā kàu chia, cha̍p-ê tek-khak sí káu-ê.
Hit-tia̍p Tí-má koh toā siaⁿ âu kóng, Lí siáⁿ-sū m̄ lâi khoàⁿ?
Ki-tok-tô͘ tı̍t-tı̍t hiâm i kóng, Lí taⁿ kiáu-chhá Chú ê chèng-tō, sı̄ kap Chú choè tùi-te̍k. Lí tāi-seng tùi-tiōng chí sè-kan, m̄-tı̍h chèng-keng lō͘, Chú taⁿ í-keng tēng lí ê choē. Siáⁿ-sū ín-iú goá, kah goá o̍h lí? Goá nā lio̍h-á lı̄ thiⁿ-lō͘, Chú tek-khak oē chai, goá pa̍t jı̍t khiā i ê bı̄n-chêng thái-thó bô kiàn-siàu?
Tí-má koh toā siaⁿ âu kóng, Goá ia̍h sı̄ lín ê lâng, nā thèng-hāu tia̍p-á-kú, beh kap lín tâng kiâⁿ.
Ki-tok-tô͘ kóng, Lí siáⁿ miâ? Goá tú-á teh kiò, kám m̄-sı̄ lí ê miâ mah?
Tí-má kóng, Tio̍h lah, goá chiū-sı̄ miâ Tí-má, sı̄ A-pek-lia̍p-hán ê hō͘-è.
Ki-tok-tô͘ kóng, Goá bat lí. Ki-khap-sián chiū-sı̄ lí ê chó͘, Iû-tāi chiū-sı̄ lí ê pē, lí sı̄ kiâⁿ in ê khoán. Lí ê pē boē Chú, í-keng sí, lí kám tio̍h khah khin ê hêng-hoa̍t? Goá nā kàu Chú ê bı̄n-chêng, tek-khak chiong lí ê só͘ choè kā i kóng. Nn̄g ê ha̍k-seng hit-tia̍p lı̄ i chı̀n-chêng kiâⁿ.
Bô joā kú, Lı̄-tô͘ chiah-ê ia̍h kiâⁿ oá Châi-san, hō͘ Tí-má chı̍t-ē kiò, liâm-piⁿ khı̀ oá--i. In chiah-ê kiám-chhái sı̄ poa̍h-lo̍h kim-khàng sí, kiám-chhái sı̄ jı̍p hí kim-khàng teh ku̍t kim, á kiám-chhái sı̄ hō͘ hit-ê kim-khàng ê to̍k-khı̀ chhèng--sí, goá bô tek-khak chai. Goá só͘ chai--ê, chí sı̀ lâng bô koh kiâⁿ thiⁿ-lō͘. Hit-tia̍p Ki-tok-tô͘ gı̂m-si kóng,
Lı̄-tô͘ Tí-má chin tham-châi,
Kóng tio̍h ū kim, in chiū lâi;
Taⁿ chai siū sí, ūi kim khí,
Sit-lo̍h thiⁿ-gia̍p bô poeh-sí.
Hit-tia̍p goá bāng-kı̀ⁿ nn̄g ê ha̍k-seng kàu pı̂ⁿ-iûⁿ goā, lō͘-piⁿ ū chı̍t-ki kó͘-chá ê thiāu, khoán-sit chin kı̂-koài. Nn̄g ê ha̍k-seng khoàⁿ-kı̀ⁿ, sim-lāi chám-jiân gông-ngia̍h, sı̄ siáⁿ-sū? Khoàⁿ-kı̀ⁿ chit ki thiāu sı̄ hū-jı̂n-lâng pı̀ⁿ--ê, nn̄g ê ha̍k-seng chiah khoàⁿ liáu koh-khoàⁿ. It-sı̂-kan boē hiáu-tit sím-mı̍h in-toaⁿ. Hit-tia̍p chù-sı̂n teh khoàⁿ, hiân-bōng ū khoàⁿ-kı̀ⁿ thiāu-thâu ū jı̄, lóng sı̄ chhin-chhiūⁿ chāi-chá siá-ê. I chhián-ha̍k, Ki-tok-tô͘ khah phok-ha̍k, liâm-piⁿ kiò i lâi khoàⁿ, mn̄g i khoàⁿ oē bat boē. Ki-tok-tô͘ chiū kia̍h thâu teh khoàⁿ, khoàⁿ khah siông-sè, chiah bat hit-ê jı̄, sı̄ siá “Tio̍h kı̀-tit Lô-tek ê bó͘.” Liâm-piⁿ chiū tha̍k hō͘ Hiân-bōng thiaⁿ, hit-tia̍p chiah kı̀-tit Lô-tek ê bó͘, tùi Só͘-to-má siâⁿ chhut-lâi, thâu-khak oa̍t-thâu kè-lâi khoàⁿ, chiū pı̀ⁿ choè iâm-thiāu. Chiah chai chit ki thiāu chiū-sı̄ i ê thiāu. Nn̄g-ê ha̍k-seng khoàⁿ-kı̀ⁿ che chin-chiàⁿ sı̄ kı̂-koài koah kiaⁿ, chiah ū saⁿ-kap kóng chí ē-toé ê tāi-chı̀.
