e̍k
(Hoat-têng) Shakesprare
Sū
Chit pún sı̄ Tām-chúi Sûn-tek Lú-chú Tiong-ha̍k-hāu ê Hāu-tiúⁿ Tân Chheng-tiong Sian-siⁿ, tùi Shakesprare “The Merchant Of Venice” hoan-e̍k--ê. Tı̄ chia chhim-chhim ài kā i seh to-siā.
Chit pang Chheng-liân Thoân-khè Lı̂m-sı̂ Chóng-hoē chū-chı̍p tı̄ Tâi-tiong ê sı̂, ū gı̄-koat ài chiong chit pún kín-kín ı̀n, ài hù nı̂-bé, ǹg-bāng choē-choē ūi ê thoân-khè ê bûn-gē-pō͘, tı̄ Kiù-chú tàn ê sı̂ oē chù-bûn lâi ēng.
Bêng Iú-tek
T.K.C. Bêng-ū Chóng-kàn-sū
Tâi-pak 10 ge̍h 12 jı̍t 1950
“Venice ê Siong-jı̂n” Khài-iàu
Venice ê seng-lí lâng Antonio khoàⁿ-kı̀ⁿ i ê chhin-iú Bassanio ài beh khı̀ Belmont kiû-hun tı̄ chı̍t ê chin hó-gia̍h, siōng-chhiáⁿ chin súi ê sió-chiá miâ-kiò Portia, ū khiàm-ēng chı̂ⁿ-hāng, sim-koaⁿ chin kan-khó͘, put-chí tông-chêng i, chóng-sı̄ tú-tn̄g i pún-sin bô hiān-kim, só͘-í ū khı̀ kā i pêng-sı̂ put-chí iàm-ò͘ⁿ, hit ê pàng tāng-lāi ê Iû-thài lâng, kiò-choè Shylock, beh kā i chioh 3000 Ducat lâi hō͘ i. Chóng-sı̄ chit ê Shylock siông-siông bat hō͘ chiah ê Christian bú-jio̍k, chau-that i, mā i pàng tāng-lāi; só͘-í sim-toé chin bô hoaⁿ-hí, chhē ki-hoē beh kā in pò oan-siû. Chin tú-hó, tú-tn̄g Antonio lâi beh kā i chioh 3000 ducat, i sûi-sı̂ tah-èng i, kóng i bô beh kā i the̍h tāng ê lı̄-sek, kan-ta tio̍h lı̍p khoè-iok siá bêng, nā-sı̄ kè kı̂-hān ê sı̂, tio̍h chiong i seng-khu ê bah chı̍t kun lâi choè kho-liāu.
Āu-lâi Bassanio kiû-hun tı̄ Portia ê sió-chiá ê sū, tit-tio̍h sêng-kong, soà sêng-hun, iā siāng hit-sı̂ i ê pêng-iú Gratiano iā kap Nerissa kiat-hun. Tāi-ke teh hoaⁿ-hí ê tiong-kan, hut-jiân siu-tio̍h Antonio ê phoe kóng: ─ I ê siong-chûn ū kòng-phoà, ū tú-tio̍h phò-sán ê ūn-bēng, siōng-chhiáⁿ tùi Shylock chioh hit tiâu chè-bū iā boán-kı̂, boē-tit-thang hêng, só͘-í Shylock ū sò͘-siōng tı̄ hoat-têng, iàu-kiû beh chhú i seng-khu chı̍t-kun ê bah. Bassanio ūi-tio̍h beh kiù i ê chhin-iú Antonio, chiū koáⁿ-kín tńg-khı̀ Venice. I ê bó͘ Portia sim-lāi iā ū phah-sǹg ê só͘-chāi, chiū ká-chong lâm-chú, chheng choè Padoa ê Bellario phok-sū ê tāi-lí; toà Nerissa ké-choè i ê su-kı̀, iā koáⁿ-kín khí-sin khı̀ Venice ê hoat-têng, Portia ēng sím-mı̍h kı̂-tı̀ lâi kiù i ê tiōng-hu ê chhin-iú Antonio. Tı̄ chit-tiûⁿ chin chhut-miâ ê tiûⁿ-bı̄n, chiū-sı̄ Venice ê hoat-têng teh-beh lâi kái-koat. Chit chhut iû-goân sı̄ Eng-kok ê bûn-hô Shakespeare chok--ê.
