Tit choân sè-kài Sòng-sit sèⁿ-miā

 Kó͘-chá sı̂-tāi, bô to͘-chhı̄, bô chhı̄-tiûⁿ, bô ēng chı̂ⁿ chò bé-bē, lóng sı̄ ēng mı̍h kau-oāⁿ mı̍h. Kàu āu-lâi siat to͘-chhı̄, chù kim, gı̂n, tâng, choá-phiò, chò hoè-pè, lâi chò bé-bē. Kau-oāⁿ chiū pı̀ⁿ-chò bé-bē. 
 Tı̄ chia kóng ēng choân sè-kài kap kò-jı̂n ê sı̀ⁿ-miā lâi kau-oāⁿ, tó chı̍t hāng khah kè-ta̍t? Lán kiám-chhái beh kóng, sè-kài khah kè-ta̍t. Nā-sı̄ Iâ-so͘ pò lán chai, sı̀ⁿ-miā ū sím-mı̍h lı̄-ek? 
 Ū chı̍t ê Má Chhâ-lı̂m, i tùi pi-chiān kàu chin koân, chò Hoat-lân-se ê tāi-ông, êng-hoâ, hù-kùi, kim-gı̂n, châi-pó moá chhù keng. Ū chı̍t sı̂ i phoà-pı̄ⁿ, i-seng kā i kóng, koh nn̄g goe̍h-jı̍t chiū ē sí, i chin toā hoân-ló, bô pêng-an. Kàu beh sí ê sı̂, koh chı̍t pái khoàⁿ i só͘ chek-thiok, kui chhù-keng ê châi-pó, i chiū kóng, Goá tek-khak tio̍h pàng-sak chiah ê mah? Goá sı̄ tē-it khó-lı̂n ê lâng! Goá beh tit-tio̍h sím-mı̍h leh! Goá beh tó-ūi khı̀ leh! Oē kóng soah, chiū sí lah! Lâng tit choân sè-kài, sòng-sit sı̀ⁿ-miā ū siáⁿ lı̄-ek? 
 Ū chı̍t ūi toā tē-chú, chhut bē thó͘-tē, tē-kè chı̍t jı̍t chı̍t-chheng kho͘. Ì-sù chiū-sı̄ bé-chú nā kau-liáu chı̍t-chheng kho͘, thang tı̄ bē-chú ê thó͘-tē cháu chı̍t jı̍t, kı̀ⁿ-nā só͘ cháu koè ê hoân-ûi lāi, bô-lūn loā chē thó͘-tē, lóng beh kui bé-chú; put-kò nā bē pháu chı̍t ê ı̂ⁿ-khoân, chı̍t-sut-á to bē tit-tio̍h. Hit-sı̂ ū chı̍t ê chheng-liân lâng, the̍h chhut chı̍t-chheng kho͘, kau hō͘ bē-chú, chheng-liân lâng tùi thàu-chá chiū khai-sí pháu-cháu, cháu kàu tiong-tàu, pak-tó͘ chin iau, iā m̄-káⁿ hioh-khùn chia̍h-pn̄g. I tùi pak-tó͘ an-ùi kóng, lí tio̍h thun-lún ê-hng 6 tiám, chiah lâi chia̍h. In-ūi chia̍h-pn̄g ē liáu sı̂-kan. I chiū koh chhut-la̍t pháu-cháu; chhùi-ta iā bô lim, ià-siān iā bô hioh-khùn, Sin-thé tı̍t-tı̍t tòng bē tiâu, i tùi sin-thé kóng, lí tio̍h thun-lún, kin-ná-jı̍t kan-khó͘, bı̂n-á-jı̍t chiū khoàⁿ-oa̍h; kin-á-jı̍t sàn-hiong, bı̂n-á-jı̍t chiū hó-gia̍h. Piàⁿ miā chhut-la̍t cháu, cháu kàu ūi, tó tı̄ thô͘-kha, khùi tn̄g, chiū sí lah!