Ki-tok-tô͘ kóng, Haih! Án-hiaⁿ--ah! Thâu-seng Tí-má ū chhiáⁿ goán khı̀ khoàⁿ Châi-san, taⁿ oē-tit-thang khoàⁿ-kı̀ⁿ che, chin-chiàⁿ sı̄ kı̍p-sı̂. Hit-tia̍p i chhiáⁿ goán khı̀, lí ê ı̀-sù lı̂-á ài khı̀, goán nā chiàu i chhiáⁿ chiū khı̀, Siōng-tè kiám-chhái oē hêng-hoa̍t goán, hō͘ āu-sin ê lâng khoàⁿ-iūⁿ, ū chhin-chhiūⁿ chit-ê hū-jı̂n-lâng, káⁿ ia̍h káⁿ--ah.
Hiân-bōng kóng, Goá tāi-seng ū lām-sám án-ni siūⁿ, taⁿ chin hoân-ló koh hoán-hoé. Nā-sı̄ Siōng-tè hit-tia̍p bô hêng-hoa̍t goá, chhin-chhiūⁿ Lô-tek ê bó͘, goá chin kı̂-koài, sı̄ kóng-kiò goá ê m̄-tio̍h kap Lô-tek ê bó͘ bô loā cheng-chha. I sı̄ oa̍t kè-khı̀ khoàⁿ, goá sı̄ ài tit khı̀ khoàⁿ. Taⁿ Siōng-tè khoan-iông goá, un chin-chiàⁿ toā. Sim-koaⁿ lām-sám siūⁿ che, goá tio̍h éng-éng kiàn-siàu.
Ki-tok-tô͘ kóng, Taⁿ khoàⁿ-kı̀ⁿ cheh thiāu, lán tio̍h soè-jı̄ siūⁿ, thang tı̂-hông āu-lâi. Lán m̄-thang siūⁿ--kiò chit-ê gûi-hiám kè liáu, sı̄ bô siong-kan, āu-lâi kú ia̍h ū gûi-hiám, kú tio̍h sı̍t-chāi soè-jı̄. Lô-tek ê bó͘ khiok ū cháu-chhut hit-ê siâⁿ, bô kap siâⁿ--nı̍h ê lâng lóng bia̍t-bô, āu-lâi ia̍h ū hō͘ Siōng-tè bia̍t--khı̀, seng-khu pı̀ⁿ choè thiāu.
Hiâm-bōng kóng, Tio̍h, chit-ê hū-jı̂n-lâng thang khoàⁿ-iūⁿ, chı̍t-hāng sı̄ kéng-kài lán bo̍h-tit o̍h i ê pháiⁿ; chı̍t-hāng sı̄ kà-sı̄ lâng, nā m̄ ēng che lâi khoàⁿ-iūⁿ, tek-khak oē tú-tio̍h sím-mı̍h chai-ē. Ū chhin-chhiūⁿ Ko-lat, Tāi-tan, A-pí-lân, kap tâng choē ê hoē-tiúⁿ, nn̄g-pah gō͘-cha̍p lâng, lóng-chóng hō͘ hit-ê toē lı̍h hām-lo̍h-khı̀, thang hō͘ Í-sek-lia̍t ê peh-sı̀ⁿ khoàⁿ-iūⁿ. Taⁿ Tí-má kap i tâng-phoāⁿ ê lâng, siáⁿ-sū koh tiàm chia kè-bô͘ chı̂ⁿ, choè i an-ún teh khiā, lóng m̄ kiaⁿ, che goá to boē hiáu-tit. Lô-tek ê bó͘ chiàu Sèng-chheh só͘ kóng, seng-khu bē pàng hiat-ka̍k chèng-keng lō͘, put-kò tham-sim oa̍t-kè-khı̀ khoàⁿ, liâm-piⁿ pı̀ⁿ choè iâm-thiāu. Taⁿ chit ki thiāu lı̄ Tí-má bô joā hn̄g, bêng-bêng ū khoàⁿ-kı̀ⁿ, siáⁿ-sū koh lām-sám án-ni choè?