Venice ê Hoat-têng
Kong-chiok, Kùi-cho̍k, Antonio, Bassanio, Gratiano, Salerio í-kı̍p kı̂-thaⁿ chhut-tiûⁿ.
Kong-chiok: Antonio ū chhut-têng á bô?
Antonio: Ū, Kok-hā, tı̄-chia.
Kong-chiok: Goá thoè lí chin khó-lı̂n, in-ūi lí ūi-tio̍h beh tap-piān chit ê boē-oē lı̂n-bín lâng, bô chı̍t-sut-á chû-pi sim, hui-tō ê ok-hàn, bû-chêng ê goân-kò, chiah tio̍h lâi hoat-têng.
Antonio: Thiaⁿ-kı̀ⁿ kóng Kok-hā ūi-tio̍h chit chân sū put-chí chhut-la̍t lâi khó͘-khǹg goân-kò, chóng-sı̄ i chı̍t-sut-á beh thiaⁿ, siōng-chhiáⁿ put-lūn jû-hô hoat-lu̍t-siōng ê chhiú-toāⁿ, boē-tit-thang kiù goá thoat-chhut i ê to̍k-sim ê hoān-ûi, só͘-í goá í-keng cha̍p-hun jím-nāi kiông-chı̀ lâi tí-khòng i ê loān-pō͘, ēng léng-chēng ê sim-koaⁿ, toā ê kak-gō͘ beh jím-siū i ê chân-ge̍k ê hui-ûi.
Kong-chiok: Lín chı̍t ê khı̀ tiàu hit ê Iû-thài lâng jı̍p-têng.
Salerio: I tı̄ mn̂g-goā teh tán. Ah! Kok-hā, i chit-chūn jı̍p-têng lah! (Shylock jı̍p-tiûⁿ)
Kong-chiok: Siám-khui, hō͘ i thang khiā tı̄ pún-koaⁿ ê bı̄n-chêng. (Tùi Shylock) Shylock ah, lâng-lâng to teh siūⁿ, goá iā sı̄ án-ni, tı̄ chit ê sū-bé, kiat-kio̍k lí teh-beh kái-oāⁿ lí kàu taⁿ só͘ khǹg pháiⁿ ê só͘ siūⁿ, pí hit-sı̂ lí só͘ chhéng-kiû, khoàⁿ liáu chin kı̂-koài, chin chân-jím ê sū; lí teh-beh ēng koh-khah kı̂-koài ê khoán-sit lâi piáu-sı̄ lí ê chû-pi kap lı̂n-bín; iā lí só͘ iàu-kiû ê kho-liāu, chiū-sı̄ chı̍t ê sı̀n-sı̍t ê seng-lí lâng ê bah chı̍t-kun, put-tàn lí bô beh kiông chhéng, kàu bé soà siū jı̂n-chêng chû-ài ê kám-tōng, lâi bián-tû hit ê kho-liāu, m̄-nā án-ni, goân-kim lí iā beh kā i kiám-chió toā-pō͘-hūn. Kūn-lâi pı̄-kò ê sin-chiūⁿ, lio̍k-sio̍k lúi-chı̍p ê sún-sit, lí beh ēng lı̂n-bín ê ba̍k-chiu lâi khoàⁿ; sı̍t-chāi kan-ta án-ni ê sit-pāi í-keng kàu-gia̍h ap-tó chit ê sin-siong, liân hit khoán sim-koaⁿ bû-chêng chhin-chhiūⁿ thih-chio̍h ê lâng, á-sı̄ bô koàn-sı̀ tı̄ chû-pi chhin-chhiat ê sū, hiah ê goán-kiông ê Thó͘-ní-kı̂ lâng, á-sı̄ Tha̍t-tán lâng, nā khoàⁿ-kı̀ⁿ chit khoán chōng-thài, ún-tàng beh siⁿ-khí chı̍t phı̀ⁿ tông-chêng ê sim-liām! Pún-koaⁿ í-kı̍p it-tông teh kı̂-thāi lí teh-beh ēng chin un-sûn ê oē lâi tap-piān siáⁿ khoán? Iû-thài lâng ah!
