Sam-jū-keng Sin-choān Pe̍k-oā Chù-kái/Sam-jū-keng 11
| Sam-jū-keng 10 | Sam-jū-keng Sin-choān Pe̍k-oā Chù-kái 三字經新篡白話註解 (1894 nî) Sam-jū-keng 11 Chok-chiá: Î Jiâu-lí
|
Sam-jū-keng 12 |
| 1904 nî tiông-ìn. |
| 121 | 首 | siú | khí-thâu, tē-it |
| 122 | 孝 | hàu | ū-hàu, hàu-chhin |
| 123 | 弟 | tē | chun-kèng, kèng-tióng |
| 124 | 次 | chhù | tē-jī |
| 125 | 見 | kiàn | khòaⁿ-kìⁿ |
| 126 | 聞 | bûn | thiaⁿ-kìⁿ |
| 127 | 知 | ti | chai |
| 128 | 某 | bó͘ | bó͘-hāng |
| 129 | 數 | sò͘ | siàu-ba̍k, siàu ê khóaⁿ-hāng |
| 130 | 識 | sek | bat |
| 131 | 某 | bó͘ | bó͘-hāng |
| 132 | 文 | bûn | bûn-gī, bûn-lí |
“Khí-thâu ê iàu-kín sī hàu-chhin kèng-tióng”.
“Tē-jī ê iàu-kín sī tio̍h khòaⁿ-kìⁿ (chē-chē) thiaⁿ-kìⁿ (chē-chē), lâi chai bó͘-hāng ê siàu-ba̍k, lâi bat bó͘-hāng ê bûn-gī”.
‘siú, chhù’. Chiàu Tiong-kok lâng phah-sǹg pah-hāng só͘-kiâⁿ ê kin-goân tē-it iàu-kín chiū-sī Háu-tē; nā-sī ta̍k-lâng tio̍h chai i siāng iàu-kín ê pún-hūn sī tio̍h kèng-pài Siōng-tè, in-ūi I chhòng-chō lâng, ia̍h chò bān-mih ê Chú-cháiⁿ.
‘kiàn, bûn’. Lâng nā chē-chē iat-le̍k khòaⁿ-kìⁿ chē-chē iat-le̍k thiaⁿ-kìⁿ thiⁿ-ē kó͘-kim ê tāi-chì kap tō-lí, chiū ē hiáu-tit bó͘-sò͘ kap bó͘-bûn.
‘bó-sò͘’. Chai cha̍p, pah, chheng, bān ê siàu ê khóaⁿ-hāng hō-chò “Bó͘-sò͘”.
‘bó͘-bûn’. Bat kó͘-kim sèng-hiân ê sū-chêng hō-chò “Bó͘-bûn”.