Bû-ti kóng, Goá tı̄ chit-ê soaⁿ ê chó-pêng chhut-sı̀, beh khı̀ thiⁿ-siâⁿ.
Ki-tok-tô͘ kóng, Lí siūⁿ beh jı̍p thiⁿ-siâⁿ káⁿ oh--ah?
Bû-ti kóng, Hó lâng oē jı̍p, goá siáⁿ-sū boē? Ki-tok-tô͘ kóng, Lí nā kàu thiⁿ-siâⁿ, ū sím-mı̍h pı̂n-kù thang jı̍p-khı̀?
Bû-ti kóng, Goá chai Chú ê bēng-lēng, goá pêng-sò͘ ū kiâⁿ hó, ū ēng kong-gı̄ khoán-thāi lâng, ia̍h ū kı̂-tó kı̀m-chia̍h, ia̍h ū toê-iân chān sèng-hoē, ia̍h ū chín-chè sòng-hiong lâng, taⁿ koh ka-kı̄ pàng-sak pún siâⁿ, ài khı̀ thiⁿ-siâⁿ.
Ki-tok-tô͘ kóng, Nā-sı̄ jı̍p cheh lō͘ m̄-sı̄ tùi oe̍h-mn̂g, sı̄ tùi oan lō͘ jı̍p, kiaⁿ-liáu kàu sím-mn̄g hit-tia̍p, tek-khak lia̍h lí choè chha̍t, m̄ chún lí jı̍p siâⁿ.
Bû-ti kóng, Lia̍t-ūi lín m̄-chai tāi--ah, lín pêng-sò͘ kap goá bô siong-se̍k, lín thàn lín ê kàu, goá thàn goá ê kàu, chiū-sı̄--lah. Lín tú-á teh kóng ê oe̍h-mn̂g, ta̍k lâng chai, lı̄ goán ê siâⁿ chin hn̄g. Goá liōng beh khı̀ hit--nı̍h, goán ê siâⁿ tek-khak bô lâng bat lō͘. Lín siáⁿ-sū m̄ khoàⁿ chit tiâu lō͘, kín koah khoài kiâⁿ, tùi goán ê siâⁿ lâi, chiū oē-tit-thang thàng chia.
Ki-tok-tô͘ khoàⁿ-kı̀ⁿ i ka-kı̄ lia̍h choè tio̍h, chiū soè siaⁿ kā Hiân-bōng kóng, Sèng-chheh kóng, “Goān lâng iáu ū thang ǹg-bāng”, kàu chit-ê lâng lóng bô thang ǹg-bāng; koh kóng, “Kı̀ⁿ ū boē hiáu-tit--ê, chı̍t-ē chhut lō͘, tı̀-sek bô kàu-gia̍h, nā kap lâng kóng, i ê boē biáu-tit chiū làu-pauh”. Goán taⁿ tio̍h cháiⁿ-iūⁿ khoán-thāi cheh lâng? Tio̍h kap i koh kóng--ah, iá-sı̄ choè goán lâi khı̀, hō͘ i oē hiáu-tit tò siūⁿ goán ê oē, āu-lâi thèng-hāu i lâi, chiah ûn-á khǹg--i, khoàⁿ kiám-chhái oē hoán-hoé boē?
Hiân-bōng kóng, Chāi goá siūⁿ, chit-tia̍p m̄-thang kap i kóng, tio̍h thèng-hāu āu-sin, nā oē kóng--tit chiah kap i koh kóng. Hit-tia̍p Hiân-bōng ū gı̂m-si kóng:
Goá khoàⁿ hit lâng miâ Bû-ti,
Khoán-sit kiau-ngō͘ bô khiam-pi;
Boa̍t-jı̍t sím-mn̄g nā kàu sı̂,
Siōng-tè kiám beh iông-ún i?