Shylock: Lūn goá ê chûn ı̀, í-keng siōng-sin liáu! Goá ū kí sèng-jı̍t lâi chiù-choā, tiāⁿ-tio̍h iàu-kiû chiàu chèng-su-bı̄n só͘ kı̀-bêng, chiū-sı̄ lâng-bah chı̍t-kun. Ká-sú Kok-hā nā-sı̄ kū-choa̍t bô beh hō͘ goá ê sı̂, chiū Kok-hā lí tùi goā-kok lâng só͘ hō͘ in ê te̍k-hú, í-kı̍p lí só͘ koán-hat Venice hú chū-iû ê téng-bı̄n, ún-tàng oē hoat-seng toā ê gûi-hiám. Kiám-chhái Kok-hā teh-beh mn̄g, siáⁿ-sū goá m̄-tı̍h saⁿ-chheng “ducat”, hoán-tńg beh tı̍h chı̍t-kun bô lō͘-ēng ê bah iā káⁿ! Chóng-sı̄ che goá khiok m̄-bián ı̀n-tap, nā ài chai, thang kóng sı̄ goá ê sim-koaⁿ chı̍t-sı̂ só͘ ài, án-ni káⁿ ū liáu-kái!? Ká-sú goá ê chhù ū hō͘ chı̍t chiah niáu-chhú khó͘-chhó͘, ūi-tio̍h beh to̍k-sat hit chiah niáu-chhú, goá hoaⁿ-hí lâi siau-hùi saⁿ-chheng ducat ê sı̂, siáⁿ khoán?! Lí beh cháiⁿ-iūⁿ lâi tap-piān?! Ū lâng bô ài khoàⁿ khui-chhùi ê ti; iā ū lâng khoàⁿ-tio̍h niau oē khí-siáu, koh-chài ū lâng thiaⁿ-tio̍h hong-te̍k ê siaⁿ iā oē hoat-kông, che kiù-kèng sı̄ lâng ê sèng-phiah, iā chiàu hit ê lâng ê sèng-phiah ê chí-hui khoàⁿ i ê só͘ ài sı̄ sím-mı̍h, i ê khı̀-hun chiū hiòng hit pêng, nā bô ài--ê, chiū oa̍t hong-hiòng tı̄ pa̍t-ūi. Só͘-í tùi tı̄ Kok-hā goá iā beh án-ni lâi tap-piān. Siáⁿ-sū lâng khoàⁿ-kı̀ⁿ khui-chhùi ê ti, chiū tòng-boē-tiâu? Siáⁿ-sū, put-tàn sı̄ bô hāi, hoán-tńg iú-ek ê niau iā bô ài khoàⁿ? Iā thiaⁿ-tio̍h iûⁿ-mn̂g choè ê hong-te̍k cháiⁿ-iūⁿ chiū tòng-boē-tiâu? Chóng kóng, ka-kı̄ ê kám-chhiok siū chó͘-gāi ê sı̂, ún-tàng oē hām-lo̍h tı̄ oh-tit siám-pı̄, oē hāi-tio̍h pa̍t ê kám-chhiok ê thí-jio̍k, án-ni lūn hit tiám, boē-tit-thang lâi khak-tēng hit ê lí-iû; siāng chı̍t-iūⁿ, goá iā bô ū sím-mı̍h lí-iû thang kóng, siōng-chhiáⁿ iā bô siūⁿ beh tap-piān! Goá tùi pı̄-kò thê-chhut iàu-chhéng chı̍t khoán sı̍h-pún ê sò͘-siōng, kiù-kèng sı̄ goá tùi tı̄ pı̄-kò ū khǹg siok-oàn kap liâm-ok tı̄-teh, chhut chit hāng í-goā, sı̄ bô ū sím-mı̍h pa̍t khoán ê lí-iû tı̄-teh! Án-ni káⁿ ū liáu-kái chiah tio̍h!?
Bassanio: Lí chit khoán bû-chêng ê lâng! Án-ni kiám oē choè lí tap-piān lí chân-ge̍k ê hiông-piān ê piān-kái mah !?
Shylock: Goá bô hit khoán gı̄-bū tio̍h tap-piān hō͘ lí hoaⁿ-hí!
Bassanio: Lâng kiám lóng-chóng hāi-sí in só͘ bô-ài--ê mah!?
Shylock: Lâng ta̍k ê kiám ū oàn-hūn in só͘ bô-ài--ê mah!?
Bassanio: Put-khoài ê kám-chêng kap oàn-hūn ê kám-chêng bô tek-khak sı̄ siāng chı̍t-iūⁿ!
Shylock: EhN! Lí ài hō͘ to̍k-choâ kā lí kā nn̄g-piàn mah?