Ki-tok-tô͘ kóng, Che chin-chiàⁿ sı̄ oh bêng-pe̍k, nā sái khoàⁿ i án-ni, chiū chai i ài chı̂ⁿ ê sim lóng bô tò-tńg.
Cháiⁿ-iūⁿ thang pó-phēng--i? Chhin-chhiūⁿ lâng tiàm koaⁿ-hú hit--nı̍h, khoàⁿ-kı̀ⁿ chha̍t hō͘ lâng hêng-hoa̍t, i iáu káⁿ thau-the̍h mı̍h, koh khoàⁿ-kı̀ⁿ chha̍t, tı̄ hí kà-tiûⁿ--nı̍h hō͘ lâng thâi thâu, i iáu káⁿ thau lâng. Sèng-chheh kóng, Só͘-tô-má lâng chin pháiⁿ, Siōng-tè chiū ná hó khoán-thāi--i, hō͘ i ū pûi toē thang tiàm, chhin-chhiūⁿ Ai-tiân ê hô, i iáu-kú káⁿ tùi Siōng-tè ê bı̄n-chêng kiâⁿ pháiⁿ. Siōng-tè chiah it-hoat siū-khı̀, piàⁿ thiⁿ--nı̍h ê toā hé bia̍t-bô--i. Chiàu chêng-lí lâi kóng, lâng khoàⁿ-kı̀ⁿ lâng kiâⁿ pháiⁿ, siū hêng-hoa̍t, i iû-goân káⁿ kiâⁿ pháiⁿ, pa̍t jı̍t hō͘ Siōng-tè hêng-hoa̍t, tek-khak koh-khah thiám. Taⁿ chit-ê Tí-má, lí khoàⁿ, i oē bián-tit āu-jı̍t ê hêng-hoa̍t á boē?
Hiân-bōng kóng, Án-hiaⁿ, lí kóng chin tio̍h, goá taⁿ oē-tit-thang m̄-sái sí, thang hō͘ āu-sin ê lâng khoàⁿ, cheh un sı̍t-chāi sı̄ toā.
Hit-tia̍p goá bāng-kı̀ⁿ nn̄g ê ha̍k-seng chı̀n-chêng teh kiâⁿ, kiâⁿ kàu hó kéng-tı̀ ê khoe. Tāi-pı̍t hông-tè miâ chit-ê khoe kiò-choè sı̄ Siōng-tè ê khoe. Iok-hān miâ i choè Oa̍h-miā chúi ê khoe. Kiâⁿ thiⁿ-lō͘ tio̍h tùi khoe-piⁿ khı̀, chiah nn̄g ê ha̍k-seng kiâⁿ kàu chia, hit-tia̍p chin hoaⁿ-hí. Lim hit-ê khoe-chúi, chheng koah tiⁿ, oē hō͘ lâng ê khùi-la̍t ióng. Siang pêng ū chhiū, sek-tı̄ mı̄ chhiⁿ-chhùi, oē kiat ta̍k hāng ê ké-chí; hio̍h thang choè io̍h, táⁿ-tia̍p kiâⁿ lō͘ lâng ê pı̄ⁿ. Koh siang pêng lóng sı̄ chháu-po͘, lāi-tiong ū choē-choē kı̂-iūⁿ ê hoe, ta̍k sı̂ chháu-á mı̄ le̍k, hoe mı̄ khui, boē ko͘-tâ, koah boē siā. Hit-tia̍p nn̄g ê ha̍k-seng tiàm chit-ê chháu-po͘ tó-teh khùn, chin khoàⁿ-oa̍h, lóng bô kan-khó͘. Khùn khí-lâi, koh bán ké-chí lâi chia̍h, koh lim hit-ê chúi, iū koh-chài tó-teh khùn. Kè kúi-ná mı̂-jı̍t lóng sı̄ án-ni. Hit-tia̍p chiū gı̂m-si kóng,
Oa̍h-miā ê khoe chúi chin tiⁿ,
Siang pêng ké-chí ta̍k hāng siⁿ;
Hoe-ba̍k siông khui bô cheng-choa̍h,
Ha̍k-seng kàu chia ke̍k khoàⁿ-oa̍h.