Nn̄g ê ha̍k-seng tùi án-ni tāi-seng kiâⁿ. Bû-ti ia̍h tè āu-piah kiâⁿ. Bē joā kú, jı̍p chı̍t-tiâu o͘-im ê lō͘, chiông-tiong tú-tio̍h chı̍t-lâng, hō͘ chhit-ê siâ-sı̂n ēng chhit tiâu soh pa̍k, hit-tia̍p thoa i tò-tńg, tı̍t-thàu tùi soaⁿ-ē ê mn̂g khı̀. Ki-tok-tô͘ khoàⁿ-kı̀ⁿ che ngia̍uh-ngia̍uh-chhoah, kiaⁿ kàu boē kò͘-tit. Hiân-bōng ia̍h sı̄ án-ni. Tú-tú siâ-sı̂n thoa chit lâng tùi hia kè, Ki-tok-tô͘ ū lâi teh khoàⁿ ū bat--i á-bô, liōng kiám-chhái sı̄ Khı̀-sı̀n hiuⁿ ê Poē-tō, nā-sı̄ khoàⁿ liáu bô sím-mı̍h bêng-pe̍k, sı̄ thâu-khak àⁿ-àⁿ teh kè, chhin-chhiūⁿ hō͘ lâng lia̍h ê chha̍t. Chit lâng kè-khı̀ liáu, Hiân-bōng oa̍t kè-khı̀ khoàⁿ, khoàⁿ-kı̀ⁿ ka-chiah--nih ū jı̄ kóng, “Goā-phê sı̄ sèng-tô͘, sim-lāi sı̄ kan-ı̂m ok-to̍k.”
Hit-tia̍p Ki-tok-tô͘ tùi Hiân-bōng kóng, Goá bat thiaⁿ-kı̀ⁿ chı̍t-ê hó ê ha̍k-seng chit--nı̍h tú-tio̍h ê tāi-chı̀, taⁿ liâm-piⁿ kı̀-tit. Hit-ê lâng chiū-sı̄ Siáu-sı̀n, ia̍h sı̄ kó͘-ı̀ lâng, pêng-sò͘ khiā Sim-sêng hiuⁿ. Taⁿ beh kóng hit-ê tāi-chı̀, i ê chêng-iû chiū-sı̄ án-ni. Tú-tú jı̍p chit-ê o͘-im ê lō͘, goā-bı̄n koh ū chı̍t-tiâu lō͘, tı̍t-thàu thàng toā lō͘, miâ choè Sat-kèng . Lâng éng-éng tùi chia khit lâng thâi, chiah ū cheh miâ. Hit-tia̍p Siáu-sı̀n ia̍h chhin-chhiūⁿ lán kiâⁿ thiⁿ-lō͘, ū chē chia teh khùn. Pō͘-pı̂n ū saⁿ ê kiông-liông ê chha̍t, chiū-sı̄ Nō͘-chı̀ , Gı̂-sim , Choē-ko͘ , tùi toā lō͘ lo̍h-lâi Sat-kèng, khoàⁿ-kı̀ⁿ Siáu-sı̀n khùn, chiah liâm-piⁿ cháu khı̀ oá i. Hit-tia̍p, Siáu-sı̀n khùn chhíⁿ, tit-beh khí-lâi koh kiâⁿ, saⁿ ê chha̍t kūn-oá hoah--i kóng, Khiā--teh, m̄-thang khı̀. Siáu-sı̀n thiaⁿ-kı̀ⁿ, kiaⁿ kàu bı̄n lek-sek, bô la̍t thang kap in tí-te̍k, koah boē cháu.
Hit-tia̍p Nō͘-chı̀ kóng, Gûn kín-kín the̍h chhut-lâi. Siáu-sı̀n chin m̄ ài hō͘ i the̍h-khı̀, ı̂ⁿ-ı̂ⁿ tı̂ⁿ-tı̂ⁿ the̍h lóng boē chhut-lâi, Gı̂-sim chiū chhek-oá--i, chhun chhiú jı̂m i ê tó͘-koāⁿ, chhiúⁿ i ê gûn-tē-á. Siáu-sı̀n liâm-piⁿ toā siaⁿ hoah-hiàm, Chha̍t--ah! Chha̍t--ah! Choē-ko͘ chiū ēng toā ki khoáiⁿ-á kòng i ê thâu-khak, hō͘ i tó hí toē--nı̍h, chiū lâu huih, chhin-chhiūⁿ beh sí. Hit-tia̍p saⁿ ê chha̍t khiā-teh khoàⁿ, thiaⁿ-kı̀ⁿ āu-piah ū lâng siaⁿ lâi, kiaⁿ-liáu sı̄ Tok-sı̀n hiuⁿ ê Chông-un , chiū pàng Siáu-sı̀n hí lō͘--nı̍h, khí-kha kín-mé cháu. Ū tiap-á kú, Siáu-sı̀n lio̍h-á khah hó, chiah bián-kióng tı̍t-tı̍t kiâⁿ. Hit-tia̍p ū si kóng,
Nō͘-chı̀, Gı̂-sim, kap Choē-ko͘,
Phah kàu Siáu-sı̀n cháu bô lō͘;
Chha̍t thiaⁿ lâng siaⁿ chiū kín cháu,
Oán-jiân chhin-chhiūⁿ bé teh pháu.
