Toā-siā ê I-koán

Goá tùi kin-nı̂ saⁿ-goe̍h-kan khı̀ Toā- siā khui-siat I-koán; tiàm tı̄-hia kàu 11 goe̍h 20 thêng i , lo̍h-lâi Hú-siâⁿ koè nı̂. Án-ni toà tı̄-hia kè-kiōng 8 goe̍h jı̍t kú. Chiông-tiong só͘ lâi i ê lâng-gia̍h ū pâi-lia̍t tı̄ ē-té.

Sin-lâi chiū i ê lâng sı̄ 2315. In tiong-kan ū 190-ê toà tı̄ I-koán lāi. Ia̍h ū 366 ēng thâi-koah kā in táⁿ-tia̍p. Ū-ê lâi kúi-nā pái. Nā beh sǹg sin--ê kap kū--ê, goá ū khoàⁿ kiōng 13847-lâng.

Hiah-ê pēⁿ-lâng khah-chē sı̄ choh-sit lâng, toà tı̄ hiuⁿ-siā--ê; toà tı̄ siâⁿ-lāi á- sı̄ ke-chhı̄--ê khah chió. Hó-gia̍h kap sin-khim ê lâng khah hán-tit lâi I-koán chiū i, éng ài chhiáⁿ I-seng khı̀ in tau kā in khoàⁿ. Sui-jiân hiah-ê lâng khah- chē sı̄ tùi khah kı̄n ê só͘-chāi lâi, iáu-kú ū-ê bat tùi khah hn̄g ê só͘-chāi, kúi-nā jı̍t lō͘ lâi I-koán táⁿ-tia̍p; ia̍h ū Kheh- lâng loā-chē. Lēng-goā ū chē-chē lâng lâi I-koán, m̄-sı̄ beh chhéng-kàu I-seng, put-kò ài bé Ke-ná-hún khı̀ táⁿ-tia̍p koâⁿ-jia̍t chèng. Hiah-ê lóng bô sǹg.

I-koán só͘ siat ê kui-kí, chiū-sı̄ ta̍k-jı̍t chá-khí ê-hng tio̍h lé-pài. Ē-tàu sı̂ I- koán ê ha̍k-seng nā êng, siông-siông hoaⁿ-hí khı̀ chham pēⁿ-lâng gı̄-lūn tō-lí, ia̍h kà in liām kàu-hoē ê si, in-ūi hiah- ê lâng khah chē sı̄ m̄-bat jı̄--ê. Khiok ū chē-chē lâng hoaⁿ-hí thiaⁿ. Koh ū kúi- nā lâng tò--tńg-khı̀ in chhù, múi lé-pài- jı̍t ka-tı̄ koh lâi lé-pài. Ǹg-bāng pa̍t-jı̍t hiah-ê lâng beh chò Iâ-so͘ ê ha̍k-seng.

Taⁿ chhiáⁿ lán kàu-hoē ê hiaⁿ-tı̄ chí- moē thè Toā-siā I-koán kı̂-tó, hō͘ hiah-ê phoà-pēⁿ-lâng só͘ thiaⁿ ê tō-lí ē kám-kek in ê sim, hō͘ in chai in ê lêng-hûn ia̍h ū pēⁿ-chèng, tio̍h chiū-kı̄n Iâ-so͘ lâi tit-tio̍h kiù.

(Tâi-oân Hú-siâⁿ Kàu-hoē-pò tē 69 tiuⁿ,1891 nı̂ 1 ge̍h)