Nn̄g ê ha̍k-seng tùi chia beh khı̀, ū koh chia̍h ké-chí, lim chúi chiah khı̀.
Hit-tia̍p goá bāng-kı̀ⁿ in kiâⁿ bē loā hn̄g, ū ná lı̄ hit-ê khoe. Nn̄g ê ha̍k-seng khoàⁿ-kı̀ⁿ che, sim-lāi ū hoân-ló, nā-sı̄ kú m̄-káⁿ lı̄ thiⁿ-lō͘, lâi oá khoe teh kiâⁿ. Lı̄ khoe-piⁿ, lō͘ chin kham-khia̍t, oh kiâⁿ; in ê kha chin sng-nńg, sı̄ in-ūi kiâⁿ hn̄g lō͘, ha̍k-seng ê sim chiah loé-chı̀, ài tit ná kiâⁿ ná pı̂ⁿ-tháⁿ ê lō͘. Hit-tia̍p tú-tú bı̄n-chêng ū chı̍t-ê po͘, miâ kiò Pông-kèng po͘ , oá hí thiⁿ-lō͘ ê tò pêng, ū lı̂-pa thang poâⁿ jı̍p-khı̀. Nn̄g ê ha̍k-seng kàu chia, Ki-tok-tô͘ chiū kā Hiân-bōng kóng, Chit-ê po͘ nā ū lō͘ thang kap cheh lō͘ pı̂ⁿ-pı̂ⁿ khı̀, tio̍h tùi hia khı̀, khah hó. I chiah khı̀ khoàⁿ lı̂-pa, khoàⁿ-kı̀ⁿ piⁿ-á ū lō͘, chhin-chhiūⁿ kap thiⁿ-lō͘ siāng lō͘. Liâm-piⁿ kā Hiân-bōng kóng, Che chin ha̍h goá ı̀, tùi chia lâi-khı̀ hó.
Hiân-bōng kóng, Tùi chia khı̀ kám bô kiâⁿ m̄-tio̍h mah?
Ki-tok-tô͘ kóng, Liōng ia̍h m̄-sái kiaⁿ, lí chhı̀-khoàⁿ--teh, kám m̄-sı̄ kap chit tiâu lō͘ pı̂ⁿ-pı̂ⁿ ǹg tùi chia khı̀ mah? Hiân-bōng chiū thàn i ê oē tè i jı̍p lı̂-pa. In tùi hia kiâⁿ-khı̀, lō͘ sı̍t-chāi sı̄ pı̂ⁿ-tháⁿ hó kiâⁿ. Teh kiâⁿ hit-tia̍p, khoàⁿ-kı̀ⁿ ū chı̍t-lâng thâu-chêng teh kiâⁿ, chiū-sı̄ miâ choè Chū-sı̄ .Nn̄g ê ha̍k-seng chiū kiò--i, mn̄g kóng, Tùi chia khı̀ sı̄ to̍h-lo̍h? Chū-sı̄ kóng, Cheh lō͘ thàng thiⁿ-siâⁿ.
Ki-tok-tô͘ kā Hiân-bōng kóng, Goá thâu-seng kóng chin-chiàⁿ tio̍h, lí thang chai, goá bô lām-sám kóng. Án-ni chiū ûn-á kiâⁿ, tè Chū-sı̄ khı̀. Bē joā-kú jı̍t lo̍h, ûn-ûn-á ná àm, bô khoàⁿ-kı̀ⁿ bı̄n-thâu-chêng ê lō͘. Chit-ê thâu-chêng kiâⁿ ê Chū-sı̄ chiah bô tiuⁿ-tı̂ hām-lo̍h chhim-khiⁿ, poa̍h kàu kut chı̍h, bah lı̍h. Chit ê chhim-khiⁿ chiū-sı̄ chit-nı̍h ê Chú siat ê, tiâu-kò͘-ı̀ beh hāi chit-hō ka-kı̄ phín-phóng--ê.