Hiân-bōng chiū mn̄g Ki-tok-tô͘ kóng, Hit-tia̍p saⁿ ê chha̍t ū lóng chhiúⁿ i ê mı̍h á-bô?
Ki-tok-tô͘ kóng, Bô, i ê seng-khu khǹg pó-poè hit--nı̍h, bô hō͘ i chhiau-tio̍h, i ê pó-poè iáu tı̄-teh. Nā-sı̄ chiàu lâng kóng, i ta̍k jı̍t teh khai ê gûn hō͘ i chhiúⁿ kàu beh liáu, chí-ū chhun tām-po̍h chhùi gûn nā-tiāⁿ, ēng kàu lō͘-bé, kiaⁿ-liáu bô kàu. Goá thiaⁿ-kı̀ⁿ i kiâⁿ-lō͘ hit-tia̍p, ta̍uh-ta̍uh kiû-khit lâi tō͘-khó͘ kè jı̍t. i ê pó-poè tek-khak m̄ boē. Chı̍t lō͘ chheng-chheng poàⁿ-iau poàⁿ-pá teh kiâⁿ, i ê sè-bı̄n chin khó-lı̂n.
Hiân-bōng kóng, i ū thang jı̍p thiⁿ-siâⁿ ê pı̂n-kù, hit-tia̍p bô hō͘ chha̍t chhiūⁿ-khı̀, kiám m̄ kı̂--lah?
Ki-tok-tô͘ kóng, Che chin khá, nā-sı̄ bô hō͘ chha̍t chhiúⁿ--khı̀, kú m̄-sı̄ i ka-kı̄ oē hiáu siūⁿ, chiah oē án-ni. I tú-tio̍h chha̍t hit-tia̍p kiaⁿ kàu boē kò͘-tit, thái-thó oē hiáu-tit khǹg i ê pı̂n-kù bô hō͘ i chhiúⁿ-khı̀? Che lóng sı̄ Siōng-tè ê un.
Hiân-bōng kóng, i ê pó-poè boē hō͘ i kiap-khı̀, liōng i ê sim tek-khak chin hoaⁿ-hí.
Ki-tok-tô͘ kóng, i nā gâu ēng cheh pó-poè, sim-koaⁿ chin-chiàⁿ thang hoaⁿ-hí. Nā-sı̄ kā goá kóng cheh tāi-chı̀ ê lâng, kóng-kiò i ê gûn hō͘ chha̍t kiap-khı̀, sim-koaⁿ jû chhiáng-chhiáng, kàu boē hiáu-tit ēng i ê pó-poè. I iáu teh kiâⁿ lō͘, chı̍t-ē siūⁿ--kiò i ê gûn hō͘ chha̍t chhiúⁿ-khı̀, liâm-piⁿ hoân-ló kàu boē kò͘-tit, lóng boē kı̀-tit i ū pó-poè thang hoaⁿ-hí.
Hiân-bōng kóng, Khó͘--ah! chit-ê lâng hoân-ló kàu chiah thiám.
Ki-tok-tô͘ kóng, Tio̍h, i ê hoân-ló chin thiám. Kiám-chhái lán ia̍h tú-tio̍h che, seng-khu siū-siong, gûn hō͘ lâng chhiúⁿ--khı̀, hit-tia̍p tiàm hia chhiⁿ-so͘ ê só͘-chāi, lán ê hoân-ló ia̍h sı̄ án-ni. I hit-tia̍p kan-khó͘ kàu án-ni, kú iū boē sí, chin-chiàⁿ kı̂. Lâng kóng i āu-sin kiâⁿ lō͘, chheng-chheng thó͘-khùi hoân-ló, kàu ta̍k só͘-chāi lóng sı̄ án-ni. Lō͘-nı̍h chhēng-tio̍h sím-mı̍h lâng, chiū kóng i to̍h-lo̍h tú-tio̍h chha̍t, sím-mı̍h hō͘ i chhiúⁿ-khı̀, seng-khu siū-tio̍h cháiⁿ-á tāng-siong, lóng-chóng kóng hō͘ i chai.
Hiân-bōng kóng, i hit-tia̍p kan-khó͘ kàu án-ni, siáⁿ-sū m̄ chiong i ê pó-poè khı̀ tǹg, iá-sı̄ khı̀ boē tām-po̍h-á lâi choè lō͘-hùi?
