Sam-jū-keng Sin-choān Pe̍k-oā Chù-kái/Sam-jū-keng 13

Sam-jū-keng Sin-choān Pe̍k-oā Chù-kái
三字經新篡白話註解 (1894 nî)
Sam-jū-keng 13
Chok-chiá: Î Jiâu-lí

1904 nî tiông-ìn.

145	三	sam	saⁿ
146	才	châi	châi-chit, châi-chêng --> Sam-châi
147	者	chiá	ê

148	天	thian	thiⁿ
149	地	tē	tē
150	人	jîn	lâng

“Sam-châi--ê chiū-sī Thiⁿ, Tē, Lâng”

‘châi’. Chit-jī ū pún-chit, koân-lêng kap-khùi-la̍t ê ì-sù. ‘Sam-châi’ ia̍h ū hō Sam-ke̍k kap Sam-gî.

Chiàu Tiong-kok lâng kóng, chò khí-thâu ê sî ū Thài-ke̍k. Chit-ê Thài-ke̍k hòa-chhut Lióng-gî, chiū-sī Iông-khì kap Im-khì, á-sī Thiⁿ kap Tē. Aū-lâi Lióng-gî ū hòa-seng Lâng kap bān-mi̍h; chóng-sī lâng pí hiah-ê mi̍h khah kùi-khì, in-ūi i sī chò bān-mih ê cheng-lêng, só͘-í, hō i chò châi ná-chhin-chhiūⁿ Thiⁿ, Tē chi̍t-iūⁿ. Nā-sī Sèng-chheh só͘ be̍k-sī m̄-sī án-ni; chiàⁿ-sī kóng–Thiⁿ, tē, lâng kap bān-mi̍h lóng-sī to̍k-it chin Siōng-tè chhòng-chō--ê (Khòaⁿ Chhòng-sè-kì I0.

Tiong-kok lāi bô lâng ho̍k-sāi Thài-ke̍k, m̄-chai sī sím-mi̍h ín-toaⁿ.

‘thian’ iā ū hō-chò khiân. Thiⁿ m̄-sī Siōng-tè, Thiⁿ-tē tio̍h ū chi̍t-ê chú-cháiⁿ lâi koán lâi hô in. Chit-ê chú-cháiⁿ chiū-sī Siōng-tè.

‘tē’ iā ū hō-chò khun.

‘jîn’. Siōng-tè chhòng-chò lâng hó͘ i chhin-chhiūⁿ pún-sin ê khoán-sit; só͘-í, lâng ū lêng-hûn, kap Siōng-tè ū kan-sia̍p. Ań-ni-seⁿ lâng sī khah kùi-khi tī thiⁿ-tē.