Sam-jū-keng Sin-choān Pe̍k-oā Chù-kái/Sam-jū-keng 1

Sam-jū-keng Sin-choān Pe̍k-oā Chù-kái
三字經新篡白話註解 (1894 nî)
Sam-jū-keng 1
Chok-chiá: Î Jiâu-lí

1904 nî tiông-ìn.

1	人	jîn	lâng
2	之	chi	ê, tī
3	初	chho͘	khí-thâu, chhut-sì ê sî

4	性	sèng	sèng, sim-sèng
5	本	pún	pún-jîan
6	善	siān	hó

7	性	sèng	sèng, sim-sèng
8	相	siong	saⁿ
9	近	kīn	kīn, kīn-óa

10	習	si̍p	khì-sip, o̍h
11	相	siong	saⁿ
12	遠	oán	lī-hn̄g, hn̄g

Tī lâng ê khí-thâu in-ê sèng pún-jiân hó: chiū in-ê sèng tāi-khài saⁿ-kīn, aū-lâi in-ūi in-ê khì-si̍p chiah saⁿ lī-hn̄g

‘sèng pún siān.’ Sam-jū-keng kì-chài chit-chat ê kà-sī sī bô ha̍p Siōng-tè ê chin-lí. Sèng-chheh ê kà-sī chiū-sī kóng, Lán ê sí-chó͘ A-tong kap Hā-oa goân-pún sī chiáu-chn̂g hó ê lâng, aū-lâi ū hō͘ Mô͘-kúi bê-he̍k in ê sim, chiū sit-lo̍h in hó ê sèng. In-ê chōe ū liân-lūi--tio̍h bān sè-tāi ê hō͘-è, só͘-í chhut-sì ta̍k-ê tòa chōe lâi, bô chi̍t-lâng bô chōe (Khòaⁿ Lô-má 3: 10-12). Kai-chài! Kiù-chú Iâ-so͘ ū lîm-kàu tī chit sè-kan beh têng-thâu-seⁿ lâng ê sim, hō͘ in tùi sìn lâi tit-tio̍h sin ê sim-sèng, chiah thang him-bō͘ hó, oàn-hīn pháiⁿ; ia̍h thang thiàⁿ Siōng-tè kap thiàⁿ pa̍t-lâng chhin-chhiūⁿ pán-sin chit-iūⁿ (Khòaⁿ Iok-hān 3: 1-18 kap Iok-hān it-su 3 chiuⁿ).

Chiông-tiong Tiong-kok miâ-siaⁿ ê sian-seⁿ ū-ê ha̍p Sèng-chheh só͘-kóng,–Lâng ê sèng pún-jiân pháiⁿ. Thang khòaⁿ Sûn-chú Sèng-ok-phian. I ū gī-lūn kóng, Nā-sī lâng ê sèng sī hó, chiū m̄-sái lé-gī kap hoat-tō͘ chò chún-chîn lái iok-sok i. Ia̍h kóng, Siat-sú tû-khì hiah-ê lé-gī kap hoat-tō, chiū lâng ê pháiⁿ liâm-piⁿ hián-chhut. Khó-kiàn làng ê sèng pún-jiân sī pháiⁿ, m̄-sī hó.

‘siong-kīn, siong oán.’ Sui-jiân lâng ū hun-piat Kun-chú kap Siáu-jîn, iáu-kú in pêⁿ-pêⁿ sī ū-chōe ê lâng. In tī tú-á chhut-sì ê sî bô͘ sím-mi̍h hián-chhut koh-iūⁿ. Chit-ê sī siong-kīn khah ha̍p-lí ê ì-sù. Aū-lâi in-ūi in ê só͘ ha̍k-si̍p bô saⁿ-tâng, só͘-í ū hun in-ê khoán-sit chò Kun-chú Siáu-jîn. Chit-ê sī siong-oán ê ì-sù.