Ki-tok-tô͘ kóng, Lí án-ni kóng, siáⁿ-sū kàu chiah bô bêng-pe̍k? Kiám-chhái ài tǹg chit-ê pó-poè, lâng bô chiah choē chı̂ⁿ thang kā i tǹg, kiám-chhái beh boē, ū sím-mı̍h hó-gia̍h ê lâng thang kā i boé? Koh kā i siūⁿ-teh, sı̄ hō͘ lâng chhiúⁿ, hit-nı̍h ê lâng lóng boē hiáu tùi-tiōng cheh pó-poè, koh hit-ê só͘-chāi lóng bô sím-mı̍h mı̍h thang hō͘ i. Koh kā i siūⁿ-teh, kàu thiⁿ-siâⁿ nā bô cheh pó-poè, tek-khak boē-tit-thang tit thiⁿ-nı̍h ê ke-hé.
Hiân-bōng kóng, Goá teh kóng, Án-hiaⁿ lí án-ni chiat goá, siáⁿ-sū kàu chiah ngı̄-tı̍t? Chāi-chá Í-sò ūi-tio̍h chı̍t-tǹg chia̍h, chiū niū i ê sió-tı̄ choè i ê hiaⁿ, che kám m̄-sı̄ ēng i ê pó-poè sán-niū? Í-sò to oē án-ni, Siáu-sı̀n kám boē mah?
Ki-tok-tô͘ kóng, Í-sò chin-chiàⁿ ū boē i ka-kı̄ choè án-hiaⁿ ê bêng-hūn. Lâng o̍h--i sı̄ choē, chóng-sı̄ o̍h--i cheh khoán, chin-chiàⁿ sı̄ ka-kı̄ m̄-tı̍h toā hok-khı̀, lâi kap Í-sò chı̍t-poaⁿ-iūⁿ. Iáu-kú tio̍h siūⁿ Í-sò choè lâng kap Siáu-sı̀n bô saⁿ-tâng, i ê pó-poè ia̍h bô saⁿ-tâng; lí tio̍h hun-pia̍t. Che sı̄ cháiⁿ-iūⁿ--nih ? Í-sò ê bêng-hūn put-kò sı̄ koan-chiò thiⁿ-nı̍h ê ke-hé, Siáu-sı̀n m̄-sı̄ án-ni. Í-sò lia̍h i ê pak-tó͘ choè chú, Siáu-sı̀n m̄-sı̄ án-ni.
Hiân-bōng kóng, Án-hiaⁿ lí kóng sı̄ tio̍h, nā-sı̄ goá siūⁿ kàu chit saⁿ ê chha̍t lóng bô táⁿ, nā m̄-sı̄ án-ni, siáⁿ-sū thiaⁿ-kı̀ⁿ lâng lâi, kín-mé cháu? Siáu-sı̀n siáⁿ-sū kàu chiah kiaⁿ? In-hô m̄ kap in tùi-te̍k, thèng-hāu kàu boē iâⁿ in chiah lâi cháu, iáu bē tı̂? Ki-tok-tô͘ kóng, Choē-choē lâng kóng hí saⁿ ê chha̍t sı̄ sió-táⁿ, nā-sı̄ kap in tí-te̍k, lâng éng lún--i. Cheh Siáu-sı̀n sı̍t-chāi sı̄ sió-táⁿ, chóng-sı̄ lí kiám-chhái nā tú-tio̍h chit-hō chha̍t, khoàⁿ-kı̀ⁿ ia̍h tek-khak cháu, chhin-chhiūⁿ Siáu-sı̀n chı̍t-poaⁿ-iūⁿ. Chit ê chha̍t kú m̄-sı̄ chha̍t-thâu, sı̄ chhim-ian ông ê chha̍t-hé, nā ū toā tāi-chı̀, i ê ông liâm-piⁿ chān--i. Goá ia̍h bat tú-tio̍h che chha̍t, chin lún i. Hit-tia̍p hō͘ i pek-oá goá, goá chı̄n-la̍t kap i tí-te̍k, i ê siaⁿ chı̍t-ē âu, in ê ông liâm-piⁿ koáⁿ lâi chān--i. Hit-tia̍p chin hiám, kai-chài siūⁿ-tio̍h Siōng-tè ê un, seng-khu ū khoe-kah, ke-si, phah boē tio̍h. Kai-chài ū chit-ê khoe-kah, ia̍h ū chhut-la̍t kap in tí-te̍k, nā-sı̄ kú chin kan-khó͘. Che nā m̄-sı̄ pún-sin tú-tio̍h ê lâng, lóng m̄-chai chit chân ê tāi-chı̀.
Hiân-bōng kóng, in ê táⁿ nā-sı̄ toā, siūⁿ-tio̍h Chông-un lâi, siáⁿ-sū kín-mé cháu?
