Ū chı̍t-pái lo̍h toā-hō͘, chiong chı̍t-tiâu thih-lō͘ ê thih-kiô chhiong pháiⁿ. Chit ê chháu-toē ê lāu-toā lâng keng-kè hia, khoàⁿ-kı̀ⁿ thih-kiô pháiⁿ-khı̀, chiū siūⁿ-tio̍h kin-á-jı̍t ê hé-chhia nā sái-lâi, tek-khak oē hoat-seng chin chhiⁿ-chhám ê chai-hō. I teh siūⁿ ê sı̂, hut-jiân thiaⁿ-tio̍h hn̄g-hn̄g ê só͘-chāi, ū hé-chhia siaⁿ hōng-hōng-kiò teh sái lâi. Chit ê sı̂-chūn, i ūi-tio̍h beh kiù choân chhia-lāi ê lâng ê sı̀ⁿ-miā, chiū ēng to koah ka-kı̄ ê kha-thúi, koh thǹg chı̍t-niá pe̍h-saⁿ ní tı̄ i só͘ lâu chhut-lâi ê huih. Tùi án-ni, i chiū khı̀ khiā tı̄ khah koâiⁿ ê só͘-chāi, chı̍t-bı̄n toā-siaⁿ âu-kiò, chı̍t-bı̄n ko-kú hit niá bak huih kàu âng-âng ê pe̍h-saⁿ, tı̄ poàⁿ khong-tiong ia̍t-lâi ia̍t-khı̀. Bo̍k-tek sı̄ beh hō͘ su-ki khoàⁿ-kı̀ⁿ âng-sek ê kı̂-á, thang sûi-sı̂ tòng-tiām teh.
Chē tı̄ chhia-téng ê lâng, ū ê chia̍h-hun, ū ê khoàⁿ sin-bûn, ū ê chia̍h mı̍h-kiāⁿ, ū ê kóng tang kóng sai, iā ū ê siūⁿ kóng koh kè chı̍t tiap-á-kú chiū oē kàu bo̍k-tek toē, khiok bô chı̍t lâng oē siūⁿ-tio̍h tı̄ thâu-chêng ū chin toā ê put-hēng, in beh tı̄ chit-pái put-hēng ê tiong-kan lâi sí-siong!
Lāu-toā-lâng ê chhiú iáu teh ia̍t, i ê huih iáu teh lâu ê sı̂, i ê siaⁿ-im khiok chiām-chiām soè-siaⁿ. Nā-sı̄ hé-chhia iā chiām-chiām oá-kūn. Tng su-ki khoàⁿ-kı̀ⁿ thâu-chêng âng-sek ê kı̂, chiū sûi-sı̂ tòng khí-lâi, chóng-sı̄ chit ê lāu-toā-lâng khiok in-ūi lâu-huih kè choē soà tó-lo̍h-khı̀. Chē tı̄ chhia-téng ê lâng tāi-ke lóng chin kı̂-koài, m̄-chai-iáⁿ hé-chhia siáⁿ-sū thêng-khùn. Tng in tāi-ke lóng lo̍h-chhia ê sı̂, in chiah chai-iáⁿ thih-kiô pháiⁿ. Tı̄ chit sı̂ in tāi-ke chiah chhíⁿ-ngō͘ hui-siông kám-kek chit-ūi lāu-toā-lâng lâu-huih pàng-sak sı̀ⁿ-miā lâi chín-kiù in. Tùi án-ni choè chı̍t ê bōng chiong i bâi-chòng. Tı̄ i ê bōng-téng ū lı̍p chı̍t-tè chio̍h-pi, siá kóng: “I thoè goán sí!”
Pêng-iú! Tı̄ chhia-téng ê lâng tú-tú chhin-chhiūⁿ lí, hit ê lāu-toā-lâng sı̄ Iâ-so͘. I in-ūi khoàⁿ-kı̀ⁿ lí tı̍t-tı̍t cháu tùi tē-ge̍k hia khı̀, só͘-í tı̄ sı̍p-jı̄-kè téng, pàng-sak I ka-kı̄ ê sı̀ⁿ-miā lâu-huih lâi kiù lí. Ǹg-bāng lí m̄-thang koh kiâⁿ hit tiâu sí-lō͘, hiān-chāi chiū sı̀n-khò I.
(Ka-têng ê pêng-iú tē 16 kı̂, 1959 nı̂ 6 ge̍h)