Antonio: Bassanio, lí tio̍h siūⁿ, lí sı̄ teh kap bû-chêng, khek-po̍k ê Iû-thài lâng gı̄-lūn! Lí nā oē soat-ho̍k i ê sim-koaⁿ, lí iā khó-í khiā hái-piⁿ bēng-lēng toā-iûⁿ ê toā-éng pı̀ⁿ choè soè ê éng; iā thang kap chhâi-lông kè-kàu, khoàⁿ i siáⁿ-sū kā-sí iûⁿ-bú, iā pàng kù-chāi iûⁿ-kiáⁿ háu beh chhē i ê lāu-bú! Ia̍h mā oē thang kı̀m-chí soaⁿ-téng bé-liu ê chhêng-peh-chhiū, hō͘ toā-hong chhe lâi chhut toā ê siaⁿ. Kı̂-thaⁿ bô-lūn sím-mı̍h ûi-lân ê sū iā oē chiâⁿ! Sı̍t-chāi tı̄ chit ê sè-kan bô chı̍t hāng pí beh iông-hô Iû-thài lâng ê sim-koaⁿ khah ûi-lân ê sū! Só͘-í bô pit-iàu koh kóng-khí, bo̍h-tit koh gı̄-lūn khah hó, lēng-khó chhú kán-tan ê chhiú-sio̍k koáⁿ-kín lâi siū chhâi-phoàⁿ, thang hō͘ Iû-thài lâng boán-chiok i ê só͘ ài!
Bassanio: Beh hêng lí ê 3000 ducat, tı̄ chia ū toà 6000 lâi, beh siu bô?
Shylock: Ká-sú lí ê 6000 ducat ê tiong-kan, múi chı̍t ê ducat phoà choè 6 phı̀ⁿ, iā kok phı̀ⁿ chiâⁿ-choè chı̍t ducat goá iā bô siūⁿ beh siu. Goá iàu-kiû chiàu chèng-su bı̄n lâi lí-hêng.
Kong-chiok: Lí bô kiâⁿ chû-pi, hit-tia̍p lí nā khiàm-ēng chû-pi ê sı̂ beh cháiⁿ-iūⁿ?
Shylock: Lâng nā bô oai-ko chhı̍h-chhoa̍h, ū sím-mı̍h thang kiaⁿ chhâi-phoàⁿ ê sū? Goá só͘ iàu-kiû chı̍t-kun ê lâng bah sı̄ chin ko-kè lâi boé--ê, sı̄ goá ê só͘-iú-bu̍t, só͘-í bô tit-tio̍h boē boán-ı̀. Lí nā-sı̄ kóng m̄ hō͘ goá ê sı̂, chiū lí ê kok-ka só͘ tēng ê hoat-lu̍t, sı̄ kap bô siāng chı̍t-iūⁿ! Iā Venice ê chèng-lēng sı̄ kui khang-khang!
Kong-chiok: Goá ēng Kok-chú ê koân-le̍k, thèng hó bēng-lēng pı̀-têng, chóng-sı̄ ū chhiáⁿ chı̍t-ūi phok-ha̍k ê phok-sū, kiò-choè Bellario, lâi kái-koat chit chân sū, i kin-á-jı̍t oē lâi.
Salerio: Kok-hā, tú-chiah tùi Padoa ū sú-chiá toà phok-sū ê su-sı̀n lâi tı̄ mn̂g-goā teh thèng-hāu.
Kong-chiok: Nā-sı̄ án-ni, su-sı̀n the̍h--lâi, iā chhiáⁿ sú-chiá jı̍p--lâi. (Nerissa, chng-choè hoat-lu̍t-ka ê su-kı̀ jı̍p--lâi).
Kong-chiok: Hō͘ⁿ! Lí sı̄ tùi Padoa, Bellario phok-sū hia lâi mah?
Nerissa: Sı̄, Kok-hā, Bellario phok-sū beh kā lí chhéng-an, (chı̀n-chêng chiong su-sı̀n hiàn hō͘ Kong-chiok).
Bassanio: Siáⁿ-sū lí hiah chhut-la̍t teh boâ-to?
Shylock: Beh koah bah ko̍h! Khiā tı̄ hia hit ê phò-sán-chiá ê heng-khám-bah! (pí ka-kı̄ ê heng-khám).