Ki-tok-tô͘ kóng, Chông-un chı̍t-ē kàu, in kap in ê ông éng-éng ū cháu, siáⁿ-sū--ah? Chông-un sı̄ lán ê Chú ê tāi-chiòng. Nā-sı̄ Siáu-sı̀n kú m̄-sı̄ tāi-chiòng, i ê táⁿ thái-thó oē Pí-tit--i? Lán ê Chú chiū nā ū choē-choē peh-sı̀ⁿ, kú bô lóng choè tāi-chiòng, kiám-chhái kap lâng saⁿ-thâi, ia̍h boē chhin-chhiūⁿ tāi-chiòng toā iú-kong. Chāi-chá Tāi-pı̍t thâi Kho-lı̄-a, che kám sı̄ gín-ná oē hiáu-tit mah? Chhiⁿ-si-á ê khùi-la̍t kiám oē ta̍t-tit súi-gû mah? Sèng-tô͘ lāi-tiong khùi-la̍t ū ióng, lám; sı̀n ū toā, soè, Siáu-aı̀n sı̍t-chāi sı̄ lám ê lâng, tú-tio̍h tùi-te̍k chiah liâm-piⁿ su.
Hiân-bōng kóng, khó-sioh m̄-sı̄ Chông-un lâi thang kap chí saⁿ ê chha̍t tí-te̍k.
Ki-tok-tô͘ kóng, Chông-un chiū nā chhut-thâu iâⁿ--i ia̍h sı̄ oh. Chông-un khiok gâu saⁿ thâi, ēng to kiàm kap i lā, éng boē su in, iáu tng oē-tit tiâu. Kiám-chhái Nō͘-chı̀, Gı̂-sim chiah-ê, poah khui i ê to kiàm, oá kàu i ê Seng-khu, boē bián-tit tio̍h tó. Lâng í-keng tó, thái-thó oē lòng-hêng ? Nā-sı̄ soè-jı̄ khoàⁿ Chông-un ê bı̄n, khoàⁿ-kı̀ⁿ ū siong-hûn, thang chai--kiò goá kóng sı̄ ū-iáⁿ. Chāi-chá Pó-lô kap in kau-chiàn hit-tia̍p, bat kóng, ‘Ài pó-choân sı̀ⁿ-miā í-keng sit ǹg-bāng’.Koh chit-ê kiông ê tùi-te̍k, siáⁿ-sū kàu hō͘ Tāi-pı̍t hoân-ló. Thó͘-khùi, thı̂-khàu--ah! Hi-bān, Hi-se-ka chiū nā choè tāi-chiòng, tú-tio̍h chit-ê tùi-te̍k, chı̄n-la̍t kap i tí-tng, ia̍h oh-tit liâm-piⁿ tek-sèng. Hit pang Pí-tek ài-tit kap i kı̀ⁿ su-iâⁿ, chiū nā-sı̄ choè Chú ê Sù-tô͘, khiok ia̍h bô thang kóng i ū khùi-la̍t thang iâⁿ--in. Pí-tek hit-tia̍p chin lún, lún kàu bé-liu, ū kiaⁿ chı̍t-ê lú-pı̄, soà m̄-káⁿ jı̄n Iâ-so͘ choè Chú. Koh chiah-ê chha̍t ê ông in chı̍t-ē hoah-hiám, i chiū lâi, bô chı̍t-tia̍p-á kú kap in saⁿ-lı̄, siông-siông oē thiaⁿ-kı̀ⁿ in ê âu-kiò. Thâi nā boē iâⁿ, in ê ông liâm-piⁿ chiū lâi chān in. In ê ông chin kiông-liông, ‘lâng ài kong-kek--i, to chiam chha̍k boē jı̍p--i, khoe-kah bô lō͘-ēng, khoàⁿ thih chhin-chhiūⁿ koaⁿ-bâng, khoàⁿ tâng chhin-chhiūⁿ ko͘-tâ ê chhâ, ēng chı̀ⁿ kā i siā, bô siūⁿ beh cháu, hı̀ⁿ chio̍h-thâu tı̀m--i, i khoàⁿ chhin chhiūⁿ chháu-ki. Lâng ēng thûi-á kā i kòng, i lia̍h choè sı̄ chháu. Lâng bú hit-ê kek, i lia̍h choè sı̄ kún-chhiò.’ Béng kàu án-ni, lâng thái-thó ū hoat--i? Kiám-chhái oē tit-tio̍h Iok-pek ê bé, táⁿ, tı̀-sek, kàu-gia̍h thang kap i tí-tng, khoàⁿ tng oē tiâu boē. I ê bé tāi-khài ū si kóng,
Che bé teh tián-ui,
Siaⁿ-sàu mı̄ ná lûi,
Chhut-la̍t chı̍t-ē pháu,
Tùi-te̍k kín-mé cháu,
Hı̄-khang chı̄n-chāi lāi,
Peng lâi i lóng chai;
Thiaⁿ-kı̀ⁿ lô-kó͘ siaⁿ,
Pēng bô sió-khoá kiaⁿ.