 Chit lâng só͘ tit-tio̍h sı̄ chı̍t ūi koaⁿ-chhâ tē nā-tiāⁿ. Tit choân sè-kài sòng-sit sı̀ⁿ-miā, ū sím-mı̍h lı̄-ek? Choân sè-kài thang tit-tio̍h mah? Lâng só͘ tit-tio̍h sı̄ loā-chē? Kiám m̄-sı̄ chı̍t oáⁿ pn̄g thang chia̍h, chı̍t niá saⁿ thang chhēng, chı̍t keng chhù thang toà, ū kang thang chò, án-ni chiū kàu-gia̍h lah! Siat-sú tit-tio̍h choân sè-kài, ē thang kú-tn̂g hióng-siū mah? Toàn-toàn bē-ē. Sè-kài kap i ê chêng-io̍k teh koè-khı̀ lah! Êng-hoâ, hù-kùi sı̄ chiām-sı̂, lán tio̍h lia̍h sı̀ⁿ-miā chò iàu-kín. 
 Ū chı̍t lâng tı̄ hái-nih chē chûn, tú-tio̍h péng-chûn, hit lâng bē-hiáu siû-chúi, i chiū toā siaⁿ kiò kiù-miā oh! kiù-miā oh! Nā ū lâng kiù goá khí-lâi, goá beh chı̍t-pah kho͘ siúⁿ lâng; kó-jiân ū chı̍t ê thó-hı̂ lâng kā i kiù khí-lâi, i chiū beh kā i thó chı̍t-pah kho͘. Hit ê hō͘ lâng kiù ê lâng, chiū the̍h chı̍t kho͘ hō͘ i nā-tiāⁿ. Hit ê kiù lâng ê lâng chiū kóng, poa̍h-lo̍h chúi, ài lâng kiù-miā; chı̍t-ē kiù chiūⁿ hoāⁿ, chiū m̄-khéng chhut chı̂ⁿ, kóng oē kiám ū pı̂n-chún? Hit ê hō͘ lâng kiù ê lâng chiū kóng, Chı̍t tia̍p-á-kú nā-tiāⁿ, hō͘ lí chı̍t kho͘ gı̂n, pí lia̍h hı̂ khah hó thàn, lí èng-kai kiù goá; lí nā bô kiù goá, choē kap thâi lâng pêⁿ-pêⁿ, lí chai mah? Kiù i ê lâng, thiaⁿ-liáu tiām-tiām. Koh bô kú; hit ê hō͘ lâng kiù ê lâng, koh poa̍h-lo̍h tı̄ hái-nih. I chiū koh hoah kóng, Kiù-miā oh! Kiù-miā o͘h! Nā kiù goá khí-lâi, goá beh chē-chē chı̂ⁿ hō͘ lâng. Chêng-jı̍t chit ê kiù lâng ê lâng, thiaⁿ-kı̀ⁿ kiù lâng ê siaⁿ, m̄ khı̀ kiù i, hit lâng chiū tı̂m-tı̂m sí lah! Hit ê ài chı̂ⁿ m̄ khı̀ kiù lâng ê lâng, tı̄ i ê hı̄-khang tiāⁿ-tiāⁿ thiaⁿ chı̍t kù oē, “Khoàⁿ sí m̄ kiù, choē kap thâi lâng pêⁿ-pêⁿ.” Chit ê lâng thiaⁿ chit kù oē, soà phoà-pēⁿ, bô kú i iā sí-khı̀. Chit nn̄g lâng lóng sı̄ hoān-tio̍h siāng khoán ê pēⁿ, chiū-sı̄ khoàⁿ-tāng kim-chı̂ⁿ, bô khoàⁿ-tāng sı̀ⁿ-miā, kàu boé nn̄g lâng lóng sí. Lia̍t-ūi, lán tio̍h lia̍h sı̀ⁿ-miā choè pó-poè. Chú Iâ-so͘ kóng, Lâng nā tit-tio̍h choân sè-kài, lâi sòng-sit i ê sı̀ⁿ-miā ū siáⁿ lı̄-ek? Á-sı̄ lâng beh chhut sím-mı̍h lâi tùi-oāⁿ i ê sı̀ⁿ-miā (Thài 16:26). 

(Tâi-oân Kàu-hoē Kong-pò tē 808 kı̂, 1956 nı̂ 4 goe̍h)