Gratiano: Ngı̄-sim ê Iû-thài lâng, lí ēng oê-toé boâ-to, m̄-ta̍t-tio̍h ēng lí sim-toé hit tè tēng-chio̍h lâi boâ, kám m̄-sı̄ khah oē lāi mah? Chóng-sı̄ bô-lūn sím-mı̍h khoán lāi ê to-khı̀, á-sı̄ chām thâu-khak ê pó͘-thâu, nā ēng lí toé chio̍h lâi boâ, sı̍t-chāi thang kiaⁿ lâng! Iû-thài lâng ah, bô-lūn sím-mı̍h kı̂-goān, kiám kó-jiân boē koàn-thiat lí ê sim-koaⁿ mah?
Shylock: Boē, nā-sı̄ siong-èng lí ê tı̀-hūi ê kı̂-tó, sı̄ bô hoat-tō͘ lah!
Kong-chiok: Chiàu Bellario chit tiuⁿ phoe, i ū chhui-kú chı̍t-ūi liân-siàu ê hoat-ha̍k phok-sū lâi lán ê hoat-têng. I tı̄ tó-ūi?
Nerissa: I teh thèng-hāu Kok-hā ún-chún i jı̍p têng.
Kong-chiok: Chin hoaⁿ-hí hoan-gêng--i, lín kúi-nā lâng, chiàu lé-sò͘ khı̀ àn-nāi i lâi chit ê só͘-chāi! (Portia jı̍p-tiûⁿ, chhēng hoat-ha̍k phok-sū ê ho̍k-chong). Oh, Sian-siⁿ chiū-sı̄ tùi Bellario ló-ong hia lâi--ê mah?
Portia: Chiàⁿ-sı̄, Kok-hā!
Kong-chiok: Chin lô-hoân lí lâi, chhiáⁿ chē! Hiān sı̂ tong hoat-têng teh sím-gı̄ ê àn-kiāⁿ, koan-hē Goân, Pı̄-kò lióng-pêng só͘ tı̂n-su̍t ê sū, m̄-chai lí í-keng thiaⁿ-tio̍h mah?
Portia: Goá í-keng chai chin siông-sè! Pı̄-kò ê seng-lí lâng tı̄ tó-ūi? Goân-kò ê Iû-thài lâng tı̄ tó-ūi?
Kong-chiok: Antonio kap Shylock, nn̄g lâng lóng chhut-lâi thâu-chêng.
Portia: Lí chiū-sı̄ Shylock?
Shylock: Sı̄, Shylock sı̄ goá ê miâ!
Portia: Chit pang lí só͘ thê-chhut chit ê sò͘-siōng, thang kóng sı̄ kı̂-koài ê lah! Chóng-sı̄ chhiú-sio̍k-siōng bô chı̍t-sut-á m̄ tú-hó ê só͘-chāi, só͘-í tùi Venice ê hoat-lu̍t piáu-bı̄n-siōng lâi khoàⁿ, sı̄ bô thang hiâm! (tùi Antonio). Lí ê siⁿ-sí tio̍h ài it-jı̄m tı̄ goân-kò chiah oē ēng--tit.
Antonio: Sı̄, i án-ni chú-tiuⁿ!
Portia: Tùi tı̄ chèng-su, ū ı̄ⁿ-gı̄ á-bô?
Antonio: Bô!
Portia: Nā-sı̄ án-ni, Iû-thài lâng tio̍h ài si-sià chû-pi chiah oē ēng--tit.
Shylock: Sı̄ hō͘ sím-mı̍h kiông-pek--tio̍h, goá tio̍h si-sià chû-pi? Chhiáⁿ kóng bêng.
