Ti-tu

Gín-ná khah siông khoàⁿ-tio̍h ti-tu chiū put-chí kiaⁿ, koh iàm-ò͘ⁿ in. In-ūi chiàu in teh siūⁿ ti-tu sı̄ lâ-sâm bô lō͘-ēng ê mı̍h; sû-put-ti Siōng-tè ia̍h bat ēng in chò I ê khı̀-khū, lâi kiâⁿ I ê sèng-chí. Chiàu goá só͘ chai Siōng-tè chı̀-chió tek-khak ū nn̄g pái bat ēng ti-tu lâi pang-chān I ê peh-sı̀ⁿ. Tı̄ So͘-kek-lân chha-put-to 600 nı̂ chêng ū chı̍t ê chin hó ê ông tú-tio̍h chai-lān. Chiū-sı̄ Eng-kok ê ông ū chhoā kun-peng lâi kong-kek khah-iâⁿ i, soà chhim-chiàm kúi-nā ê siâⁿ, tı̀-kàu So͘-kek-lân ê peh-sı̀ⁿ chin kan-khó͘. Kun-peng cháu soàⁿ, liân ông pún-sin iā tio̍h tô-cháu khı̀ bih tı̄ soaⁿ-nı̍h, toà tı̄ chı̍t keng tē-it sòng-hiong ê peh-sı̀ⁿ ê chhù. Tı̄ bó͘ chá-khí, ông tó tı̄ bı̂n-chhn̂g ê sı̂, sim teh khoà-lū i ê kok, chiū chin ài siūⁿ-chhut khoàⁿ ū hó ê hong-hoat thang kiù in. Hut-jiân-kan ū khoàⁿ-kı̀ⁿ chı̍t chiah ti-tu tı̄ chhù-téng ê toā ki ı̂ⁿ-á teh kiⁿ-bāng. I tāi-seng tiàu tı̄ chı̍t tiâu si boé, hı̀ⁿ-lâi hı̀ⁿ-khı̀, chhin-chhiūⁿ hı̀ⁿ chhian-chhiu ê khoán; in-ūi ài khan si kàu pa̍t ki ı̂ⁿ-á thang kiⁿ-bāng. Ông siông-sè khoàⁿ, chiū chai thâu chı̍t pái ti-tu siūⁿ beh hı̀ⁿ kàu hit pêng ı̂ⁿ-á, m̄-kú i bô kàu-gia̍h la̍t thang hı̀ⁿ kàu hia. Tē jı̄ pái i koh khah chhut-la̍t, chóng--sı̄ iû-goân sı̄ bô lō͘-ēng. Ông chiū ka-tı̄ teh siūⁿ kóng,“Taⁿ chit chiah ti-tu kiám m̄ sı̄ chhin-chhiūⁿ goá pún-sin. Goá nn̄g pái ū toā chhut-la̍t, ài beh kiù goá ê peh-sı̀ⁿ, bô phah-sǹg ta̍k pái hō͘ tùi-te̍k khah-iâⁿ. Taⁿ goá beh koh chim-chiok kā i khoàⁿ, chit chiah ti-tu kàu tē saⁿ pái nā oē sêng-kong, chiū goá beh lia̍h chit-ê chò tiāu-thâu, chai Siōng-tè ài goá koh chı̍t pái chhut-la̍t, ǹg-bāng hō͘ goá ê kok oē-tit chū-iû.” Taⁿ ti-tu kàu tē saⁿ pái kó-jiân ū hı̀ⁿ kàu hit ki ı̂ⁿ-á, ông khoàⁿ liáu, chiū chòng-táⁿ, khí-lâi koh tò-khı̀ kiaⁿ-siâⁿ; bô loā-kú ê tiong-kan i ū tit-tio̍h koh khah chē peng lâi toè i, āu --lâi in ū khah-iâⁿ tùi-te̍k. Che kiám m̄ sı̄ Siōng-tè ēng chit chiah ti-tu lâi chí-sı̄ i mah? Koh koè 300 nı̂ Siōng-tè ia̍h ū koh chı̍t pái bat ēng ti-tu lâi chò I toā ê lō͘-ēng. Hit-sı̂ So͘-kek-lân lâng chin chē in-ūi ài chiàu ka-tı̄ ê liông-sim lâi kèng-pài Siōng-tè, chiū hō͘ chân-jím ê lâng khùn-tio̍k. In chē-chē siū lâng koáⁿ-chhut, tô-siám khı̀ soaⁿ-nı̍h bih. Bat chı̍t pái kúi-nā lâng tı̄ soaⁿ-nı̍h hō͘ tùi-te̍k tui-jip; in kàu tı̄ chı̍t ê soaⁿ-tōng chiū jı̍p-khı̀ bih. Liâm-piⁿ ū chit chiah ti-tu lâi kiⁿ-bāng tı̄ tōng-kháu. Bô loā-kú peng chiū kàu, teh chhoē chiah ê lâng. Teh-beh jı̍p tōng ê sı̂, ū khoàⁿ-kı̀ⁿ ti-tu bāng, chiah siūⁿ tek-khak bô lâng jı̍p-khı̀ bih tı̄ lāi-bı̄n; siat-sú ū, chiū ti-tu bāng ún-tàng bô án-ni hó-hó. Teh pó-hō͘ I ê peh-sı̀ⁿ ê Siōng-tè ū án-ni siat-hoat, hō͘ ti-tu tú-á hit-sı̂ lâi kiⁿ-bāng, ia̍h hō͘ i tú-hó kiⁿ tı̄ chit ê tōng-kháu ê só͘-chāi, thang pó-choân thiàⁿ I ê lâng ê sı̀ⁿ-miā. (Tâi-oân Kàu-hoē-pò tē 436 koàn, 1921 nı̂ 7 ge̍h)