Tio̍h toā-táⁿ ná sai

Hiān-sı̂ tı̄ Tiong-kok khah bô sai, iáu-kú lâng ū oē i-ê hêng khek i-ê siōng lâi ēng tı̄ gê-mn̂g-kháu kap biō-téng, lóng sı̄ hô͘-tô͘ phah-sǹg i-ê ui-lêng ē khı̀ siâ.

Sai sı̄ ke̍k ióng-béng, hō͘ lâng chheng-chò pah-siù ê ông. I sio̍k tı̄ niau-á lūi, siông-siông chia̍h cha̍p-hāng ê chhiⁿ-bah, koh i-ê kha-pō͘ sı̄ khin, ba̍k hı̄ lóng lāi, ia̍h ū àm-chēⁿ gâu kā só͘ beh chia̍h ê mı̍h.

Hoān-nā chhùi-khí ū hun-pia̍t saⁿ-hāng, ū-ê chhin-chhiūⁿ to ē chhiat, ū-ê chhin-chhiūⁿ pê ē thiah, ia̍h ū-ê chhin-chhiūⁿ thô͘ lâng ê khí ē boâ. Sai bô hit-ê boâ ê chhùi-khí. I to̍k-to̍k thiah-bah chiū thun--lo̍h-khı̀, lóng m̄-bián pō͘. Koh i-ê khí put-chí ióng. Nā kā bé, ia̍h ē thoa hn̄g hn̄g. (Khoàⁿ chit-tah ê sè-tô͘ chiū thang chai sai-chhùi ê khoán).

Sai ê sin-thé sı̄ chin ū-la̍t, ia̍h lāi-bı̄n ê kin sı̄ tēng koh lūn tı̀-kàu ē phah-khiû to-chhùi. I nā ēng kha-chiúⁿ siàn gû, hit-chiah gû sûi-sı̂ tó--lo̍h-khı̀. Ū-sı̂ sai ē thiàu kàu nn̄g-tn̄g chó-iū ê hn̄g.

Lâng kap niau-á kiâⁿ-lō͘ bô siāng-khoán, sı̄ in-ūi lâng ê kha-chhioh-té lóng ta̍h tı̄ tē--nı̍h, niau kan-ta ēng thâu-chêng koe̍h ta̍h tı̄ thô͘-bı̄n, chhin-chhiūⁿ ké-kha ê hū-jı̂n-lâng nı̀-kha-boé teh kiâⁿ. (Khoàⁿ chit-tah ê sè-tô͘ chiū thang chai sai ê kha-kut ê khoán-sit).

Sai ê jiáu sı̄ toā koh khiau, ū toā-kin ē chhun-chhut kiu-jı̍p tı̄ siù--nı̍h. Tı̄ kha-chńg-thâu-á ê ē-té ū nńg-lūn ê jı̄-nn̂g phû--khí-lâi, sı̄ chò chhin-chhiūⁿ jio̍k-tiām ê lō͘-ēng. (Khoàⁿ chit-tah ê sè-tô͘ chiū thang chai sai ê kha-jiáu ê khoán-sit).

Lâng kap niau ê chhùi-chı̍h bô saⁿ-tâng. Lâng--ê sı̄ kng-ku̍t, niau--ê sı̄ chho͘-chho͘ bô kng-seⁿ, ná ū chhı̀ chı̍t-iūⁿ. Sai ia̍h sı̄ án-ni, put-kò i chı̍h ê chhı̀ sı̄ khah-toā khah-tn̂g. Koh hiah-ê chhı̀ sı̄ ǹg-jı̍p âu-lāi. Ū-sı̂ teh chia̍h to̍k-to̍k ēng chı̍h lâi chı̄ⁿ chiū bah sûi-sı̂ tùi kut-thâu khoài-khoài khí--lâi. Chêng tı̄ Ìn-tō͘ kok ū chı̍t-lâng chhı̄ chı̍t-chiah sai-á, siông-siông sı̄ koai-koai. Ū chı̍t-jı̍t i teh khùn, chhiú chhun-chhut bı̂n-chhn̂g-goā. Hit chiah sai-á lâi chı̄ⁿ--i. Lâng liâm-piⁿ cheng-sı̂n chiū khoàⁿ-kı̀ⁿ chhiú teh lâu-hoeh. I chai sai-á lim-hoeh teh-beh pı̀ⁿ-pháiⁿ kā-lâng, só͘-í chiong sin-piⁿ ê chhèng kā i phah-sí. (Khoàⁿ chit-tah ê sè-tô͘ chiū thang chai sai-chı̍h ê khoán-sit).