Portia: Só͘-ûi chheng choè chû-pi-chiá, m̄-sı̄ kiông-hêng ê sèng-chit ê mı̍h. Tio̍h chhin-chhiūⁿ bı̂-soè ê hō͘, tùi thiⁿ lo̍h-lâi toē-bı̄n, lâi lūn-te̍k thó͘-toē! Chû-pi ū nn̄g-têng ê hok-khı̀, chiū-sı̄ hō͘--lâng-ê, kap niá-siū--ê, Chû-pi nā-sı̄ tùi úi-tāi ê lâng lâi chhut, chiū oē hián-chhut choè úi-tāi ê hāu-kó; koh-chài chû-pi sı̄ pí ông-koan koh-khah oē hō͘ kun-ông tit-tio̍h êng-kng. Kun-ông só͘ giâ ê chàu-pán (笏=hut) sı̄ piáu-sı̄ sio̍k-kài ê koân-le̍k, sı̄ kiaⁿ-hiâⁿ, ui-giâm ê goā-bı̄n-tek ê kı̀-hō, chiū-sı̄ piáu-sı̄ kun-ông sı̄ khó-ùi ê ı̀-gı̄. Nā-sı̄ chû-pi sı̄ pí kun-ông só͘ giâ ê chàu-pán koh-khah ū la̍t, sı̄ ku-chiàm tı̄ khah koân ê ūi-tı̀, chiū-sı̄ ku-chiàm tı̄ kun-ông ê sim-chō sı̄ sio̍k tı̄ Thian-tè sèng-chit ê chı̍t-pō͘-hūn, jı̂-chhiáⁿ chû-pi lâi tiâu-hô kong-tō ê sı̂, hit-sı̂ chiah oē sı̍t-hiān sio̍k-kài ê koân-le̍k kap Thian-kài ê koân-le̍k ha̍p-it. Só͘-í Iû-thài lâng ah, sui-bóng lí ê piān-lūn sı̄ sio̍k tı̄ kong-tō, iáu-kú lí chim-chiok lâi siūⁿ chı̍t chân sū! Chiū-sı̄ tı̄ kong-tō ê lō͘-siōng, bô-lūn sím-mı̍h lâng sı̄ boē-tit-thang sio̍k-choē, lán tùi Thian-tè ài tit-tio̍h I sià-choē, tio̍h ài kiû I ê chû-pi. Chiū-sı̄ iû-goân kà-sı̄ lán tio̍h o̍h I si-sià chû-pi. Goá ūi-tio̍h beh iông-hô lí só͘ piān-lūn ê kong-tō, só͘-í chiah án-ni lâi piān-lūn. Tān-sı̄ lí nā kiông-tiāu lí ê chú-tiuⁿ ê sı̂, Venice giâm-chèng ê hoat-têng, tek-khak tio̍h ài tùi hit ê siong-jı̂n lâi soan-kò chiah oē ēng--tit.
Shylock: Goá ka-kı̄ só͘ choè ê sū, goá ka-kı̄ beh taⁿ chek-sêng! Só͘-í goá beh chhéng-kiû ha̍p-hoat ê chhâi-phoàⁿ, goá iàu-kiû chiàu chèng-su èng-tong tit ê kho-liāu, lâng bah chı̍t-kun, án-ni chiū moá-ı̀.
Portia: Pı̄-kò sı̄ boē-tit-thang hêng hit ê chè-bū mah?
Bassanio: Oē, tı̄ chia beh hêng--i, siōng-chhiáⁿ beh hêng goân-kim ê nn̄g-pē! Án-ni nā iáu put-boán, goá hoaⁿ-hí chiong goá ê choân-sin choè tí-tong, tek-khak hêng i cha̍p-pē; nā koh boē boán-chiok, án-ni chiū thang chai i ê “pháiⁿ-ı̀”, í-keng ap-tó i ê tō-gı̄-sim, tio̍h khoàⁿ choè goân-kò thàn i ê ok-ı̀ ê chhiòng-hêng, lâi ài beh hāi-sí pı̄-kò jı̂-í ... (tùi Kong-chiok) Kok-hā, khún-goān lí, ēng lí ê chit-koân, kan-ta chı̍t piàn chiū hó, lâi at-chı̍h hoat-bûn, ūi-tio̍h tāi-siān lâi choè sió-ok, chiong chit ê chân-ge̍k bô pí ê toā ok-hàn giâm-pān chhú-hun! Kùi-ı̀ jû-hô!?
Portia: Tek-khak m̄-thang at-chı̍h hoat-bûn! Án-ni sı̄ boē-ēng--tit. It-tàn chè-tēng ê hoat-bûn, put-lūn jû-hô tı̄ Venice kok-lāi, bô chı̍t lâng ū hit hō koân-le̍k thang kā i piàn-keng, nā-sı̄ chı̍t-pái choè put-tong ê lē, chiū án-ni choè goân-in, oē sio̍k-chhut choē-choē ê chhò-gō͘, ūi-tio̍h án-ni, kok-ka oē siⁿ-khí chióng-chióng ê lân-sū, só͘-í toàn-toàn sı̄ boē-ēng--tit!
Shylock: Daniel lâi sím-phoàⁿ lah! Daniel lah! Hiân-bêng ê chhâi-phoàⁿ-koaⁿ lah!
Portia: Chiong chèng-su hō͘ goá khoàⁿ!
Shylock: Tı̄-chia, tı̄-chia! Chin-sı̍t ê hoat-lu̍t phok-sū lah! Tı̄-chia, chhiáⁿ lí khoàⁿ!