Taⁿ lán bô chit-hō bé thang khiâ, put-kò pō͘-lián teh kiâⁿ, lán kám thang ài kı̀ⁿ-tio̍h tùi-te̍k? Iá-sı̄ thiaⁿ-kı̀ⁿ ū lâng khah-su--i, lán kám oē kóng-tit lán khah ū pún-sū éng-éng boē su--i? Goá khoàⁿ Pí-tek hit-tia̍p ū siⁿ-khí lām-sám siūⁿ, liâm-piⁿ tùi Iâ-so͘ phín-phóng kóng, ‘Chèng-lâng chiū nā m̄ tı̍h lí, goá bô m̄ tı̍h lí.’ Khiok ū kóng che, āu-lâi su tùi-te̍k pí pa̍t lâng khah chhám. Taⁿ thiaⁿ-kı̀ⁿ chit-ê thiⁿ-lō͘ ū chha̍t éng-éng teh kiap lâng, lán nā teh kiâⁿ, tio̍h chhēng khoe-kah, the̍h sı̀n ê tı̂n-pâi chiah tio̍h. Sèng-chheh ū kóng, ‘Tio̍h the̍h sı̀n ê tı̂n-pâi, chiah thang ēng che, phah-bô tùi-te̍k ê hé-chı̀ⁿ.’Koh tio̍h kiû Chú ēng peng tè lán, iū tio̍h kiû Chú kap lán khı̀. Chêng Tāi-pı̍t ū tit-tio̍h che, khiok ū tiàm Sí-ı̀m ê soaⁿ-kha, i ê sim-koaⁿ ia̍h pêng-an. Mô͘-se kóng--kiò nā bô Chú saⁿ-kap kiâⁿ, sí khah hó, chı̍t-pō͘ ia̍h bô beh kiâⁿ. Taⁿ lán nā ū Chú choè phoāⁿ, chiū ū chiâⁿ chheng-bān ê tùi-te̍k, lán m̄-sái kiaⁿ. Nā-sı̄ Chú bô chān, lán koh-khah ióng ia̍h sı̄ sí. Goá bat kap lâng toā kau-chiàn, siū-tio̍h Chú ê un, oē-tit-thang m̄-sái sí, nā-sı̄ goá kú m̄-káⁿ phín-phóng, kóng--kiò goá ū toā pún-sū chiah ū iâⁿ--i. Goá sı̄ ài-tit āu-lâi bô tú-tio̍h án-ni, chiū chı̄n-chāi hoaⁿ-hí, nā-sı̄ kú iū kiaⁿ, chit--nı̍h sı̄ chha̍t-siū, goá só͘-í chiah lún. Taⁿ goá ū khò Siōng-tè kiù--goá, bô hō͘ tùi-te̍k iâⁿ--goá. Ū si kóng,
Tùi-te̍k saⁿ-thâi chin hiông-hún,
Ha̍k-seng tú-tio̍h kám bô lún?
Choan-sim sı̀n-khò Chú Ki-tok,
Tùi-te̍k boē iâⁿ, koà hâng-ho̍k.
Hit-tia̍p nn̄g ê ha̍k-seng chı̀n-chêng teh kiâⁿ, Bû-ti ia̍h tè--in, āu-lâi kàu chı̍t-só͘-chāi, khoàⁿ-kı̀ⁿ ū chı̍t-tiâu lō͘ chiah jı̍p thiⁿ-lō͘. Hit tiâu lō͘ hóng-hut chhin-chhiūⁿ thiⁿ-lō͘, nn̄g ê ha̍k-seng kàu chia, m̄-chai beh tùi ta̍h-lo̍h chı̍t-tiâu khı̀, chiah tiû-tû teh khiā. Hit-tia̍p ū o͘-o͘ toā-hàn ê lâng, chhēng pe̍h-pe̍h ê saⁿ, oá lâi mn̄g--in, Lín khiā chia siáⁿ-sū? Nn̄g ê ha̍k-seng kóng, Goán beh khı̀ thiⁿ-siâⁿ, tú-tio̍h chit nn̄g tiâu lō͘, m̄-chai to̍h-lo̍h chı̍t-tiâu khah tio̍h. Chit-ê o͘-hàn kóng, Tè goá lâi, goá beh khı̀ hit-nı̍h.Nn̄g ê ha̍k-seng chiū tè--i, tùi phian-lō͘ khı̀. Kiâⁿ bē joā kú, hit tiâu lō͘ ûn-á oat, hit-ê thiⁿ-siâⁿ khiok tı̄ in ka-chiah-āu. Nā-sı̄ nn̄g ê ha̍k-seng iáu-kú teh tè--i, bē joā kú, khioh hō͘ i chhoā jı̍p lô-bāng, kha hō͘ i tı̂ⁿ-teh, m̄-chai beh cháiⁿ-iūⁿ. Hit-tia̍p o͘-hàn ê pe̍h saⁿ pō͘-pı̂n khioh la̍k-teh, nn̄g ê ha̍k-seng chiah khoàⁿ-phoà chai khó͘. Nā-sı̄ kú boē-tit-hang chhut-lâi--lah, chiah tiàm hia teh thı̂-khàu.