Nn̄g ê ha̍k-seng thiaⁿ-kı̀ⁿ ū poa̍h-lo̍h-khı̀ ê siaⁿ, chiū toā siaⁿ mn̄g i sím-mı̍h tāi-chı̀. I lóng bô ı̀n, chheng-chheng thiaⁿ-kı̀ⁿ i teh thó͘-khùi nā-tiāⁿ. Hit-tia̍p Hiân-bōng kóng, Àm-bong-bong lóng bô khoàⁿ-kı̀ⁿ, taⁿ lán tı̄ tah-lo̍h? Ki-tok-tô͘ chēng-chēng, in-ūi in tùi chia khı̀ lóng sı̄ i chhoā m̄-tio̍h, chiah m̄-káⁿ ı̀n--i. Hit-tia̍p khí hong, lo̍h hō͘, lûi tân, sih chhoah, chúi ná tiòng-khí-lâi. Hiân-bōng thó͘-khùi kóng, HaihN! Khó͘--ah! Kiâⁿ chia chhò--lah!
Ki-tok-tô͘ kóng, Tùi chia kiâⁿ oē tú-tio̍h án-ni, chı̄-chūi-á oē chai?
Hiân-bōng kóng, Goá tāi-thâu kiaⁿ-liáu che, ia̍h ū lı̂-á kóng, lí nā m̄-sı̄ khah choē hè goá, goá tek-khak kā lí kóng khah siông-sè.
Ki-tok-tô͘ kóng, Chhiáⁿ án-hiaⁿ bo̍h-tit siū-khı̀, hō͘ lí kiâⁿ m̄-tio̍h, tú-tio̍h che kan-khó͘, goá ê sim chin hoân-ló, sı̍t-chāi goá m̄-sı̄ tiâu-kò͘-ı̀, lí tio̍h khoan goá.
Hiân-bōng kóng, Án-hiaⁿ lí ê sim choè lí pàng khoan, goá bô beh chek-pı̄ lí. Lán tú-tio̍h che kan-khó͘, liōng pa̍t jı̍t tek-khak ū lı̄-ek.
Ki-tok-tô͘ kóng, Kai-chài tit-tio̍h tâng-phoāⁿ chhin-chhiūⁿ án-hiaⁿ lí ê toā-liōng. Goá ê sim chin hoaⁿ-hí, nā-sı̄ lán tek-khak m̄-thang khiā chia, kín-kín tio̍h tò-tńg--khı̀.
Hiân-bōng kóng, Nā-sı̄ án-ni, goá tio̍h tāi-seng kiâⁿ.
Ki-tok-tô͘ kóng, M̄-thang, goá tio̍h tāi-seng, kiám-chhái lō͘--nı̍h ū kan-khó͘, goá thang tāi-seng tng, sı̄ lí goá kiâⁿ m̄-tio̍h lō͘, lóng sı̄ goá ê choē.
Hiân-bōng kóng, M̄-thang. Goá khoàⁿ-kı̀ⁿ lí chit-tia̍p sim-koaⁿ hoân-ló koah bâng-bâng, kiaⁿ-kı̀ⁿ lí koh kiâⁿ m̄-tio̍h, lí m̄-thang tāi-seng kiâⁿ. Hit-tia̍p thiaⁿ-kı̀ⁿ ū siaⁿ kóng, “Lí tio̍h tò-tńg-khı̀, sim-koaⁿ ǹg toā lō͘, chiū-sı̄ lí chêng kiâⁿ ê lō͘.” Nn̄g ê ha̍k-seng thiaⁿ-kı̀ⁿ che it-hoat ài tò-tńg, nā-sı̄ chit-tia̍p chúi tiòng-khí-lâi ná chhim, beh tò-tńg chin hiám.
Goá khoàⁿ-kı̀ⁿ nn̄g ê ha̍k-seng khoán-sit án-ni, chiū koh ka-kı̄ siūⁿ, lı̄ chèng-keng lō͘ siáⁿ-sū kàu chiah khoài, beh chhut m̄-tio̍h ê lō͘ siáⁿ-sū kàu chiah oh?