Sai-kang ū sàm-sàm toā-pha ê iaⁿ, sai-bú lóng bô. Sai ê mn̂g khah-chē sı̄ o͘-hoáⁿ-âng, to̍k-to̍k hı̄ kap boé ê lō͘-boé chat sı̄ o͘-mà-mà. Sai ê boé ū kiat toā-lui, ia̍h ū toā-la̍t. Nā sut lâng, lâng chiū poa̍h-tó.

Sai ê chhiu sı̄ tn̂g-tn̂g, ū lō͘-ēng pang-chān i chai khang ū kàu-gia̍h toā thang bián-tit kô--tio̍h mı̍h, tı̀-kàu ū siaⁿ hō͘ só͘ beh kā ê siù thang siám-pı̄.

Tng àm ê sı̂ sai ū chhut-khı̀ thó-chia̍h. I-ê siaⁿ kài-toā ná lûi teh tân. I nā bô liâm-piⁿ tit-tio̍h mı̍h thang chia̍h chiū ǹg-chhùi tı̄ thô͘-bı̄n toā-háu. Ta̍k-hāng siù thiaⁿ-kı̀ⁿ chiū kiaⁿ, ka-tı̄ cháu chhut-lâi sı̀-ûi, m̄-chai tó-lo̍h thang tô-pı̄. Sai sûi-sı̂ oá-khı̀ kā i.

Sèng-chheh ū kóng, "Khı̂n-khı̂n pó-siú tiuⁿ-tı̂, lín ê tùi-te̍k sı̄ Mô͘-kúi, phı̀-jū hit-ê háu ê sai sı̀-kè kiâⁿ beh thun-chia̍h lâng. (Khoàⁿ I Pí-tek 5:8).

In-ūi sai ê khùi-la̍t kap táⁿ-thâu sı̄ chin-toā kàu ē-kham-tit chheng i chò pah-siù ê ông, lâng ū chiong i-ê hêng-siōng chò kok-hō, ná-chhin-chhiūⁿ Tiong-kok ū ēng lêng chı̍t-iūⁿ. Kó͘-chá Iû-tāi ê cho̍k-phài chò án-ni. Nā khoàⁿ Be̍k-sı̄-lio̍k 5:5 thang chai hit-ê hō ia̍h sı̄ phı̀-jū Kiù-chú, in-ūi I chū-jiân ū chò bān-bı̂n ê Ông, koh ū ke̍k-toā ê koân-lêng.

Chiông-tiong Be̍k-sı̄-lio̍k só͘ kı̀-chài lêng-oa̍h ê mı̍h sı̀-ê, chı̍t-ê chiū-sı̄ sai, káⁿ-sı̄ ē phı̀-jū Má-thài, in-ūi i-ê chheh khah toā-bı̄n sı̄ gı̄-lūn Iâ-so͘ chò kok-ông.

Tı̄ II Thé-mô͘-thài 4:17,Pó-lô lâi kı̀-chài I ū chhut sai ê chhùi, kiám-chhái sı̄ phı̀-jū Lô-má ê hông-tè,miâ kiò Nı̂-lô.

Sèng-chheh ū chē-chē ūi kóng-khí sai, chóng-sı̄ tı̄-chia m̄-bián lóng-chóng ín-khí, put-kò ē-té chí kúi-ê sı̄ khah chhù-bı̄ khah iàu-kín ê:goān tāi-ke chhoē-chhut lâi siông-sè tha̍k; tha̍k Sū-su-kı̀ 14:15-18;I Sat-bó͘-ní kı̀ 17:32-36,II Sat-bó͘-ní kı̀ 1:23, I Lia̍t-ông 13:1-32,II Lia̍t-ông 17:24-25, Í-sài-a 11:7,65,25,35:8,9,Tān-í-lí 6:1-28, Hi-pek-lâi 11:33.

Lâng nā tú-tio̍h put-lūn sím-mı̍h chhı̀-liān m̄-thang sit-táⁿ thàn pháiⁿ. Chí-ū hoān-choē ê lâng tio̍h kiaⁿ-hiâⁿ,hó-lâng lóng m̄-bián. Tio̍h toā-táⁿ ná-sai.(Khoàⁿ Chim-giân 28:1)

(Tâi-oân Hú-siâⁿ-kàu-hoē-pò tē 95 koàn,1893 nı̂ 2 ge̍h)