Hit-tia̍p Ki-tok-tô͘ tùi Hiân-bōng kóng, Goá taⁿ chin chhò lah. Tio̍h soè-jı̄ tı̂-hông phô͘-tháⁿ ê lâng, bo̍k-chiá kám bô kā goá kóng mah? Taⁿ goá tú-tio̍h, chiū-sı̄ Só͘-lô-bûn ū kóng, ‘Lâng phô͘-tháiⁿ i ê chhù-piⁿ, chhin-chhiūⁿ tiuⁿ bāng tı̂ⁿ lâng ê kha.’
Hiân-bōng kóng, Lō͘-thêng chı̀-lio̍k Bo̍k-chiá bat hō͘ lán, beh hō͘ lán chai lō͘, lán boē kı̀-tit the̍h khí-lâi khoàⁿ, chiah kiâⁿ m̄-tio̍h. Tāi-pı̍t bat kóng, ‘Sè-kan choē-choē kiông-liông pō͘-gio̍k ê lâng, goá thàn lí ê bēng-lēng, hit lâng só͘ choè m̄ o̍h i kiâⁿ.’ Lán taⁿ chin-chiàⁿ m̄ ta̍t-tio̍h Tāi-pı̍t. Hit-tia̍p nn̄g ê ha̍k-seng tiàm hí lô-bāng teh thı̂-khàu. Ū hiah kú, chiah khoàⁿ-kı̀ⁿ chı̍t-ê bı̄n kng-kng ê lâng lâi, chhiú kia̍h chı̍t-ki piⁿ, oá nn̄g ê ha̍k-seng, mn̄g in tùi to̍h-lo̍h lâi, siáⁿ-sū kàu chia.
Nn̄g ê ha̍k-seng kóng, Goán sı̄ chin kan-khó͘ teh kiâⁿ lō͘ lâng, beh khı̀ Sûn-soaⁿ, ū chhiāng-tio̍h chı̍t-ê chhēng pe̍h saⁿ, o͘-hàn ê, kóng--kiò beh kàu hit-nı̍h, chio goán tè--i, chiah kiâⁿ m̄-tio̍h kàu chia. Hit-tia̍p kia̍h piⁿ ê kóng, Chit-ê o͘-hàn chiū-sı̄ phô͘-tháⁿ ê lâng, bı̄n-māu kng-kng ké choè Ki-tok ê ha̍k-seng. Kóng soah, chiū chiong lô-bāng thiah-lı̍h, pàng nn̄g ê ha̍k-seng chhut-lâi, kā in kóng, Tè Goá, goá chhoā lín tò-tńg-khı̀ chiàⁿ lō͘. I chiū liâm-piⁿ chhoā in jı̍p goân lō͘. Hit-tia̍p mn̄g in kóng, Chā-hng lín hioh ta̍h-lo̍h?
Nn̄g ê ha̍k-seng kóng, Goán chā-hng hioh Lo̍k-soaⁿ, Bo̍k-chiá ê pò͘-piⁿ lāi.
I chiū kóng, Lō͘-thêng chı̀-lio̍k, Bo̍k-chiá kiám bô hō͘ lín? Kóng, Ū--ah.
I chiū kóng, Nā-sı̄ án-ni, lín hit-tia̍p tiû-tû teh khiā, kám bô the̍h chhut-lâi khoàⁿ?
Nn̄g ê ha̍k-seng kóng, Sı̍t-chāi iáu bē khoàⁿ. Kóng, Siáⁿ-sū m̄ khoàⁿ?
In chiū kóng, Goán boē kı̀-tit.
I chiah kóng, Bo̍k-chiá kám bô thong-ti lín, tio̍h soè-jı̄ tı̂-hông phô͘-tháⁿ ê lâng?
Nn̄g ê ha̍k-seng kóng, Ū--ah! chóng-sı̄ goán khoàⁿ cheh lâng kóng oē chin hó thiaⁿ, kám ū gı̂ i sı̄ beh phô͘-tháⁿ?
Hit-tia̍p goá bāng-kı̀ⁿ kia̍h piⁿ--ê kah in tó hí toē--nih, chiū ēng piⁿ phah--in, sı̄ ài beh kà-sı̄ in kiâⁿ chiàⁿ lō͘. Phah in hit-tia̍p koh kóng, ‘Goá só͘ thiàⁿ--ê, goá chek-pı̄ i, chiah tio̍h choan-sim hoán-hoé koé-pı̀ⁿ.’ Phah soah, kah in koh khı̀, ū koh kā in kóng, Bo̍k-chiá kà lín hiah-ê oē tio̍h kı̀-tit, m̄ thang boē kı̀-tit. Hit-tia̍p nn̄g ê ha̍k-seng kā i kóng to-siā, soè-jı̄ chı̀n-chêng kiâⁿ. Ū si kóng,
Chı̍t-ê o͘-hàn teh chhoā lō͘,
Ha̍k-seng tè i kiâⁿ kha-pō͘;
Chhoā jı̍p lô-bāng hiám-hiám sí,
Kai-chài Kiù-chú kiù in khı̀.
Nn̄g ê ha̍k-seng chı̀n-chêng kiâⁿ bē joā kú, hn̄g-hn̄g khoàⁿ-kı̀ⁿ bı̄n-chêng chı̍t-ê lâng, ûn-á kiâⁿ--lâi. Hit-tia̍p Ki-tok-tô͘ tùi Hiân-bōng kóng, Hia ū chı̍t-ê lâng khı̀ thiⁿ-siâⁿ tò-tńg-lâi, beh kàu lán chia.
Hiân-bōng kóng, Goá khoàⁿ-kı̀ⁿ liáu--lah, kiaⁿ-liáu ia̍h sı̄ phô͘-tháⁿ lâng, kú tio̍h soè-jı̄--ah!
Hit-ê lâng ûn-ûn-á ná oá lâi, kàu bé kap nn̄g ê ha̍k-seng choè chı̍t-tui. I ê miâ kiò Bông-thian , mn̄g nn̄g ê ha̍k-seng beh to̍h-lo̍h khı̀.
Ki-tok-tô͘ kóng, Goán beh khı̀ Sûn-soaⁿ.
Bông-thian thiaⁿ-kı̀ⁿ cheh oē, hah-hah chhiò. Ki-tok-tô͘ kóng, Lí chhiò siáⁿ-sū?
Bông-thian kóng, Chhiò lín boē hiáu-tit. Lín kiâⁿ cheh hn̄g lō͘ bô chhái-kang chiū-sı̄--lah, kám ū pa̍t chèng?
Ki-tok-tô͘ kóng, Che cháiⁿ-á kóng? Nā kàu thiⁿ-siâⁿ, lí kám siūⁿ--kiò Chú m̄ chih-chiap goán mah?
Bông-thian kóng, Haih! chı̄-chūi-á beh chih-chiap lín? Lín siūⁿ ê só͘-chāi, chí sè-kan lóng bô.
Ki-tok-tô͘ kóng, Chit-sı̀ chiū nā bô, āu-sı̀ tek-khak ū.
Bông-thian kóng, Goá chêng tiàm pún siâⁿ ia̍h thiaⁿ-kı̀ⁿ ū chit só͘-chāi, chiah khı̀ chhē--i, taⁿ chhē jı̄-cha̍p-goā nı̂--lah, kàu taⁿ chhē lóng bô.
Ki-tok-tô͘ kóng, Sı̍t-chāi ū cheh só͘-chāi, goá thiaⁿ kú sı̀n.
Bông-thian kóng, Goá hit-tia̍p toà pún siâⁿ ia̍h chhin-chhiūⁿ lín sı̀n kàu án-ni, chiah ū lâi kàu chiah hn̄g teh chhē. Nā-sı̄ ū-iáⁿ ū cheh só͘-chāi, in-hô goá chhē chiah kú lóng bô? Taⁿ goá beh tò-lâi-khı̀, chêng goá ū pàng-hiat-ka̍k sè-kan só͘ tùi-tiōng--ê, taⁿ goá beh lâi-khı̀ hióng-hok hù-khùi.
